தமிழில் பல வெற்றிப் படங்களை கொடுத்தவர் இயக்குநர் லிங்குசாமி. 'சண்டக்கோழி 2' படத்தை தொடர்ந்து பிரபல இளம் தெலுங்கு நடிகர் ராம் பொத்தினேனியை வைத்து 'தி வாரியார்' படத்தை இயக்கி வருகிறார். தமிழ், தெலுங்கு என இரு மொழிகளில் உருவாகிவரும் இப்படத்தில் கதாநாயகியாக கீர்த்தி ஷெட்டி நடிக்கிறார். ஆதி, நதியா, அக்ஷரா கௌடா, ஜெயபிரகாஷ், ஜான் விஜய் ஆகியோர் முக்கிய கதாபாத்திரத்தில் நடிக்கின்றனர். 'ஶ்ரீனிவாசா சில்வர் ஸ்கிரீன்' தயாரிக்கும் இப்படத்திற்கு தேவி ஸ்ரீ பிரசாத் இசையமைக்கிறார். இப்படத்தின் 'புல்லட்' பாடல் சமீபத்தில் வெளியாகி ரசிகர்களிடம் நல்ல வரவேற்பு பெற்றது. இப்பாடலை சிம்பு தமிழ், தெலுங்கு ஆகிய இரு மொழிகளிலும் பாடியிருந்தார் என்பது குறிப்பிடத்தக்கது. இப்படம் உலகெங்கும் உள்ள திரையரங்குகளில் ஜூலை14-ஆம் தேதி வெளியாகவுள்ளது.
இந்நிலையில் 'தி வாரியார்' படத்தின் டீசரை படக்குழு வெளியிட்டுள்ளது. டீசரில் ராம் பொத்தினேனி, கம்பீரமான போலீஸ் அதிகாரியாக தோன்றுகிறார். அதோடு வில்லன்களிடம் மோதும் சண்டை காட்சிகளில் ஆக்ஷனில் மிரட்டுகிறார். பக்காவான கமர்ஷியல் படத்தை போல் வெளிவந்திருக்கும் இப்படத்தின் டீசர் ரசிகர்கள் மத்தியில் நல்ல வரவேற்பை பெற்று சமூக வலைத்தளத்தில் வைரலாகி வருகிறது.