புது முகங்களுக்கு வாய்ப்பளித்த நரேந்திர மோடி!

இரண்டாவது முறையாக நரேந்திரமோடி பிரதமராக நேற்று பதவியேற்று கொண்டார். இவருக்கு குடியரசுத்தலைவர் ராம்நாத் கோவிந்த் பதவி பிரமாணம் மற்றும் ரகசிய காப்பு பிரமாணம் செய்து வைத்தார். இந்நிலையில் பிரதமர் தலைமையிலான மத்திய அமைச்சரவையில் ராஜ்நாத் சிங், அமித்ஷா உள்பட 25 எம்பிக்கள் கேபினட் அமைச்சர்களாகவும், மத்திய இணையமைச்சர்களாக அனுராக் தாகூர், ஜிதேந்திர சிங் உள்ளிட்ட 24 எம்பிக்கள் பதவியேற்றுக் கொண்டனர். மத்திய அமைச்சர்கள் (தனிப்பொறுப்பு) கிரண் ரிஜிஜூ, வி.கே. சிங் உள்ளிட்ட 9 எம்பிக்கள் பதவியேற்றுக் கொண்டனர். பிரதமர் அமைச்சரவையில் பிரதமர் உட்பட மொத்தம் 58 பேர் மத்திய அமைச்சர்களாக உள்ளனர். தேசிய ஜனநாயக கூட்டணியில் உள்ள எம்பிக்களுக்கு மத்திய அமைச்சரவையில் பிரதமர் இடம் அளிப்பார் என எதிர்பார்க்கப்பட்ட நிலையில் சிவசேனா கட்சி மற்றும் லோக் ஜனசக்தி கட்சி , இந்திய குடியரசுக்கட்சி, சிரோமணி அகாலி தளம் உள்ளிட்ட நான்கு கட்சிகளுக்கு மட்டுமே அமைச்சரவையில் வாய்ப்பு அளிக்கப்பட்டுள்ளது. மத்திய அமைச்சரவையில் நான்கு இடங்கள் மட்டுமே கூட்டணி கட்சிகளுக்கு பாஜக வழங்கியுள்ளது. இந்நிலையில் அதிமுக மற்றும் ஐக்கிய ஜனதா தளம் உள்ளிட்ட கட்சிகளுக்கு அமைச்சரவையில் வாய்ப்பு வழங்கப்படவில்லை என்பது குறிப்பிடத்தக்கது.