Skip to main content

EXCLUSIVE: ஜெயித்தவரை தோற்றதாக அறிவித்த தில்லுமுல்லு தேர்தல் அதிகாரிகள்!! ஆர்.டி.ஐ. ஆதாரத்துடன் அம்பலம்!

Published on 25/06/2020 | Edited on 25/06/2020
locla

தேர்தலில் வெற்றிபெற்றவரை தோற்றவராக  அறிவித்த தில்லுமுல்லு தேர்தல் அதிகாரிகளின் மோசடி ஆர்.டி.ஐ. ஆதாரத்துடன்  அம்பலமாகியுள்ளது. இதுகுறித்து, நாம் விசாரிக்க ஆரம்பித்தோம்...

 

தமிழகத்தில் கடந்த, 2020- ஆம் ஆண்டு ஜனவரி மாதம் உள்ளாட்சித்தேர்தல் வாக்கு எண்ணிக்கை நடந்து முடிந்தது. கடலூர் மாவட்டத்திலுள்ள அண்ணாகிராமம், கடலூர், காட்டுமன்னார்கோயில், கீரப்பாளையம், குமராட்சி, குறிஞ்சிப்பாடி, நல்லூர், பண்ருட்டி, பரங்கிப்பேட்டை, மங்களூர், மேல்புவனகிரி, விருத்தாச்சலம், ஸ்ரீமுஷ்ணம் ஆகிய 13 ஒன்றியங்களில் கடந்த 2019- ஆம் ஆண்டு டிசம்பர் 27- ஆம் தேதி உள்ளாட்சித்தேர்தல் நடந்தது. 

 

இதில், கீரப்பாளையம் ஒன்றியம் கவுன்சிலர் (மூன்றாவது வார்டு உறுப்பினர்) பதவிக்கு போட்டியிட்டார் தி.மு.க. மகளிரணி மாவட்ட அமைப்பாளரும், தலைமை பொதுக்குழு உறுப்பினரும் கீரப்பாளையம் ஒன்றிய முன்னாள் சேர்மனுமான த.அமுதராணி. ஆனால், அமுதராணியைவிட குறைந்த வாக்குகள் பெற்ற டி.டி.வி. தினகரனின் அ.ம.மு.க. சார்பாக போட்டியிட்ட கவிதா என்பவரை வெற்றிபெற்றதாக அறிவித்தார்கள் தேர்தல் அதிகாரிகள்.  

 

இதனால், அதிர்ச்சியடைந்த திமுக வேட்பாளர் அமுதராணி தேர்தல் நடத்திய அதிகாரி ஜெயக்குமாரிடம் முறையிட, லேட்டாக வந்து சொல்கிறீர்கள் என்று காரணம் காட்டி காவல்துறையினரால் வி(மி)ரட்டி அனுப்பப்பட்டார். இந்தநிலையில்தான், சக வேட்பாளரான காஞ்சனா சந்தோஷ்குமார், ஆர்.டி.ஐ. (Right To Information) எனப்படும் தகவல்பெறும் உரிமை சட்டத்தின்படி தேர்தல் வாக்குவிவரங்கள் கேட்டு விண்ணப்பித்திருந்தார்.

  

local body election dmk candidate rti report state election commission

 

அதில்தான், அதிர்ச்சிகரமான தகவல் வெளியாகியிருக்கிறது. தி.மு.க வேட்பாளர்  அமுதராணி 1172 வாக்குகள் பெற்றுள்ளார். ஆனால், வெற்றிபெற்றதாக அறிவிக்கப்பட்ட  கவிதா 1066 வாக்குகள் மட்டுமே பெற்றுள்ளார் என்று ஆர்.டி.ஐ. மூலம் ஆதாரத்துடன் அம்பலமாகியிருக்கிறது. அதாவது, வெற்றிபெற்றதாக அறிவிக்கப்பட்ட கவிதாவைவிட தோற்றுப்போனதாக அறிவிக்கப்பட்ட அமுதராணி 106 வாக்குகள் அதிகமாகப் பெற்றுள்ளார்.

 

இதுகுறித்து, நாம் அமுதராணியிடம் பேசியபோது, “13 ஒன்றியங்களுக்கும் சேர்மன் பதவி என்பது பெண்களுக்கு ஒதுக்கப்பட்டுள்ளது. நான், ஏற்கனவே சேர்மனாக இருந்ததாலும் தற்போது வெற்றிபெற்றால் பெண் என்கிற அடிப்படையில் சேர்மன் ஆகிவிடுவேன் என்ற காழ்ப்புணர்ச்சியாலும், சதியாலும்தான் என்னைவிட 106 வாக்குகள் குறைவாக பெற்ற கவிதாவை வெற்றிபெற்றதாக அறிவித்திருக்கிறார்கள் என்பது தற்போது ஆர்.டி.ஐ மூலம்தான் ஆதாரத்துடன் தெரியவந்துள்ளது.  

loccal

தேர்தல் முடிவுகள் அறிவித்த ஜனவரி-2 ஆம் தேதியே சந்தேகத்தின் அடிப்படையில் இதுகுறித்து, கீரப்பாளையம் ஊராட்சி  ஒன்றிய வார்டு உறுப்பினர் தேர்தல் நடத்தும் அலுவலர் மற்றும் கடலூர் மாவட்ட ஆய்வுக்குழு அலுவலர் ஜெயக்குமாரிடம் மறு வாக்கு எண்ணிக்கை நடத்தவேண்டும் என்று கோரிக்கை வைத்தோம். ஆனால், வேண்டுமென்றே காலதாமதாக வந்ததாக காரணம் காட்டி கோரிக்கையை நிராகரித்துவிட்டார்.

locla

 

ஒரு ஒன்றிய கவுன்சிலருக்கு 5 முகவர்கள் மட்டுமே அனுமதிக்கப்படுவார்கள். ஆனால், டிடிவி தினகரனின் அமமுகவைச் சேர்ந்தவர்கள் 12 பேர்  உள்ளே இருந்தார்கள். இதிலிருந்தே, தேர்தல் எந்தளவுக்கு நேர்மையற்ற முறையில் நடந்தது என்பதை அறிந்துகொள்ளலாம். தற்போது, தேர்தலில் எனக்கு எதிராக மோசடி நடந்திருப்பது ஆதாரப்பூர்வமாக தெரியவந்ததால் திமுக மாவட்டச்செயலாளர் அவர்களுக்கும், தலைமைக்கும் தகவல் தெரிவித்துள்ளேன். இனி, அவர்கள் எனக்கு என்ன வழிகாட்டுகிறார்களோ அதன்படி சட்டப்போராட்டத்தில் ஈடுபடுவேன்” என்றார்.

 

local 2333

 

இதுகுறித்து, கடந்த 2020- ஆம் ஆண்டு ஜூன் 12- ஆம் தேதி தேதி தமிழ்நாடு தலைமை தேர்தல் அதிகாரிக்கு புகார் அனுப்பியிருக்கிறார். கடலூர் மாவட்ட ஆட்சியர் வளர்ச்சிப்பிரிவு உரிய நடவடிக்கை எடுத்து மனுதாரருக்கு தெரிவிக்கும்படி உத்தரவிட்டுள்ளார். தமிழ்நாடு தேர்தல் ஆணையத்தின் செயலாளர் சுப்பிரமணியன் ஐ.ஏ.எஸ். தேர்தலில், நடந்த மோசடிகள் வெளிவந்து வெற்றி வேட்பாளரை அறிவிப்பதோடு, தேர்தலில் தில்லுமுல்லு செய்த தேர்தல் அதிகாரிகள் மீது சட்டரீதியான நடவடிக்கை எடுக்க வேண்டும்.
 

 

 

Next Story

அதிகாரிகள் முன்னிலையில் தீக்குளித்த இளைஞருக்கு நேர்ந்த சோகம்!

Published on 07/07/2024 | Edited on 07/07/2024
Tragedy of the young man who set himself on fire in front of the authorities in gummidipoondi

திருவள்ளூர் மாவட்டம் கும்மிடிப்பூண்டி கோட்டக்கரை பகுதியில் கல்யாணி என்பவர் தனது குடும்பத்துடன் வசித்து வருகிறார். இவர் குடியிருக்கும் வீடு பொதுப் பாதையை ஆக்கிரமித்து கட்டப்பட்டுள்ளதாக எழுந்த புகாரின் அடிப்படையில் வருவாய் அதிகாரிகள் உரிய விசாரணை நடத்தாமல் நேற்று முன்தினம் (4 ஆம், தேதி) காவல்துறையினரின் பாதுகாப்புடன் ஜேசிபி இயந்திரத்தை கொண்டு சென்று வீட்டை இடிக்க வந்துள்ளதாக தெரிவித்துள்ளனர்.

இதனால் அதிர்ச்சி அடைந்த கல்யாணியின் இளைய மகன் ராஜ்குமார் செல்வந்தர் ஒருவர் தனது குடும்பத்திற்கு தானமாக கொடுத்த தனிநபர் பட்டா நிலத்தில் தாங்கள் வசிப்பதாக கூறியதை ஏற்க மறுத்த அதிகாரிகள் உரிய கால அவகாசம் வழங்காமல் வீட்டை இடிக்கும் நடவடிக்கையில் இறங்கியுள்ளனர். இதனால், மன உளைச்சலுக்கு ஆளான ராஜ்குமார் வீட்டை இடிக்கும் நடவடிக்கைக்கு எதிர்ப்பு தெரிவித்து அதிகாரிகள் முன்னிலையில் உடலில் பெட்ரோல் ஊற்றிக் கொண்டு தனக்குத்தானே தீ வைத்துக்கொண்டு தற்கொலைக்கு முயற்சித்தார்.

அப்போது அங்கிருந்த தீயணைப்பு வீரர்கள் தங்கள் கையில் வைத்திருந்த தீ அணைப்பான் கருவி மூலம் அவரது உடலில் பற்றிய தீயை அனைத்து, 60% காயங்களுடன் கும்மிடிப்பூண்டி அரசு மருத்துவமனைக்கு தூக்கி சென்றனர், அங்கு முதல் உதவி சிகிச்சை அளிக்கப்பட்டு பின் மேல் சிகிச்சைக்காக சென்னை கீழ்பாக்கம் அரசு மருத்துவமனையில் தீவிர சிகிச்சை பிரிவில் அனுமதிக்கப்பட்டார், இந்த விவகாரத்தில் பணியின் போது கவன குறைவாக செயல்பட்டதாக கும்மிடிப்பூண்டி வட்டாட்சியர் ப்ரீத்தி, ஏளாவூர் வருவாய் ஆய்வாளர் கோமதி, தேர்விழி கிராம நிர்வாக அலுவலர் பாக்கிய ஷர்மா ஆகியோர் பணியிடம் மாற்றம் செய்யப்பட்டனர், இந்த நிலையில் மருத்துவமனையில் இன்று காலை சிகிச்சை பலனின்றி ராஜ்குமார் பரிதாபமாக உயிரிழந்தார்.

Next Story

தீ குளித்த இளைஞர்; அதிகாரிகளைக் கூண்டோடு தூக்கிய மாவட்ட ஆட்சியர்!

Published on 05/07/2024 | Edited on 07/07/2024
Collector has to transfer the officer of the youth is on fire In Gummidipoondi

திருவள்ளூர் மாவட்டம் கும்மிடிப்பூண்டி கோட்டக்கரை பகுதியில் 50 ஆண்டுகளுக்கு முன்பே கல்யாணி என்பவர் சிறு வயதாக இருக்கும்போதே குடும்பத்துடன் வசித்து வந்திருக்கிறார். இந்த நிலையில் கல்யாணிக்குத் திருமணமான சில ஆண்டுகளிலேயே கணவன் உடல்நலக்குறைவால் உயிரிழந்துள்ளார். இதனைத் தொடர்ந்து கோட்டக்கரையிலேயே தனது இரண்டு மகன்கள் மற்றும் மகளுடன் கல்யாணி வசித்து வந்திருக்கிறார். கல்யாணி சிமெண்ட் கூரை அமைத்து தங்கி இருக்கும் இந்த இடம் செல்வந்தர் ஒருவர் தானமாகக் கொடுத்தாகக் கூறப்படுகிறது. 

இந்த நிலையில் கடந்த இரண்டு ஆண்டுகளுக்கு முன்பு கல்யாணி வீட்டின் பின்புறம் புதிதாக உருவாக்கப்பட்ட வீட்டுமனையில் குடியேறிய சிலர் தங்கள் குடியிருப்புக்குச் செல்லும் பாதையில் ஆக்கிரமித்து கல்யாணி குடும்பத்தினர் வீடு கட்டி இருப்பதாகப் புகார் கொடுத்துள்ளனர். இதன் பேரில் அப்போதைய வட்டாட்சியர் கண்ணன் நேரடியாகச் சென்று விசாரணை மேற்கொண்ட போது அந்த இடம் தானமாகக் கொடுத்த தனி நபர் ஒருவரின் பெயரில் பட்டா இருப்பதாகக் கூறி சம்பந்தப்பட்ட இரு தரப்பினரும் பிரச்சனையை நீதிமன்றம் சென்று தீர்த்துக்கொள்ளுமாறு கடிதம் மூலம் தெரிவித்துள்ளனர்.

இந்த நிலையில் தான் கடந்த வாரம் மீண்டும் வருவாய்த் துறையினர் ஆக்கிரமிப்பை அகற்ற உள்ளதாகக் கூறி கல்யாணிக்கு நோட்டீஸ் வழங்கியுள்ளனர். இதனைக் கண்டு அதிர்ச்சியடைந்த கல்யாணியின் இளைய மகன் ராஜ்குமார் அதிகாரிகளை நேரடியாகச் சந்தித்து வீட்டை காலி செய்ய ஒரு மாதக்காலம் கால அவகாசம் வேண்டும் என்று கேட்டுள்ளார். ஆனால் திடீரென கல்யாணியின் வீட்டிற்கு மின்வாரியம் மூலம் மின் இணைப்பு துண்டிக்கப்பட்டது. இந்த நிலையில் நேற்று(4.6.2024) காவல்துறையினரின் பாதுகாப்புடன் முன்னறிவிப்பு இன்றி வீட்டை இடிக்க ஜே.சி.பி. இயந்திரத்தை அதிகாரிகள் கொண்டுவந்ததால், மன உளைச்சலுக்கு ஆளான ராஜ்குமார் முறையான விசாரணை நடத்தாமல் தங்களுக்கு சொந்தமான நீளத்தை ஆக்கிரமிப்பு எனக் கருதி வீட்டை இடிப்பதற்கு எதிர்ப்பு தெரிவித்தார். 

இதையடுத்து, வீட்டினுள் இருந்தபடியே அதிகாரிகள் முன்னிலையில் உடலில் பெட்ரோல் ஊற்றி தனக்குத்தானே தீ வைத்துக் கொண்டு சாலையில் அலறி அடித்தபடி ஓடினார். இதனைக் கண்ட வருவாய் மற்றும் காவல்துறை அதிகாரிகள் திகைத்து நின்றனர். அப்போது அங்கிருந்த தீயணைப்பு வீரர்கள் தங்களது கையில் வைத்திருந்த தீயணைப்பான் கருவி மூலம் தீயை அணைத்து, 60% தீக்காயங்களுடன்  உயிருக்குப் போராடிய ராஜ்குமாரை மீட்டு அருகிலேயே உள்ள கும்மிடிப்பூண்டி அரசு மருத்துவமனைக்குக் கொண்டு சென்றனர்.

பின் மேல் சிகிச்சைக்காக சென்னை கீழ்ப்பாக்கம் அரசு மருத்துவமனையில் அனுமதிக்கப்பட்டுள்ள அவரது நிலைமை கவலைக்கிடமாக உள்ளது. இந்த நிலையில், இந்த விவகாரத்தில் பணியின் போது கவனக்குறைவாக செயல்பட்டதாக கும்மிடிப்பூண்டி வட்டாட்சியர் ப்ரீத்தி,  ஏளாவூர் வருவாய் ஆய்வாளர் கோமதி, தேர்விழி கிராம நிர்வாக அலுவலர் பாக்ய ஷர்மா ஆகிய மூன்று பேரையும் பணியிடை மாற்றம் செய்து உத்தரவிட்டுள்ள மாவட்ட ஆட்சியர் பிரபு சங்கர் சம்பந்தப்பட்ட மூன்று அதிகாரிகள் மீதும் துறை ரீதியான நடவடிக்கை மேற்கொள்ளப்படும் எனவும் தெரிவித்துள்ளார். இதனிடையே அதிகாரிகளின் அலட்சியத்தால் தீக்குளித்து தற்கொலைக்கு முயன்ற இளைஞருக்கு உயரிய சிகிச்சை அளிக்கவும் அவரது குடும்பத்திற்கு தமிழக அரசு உரிய நிவாரணம் வழங்க வேண்டும் என அப்பகுதி வாசிகள் கோரிக்கை விடுத்துள்ளனர்.

The website encountered an unexpected error. Please try again later.