ஹொம்பாலே பிலிம்ஸ் நிறுவனத்தின் தயாரிப்பில் ரிஷப் ஷெட்டி நடித்து இயக்கிய கன்னடப் படம் 'காந்தாரா'. கடந்த ஆண்டு செப்டம்பரில் வெளியான இப்படம் பெரும் வரவேற்பைப் பெற்றது. கன்னடத்தில் கிடைத்த வரவேற்பைத் தொடர்ந்து தமிழ், தெலுங்கு, மலையாளம் மற்றும் இந்தி உள்ளிட்ட மொழிகளில் டப் செய்யப்பட்டும் வெளியானது. இப்படத்தைப் பார்த்த திரை பிரபலங்கள் மற்றும் சினிமா விமர்சகர்கள் படக்குழுவினரை வெகுவாக பாராட்டினர்.
திரை பிரபலங்கள் சிம்பு, தனுஷ், கார்த்தி, கங்கனா ரணாவத் உள்ளிட்ட பலர் பாராட்டியிருந்தனர். மேலும் ரஜினிகாந்த் இந்திய சினிமாவில் ஒரு தலைசிறந்த படம் என தனது எக்ஸ் பக்கத்தில் குறிப்பிட்டிருந்தார். அதோடு ரிஷப் ஷெட்டியை நேரில் அழைத்து பாராட்டியிருந்தார். உலகம் முழுவதும் ரூ.400 கோடி வசூலித்ததாகக் கூறப்பட்டது.
இந்த மாபெரும் வெற்றியைத் தொடர்ந்து இப்படத்தின் இரண்டாம் பாகம் உருவாகிறது. அதற்கான ப்ரீ ப்ரொடக்ஷன் பணிகள் முன்னரே தொடங்கப்பட்ட நிலையில் தற்போது நிறைவுற்றதாக கூறப்படுகிறது. இப்படம் காந்தாரா படத்தின் ப்ரீக்குவலாக உருவாகிறது. இந்த நிலையில் இப்படத்தின் ஃபர்ஸ்ட் லுக் டீசர் மற்றும் போஸ்டர் வெளியாகியுள்ளது. முதல் பாகத்தில் பணியாற்றிய தொழில் நுட்ப கலைஞர்கள் பலரும் இதில் பணியாற்றுகின்றனர்.
ஃபர்ஸ்ட் லுக் டீசரில், ரிஷப் ஷெட்டி உடல் முழுக்க ரத்தத்துடனும், நீண்ட தாடி மற்றும் முடியுடனும் காணப்படுகிறார். இப்படத்திற்கு ‘கந்தாரா தி லெஜண்ட் - சாப்டர் 1’ என்ற தலைப்பு வைக்கப்பட்டுள்ளது. மேலும் கன்னடம், தமிழ், இந்தி உள்ளிட்ட ஏழு மொழிகளில் வெளியாகவுள்ளதாக அறிவிக்கப்பட்டுள்ளது.