வரும் ஜூலை 19- ஆம் தேதி அன்று நாடாளுமன்ற மழைக்கால கூட்டத்தொடர் தொடங்க உள்ள நிலையில், சென்னையில் உள்ள தி.மு.க.வின் தலைமை அலுவலகமான அண்ணா அறிவாலயத்தில் தமிழக முதலமைச்சரும், தி.மு.க. கட்சியின் தலைவருமான மு.க.ஸ்டாலின் தலைமையில் இன்று (16/07/2021) மாலை 05.00 மணிக்கு தி.மு.க.வின் நாடாளுமன்ற உறுப்பினர்களின் கூட்டம் நடைபெற்றது.
நாடாளுமன்ற கூட்டத்தொடரில் தி.மு.க.வின் மக்களவை மற்றும் மாநிலங்களவை உறுப்பினர்களின் செயல்பாடுகள், நாடாளுமன்றத்தில் நடைபெறும் விவாதங்களில் யார் யார் பேசுவது என்ற விவரங்கள் குறித்தும், மேகதாது அணை, நீட் தேர்வு, கரோனா தடுப்பூசி உள்பட நாடாளுமன்ற கூட்டத்தில் பேச வேண்டியவைக் குறித்தும், மீண்டும் டெல்லி செல்ல உள்ள முதலமைச்சருக்கான வரவேற்பு, திங்கள்கிழமை அவரது சந்திப்புகள் குறித்தும் ஆலோசனை நடைபெற்று வருவதாக தகவல் கூறுகின்றன.
கூட்டத்தில் தி.மு.க.வின் மக்களவைக் குழு தலைவர் டி.ஆர்.பாலு உள்பட 20 மக்களவை உறுப்பினர்களும், கட்சியின் அமைப்புச் செயலாளர் ஆர்.எஸ்.பாரதியைத் தவிர்த்து 6 மாநிலங்களவை உறுப்பினர்களும் பங்கேற்றுள்ளனர்.