அலகாபாத்தில் பாஜக தலைவர் அமித்ஷா சுற்றுப்பயணம் மேற்கொண்ட பொழுது அவர் வருகைக்கு எதிராக கோஷமிட்ட கல்லூரி மாணவியை ஆண் போலீசார்கள் முடியைபிடித்து இழுத்து சென்ற வீடியோ காட்சி தற்போது வைரலாகி வருகிறது.
அலகாபாத்தில் பல இடங்களில் பாஜக தலைவர் அமித்ஷா சுற்றுப்பயணம் மேற்கொண்டு வருகிறார். இந்த நிலையில் இன்று அங்கு சில இடங்களுக்கு சுற்றுப்பயணம் மேற்கொள்ள அமிதாஷா கார் அணிவகுப்புடன் வந்துகொண்டிருந்தார். அப்போது சாலையில் நின்று ''கோ பேக் அமித்ஷா'' என்ற முழக்கத்துடன் கல்லூரி மாணவி இருவர் மற்றும் ஒரு கல்லூரி மாணவனும் போராட்டத்தில் ஈடுபட்டனர். அப்போது திடீரென வரிசையாக வந்துகொண்டிருந்த கார் முன்பு போலிஸாரின் தடையை மீறி உள்ளே புகுந்த அந்த மாணவிகள் தொடர்ந்து எதிர் கோஷங்களை எழுப்பி காரை வழிமறித்தனர்.
இதனை சுதாரித்துக்கொண்ட போலீசார் மூவரை பிடித்து தரதரவென இழுத்து சென்று காவல் வாகனத்தில் ஏற்றினர். அந்த மாணவிகளில் வெள்ளை நிற ஆடை உடுத்தியுள்ள மாணவியை கைது செய்யும் பொழுது முடியை பிடித்து ஆண் காவலர் ஒருவர் வண்டியில் ஏற்றிய வீடியோ இப்பொழுது வைரலாகி வருகிறது.