தமிழ் சினிமாவில் முன்னணி நடிகையாக வலம் வருபவர் த்ரிஷா. கடைசியாக இவர் நடிப்பில் வெளியான படம் 'பரமபதம்'. அடுத்து மணிரத்னத்தின் 'பொன்னியின் செல்வன்' படத்தில் குந்தவை தேவி கதாபாத்திரத்தில் த்ரிஷா நடித்து முடித்துள்ளார். இந்த படம் செப்டம்பர் மாதம் 30-ஆம் தேதி திரையரங்கில் வெளியாகவுள்ளது. 

இந்நிலையில் த்ரிஷா நடிக்கும் புதிய படத்தின் அறிவிப்பு வெளியாகியுள்ளது. அதன் படி அருண் வசீகரன் இயக்கும் 'தி ரோடு' படத்தில் முதன்மை கதாபாத்திரத்தில் த்ரிஷா நடிக்கிறார். சாம் சி.எஸ். இசையமைக்கும் இப்படத்தில் மியா ஜார்ஜ், 'சார்பட்டா பரம்பரை' பட பிரபலம் சந்தோஷ் பிரதாப் மற்றும் 'டான்சிங் ரோஸ்' சபீர் உள்ளிட்ட பலர் முக்கிய கதாபாத்திரத்தில் நடிக்கின்றனர். 2000-ஆம் ஆண்டு மதுரையில் நடந்த ஒரு உண்மை சம்பவத்தை அடிப்படையாக கொண்டு இப்படம் உருவாகி வருகிறது. மேலும் மதுரையில் இன்று படப்பிடிப்பு தொடங்கி நடைபெற்று வருவதாக கூறப்படுகிறது. 

ஷாடோ லைட் என்டர்டைன்மென்ட் வழங்கும் புதிய திரைப்படம் 'தூநேரி'. கமல் நடிப்பில் வெளியான ஆளவந்தான், தெனாலி, ரஜினி நடிப்பில் வெளியான பாபா, குசேலன், உள்ளிட்ட பல படங்களுக்கு விஷுவல் எபெக்ட் இயக்குனராக பணியாற்றிய சுனில் டிக்சன் இப்படத்தை இயக்கியுள்ளார். இவர் சவுந்தர்யா ரஜினிகாந்த் வைத்திருக்கும் விஷுவல் எபெக்ட் ஸ்டூடியோவில் நான்கு வருடங்களுக்கு மேல் பணியாற்றி இருக்கிறார். பல விளம்பர படங்களை இயக்கி இருக்கும், சுனில் டிக்சன் முதல் முறையாக இப்படத்தின் மூலம் இயக்குனராக அறிமுகமாகிறார். கலையரசன் இசையமைத்துள்ள இப்படத்திற்கு கைலேஷ் குமார் மற்றும் ஆலன் ஒளிப்பதிவு செய்துள்ளனர்.

'தூநேரி' என்பது ஊட்டி அருகில் இருக்கும் ஊரின் பெயர். இப்படத்தில் கதையின் நாயகனாக 'சார்பட்டா பரம்பரை' புகழ் டாடி ஜான் விஜய் நடித்துள்ளார். கதாநாயகனாக நிவின் கார்த்திக், கதாநாயகியாக மியா ஶ்ரீ நடித்துள்ளார். குழந்தைகளை மையமாக வைத்து ஹாரர் திரில்லர் பாணியில் உருவாகியுள்ள இப்படத்தில் ஜான் விஜய்யின் கதாபாத்திரம் குழந்தைகளை பயமுறுத்தும் அளவிற்கு உருவாக்கப் பட்டிருக்கிறது என்று இயக்குனர் சுனில் டிக்சன் தெரிவித்துள்ளார். இப்படத்தின் படப்பிடிப்பு ஊட்டி, கொடைக்கானல், ஏற்காடு, திருவனந்தபுரம், சென்னை உள்ளிட்ட இடங்களில் 70 நாட்கள் நடைபெற்றது. இப்படத்தின் பர்ஸ்ட் லுக் போஸ்டர், மோஷன் போஸ்டர் ஆகியவை விரைவில் வெளியாகவுள்ளது.