ஊரடங்கு நேரத்தில் சிறப்பாகப் பணியாற்றும் காவல்துறை, ஊர்க்காவல் படை, காவல்துறை நண்பர்கள் குழுவினருக்கு நிவாரணப் பொருட்களை வழங்கிய எம்.எல்.ஏ!

ஊரடங்கு நேரத்தில் பொதுமக்களைப் பாதுகாக்கும் விதத்தில் வீடுகளை மறந்து வெயிலிலும் தெருக்களிலும் நின்று பணி செய்த சிதம்பரம் காவல் உட்கோட்ட பகுதிகளில் உள்ள புவனகிரி, மருவாய், பரங்கிப்பேட்டை, புதுச்சத்திரம், சிதம்பரம், சிதம்பரம் தாலுக்கா, அனைத்து மகளிர் காவல் நிலையங்களில் பணியாற்றி வரும் அனைத்துக் காவலர்கள், ஊர்க்காவல்படையினர், காவல்துறை நண்பர்கள் குழு மற்றும் காவல் அதிகாரிகளின் பணியைப் பாராட்டும் வகையில் சிதம்பரம் சட்டமன்ற உறுப்பினர் கே.ஏ பாண்டியன் அனைவருக்கும் 25 கிலோ அரிசி மூட்டை, மளிகைப் பொருட்கள். காய்கறிகள் உள்ளிட்டவைகளை வழங்கினார்.

நிவாரணப் பொருட்களை வழங்கிய எம்.எல்.ஏ.வுக்கு சிதம்பரம் டி.எஸ்.பி கார்த்திகேயன் தலைமையிலான காவல்துறையினர் நன்றி தெரிவித்து கொண்டார். இதேபோல் ஊரடங்கு நேரத்தில் வீட்டை விட்டு வெளியே வேலைக்குச் செல்லமுடியாமல் வீட்டில் முடங்கியுள்ள குமராட்சி அருகேயுள்ள சிவாயம், தவர்தாம்பட்டு, வக்காரமாரி, பரங்கிப்பேட்டை, வேளிங்கராயன்பேட்டை, புதுகுப்பம், மீதிகுடி உள்ளிட்ட 10- க்கும் மேற்பட்ட கிராமங்களில் உள்ள இரண்டு ஆயிரத்திற்கும் மேற்பட்ட ஏழை குடும்பங்களுக்குத் தலா 5 கிலோ அரிசி வீதம் வழங்கப்பட்டது.