10 மற்றும் 12- ஆம் வகுப்பு பொதுத்தேர்வு முடிவுகள் வரும் ஜூன் 20- ஆம் தேதி அன்று வெளியாகும் என்று தமிழக அரசு தேர்வுகள் இயக்ககம் அறிவித்துள்ளது.
இது தொடர்பாக, அரசுத் தேர்வுகள் இயக்ககம் வெளியிட்டுள்ள அறிவிப்பில், "2022- ஆம் ஆண்டு மே மாதம் நடைபெற்ற 2021- 2022 ஆம் கல்வியாண்டிற்கான 12- ஆம் வகுப்பு மற்றும் 10- ஆம் வகுப்புத் தேர்வு முடிவுகள் தமிழக பள்ளிக்கல்வித்துறை அமைச்சரால் வரும் ஜூன் 20- ஆம் தேதி அன்று அண்ணா நூற்றாண்டு கூட்டரங்கில் வெளியிடப்படவுள்ளது.
வரும் ஜூன் 20- ஆம் தேதி அன்று காலை 09.30 மணிக்கு 12- ஆம் வகுப்பு பொதுத்தேர்வு முடிவும், பகல் 12.00 மணிக்கு 10- ஆம் வகுப்பு பொதுத்தேர்வு முடிவும் வெளியிடப்படவுள்ளது. www.tnresults.nic.in, www.dge1.tn.nic.in, www.dge2.tn.nic.in, www.dge.tn.gov.in ஆகிய இணையதளங்களில் மாணவர்கள் தங்களது தேர்வு முடிவுகளை அறிந்து கொள்ளலாம். மேலே குறிப்பிட்டுள்ள இணையதளப் பக்கத்திற்குச் சென்று பதிவெண் மற்றும் பிறந்த தேதியைப் பதிவு செய்து எளிதாகத் தேர்வு முடிவுகளைத் தெரிந்து கொள்ளலாம்.
பள்ளி மாணவர்களுக்கு அவர்கள் பயின்ற பள்ளிகளில் சமர்ப்பித்த உறுதிமொழிப் படிவத்தில் குறிப்பிட்டுள்ள கைப்பேசி எண்ணுக்கும், தனித்தேர்வர்களுக்கும் ஆன்லைனில் விண்ணப்பிக்கும்போது வழங்கிய கைப்பேசி எண்ணிற்குக் குறுஞ்செய்தி வழியாகத் தேர்வு முடிவுகள் அனுப்பப்படும்" எனத் தெரிவிக்கப்பட்டுள்ளது.
10- ஆம் வகுப்புத் தேர்வு முடிவு நாளை வெளியாகியிருந்த நிலையில், தற்போது ஒத்திவைக்கப்பட்டுள்ளது. 10- ஆம் வகுப்பு மற்றும் 12- ஆம் வகுப்பு பொதுத்தேர்வு முடிவுகள் முதல்முறையாக ஒரேநாளில் வெளியிடப்படுகிறது என்பது குறிப்பிடத்தக்கது.