சாலை விபத்தில் காயமடைந்த பெண்ணிற்கு திமுக சார்பில் நிதியுதவி

கடந்த 11 ம் தேதி கோவை அவிநாசி சாலையில் உள்ள கோல்டுவின்ஸ் பகுதியில் நடந்த விபத்தில் லாரி மோதி சிங்காநல்லூர் பகுதியை சேர்ந்த ராஜேஸ்வரி என்கிற அனுராதா படுகாயமடைந்தார். சாலையோரத்தில் நடப்பட்டிருந்த அதிமுக கொடிகம்பம் சாய்ந்ததே விபத்திற்கு காரணமென உறவினர்கள் குற்றம் சாட்டியிருந்தனர்.

இந்நிலையில் நீலம்பூர் பகுதியில் உள்ள தனியார் மருத்துவமனையில் சிகிச்சை பெற்று வரும் ராஜேஸ்வரியின் பெற்றோரை திமுக தலைவர் ஸ்டாலின் சந்தித்து ஆறுதல் தெரிவித்தார். மேலும் திமுக சார்பில் ராஜேஸ்வரியின் பெற்றோரிடம் 5 இலட்ச ரூபாய்க்கான காசோலையை அளித்து நிதியுதவி வழங்கினார். இதையடுத்து செய்தியாளர்களுக்கு பேட்டியளித்த ஸ்டாலின், கோவையில் கடந்த 11 ம் தேதி முதலமைச்சர் எடப்பாடி பழனிசாமியை வரவேற்க, சாலைகளில் பொதுமக்களுக்கு இடையூறு தரும் வகையில் கொடிக்கம்பங்கள் நடப்பட்டிருந்தன எனவும், கொடிகம்பம் சாய்ந்து லாரி மோதி விபத்து ஏற்பட்டதில், ஆபத்தான கட்டத்தில் ராஜேஸ்வரி மருத்துவமனையில் அனுமதிக்கப்பட்டார் எனவும் குறிப்பிட்டார்.