ஜெயலலிதா செய்தது சரி என்றால் நான் செய்ததும் சரி... ஜெ. அன்பழகன் அதிரடி பேட்டி...

சட்டமன்றக் கூட்டத்தொடரில் திமுக எம்.எல்.ஏ.ஜெ.அன்பழகன் கலந்துகொள்ள தடை விதித்திருக்கிறார் சபாநாயகர் தனபால்.

இதுதொடர்பாக சட்டப்பேரவை வளாகத்தில் செய்தியாளர்களை சந்தித்த ஜெ. அன்பழகன்,

சட்டமன்றத்தில் இன்று ஆளுநர் உரை மீதான விவாதத்தில் திமுக சார்பில் நான் கலந்து கொண்டேன். நான் பேசும்போது திட்டமிட்டு என்னை பேசவிடாமல் அமைச்சர் பெருமக்கள், சபாநாயகர் அத்துனை பேரும் குறுக்கீடு செய்தனர். நான் பேசக்கூடாது எனது கருத்து இந்த அவையிலே இடம்பெறக்கூடாது என்பதில் அனைவரும் அக்கறையோடு இருந்தார்கள்.

உள்ளாட்சித் தேர்தலில் ஆளும் கட்சியைச் சேர்ந்தவர் பேசும்போது, நன்றாக நடந்தது என்று பேசினார். நான் அதற்கு பதில் அளித்து பேசுகிறபோது, முறைகேடுகளை பட்டியலிட்டு பேசினேன். உதாரணமாக மந்திரி, கலெக்டர் முன்பாக கந்தவர்கோட்டை எம்எல்ஏ ஆறுமுகம் எங்களுக்கு உதவி செய்யவில்லை, எதிர்க்கட்சிக்குத்தான் உதவி செய்தாய் என்று அரசு அதிகாரி அன்வர் அலியை ஒருமையில் திட்டியதை வாட்ஸ் அப் மூலமாக இந்த உலகமே பார்த்தது. இதனை சொன்னேன். இதனால் அவர்களுக்கு எரிச்சல், தாங்க முடியவில்லை.

இதையடுத்து என்னை பேசவிடாமல் தடுக்க பார்த்தார்கள். ஒருத்தர் மாற்றி ஒருத்தர் பேசுகிறார்கள். சம்மந்தப்பட்ட அமைச்சர் பேசினால் ஒத்துக்கொள்ளலாம். முதலமைச்சர் சட்டம் ஒழுங்கில் முதலிடம் பெற்றது என்றார். எதில் முதலிடம் பெற்றீர்கள் என்று கேட்டால் முதலமைச்சருக்கு கோபம் வருகிறது. மத்திய அரசு சொல்லிவிட்டது என்கிறார்கள். எந்த மத்திய அரசு? நீங்க அடிமையாக இருக்கிற மத்திய அரசு.

ஸ்டெர்லைட் ஆலை முன்பு துப்பாக்கிச் சூடு நடந்ததே அதில் முதலிடம் கொடுத்தார்களா? சட்டம் ஒழுங்கு சரியில்லை என்று நெல்லை கண்ணனை கைது செய்தீர்கள். குண்டு போடுவோம் காலேஜில என்று எச்.ராஜா பேசினாரே அதற்கு நடவடிக்கை எடுத்தீர்களா? நீதிமன்றம் என்ன பெரிய என்று ஒரு வார்த்தை சொன்னாரே அதற்கு ஏதாவது நடவடிக்கை எடுத்தீர்களா? பெரியார் சிலையை உடைப்போம் என்றாரே? அதற்கு நடவடிக்கை எடுத்தீர்களா? இதுதான் சட்டம் ஒழுங்கா?