பிரபல நடிகருக்கு ஹைதராபாத் அரண்மனையில் திருமணம்!

தெலுங்கில் முன்னணி நடிகராக வலம் வரும் நிதினுக்கு ஜூலை 26ஆம் தேதி திருமணம் நடைபெறவுள்ளது.

நடிகர் நிதினின் திருமணம் மிகவும் பிரம்மாண்டமாக துபாயில் ஏப்ரல் 16ஆம் தேதி நடைபெறுவதாக இருந்தது. ஆனால், கரோனா அச்சுறுத்தல் காரணமாக ஒத்திவைக்கப்பட்டது.

கரோனா அச்சுறுத்தல் முடிவடைந்தவுடன் திருமணத்தை மீண்டும் வெகு விமரிசையாக நடத்தலாம் என்று தெரிவித்திருந்தார். ஆனால், தற்போதைய நிலையைப் பார்த்தால் விரைவில் கரோனா அச்சுறுத்தல் முடைவடையாது என்பதால் விரைவில் திருமணத்தை நடத்த திட்டமிட்டுள்ளார்.

ஆகையால், நேற்று நிதினின் வீட்டில் ஷாலினியுடன் நிச்சயதார்த்தம் நடைபெற்றது. இருவரும் மோதிரம் மாற்றிக் கொண்டனர். இந்த நிகழ்வில் இரண்டு குடும்பத்தினர் மட்டுமே கலந்து கொண்டனர். நிதின் - ஷாலினி இருவரது திருமணம் ஜூலை 26-ஆம் தேதி நடைபெறவுள்ளது.

ஹைதராபாத்தில் உள்ள ஃபலக்கனுமா பேலஸில் இரவு 8:30 மணிக்கு திருமணம் நடைபெறவுள்ளது. இந்தத் திருமணத்துக்காக தெலுங்கு திரையுலகின் முன்னணி பிரபலங்கள் பலருக்கும் அழைப்பு விடுக்கப்பட்டுள்ளது.