இந்தியாவின் முன்னணி இசையமைப்பாளராக இருக்கும் ஏ.ஆர் ரஹ்மான் கடந்த 1995 ஆம் ஆண்டு சாய்ரா பானு என்ற பெண்ணை திருமணம் செய்துகொண்டார். இந்த தம்பதிக்கு அமீர் என்ற மகனும் கதீஜா, ரெஹிமா என்ற இரு மகள்களும் உள்ளனர். இதில் கதீஜாவுக்கும் தொழிலதிபரும் ஆடியோ இன்ஜினியருமான ரியாஸ்தீன் ஷேக் என்பவருக்கும் கடந்த டிசம்பர் மாதம் நிச்சயதார்த்தம் நடைபெற்றது.
இதையடுத்து நேற்று முன்தினம்(5.5.2022) ஏ.ஆர் ரஹ்மான் மகள் கதீஜா மற்றும் ரியாஸ்தீன் ஷேக் ஆகியோரின் திருமணம் எளிய முறையில் நடைபெற்றுள்ளது. இந்த திருமண நிகழ்வில் குடும்ப உறுப்பினர்கள் மற்றும் நெருங்கிய நண்பர்கள் மட்டுமே கலந்து கொண்டனர். இத்தொடர்பான புகைப்படத்தை ஏ.ஆர் ரஹ்மான் சமூக வலைதளத்தில் பகிர்ந்த நிலையில் மணமக்களுக்கு பலரும் தங்களின் வாழ்த்துக்களை தெரிவித்து வருகின்றனர்.
இந்நிலையில் திருமணமான தனது மகள் மற்றும் குடும்பத்தினருடன் தமிழக முதல்வர் மு.க ஸ்டாலினை நேரில் சந்தித்து ஏ.ஆர் ரஹ்மான் வாழ்த்து பெற்றுள்ளார்.