சென்னையின் பசியாற்றும் அக்கா, தாத்தா...

சென்னைக்கு வந்தா மெரினா வராம யாரும் போகமாட்டாங்க. அந்தளவுக்கு மெரினா ஸ்பெஷல். சென்னைக்கு மெரினா எவ்வளவு ஸ்பெஷலோ மெரினாவுக்கு மீன் குழம்பும், சுந்தரி அக்கா கடையும் ஸ்பெஷல். வெறும் முப்பது ரூபா போதும், தட்டுல வாழ இலை போட்டு மீன்குழம்போட  சாப்பாடு கிடைக்கும். கடையளவு சின்னதுதான். கடைக்கு சாப்பிட போனா கியூவுல நின்னுதான் சாப்பாடு வாங்கனும், அந்த அளவுக்கு கூட்டம் இருக்கும். புயலானாலும் மழையானாலும்  இங்க மக்கள் கூட்டம் இருந்துட்டுதான் இருக்கும். இந்த கடைய 2000ஆம் ஆண்டு தொடங்கி இன்று வரை வெற்றிகரமா  நடத்திட்டு வராங்க சுந்தரி அக்கா. குறைந்த விலையில் சாப்பாடு கொடுக்கும் சுந்தரி அக்கா வருஷத்துல ஒரு நாள் (நவம்பர் 1 தன் கணவர் இறந்த நாளில்) மட்டும் கடைக்கு வரும் அனைத்து  வாடிக்கையாளர்க்கும் இலவசமா சாப்பாடு கொடுக்குறாங்க. ஏழை மக்களுக்கு குறைந்த விலையில் சுவையான உணவு கொடுக்கும் சுந்தரி அக்காவுக்கு  சந்தானம் 'சகுனி'ல சொல்றமாரி மெரினால சிலையே வைக்கலாம்.

மோர்  தாத்தா 

"ராகுல் தாத்தா" கேள்விப்பட்டிருக்கோம், அது என்ன 'மோர் தாத்தா' அப்படினு கேக்குறீங்களா... சென்னையில் இரவு நேரத்துல திடீர்னு மோர் குடிக்கனும் என்று தோன்றினால், திருவான்மியூர் கடற்கரை பக்கத்துல சைக்கிளில்  திக்கான மோர்ல மாங்காய் துண்டுகள் மற்றும் காராபூந்தி போட்டு சுவையான மோர் கிடைக்கும். அதை விற்பனை செய்யும் இராமானுஜம்தான் "மோர் தாத்தா".  தினமும் இரவு ஒன்பது மணி முதல் பனிரெண்டு மணிவரை இங்க மோர் கிடைக்கும். இவர் மோர் விற்பனை செய்யத்  தொடங்கி கிட்டத்தட்ட 19 ஆண்டுகள் ஆகுது.  என்னதான் கடல் காற்று கூலிங்கா வீசினாலும், மோர் தாத்தா கையில குடிக்குற மோரோட கூலிங்கும் சுவையும் தனிதான். இரண்டு மோர் குடிச்சா மறுநாள் காலையில வரைக்கும் கூட பசி இருக்காது. விலையோ குறைவு, மனசோ  நிறைவு.

 

விலைவாசி எகிறிப்போன சென்னையில் பலர் வயிறாறவும் மனதாறவும், பசிக்கடலில் மூழ்காமல் நீந்தவும் இவர்களைப் போன்ற மனிதர்கள்தான் காரணம்...