Skip to main content

விரைவில் தண்ணீர் தீரப்போகும் நகரங்கள்...  இந்தியாவிலும் இருக்கிறது!!! 

Published on 14/02/2018 | Edited on 22/03/2018

22 மார்ச் - உலக தண்ணீர் தினம் 

"நீர் இன்றி  அமையாது உலகு" இவ்வுலகில் நீர் இல்லையெனில் எந்த ஒரு உயிரும் வாழ இயலாது என்பது வள்ளுவனின் கூற்று, நாம் நாள்தோறும் காணும் உண்மை. அதில் முதல் நகரமாக தென் ஆப்பிரிக்காவில் உள்ள கேப்டவுன், தண்ணீர் தீர்ந்துகொண்டே வரும் நகரமாக உருவெடுத்துள்ளது. தென்ஆப்பிரிக்காவின் இரண்டாவது மிகப்பெரிய சுற்றுலா நகரமான கேப்டவுனில் கடந்த பிப்ரவரி 1 முதல் ஒரு நாளுக்கு ஒரு நபருக்கு 50 லிட்டர் தண்ணீர்தான் வழங்கப்படுகிறது. குளிப்பதற்கு 15 லிட்டர் அதுவும் 90 நொடிகளுக்குள் குளித்து விட்டு வந்து விட வேண்டும், துணி துவைப்பதற்கு 18 லிட்டர், குடிப்பதற்கு 2 லிட்டர் ,நாய்க்கு 1லிட்டர் குடிப்பதற்கு , சமைக்க 2 லிட்டர் ,கழிவறை பயன்பாட்டிற்கு 9 லிட்டர்,கைகளை கழுவுவதற்கு 3 லிட்டர்என்று பிரித்துக்கொள்ள வேண்டும் என அறிவுறுத்தப்பட்டுள்ளது. இந்த நகரத்தில் உள்ள தண்ணீர் வரும் ஏப்ரல் 16 வரை தான் இருக்கும் என்றும், அன்று "டே ஜீரோ"  ஆகிவிடும் அதனை எதிர்க்கொள்ளவேண்டும் என்றும் அறிவிக்கப்பட்டது. அதன் பின்  கேப்டவுன் பக்கத்தில் உள்ள கிரபவ் கிராம விவசாயிகள் உதவியதால் "டே ஜீரோ " தள்ளிவைக்கப்பட்டுள்ளது. இந்த நிலையை எதிர்காலத்தில் சந்திக்கப் போகும் 11 நகரங்கள் என்ற பட்டியலை ஐக்கிய நாடுகள் சபையின் நீர் மேலாண்மை பிரிவு வெளியிட்டுள்ளது. இதில் கேப்டவுன் முதலிடத்தில் உள்ளது. அதனைத் தொடர்ந்து இந்தியாவின் தொழில்நுட்ப நகரமான பெங்களூரு மூன்றாவது  இடத்தில் உள்ளது. இது மற்ற மாநிலங்களுக்கு ஒரு அபாய மணி ஒலித்தது போல் உள்ளது. இதனை சேர்த்து மற்ற 10 நகரங்களின் நிலை என்னவென்று பார்ப்போம்.
 

சா பாலோ
 

sao paulo


சா பாலோ பிரேசில் நாட்டின் பொருளாதார நகரம் என்று அழைக்கப்படுகிறது. இங்கு  2016 கணக்கெடுப்பின் படி 12 மில்லியன் மக்கள் வாழ்கின்றனர். பிரேசில் நாட்டில் அதிக மக்கள்தொகை கொண்ட நகரங்களில் இதுவும் ஒன்று. கேப்டவுன் போலவே 2015 ஆம் ஆண்டில் இங்கு தண்ணீர் பஞ்சம் உச்சக்கட்டத்தில் இருந்தது. அப்பொழுது  லாரிகள் மூலம் தண்ணீரானது கடத்தப்பட்டு வீட்டுகளுக்கு விற்பனை செய்யப்பட்டது. இந்த தண்ணீர் திருட்டை தடுக்க போலிஸ் நடவடிக்கை எடுத்தது. ஆனாலும் திருட்டை தடுக்க போலீசார் பெரும்பாடுபட்டனர். தண்ணீர் பிரச்சனை 2016 ஆம் ஆண்டு தீர்க்கப்பட்டு பின்னர் மீண்டும் அரசின் மெத்தனத்தால் தண்ணீர் பஞ்சத்திற்கு தள்ளப்பட்டுள்ளது சா பாலோ நகரம்.
 

பெங்களூரு
 

bangalore


இந்தியாவின் தொழில்நுட்ப நகரமான பெங்களூரு எதிர்காலத்தில் தண்ணீர் இல்லா நகரமாகும் நிலை உருவெடுத்து வருகிறது. பெங்களூரு நகரத்தில் தொழில் வளர்ச்சியாலும் அதனைத் தொடர்ந்து ஏற்பட்டுள்ள மக்கள்தொகை பெருக்கத்தாலும்  அந்நகரத்தின் நீர் மற்றும் கழிவு நீர் மேலாண்மை நிர்வாகிகளுக்கு பெரும் சிரமத்தை அளித்துள்ளது. இங்குள்ள பெரும்பாலான ஏரிகள் மாசடைந்த நிலையில் உள்ளன. மேலும் 85% தண்ணீரானது குடிப்பதற்கு உகந்தது இல்லை எனவும் கண்டறியப்பட்டுள்ளது. பெங்களூரில் 1970களில் 285 ஏரிகள் இருந்துள்ளன. ஆனால் 2017 ஆம் ஆண்டின் கணக்கெடுப்பில் 194 ஏரிகள் மட்டும் தான் உள்ளன. இதுவே மிகப்பெரிய பின்னடைவாக உள்ளது. அரசு மீண்டும் குழாய் முறையை கொண்டுவர வலியுறுத்தியுள்ளது. 2030க்குள் இந்தியா முழுவதும் 50%  நீரானது குறையும் என்று ஆசிய வளர்ச்சி வங்கி அறிக்கையில் தெரிவிக்கப்பட்டுள்ளது.
 

பெய்ஜிங்
 

beijing


சீன தலைநகரமான பெய்ஜிங்கும் தண்ணீர் பஞ்சத்தை எதிர்கொள்ளவுள்ளது. உலக மக்கள் தொகையில் 20% மக்கள் தொகையுடைய நாடு சீனா, ஆனால் அங்கு 7% தண்ணீர்தான் உபயோகத்திற்கு உகந்ததாக உள்ளது. 1997ஆம் ஆண்டு நீர் மாசுபாடு காரணமாக மிகப்பெரிய நீர்த்தேக்கம் மூடப்பட்டதும் இதற்கு ஒரு காரணமாகும். பெய்ஜிங்கில் 2014ஆம் ஆண்டு 20 மில்லியன் மக்கள்தொகையில் ஒரு நபருக்கு 145 கனமீட்டர் நீர் தான் இருந்தது. 2000 முதல் 2013 வரை மட்டுமே  நீரின் அளவானது   13% வரை குறைந்துள்ளது என்று கொலம்பிய பல்கலைக்கழகம் தெரிவித்துள்ளது.
 

கெய்ரோ
 

cairo


எகிப்தின் தலைநகரமான கெய்ரோவிலும் தண்ணீரின் நிலையானது மிகவும் மோசமாகவுள்ளது. இங்குள்ள உலகப் புகழ்பெற்ற நைல் நதியானது தொழிநுட்ப வளர்ச்சியினால் 95% மாசடைந்துள்ளது. இங்கு வேளாண் கழிவுகள் மற்றும் குடியிருப்புகளின் கழிவுகள் கலப்பதால் நைல் நதி மாசடைந்துள்ளது. ஐ.நா சபையின் கணிப்பின் படி 2025க்குள் தண்ணீர் குறைபாடு அதிகரித்துவிடும் தெரிகிறது.
 

ஜகார்தா 
 

jagarta


இந்தோனிஷிய தலைநகரான ஜகார்தாவிலும் தண்ணீர் பற்றாக்குறை ஏற்பட்டுள்ளது. உலகில் உள்ள கடற்கரை நகரங்களில் ஏற்படும் கடல் நீர் மட்ட உயர்வு இங்கும் ஏற்பட்டுள்ளது. 40% நீர் கடல் மட்டத்திற்கு கீழ் உள்ளதாக உலக வங்கி மதிப்பிட்டுள்ளது. சட்டவிரோதமாக கிணறுகள் தொண்டி தண்ணீரை உபயோகிப்பதால் 1 கோடிக்கும் அதிகமான மக்கள் தண்ணீர் பற்றாக்குறைக்கு ஆளாகியுள்ளனர். இங்கு மழை  பொழிந்தாலும் அதிகமான கான்க்ரீட் தரைகள் உள்ளதால் நீரானது நிலத்தடியில் செல்வதில்லை.
 

மாஸ்கோ
 

moscow


ரஷ்ய தலைநகரான மாஸ்கோவில் 35% முதல் 60 % வரையிலான நீரானது தூய்மையாக உள்ளதா என்று இன்னும் ஆய்வு செய்யப்படவில்லை என்று சமூக அமைப்புகள் தெரிவிக்கின்றன. அடுத்த காலாண்டிற்கு ரஷ்யாவில் தேவையான தூய்மையான தண்ணீர் உள்ளது. இருந்தாலும் ரஷ்யா இந்த நூற்றாண்டில் அதிகம் மாசினால் பாதிப்படைந்துள்ளது. 70% நீரானது நிலத்தின் மேற்பரப்பை சார்ந்துள்ளது.
 

இஸ்தான்புல்
 

isthanbul


துருக்கி நாட்டின் முக்கிய நகரங்களில் ஒன்றான இஸ்தான்புல்லில் கடந்த 2014 ஆம் ஆண்டு தொடக்கத்திலிருந்து நீரானது  30%குறைந்துள்ளது. இதனால் 14 மில்லியன் மக்கள் பாதிப்படைந்தனர். இந்த நிலை நீடித்தால் 2030க்குள் தண்ணீர் பற்றாக்குறை ஏற்படும் என அந்நாட்டின் வல்லுனர்கள் தெரிவித்துள்ளனர்.
 

மெக்ஸிகோ சிட்டி
 

mexico


மெக்ஸிகோ தலைநகரான மெக்ஸிகோ சிட்டியில் தற்போது 2 கோடி மக்களுக்கு தண்ணீர் பற்றாக்குறையானது தற்போது வரை இல்லை. ஆனால் இங்கு வாரத்திற்கு ஒரு முறைதான் தண்ணீர் வழங்கப்படுகிறது. அதிலும் சில மணிநேரங்கள் தான் தண்ணீர் அளிக்கப்படுகிறது. 20% மக்கள் தான் அதில் பயனடைகின்றனர். இங்கு சரியான நீர் மேலாண்மை இல்லாததாலும் மோசமான குழாய் வடிவமைப்புகளாலும் 40% நீர் வீணாகிறது. 
 

லண்டன்
 

london


இங்கிலாந்தின் தலைநகரான லண்டனில் ஆண்டுக்கு சுமார் 600 மில்லி லிட்டர் மழைதான் பொழிகிறது. இந்த நிலை நீடித்தால் 2025க்குள் தண்ணீர் பஞ்சத்தை சந்திக்க நேரிடும். அதுமட்டுமல்லாமல் 2040களில் தண்ணீர் தேவைக்கு வேறு ஏற்பாடுகளை செய்ய இப்பொழுதே ஆயத்தமாக வேண்டும் என்று தெரிவிக்கின்றனர் வல்லுனர்கள். இங்கு மழை பெய்தாலும் 80% தேம்ஸ் மற்றும் லியா நதிகளில் கலக்கிறது.
 

டோக்கியோ
 

tokyo


ஜப்பான் தலைநகர் டோக்கியோவிலும் கடும் தண்ணீர் பஞ்சம் ஏற்பட்டுள்ளது. இங்கு வாழும் 3 கோடி மக்கள் தங்கள்  நீர் தேவைக்கு ஆறுகள், ஏரிகள் மற்றும் உருகிய பனிக்கட்டிகளை நம்பியுள்ளனர். அத்தனை வழிகளில் கிடைக்கும் நீரும் போதுமானதாக இல்லை. அதே நேரம் 3% நீரானது குழாய்களின் மூலம் சொட்டுவதால் வீணாகிறது. இங்கு 750 தனியார் நிறுவனங்கள் மற்றும் மக்களின் குடியிருப்புகளில் மழை நீரை சேகரித்து பயன்படுத்துகின்றனர். 
 

மியோமி
 

miami


அமெரிக்காவில் உள்ள புளோரிடா மாகாணம்தான் அதிகம் மழை பெய்யும் மாகாணம். ஆனால் இங்குள்ள மியோமி நகரில் கடல் நீர் மட்டத்தின் உயர்வாலும் உப்பு நீரின் ஊடுருவலாலும் தண்ணீர் வீணாகி மக்களை தண்ணீர் பஞ்சத்திற்கு தள்ளியுள்ளது.

இந்த பட்டியலைப் பார்க்கும்பொழுது சென்னையின் மழையும் நாம் வீணாக்கும் நீரும் நினைவுக்கு வருகின்றன. சென்னை இந்த பட்டியலில் இணையப்போவது எப்பொழுதோ என்ற பயமும் வருகிறது. 

Next Story

பா.ஜ.க பெண் பிரமுகரைக் கொன்று 6 துண்டுகளாக வெட்டிய கொடூரம்; விசாரணையில் பகீர் தகவல்

Published on 27/02/2024 | Edited on 27/02/2024
The a BJP woman figure passed away and into 6 pieces in karnataka

கர்நாடகா மாநிலம், சிக்பள்ளாப்பூர் மாவட்டத்தைச் சேர்ந்தவர் சுசிலாம்மா (70). இவர் கர்நாடகா மாநில பா.ஜ.க கட்சியில் நிர்வாகியாக பொறுப்பு வகித்து வந்தார். இவருக்கு 2 மகள்கள் மற்றும் ஒரு மகன் உள்ளனர். சுசிலாம்மா, பெங்களூர் நிசர்கா குடியிருப்பில் தனியாக வசித்து வந்துள்ளார். இந்த நிலையில், சுசிலாம்மா கடந்த 2 இரண்டு நாட்களுக்கு முன் வெளியே சென்றவர் வீடு திரும்பவில்லை. இதில் சந்தேகமடைந்த, அதே பகுதியில் வசிக்கும் சுசிலாம்மாவின் மகள், அக்கம்பக்கத்தினரிடம் விசாரித்து வந்துள்ளார். ஆனால், சுசிலாம்மா குறித்து எந்தவித தகவலும் கிடைக்கவில்லை. தேர்தல் வேலையாக தனது தாய் வெளியே சென்றிருக்கலாம் என்று கருதி அவரது மகள் இந்த சம்பவத்தை பெரிதுபடுத்தாமல் அப்படியே விட்டுவிட்டார் என்று கூறப்படுகிறது. 

இதற்கிடையே, சுசிலாம்மாவின் வீட்டின் அருகே இருந்த காலி இடத்தில் பிளாஸ்டிக் பீப்பாய் ஒன்று இருந்துள்ளது. அந்த பீப்பாயில் இருந்து துர்நாற்றம் வரவே, இது குறித்து அக்கம்பக்கத்தினர் போலீசாருக்கு தகவல் கொடுத்தனர். தகவல் அறிந்து சம்பவ இடத்திற்கு விரைந்து வந்த போலீசார், பிளாஸ்டிக் பீப்பாயை திறந்து பார்வையிட்டனர். அப்போது, அதில் பெண் ஒருவர் கொல்லப்பட்டு உடல் 6 துண்டுகளாக வெட்டி வைக்கப்பட்டிருந்ததைக் கண்டு அதிர்ச்சியடைந்தனர். 

உடனடியாக, அந்த உடல் பாகங்களை மீட்டு பிரேத பரிசோதனைக்காக அரசு மருத்துவமனைக்கு அனுப்பி வைத்தனர். இதனையடுத்து, இந்த சம்பவம் குறித்து போலீசார் வழக்குப்பதிவு செய்து விசாரணை நடத்தி வந்தனர். அந்த விசாரணையில், காணாமல் போன சுசிலாம்மாவின் உடல் என்பது தெரியவந்தது. மேலும், இந்த சம்பவம் தொடர்பாக சுசிலாம்மாவின் வீட்டின் அருகே வசித்து வந்த தினேஷ் என்பவரை பிடித்து விசாரணை நடத்தினர்.

அதில் அவர், முன்னுக்கு பின் முரணாக பதிலளித்துள்ளார். இதில் சந்தேகமடைந்த போலீசார் அவரிடம் கிடுக்குப்பிடி விசாரணை நடத்தியதில், பல திடுக்கிடும் தகவல்கள் கிடைத்தது. அந்த விசாரணையில், பா.ஜ.க பிரமுகரான தினேஷ், கட்சி விஷயமாக சுசிலாம்மாவின் வீட்டுக்கு அடிக்கடி சென்று அவரிடம் பேசி வந்துள்ளார். இதற்கிடையே, தினேஷ் தான் நடத்தி வந்த தொழிலில் நஷ்டம் ஏற்பட்டுள்ளது. இதனால், சுசிலாம்மாவிடம் பணம் இருப்பதை அறிந்த தினேஷ் சம்பவம் நடந்த அன்று அவரை சந்தித்து பணம் கேட்டுள்ளார். 

ஆனால், சுசிலாம்மா தினேஷுக்கு பணம் தர மறுத்துள்ளார். இதில் ஆத்திரமடைந்த தினேஷ், சுசிலாம்மாவை கொலை செய்து அவரது உடல் பாகங்களை 6 துண்டுகளாக வெட்டியுள்ளார் என்று கூறப்படுகிறது. இதனையடுத்து, சுசிலாம்மாவின் வீட்டின் அருகே காலி இடத்தில் இருந்த பிளாஸ்டிக் பீப்பாயில், சுசிலாம்மாவின் உடல் பாகங்களை போட்டு மறைத்துள்ளார் என்பது தெரியவந்தது. இதனையடுத்து, போலீசார் அவரைக் கைது செய்து தொடர்ந்து விசாரணை நடத்தி வருகின்றனர். 

Next Story

அசுத்தமான ஆடையுடன் வந்த முதியவருக்கு அனுமதி மறுப்பு; வைரலான வீடியோ

Published on 27/02/2024 | Edited on 27/02/2024
Denial of entry to an old man with dirty clothes at metro rail in karnataka

கர்நாடகா மாநிலம், பெங்களூர் நகரில் மெட்ரோ ரயில் சேவைகள் இயங்கி வருகிறது. இந்த நிலையில், கடந்த பிப்ரவரி 18ஆம் தேதி ராஜாஜி நகர் மெட்ரோ ரயில் நிலையத்தில், முதியவர் ஒருவர் அசுத்தமான ஆடைகளுடன் மெட்ரோ ரயிலில் பயணிக்க, முறையான பயணச்சீட்டு வைத்துக் கொண்டு வந்துள்ளார். இதற்கிடையே, பாதுகாப்பு மேற்பார்வையாளர் ஒருவர், அங்கு வந்திருந்த ரயில் பயணிகளிடம் சோதனை ஈடுபட்டு கொண்டிருந்தார். 

அப்போது அவர், அசுத்தமான ஆடைகளுடன் முதியவர் வந்ததால், அவரை ரயிலில் பயணிக்க அனுமதிக்கவில்லை கூறப்படுகிறது. இதனை கண்ட சக பயணிகள், பாதுகாப்பு மேற்பார்வையாளரிடம், முறையான பயணச்சீட்டு வைத்திருந்த போதும், முதியவர் ரயிலில் அனுமதிக்கப்படாதது ஏன்? என்று கேள்வி எழுப்பி வாக்குவாதத்தில் ஈடுபட்டனர். இதனால், அங்கு சற்று நேரம் பரபரப்பு ஏற்பட்டது. இது தொடர்பான வீடியோ சமூக வலைதளங்களில் வெளியாகி வைரலாகி வந்தது.

இந்நிலையில், இந்த விவகாரம் குறித்து விசாரணை நடத்திய பெங்களூர் மெட்ரோ ரயில் நிர்வாகம், முதியவரை தடுத்து நிறுத்திய பாதுகாப்பு மேற்பார்வையாளரை பணியிடை நீக்கம் செய்து உத்தரவிட்டுள்ளது. இது குறித்து பெங்களூர் மெட்ரோ ரயில் நிர்வாகம், ‘பெங்களூர் மெட்ரோ ஒரு பொது போக்குவரத்து. ராஜாஜி நகரில் நடந்த சம்பவம் குறித்து உரிய விசாரணை எடுக்கப்பட்டு, பாதுகாப்பு மேற்பார்வையாளரை பணியிடை நீக்கம் செய்து உத்தரவிடப்பட்டுள்ளது. மேலும், பயணிகளுக்கு ஏற்பட்ட சிரமத்திற்கு வருத்தம் தெரிவிக்கிறோம்’ என்று தெரிவித்துள்ளது.