மரண வலி! -ஆரூர் தமிழ்நாடன்

நேர்ந்துவிட்ட கண நேர
கொடூரத்தில்
வெட்கிச் சாகிறது தீ!
*
பகை கூட
இப்படியொரு பகையைச்
சந்திக்கக் கூடாது.
சிறுமைபட்டு நிற்கிறது
சிறுமதுரை.
*
பெண் பிள்ளைகளைப் பெற்ற தகப்பன்களை எல்லாம்
மரண வலியுடன்
கை பிசைய வைக்கிறது
‘அப்பா எங்கே?’ என்ற

அந்த ஈர குரல்;
ஈரக் குலைக்குள்

தீயாய் ஊடுருவும்

ஈரக் குரல்
*
வன்மம்

இவ்வளவு வன்மமானதா?
மனிதவடிவில்

இப்படியும்
கோர மிருகங்களா?
பழிவாங்கும் உணர்வை
ஒரேயடியாய்ப்
பழிவாங்கிவிட்டார்கள்
பாவிகள்.
*
ஜெயஸ்ரீக்களே!
இந்த பூமிக்கு
எந்த நம்பிக்கைக்கையில்
வந்தீர்கள்?
இது மரிப்பதற்கு மட்டுமான
மயான பூமி.
இங்கே
புன்னகை மலர்களுக்கு
இடமில்லை.
*
உலக உருண்டை
உயிர்ப்பற்ற
மண்ணுருண்டை ஆகிவிட்டது.
அவர்களால்.
*