இந்த சீசன் தொடங்கியதில் இருந்து ஆடிய மூன்று போட்டிகளிலும் தோற்காத ஒரே அணி சன்ரைசெர்ஸ் ஐதராபாத் தான். இதுவரை மூன்று போட்டிகளில் களமிறங்கிய அந்த அணி, மிக சிறப்பாக விளையாடி சுலபமாக வெற்றிகளைப் பதிவு செய்தது. கடந்த சீசன்களில் வார்னரின் பக்கபலமான ஆட்டம் இந்த சீசனில் இல்லாதது, ஐதராபாத் அணிக்கு மிகப்பெரிய பின்னடைவு என்று சொல்லப்பட்ட நிலையில், அது அவ்வளவு பெரிய குறையாக தெரியவில்லை என்பதுபோல் இருக்கிறது அந்த அணியின் ஆட்டம். ஷகிப் அல் ஹாசன் மற்றும் ரசித் கான் சுழலில் மிரட்டுகின்றனர்.
பஞ்சாப் அணியைப் பொருத்தவரை அந்த அணிக்கு இது நான்காவது ஆட்டம். கடைசியாக சென்னை அணியுடன் மோதியபோது, நூலிழையில் வெற்றியைத் தக்கவைத்துக் கொண்டது. முஜூப் உர் ரகுமான் முக்கியத்துவம் வாய்ந்த வீரராக இருக்கிறார். மூன்று போட்டிகளுக்குப் பின்னரும் யுவ்ராஜ் சிங் ஃபார்முக்குத் திரும்பாமல் ஏமாற்றுகிறார். கடந்த போட்டியில் சென்னை அணியை மிரள வைத்த கிறிஸ் கெயில் இன்றும் தனது அதிரடி ஆட்டத்தை வெளிப்படுத்தினால், ஐதராபாத் அணியை தொடர் வெற்றிகளில் இருந்து கொஞ்சம் நிறுத்திவைத்து முன்னேறலாம். அதேசமயம், இன்றைய போட்டியில் வெற்றிபெறும் பட்சத்தில் ஐதராபாத் அணி மீண்டும் முதலிடத்தைப் பிடிக்கும்.