வாக்குப்பதிவு நாள் நெருங்க நெருங்க தமிழகத்தில் அதிமுக-பாஜக கூட்டணியும், அகில இந்திய அளவில் பாஜக கூட்டணியும் எதிர்க்கட்சிகளைப் பார்த்து பயப்படத் தொடங்கியிருக்கின்றன. அகில இந்திய அளவில் காங்கிரஸ் தேர்தல் அறிக்கை மிகப்பெரிய மாற்றத்தை உருவாக்கி வருகிறது. காங்கிரஸ் கட்சி எடுக்கும் திடீர் முடிவுகள் பாஜக கூட்டணிக்கு கலக்கத்தை ஏற்படுத்துகிறது.

தமிழகத்தை பொறுத்தமட்டில் 40 மக்களவைத் தொகுதிகள் மற்றும் 18 சட்டப்பேரவைத் தொகுதிகளில் வாக்குப்பதிவு நடைபெறவுள்ளது. இந்தத் தொகுதிகளில் திமுக தலைமையிலான கூட்டணிக்கே வெற்றிவாய்ப்பு பிரகாசமாக இருக்கிறது என தெரியவந்துள்ளது. எனவே அதிமுக கூட்டணிக் கட்சிகள் பல்வேறு தில்லுமுல்லுகளில் ஈடுபடத் தயாராகிவருகின்றன.

இதன் வெளிப்பாடுதான், வாக்குச் சாவடிகளை கைப்பற்றும் வகையில் தொண்டர்களை உசுப்பேத்தும் அன்புமணி மற்றும் ராமதாஸ் ஆகியோரின் பேச்சு என்கிறார்கள். பட்டவர்த்தனமாகவே பொதுமேடையில் கட்சிக்காரர்களிடம் அன்புமணியும் ராமதாஸும் வன்முறையை தூண்டும் வகையில் பேசியிருப்பது, வாக்காளர்ளை அச்சுறுத்தும் நோக்கம் கொண்டதாகும் என்று புகார்கள் பதிவாகி இருக்கின்றன.

இதனிடையே ஓபிஎஸ் உள்ளிட்ட முக்கிய பிரமுகர்களின் மகன்கள் மற்றும் கட்சியின் முக்கிய நிர்வாகிகள் போட்டியிடும் தொகுதிகளில் திமுக அணியில் தேர்தல் பணியாற்றும் ஊராட்சி செயலாளர்கள் முதல் முக்கிய நிர்வாகிகளை விலைபேசி அவர்களுடைய வேலையில் சுணக்கம் ஏற்படுத்த ஆளுங்கட்சி தீவிரமாக ஈடுபட்டுள்ளதாக தெரியவந்துள்ளது.

தொகுதி தேர்தல் பொறுப்பாளர்களையே விலைபேசும் நிலைக்கு ஆளுங்கட்சி துணிந்திருப்பதாக கூறப்படும் நிலையில், திமுக தலைமையும் கூட்டணிக்கட்சிகளின் தலைவர்களும் கடைசிநேர தேர்தல் பணியை தீவிரப்படுத்த விழிப்புணர்வுடன் இருக்க வேண்டியது அவசியம் என்று திமுகவின் முக்கிய நிர்வாகிகள் சிலர் தெரிவித்தனர்.

அகில இந்திய அளவில் எதிர்க்கட்சிகள் ஆளும் மாநிலங்களில் தேர்தல் பணிகளை தங்களுக்கு ஏற்றவகையில் திட்டமிடுவதற்கு வசதியாக, மேற்கு வங்கம் மற்றும் ஆந்திரா மாநிலங்களில் தலைமைச் செயலாளர்களையும் போலீஸ் அதிகாரிகளையும் தேர்தல் ஆணையம் மாற்றியிருக்கிறது. இது தேர்தல் ஆணையத்தின் நடுநிலைத்தன்மைக்கு அழகல்ல என்று எதிர்க்கட்சித் தலைவர்கள் கண்டித்திருக்கிறார்கள்.

இந்நிலையில்தான், தேர்தலுக்கு முந்தைய கூட்டணிகளிலும் சில மாற்றங்கள் அதிரடியாக ஏற்பட்டிருப்பது பாஜகவுக்கு அதிர்ச்சியை ஏற்படுத்தி இருக்கிறது. டெல்லி மாநிலத்தில் ஆம் ஆத்மியும், காங்கிரஸும் கூட்டணியை உறுதிப்படுத்தி தொகுதிப் பங்கீடையும் முடித்துள்ளன. அதுபோலவே, ஹரியானாவிலும் இரண்டு கட்சிகளும் கூட்டணி அமைத்துப் போட்டியிடுகின்றன. இதையடுத்தும் டெல்லியில் உள்ள 7 தொகுதிகளும் பாஜகவுக்கு இல்லை என்ற நிலைமை ஏற்பட்டிருக்கிறது. ஹரியானாவிலும் பெரும்பாலான தொகுதிகள் காங்கிரஸ் கூட்டணிக்கே கிடைக்கும் என்ற நிலை உருவாகி இருப்பதாக கூறப்படுகிறது.

கடந்தமுறை பாஜகவின் சீட் எண்ணிக்கையை அதிகப்படுத்த உதவிய உத்தரப்பிரதேசம், மத்தியப்பிரதேசம், ராஜஸ்தான், ஹரியானா, குஜராத், டெல்லி, ஆகிய மாநிலங்களில் மொத்தமாக பாஜக 70 இடங்களைப் பெற்றாலே அதிகம் என்ற நிலை இருப்பதாக கூறப்படுகிறது. எனவேதான், மோடி தனது பேச்சில் அடுத்தடுத்து முரண்பாடுகளை வெளிப்படுத்துகிறார் என்கிறார்கள். ஆட்சி போகப்போகிற கடைசி நேரத்தில், தன்னை பிரதமராக நினைக்க வேண்டாம், நண்பனாக நினையுங்கள் என்று நண்பர் அவதாரம் எடுத்திருக்கிறார் என்று கிண்டல் செய்கிறார்கள்.