அமிதாப்பச்சன் தற்போது அயன் முகர்ஜி இயக்கத்தில் ரன்பீர் கபூர், ஆலியா பட், நாகார்ஜுனா, மௌனி ராய், உள்ளிட்ட பலர் நடிப்பில் உருவாகும் 'பிரம்மாஸ்திரம்' படத்தில் நடித்துள்ளார். பெரும் பொருட்செலவில் உருவாகியுள்ள இப்படத்தின் முதல் பாகம் வருகிற செப்டம்பர் 9-ஆம் தேதி வெளியாகவுள்ளது. இதனிடையே அமிதாப்பச்சன் தனக்கு கரோனா தொற்று உறுதியாகியுள்ளது எனச் சமீபத்தில் தெரிவித்திருந்தார்.
இந்நிலையில் அமெரிக்காவில் ஒரு ரசிகர் அமிதாப்பச்சனுக்கு சிலை வைத்துள்ளார். குஜராத்தை சேர்ந்த கோபி சேத் என்பவர் அமெரிக்காவின் நியூ ஜெர்சி மாகாணத்தில் தனது குடும்பத்துடன் வசித்து வருகிறார். அமிதாப்பச்சனின் தீவிர ரசிகராக இருக்கும் கோபி சேத் அமிதாப்பச்சனின் முழு உருவ சிலையை வடிவமைத்து தனது இல்லத்தின் முன்பு வைத்துள்ளார். இந்த சிலை 60 லட்சம் ரூபாய் செலவில் அமைக்கப்பட்டதாக கூறப்படுகிறது. மேலும் இந்த சிலை திறப்பு விழாவில் அமிதாப்பச்சனின் ரசிகர்கள் பலரும் கலந்துகொண்டுள்ளதாக தகவல் வெளியாகியுள்ளது. கோபி சேத்தின் இந்த செயல் அனைவரது கவனத்தையும் ஈர்த்து வருகிறது.