புதுச்சேரி மாநிலம், தட்டாஞ்சாவடி தொகுதியின் தி.மு.க. சட்டமன்ற உறுப்பினர் வெங்கடேசன் தனது பதவியை ராஜினாமா செய்துள்ளார். தனது ராஜினாமா கடிதத்தை புதுச்சேரி சட்டப்பேரவையின் சபாநாயகர் சிவக்கொழுந்துவிடம் அவர் வழங்கினார்.
சற்று நேரத்திற்கு முன் காங்கிரஸ் கட்சியைச் சேர்ந்த சட்டமன்ற உறுப்பினர் லட்சுமி நாராயணன் தனது பதவியை ராஜினாமா செய்த நிலையில், தி.மு.க.வை சேர்ந்த சட்டமன்ற உறுப்பினர் வெங்கடேசன் தனது பதவியை ராஜினாமா செய்துள்ளார் என்பது குறிப்பிடத்தக்கது.
புதுச்சேரி சட்டப்பேரவையின் மொத்த உறுப்பினர்களின் எண்ணிக்கை 33 ஆகும். இதில் 30 சட்டமன்ற உறுப்பினர்கள் மக்களால் தேர்ந்தெடுக்கப்படுபவர்கள். மற்ற 3 சட்டமன்ற உறுப்பினர்கள் நியமன உறுப்பினர்கள் ஆவர். இந்த நிலையில் காங்கிரஸ் எம்.எல்.ஏ.க்கள் 5 பேர், தி.மு.க எம்.எல்.ஏ. ஒருவர் என மொத்தம் ஆறு பேர் தங்களது எம்.எல்.ஏ. பதவியை ராஜினாமா செய்துள்ள நிலையில், புதுச்சேரி சட்டப்பேரவையில் ஆளும் காங்கிரஸ் கூட்டணியின் பலம் 12 ஆக குறைந்துள்ளது.
இதனால் புதுச்சேரியில் முதல்வர் நாராயணசாமி தலைமையிலான அரசு நீடிப்பதில் சிக்கல் ஏற்பட்டுள்ளது. மேலும், நாளை (22/02/2021) கூட உள்ள சிறப்பு சட்டப்பேரவைக் கூட்டத்தில் நம்பிக்கை வாக்கெடுப்பை முதல்வர் நாராயணசாமி கோருவாரா? அல்லது தனது பதவியை ராஜினாமா செய்துவிட்டு சட்டமன்றத் தேர்தலைச் சந்திப்பாரா? என்ற கேள்வி எழுந்துள்ளது.