Skip to main content

செண்டினல் தீவுக்கு சென்ற இளைஞரை பழங்குடியினர் கொன்றது ஏன்? - மருத்துவர் ஷாலினி தரும் உளவியல் விளக்கம்

Published on 30/11/2018 | Edited on 30/11/2018

சமீபத்தில் அந்தமான் வடக்கு செண்டினல் பகுதியில் வசிக்கும் செண்டினல் பழங்குடி மக்களால் அமெரிக்காவைச் சேர்ந்த ஜான் அலன் சாவ் என்ற 27 வயது இளைஞர் கொல்லப்பட்டார். அதில் இருந்து அந்தமானில் இருக்கும் பழங்குடிகள் யார், அவர்கள் எப்படி இருப்பார்கள், அவர்களின் வாழ்வியல் முறை எப்படிப்பட்டது, அவர்களை யார் முதலில் சந்தித்தது போன்ற பதிவுகள் தொடர்ச்சியாக வெளிவரத்தொடங்கியது. மேலும் இந்திய அரசு ஜான் அலன் சாவ் உடலை கண்டுபிடித்து மீட்டுத்தர வேண்டும் என்று அவரின் குடும்பத்தினர் வலியுறுத்தினார்கள். அதற்கான முயற்சிகள் எடுக்கப்பட்டும் அது தோல்வியில் முடிந்தது. மேலும் அவர்களை அவர்களின் வாழ்வியல் வழியிலே விட்டுவிடுங்கள் என பல மானுடவியலாளர்களும் கருத்துத் தெரிவித்துவந்தனர். அவர்களை அவர்களின் வழியிலே விட்டுவிடுவதா அல்லது மாற்றுவதா அவர்கள் ஏன் பிற மனிதர்களுடன் பழகுவதை விரும்பவில்லை ஆகிய கேள்விகளுடன் மனித பரிணாம வளர்ச்சியில் ஆழ்ந்த அறிவுடைய மனநல மருத்துவர் ஷாலினியை அனுகினோம். அவருடனான உரையாடல்...

 

 

ss

 

செண்டினல் தீவில் இருக்கும் பழங்குடி மக்களின் வாழ்வியலை அப்படியே விட்டுவிடுவது நல்லதா? அல்லது அவர்களை நாகரிக வாழ்விற்கு வர வைக்க வேண்டும் என்று நினைப்பது சரியா?
 

முதலில் நாம் வாழும் வாழ்க்கையை நாகரிகம் என்று நாம்தான் நினைக்கிறோம். அவர்களைப் பொறுத்தவரை இது நாகரிகமில்லை. அந்தத் தீவில் இருக்கும் மக்கள் அங்கு 60,000 ஆண்டுகளுக்கு மேல் வாழ்ந்து வருபவர்கள். அவர்களின் இடத்திற்குள் யாரோ ஒரு புது மனிதன் போகும்போது அவர்களை தாக்குவது என்பது இயல்புதான். மேலும் அவர்களிடத்திற்கு செல்லும்போது அவர்களை யாரோ தாக்க வருகிறார்கள் என்ற மனநிலைதான் அவர்களுக்கு இருக்கும். இது அவர்களை காத்துக்கொள்ள தற்காப்புக்காக செய்திருப்பார்கள். டார்வின், அவரின் குறிப்புகளில் அவர்  வெள்ளை நிறத்தினர் இல்லாத பகுதிகளுக்கு சென்றபோது அவரை அங்கிருப்போர்கள் பேய் என்று நினைத்து பயந்தார்கள் என்று சொல்லியிருக்கிறார். இவர்களும் அதுபோல் நினைப்பதற்கு அதிக வாய்ப்புகள் இருக்கிறது. அதுமட்டுமின்றி இந்த சம்பவம் நடந்தபின்னும் அவர்களை அப்படியே விட்டுவிடாமல் மேலும் அங்கு கப்பல்களையும் விமானங்களையும் அனுப்புவது அவர்களை இன்னும் அச்சத்திற்கு உள்ளாக்கும்.

 

பொதுவாக வெளியுலக தொடர்பற்று இருக்கும் பழங்குடியினருக்கு நோய் எதிர்ப்பு சக்தி என்பது குறைவு. காரணம் அவர்கள் இருக்கும் இடத்தில் என்ன வகையான கிருமிகள் இருக்குமோ அதை எதிர்க்கும் அளவுக்குதான் அவர்களின் நோய் எதிர்ப்பு சக்தி இருக்கும். இவர் அங்கு செல்லும்போது ஒரு மனிதன் மட்டும் செல்கிறான் என்று அர்த்தமில்லை, அவனுடன் மில்லியன் கணக்கிலான புது கிருமிகளை எடுத்துச் செல்கிறான். இந்த விஷயம் அடிப்படை அறிவியல் தெரிந்த அனைவருக்குமே தெரியும். அவருக்குத் தெரிந்திருக்காதா? அவருக்கும் இது தெரிந்திருக்கும், ஆனால் யாரும் போகமுடியாத இடத்திற்கு தான் சென்றுள்ளேன் என்ற துடுக்குத்தனமான உணர்ச்சியில் இந்தக் காரியத்தை அவர் செய்திருப்பார்.

 

வெளியுலக தொடர்பற்ற பழங்குடியினர்களை அவர்களின் வாழ்வியலிலே விடுவதுதான் சரி என்று ஐநா சபை கூறுகிறது. அதையேதான் நானும் சொல்கிறேன். அவர்களை ஏன் அப்படியே விட்டுவிட வேண்டும் என்றால், நம்மிடம் இருக்கும் கிருமிகளால் அவர்கள் அழிந்துபோவதற்கு வாய்ப்புகள் இருக்கிறது. இதற்கு வரலாற்று சான்றுகளும்கூட இருக்கிறது.

 

கொலம்பஸ் அமெரிக்காவிற்கு சென்றார் என்று படித்திருப்போம், அவர் அங்கு மதத்தை போதிக்கவோ இறைத்தூதுவராகவோ செல்லவில்லை. மாறாக வெட்டிக் கொன்று வேட்டையாடுவதற்குத்தான் அங்கு சென்றிருக்கிறார். ஆனால் நாம் அதை வீர சாகசமாக பேசிகொண்டிருக்கிறோம். மேலும் அவர் அங்கு சென்றபின் அங்கிருந்த எத்தனை ஆண்கள் கொல்லப்பட்டிருக்கிறார்கள், எத்தனை பெண்கள் கற்பழிக்கப்பட்டிருக்கிறார்கள், எத்தனை இனங்கள் அழிக்கப்பட்டன என்று அந்த வரலாற்று புத்தகங்களை படித்தால் நமக்குத் தெரியும். இதைத்தான் வரலாற்றில் பல ஆண்கள் செய்திருக்கிறார்கள். இபோதுதான் நாம் அவரவர் வாழ்க்கையை அவரவர் பார்த்துகொண்டு அமைதியாக வாழ்வோம் என்ற நிலைக்கு வந்திருக்கிறோம். இபோதும் ஒருவர் மற்றோருவர் இடத்திற்கு சென்று தொந்தரவு செய்கிறார் என்றால் அது தவறு. 

 

நாம்தான் நாகரிகமாகிவிட்டோமே அதனால் அவர்களையும் நம் வழியில் கொண்டுவந்து அவர்களையும் நாகரிகமாக்கிவிடாலாம் என்று நினைப்போம். ஆனால் உண்மையில் இயற்கையுடன் யார் ஒத்துப்போகிறார்களோ அவர்கள்தான் எந்த சூழ்நிலையையும் ஏற்றுக்கொண்டு வாழமுடியும். உதாரணத்திற்கு 2004-ல் சுனாமி வந்தபோது தமிழ்நாட்டில் இருக்கும் பெரும்பான்மை கடலோர மக்கள் இறந்தனர். ஆனால் அந்தமானில் இருக்கும் பழங்குடியினர் யாரும் இறக்கவில்லை. காரணம் அவர்கள் இயற்கையுடன் ஒத்துவாழ்வதால் சுனாமிவருவதற்கு முன்பே அவர்களுக்கு அங்கு ஏதோ நடக்கப்போகிறது என்று தெரிகிறது, அதனால் அவர்கள் அங்கிருக்கும் மரங்களின்மீது ஏறி உயிர் தப்பித்துவிடுகிறார்கள்.

 

பெரிய அறிவியல் அறிஞர்களும்கூட வேற்று கிரகத்தில் இருந்து பூமிக்கு வரும் உயிர்கள் நாம் இருக்கும் நகரத்தில் வாழ்வதற்கு விரும்பாது, பழங்குடி மக்கள் இருக்கும் இடத்தில்தான் வாழ விரும்பும் என்கிறார்கள். காரணம் அவர்கள்தான் எந்த இயற்கை சீற்றத்தையும் சமாளித்து உயிர் பிழைப்பார்கள்.

 

 

ss

 

 

அவர்களின் மக்கள்தொகை தோராயமாகத்தான் சொல்லப்படுகிறது. இருந்தாலும் அவர்களை அப்படியே விட்டுவிட்டால் அவர்களின் மக்கள்தொகை இன்னும் குறைந்துவிடாதா?
 

அவர்களின் இனவிருத்தி நல்லபடியாக நடக்கிறது என்றால் அவர்களின் மக்கள்தொகை அதுவாகவேதான் இருக்கும். அது எப்போது குறையும் என்றால், வெளிமனிதர்கள் அங்கு செல்லும்போது ஏற்படும் கிருமிதொற்றாலும், மேலும் அவர்கள் சொந்தத்தினுள்ளே திருமணம் செய்தாலும்தான்  குறைந்துபோகும். ஒருவேளை அவர்கள் ஒரு பரந்த வெளியில் இருக்கிறார்கள், ஒரு குடி ஒரு புறமும் மற்றொரு குடி நூறு கி.மீ தள்ளியும் இருந்து, பெண் கொடுத்து பெண் எடுக்கும் நிலைமை இருந்தால் மக்கள் தொகை குறைய வாய்ப்பில்லை.

 

பொதுவாக அவர்களின் மொழி எப்படி இருக்கும், அவர்கள் எப்படி பேசிகொள்வார்கள்? அதை நாம் யூகிக்க முடியுமா?
 

அவர்கள் இன்னும் ஆதிகாலத்தில் இருந்த மொழிகளின் தொடர்ச்சியைத்தான் பேசுவார்கள். மேலும் மொழிகளை பற்றிய ஆராய்ச்சி என்ன சொல்லுகிறது என்றால், மக்கள் முதலில் பழங்குடி மொழியில்தான் பேச ஆரம்பித்தார்கள், அதன்பின் தட்பவெப்ப நிலைக்கு ஏற்றார்போல் வாய்களின் அளவு திறந்து மொழி வளர்ந்தது என்கிறார்கள். உதாரணத்திற்கு பனிப் பிரதேசத்தில் இருப்பவர்களால் வாயை அதிகம் திறக்கமுடியாது, அப்படித் திறந்தால் குளிர் காற்று அவர்கள் வாய்க்குள் போகும். அதேபோல் ஆசியா மற்றும் ஆப்ரிக்கா போன்ற இடங்களில் இருப்பவர்களால் நன்றாக வாயைத் திறந்து பேச முடியும். நமது மொழிகள் அதற்கேற்ப இருக்கின்றன.

 

 

 

Next Story

“இது இனப்படுகொலைக்குச் சமம்” - இந்திய அரசை எச்சரிக்கும் ஆர்வலர்கள்!

Published on 23/02/2024 | Edited on 23/02/2024
andaman and nicobar islands shompen people issue

இந்தியாவின் யூனியன் பிரதேசமாக உள்ள அந்தமான் நிக்கோபார் தீவுகள் வங்கக்கடலில் அமைந்துள்ளது. இங்கு மொத்தம் 572 குறுந்தீவுகள் உள்ளன. இதில் ஏறத்தாழ 36 தீவுகளில் மக்கள் வசித்து வருகின்றனர். இங்கு சில தீவுகளில் இன்னமும் பழங்குடி இனத்தைச் சேர்ந்தவர்கள் வாழ்ந்து வருகின்றனர். அதன் காரணமாக சில தீவுகள் தடை செய்யப்பட்ட பாதுகாப்பு தீவுகள் என இந்திய அரசால் அறிவிக்கப்பட்டு, அங்கு வெளிநபர்கள் செல்ல தடையும் விதிக்கப்பட்டுள்ளது. 

இப்படி தடை செய்யப்பட்ட செண்டினல் பழங்குடியின மக்கள் இருக்கும் தீவுக்கு கடந்த 2018ம் ஆண்டு ஜான் அலன் சாவ் (27) எனும் மத போதகர் ஒருவர் அனுமதியின்றிச் சென்று, அங்கு செண்டினல் பழங்குடியினரால் கொல்லப்பட்டார். இந்த சம்பவம் நடந்ததை அடுத்து சில மாதங்கள் அந்தமானில் இருக்கும் பழங்குடியின மக்கள் குறித்தும் அந்தத் தீவுகள் குறித்தும் பொதுவெளியில் பரவலாக பேசப்பட்டுவந்தது. 

andaman and nicobar islands shompen people issue

தற்போது, இந்திய அரசு மேற்கொண்டுள்ள புதியத் திட்டத்தினால் வங்கக்கடலில் அமைந்துள்ள நிக்கோபார் தீவு குறித்தான பேச்சுகள் எழுந்துள்ளன. 1000 சதுர கிலோமீட்டர் பரப்பளவு கொண்ட நிக்கோபார் தீவில் 9 பில்லியன் அமெரிக்க டாலர்களை முதலீடு செய்ய இந்திய அரசு திட்டமிட்டுள்ளது. இந்த 9 பில்லியன் டாலர் முதலீடு மூலம் நிக்கோபார் தீவில் ராணுவ முகாம், வணிக மேம்பாடு, சரக்கு துறைமுகம், ராணுவம் மற்றும் பயணிகள் விமானநிலையமும் அமைக்கத் திட்டமிடப்பட்டுள்ளது. இந்தத் திட்டத்திற்கு மெகா திட்டம் என பெயரிடப்பட்டுள்ளது. இதன் மூலம், சீன வளர்ச்சிக்கு எதிராக இந்தியாவின் வளர்ச்சியை நிலை நிறுத்த இந்த மெகா திட்டம் அமல்படுத்தப்படவுள்ளது. இந்தத் தீவை இந்தியாவின் ஹாங் காங் எனும் அளவிற்கு மேம்படுத்தவும் இந்தத் திட்டத்தில் முடிவு செய்யப்பட்டுள்ளது. இந்தத் திட்டங்கள் மூலம் அங்கு மக்கள் தொகையும் அதிகளவில் பெருகும் என இந்திய அரசாங்கம் எண்ணுகிறது. 

கடந்த 20ம் தேதி இந்தியக் குடியரசுத் தலைவர் திரௌபதி முர்மு, இந்தியாவின் தெற்கு முனையான நிக்கோபார் தீவில் இருக்கும் இந்திரா பாய்ண்டுக்குச் சென்றுவந்தார். இது தொடர்பான புகைப்படங்களையும் அவர் தனது எக்ஸ் பக்கத்தில் பதிவிட்டார். 

andaman and nicobar islands shompen people issue

இந்திய அரசின் இந்த முடிவிற்கு தற்போது இயற்கை ஆர்வலர்கள், விஞ்ஞானிகள், சமூக அமைப்புகள் தங்களது கண்டனங்களையும் எதிர்ப்பையும் பதிவு செய்துவருகின்றனர். அந்த எதிர்ப்பில் அவர்கள், இந்தத் திட்டம் அங்கு வசிக்கும் பூர்வக்குடி பழங்குடி மக்களுக்கு பேரழிவை ஏற்படுத்தும் என அச்சம் கொள்கின்றனர். 

உலகில் உள்ள 13 நாடுகளைச் சேர்ந்த 39 ஆய்வாளர்கள் அவர்கள் அச்சம் குறித்தும், நிக்கோபார் தீவில் வசிக்கும் பழங்குடி இனமான சோம்பென் இன மக்களை காக்கவும் குடியரசுத் தலைவர் திரௌபதி முர்முவுக்கு கடிதம் ஒன்றையும் எழுதியுள்ளனர். அவர்கள் எழுதியுள்ள கடிதம்:

மரியாதைக்குரிய குடியரசுத் தலைவர் முர்மு அவர்களுக்கு, 

இனப் படுகொலை விவகாரங்களில் நிபுணத்துவம் பெற்ற நாங்கள், இந்தக் கடிதத்தின் மூலம் எங்களின் வருத்தத்தையும் பெரும் கவலையையும் தெரிவிக்க விரும்புகிறோம். இந்திய அரசு நிக்கோபார் தீவில் மேற்கொள்ளப்போகும் திட்டத்தின் மூலம், அங்கு வசிக்கும் பழங்குடி சமூகமான சோம்பென் இனம் அழியும் அபாயம் ஏற்படும். இந்தியாவின் ஹாங் காங் எனும் அழைக்கப்படும் திட்டத்தை ஒன்றிய அரசு அமல்படுத்துவது, சோம்பென் இனத்தை இனப்படுகொலை செய்வதற்கு சமம். இயற்கையும் வளமும் நிறைந்த நிக்கோபார்த் தீவில் பல நூற்றாண்டுகளாக சோம்பென் பழங்குடி மக்கள் வெளியுலக தொடர்பு ஏதும் இன்றி அமைதியான வாழ்வை வாழ்ந்துவருகின்றனர். 

andaman and nicobar islands shompen people issue

ராணுவ முகாம், வணிக மேம்பாடு, சரக்கு துறைமுகம், ராணுவம் மற்றும் பயணிகள் விமானநிலையம், தொழிற்பேட்டை, எரிசக்தி நிலையம் உள்ளிட்ட திட்டங்களை செயல்படுத்துவது சோம்பென் இன மக்களுக்கு மரண தண்டனை கொடுப்பதற்கு சமம். இது சர்வதேச இனப்படுகொலையாக கருதப்படும். இந்தத் திட்டத்தின் மூலம், அந்தத் தீவில் 8,000% அளவிற்கு அதாவது, 6,50,000 வரை மக்கள் தொகை கூடும். அதேசமயம், பூர்வக்குடி மக்களான சோம்பன் இன மக்கள் தொகை கடும் அழிவை சந்திக்கும். 

சோம்பென் இன மக்களுக்கு மற்றொரு மாபெரும் அச்சுறுத்தலாக இருக்கப்போவது, குறைவான நோய் எதிர்ப்பு சக்தி கொண்ட அவர்களிடத்தில் நம்மிடமிருந்து பரவக்கூடிய தொற்று எளிதில் அவர்களை பாதிக்கக்கூடும். இதன் மூலம் அவர்கள் பெரும் அளவில் மரணிக்க நேரிடும். அவர்களை அழிவில் இருந்து காப்பதற்கு இந்தத் திட்டத்தை கைவிட வேண்டும். எனவே நாங்கள், இந்திய அரசையும், இது தொடர்புடைய அதிகாரிகளையும் இந்த மெகா திட்டத்தை உடனடியாக கைவிடுமாறு கேட்டுக்கொள்கிறோம். எனத் தெரிவித்துள்ளனர். 

இப்படியான எதிர்ப்புகள் எழுந்துவரும் நிலையில், ஒன்றிய துறைமுகம் மற்றும் கப்பல் போக்குவரத்துத் துறை அமைச்சர் சர்பனண்டா சோனாவால், எதிர்ப்புகள் எழுவது உண்மைதான் ஆனால், நாங்கள் அதற்கு விளக்கம் கொடுத்துவிட்டோம். இந்தத் திட்டத்தை செயல்படுத்துவதில் மாற்று சிந்தனையே இல்லை. என செய்தியாளர்களிடம் தெரிவித்துள்ளது. இதன் மூலம், எதிர்ப்புகள் வந்தாலும் இந்திய அரசு நிச்சயம் இந்தத் திட்டத்தை செயல்படுத்தும் என்பது உறுதியாகியுள்ளது. 

அதேபோல் பழங்குடியினர் நல அமைச்சர் அர்ஜூன் முண்டா, “இந்தத் திட்டத்தின் ஒவ்வொரு அம்சமும் பல்வேறு அமைச்சகங்களால் மிகவும் தீவிரமாகப் பார்க்கப்பட்டது. அந்த இடம் மற்றும் அந்த மக்களின் புனிதத்தன்மையைப் பேணுவதற்கு இந்தத் திட்டம் மிகுந்த முன்னெச்சரிக்கைகளுடன் செயல்படுத்தப்படும்” என்று தெரிவித்துள்ளார்.