திக் திக் திருமாவளவன் வெற்றி நள்ளிரவைக் கடந்து அறிவிக்கப்பட்டது -தொண்டர்கள் வெடிவெடித்து ஆரவாரம்

தமிழகத்தில் திமுக தலைமையில் போட்டியிட்ட அனைத்து அணிகளும் முன்னிலை என செய்திகள் வந்த நிலையில் மதியத்திற்கு மேல் திருமாவளவன் முன்னிலை என தகவல் வெளியானது. அதனைத் தொடர்ந்து சில நிமிடங்களிலேயே அதிமுக சந்திரசேகர் 4 ஆயிரம் வாக்குகள் முன்னிலை என அறிவிக்கப்பட்டது. இதனைத் தொடர்ந்து மாலை 5 மணிக்கு மேல் திருமாவளவன் மீண்டும் முன்னிலை வகித்தார். இதனை தொடர்ந்து அவர் இரவு 9 மணிக்கு 19-வது சுற்றில் 9544 வாக்குகள் வித்தியாசத்தில் முன்னிலை வகித்தார். இந்த நிலையில் 10 மணிக்கு மேல் திக் திக் வினாடிகள் ஆரம்பமானது இரவு 11 மணிக்கு மேல் அதிகார பூர்வ அறிவிப்பு இல்லாமல் முன்னிலை வகித்த திருமாவளவன் பின்னடைவு என தகவல்கள் பரவியது. தேர்தல் ஆணையம் திருமாவளவனின் வெற்றியை மாற்றி அறிவிக்க முனைவதாக குற்றச்சாட்டு எழுந்தது.

அதனைத் தொடர்ந்து வாக்கு எண்ணும் மையத்தில் கூடுதலாக பலத்த போலீஸ் பாதுகாப்பு போடப்பட்டது . வாக்கு எண்ணிக்கை மையத்தை சுற்றியுள்ளப் பகுதிகளில் மின்சாரம் துண்டிக்கப்பட்டது வாக்கு எண்ணிக்கை மையத்தில் ஜெனரேட்டர் வசதியுடன் மின்விளக்குகள் எரிந்தது. ஒரே பரபரப்பான சூழ்நிலை கானப்பட்டது. இரவு 11.30 மணிக்கு மேல் திருமாவளவன் 3,186 வாக்குகள் அதிகம் பெற்று முன்னிலை என்று தகவல் வந்தது . அதனை தொடர்ந்து 25 சுற்று வரை எண்ணிய வாக்குகளின் அடிப்படையிலும் தபால் வாக்குகளை சேர்த்து திருமாவளவன் 500229 வாக்குகளும் அதிமுக வேட்பாளர் 497010 வாக்குகளை பெற்றுள்ளார் என்று அறிவிக்கப்பட்டது.