அதுகுறித்து சுவடித் திட்டப்பணியின் ஒருங்கிணைப்பாளரும், சுவடியியல் துறைப் பேராசிரியருமான முனைவர் சு.தாமரைப்பாண்டியன் கூறியதாவது: இந்துசமய அறநிலையத்துறையின் அமைச்சர் பி.கே.சேகர்பாபு அவர்களின் சீரிய பணியின் முன்னெடுப்பால் உருவான திருக்கோயில் சுவடித் திட்டப்பணி மிகச்சிறப்பாக நடைபெற்று வருகிறது. இச்சுவடித்திட்டப்பணியின் மூலம் புதிதாக இராதாபுரம் வரகுணீச்சுரமுடைய நயினார்- கல்யாண சவுந்தரி நாச்சியார் அம்மன் திருக்கோயிலில் இருந்த செப்புப் பட்டயம் ஒன்று கண்டறியப்பட்டுள்ளது. செப்புப் பட்டயத்தில் உள்ள செய்தி கோயில் கருவறையின் மேற்கு பக்க மணிமண்டபத்தின் மேல்பகுதியில் கல்வெட்டாகவும் வெட்டி வைக்கப்பட்டுள்ளது. செப்புப் பட்டயமும் கல்வெட்டும் கோயில் சந்திப்பூசைக்கு வழங்கப்பட்ட நிலதானம் குறித்த செய்தியைப் பேசுகின்றன. செப்புப் பட்டயமும் கல்வெட்டும் கி.பி.1534ஆம் ஆண்டில் எழுதப்பட்டுள்ளன.
இராஜா பூதலவீர ஸ்ரீ இரவிவர்மன் அளித்த நிலதானம்:
நமக்கு கிடைத்துள்ள செப்புப் பட்டயமும் கல்வெட்டும் ராஜா இரவிவர்மன் முர்த்தா நாடு பகுதியை ஆண்டதாகக் குறிப்பிடுகிறது. மூர்த்தா நாடு என்பதில் பணகுடி உள்ளிட்ட பகுதிகள் அடங்கி இருந்துள்ளன.இரவிவர்மன் பூசங்குடியான் என்று அழைக்கப்பட்டுள்ளான். மேலும் இவன் செய்துங்க நாட்டை ஆண்ட சங்கரநாராயணன் என்பவனை வென்றதாகவும் அறியமுடிகிறது. இத்தகைய சிறப்புடைய இராஜா ரவிவர்மன் தன் பெயர் விளங்க வரகுணீச்சுரமுடைய நயினார் - கலியாண சவுந்தரி அம்மன் கோயிலுக்கு சந்திப்பூசை நடக்க நிலதானம் செய்துள்ளான்.
இரவிவர்மன் வழங்கிய நிலதான எல்லை விவரம்:
இராஜா இரவிவர்மன் முர்த்தா நாட்டில் உள்ள இருக்கன் துறை என்று இன்று இன்று அழைக்கப்படும் சீவலப் பாடி நகர் பற்றில் சான்றான் குளம் (சாணான்குளம் என்று இன்று வழங்கப்படுகிறது.) உள்ளிட்ட பற்றிலுள்ள நஞ்சையும் புஞ்சையும் கரைப்பற்றும் வழங்கியுள்ளான்.அவன் வழங்கிய தான நிலத்தின் பெரிய நான்கு எல்லைகள் விவரம் தெளிவாகப் பட்டயத்திலும் கல்வெட்டிலும் கூறப்பட்டுள்ளன.
மேலும் இந்த நான்கு பெருஎல்லைக்கு உட்பட்ட குளமும் புரவும் கரைப்பற்றுமட்டுமல்லாமல் குள மிரண்டிலுள்ள நஞ்சையும் புஞ்சையும் கரைப்பற்றும் மேல்நோக்கின மரமும் கீழ்நோக்கிய கிணறும் தானம் செய்யப்பட்டதாக சுட்டப்பட்டுள்ளது. இச்செய்தி கல்லிலும் செம்பிலும் வெட்டப்பட்ட செய்தியினையும் செப்புப் பட்டயம் தெளிவாகச் சுட்டுகிறது” என்று அவர் தெரிவித்தார்.