Skip to main content

‘அவங்களே திருந்திருவாங்க; கண்டுக்காதீங்க!’ - அமைச்சரின் தலையீட்டை போட்டுடைத்த ஆட்சியர்!

Published on 24/02/2021 | Edited on 24/02/2021

 

Virudhunagar Achankulam crackers accident collector and minister

 

‘மாவட்ட ஆட்சியர்களை ஆட்சியாளர்கள் சுதந்திரமாகச் செயல்பட விடுவதில்லை..’ என்று பொதுவாக விமர்சனம் எழும் நிலையில், பட்டாசு ஆலை உரிமையாளர்களுடனான ஆய்வுக் கூட்டத்தில், விருதுநகர் மாவட்ட நிர்வாகத்தில் தமிழக பால்வளத்துறை அமைச்சர் கே.டி.ராஜேந்திரபாலாஜியின் தலையீடு குறித்து, வெளிப்படையாகவே பேசினார், விருதுநகர் மாவட்ட ஆட்சியர் கண்ணன். அதனால் ஏற்பட்ட பரபரப்பில், மைக் ஆஃப் செய்யப்பட்டு, செய்தியாளர்கள் வெளியேற்றப்பட்டு, ஆய்வுக்கூட்டத்தை ‘ரகசியமாக’ நடத்தியதாக,  சர்ச்சை ஏற்பட்டுள்ளது.  

 

கடந்த 12-ஆம் தேதி, அச்சங்குளம் பட்டாசு ஆலையில் வெடி விபத்து ஏற்பட்டு, 21 பேர் பலியாகி, 30-க்கும் மேற்பட்டோர் காயம் அடைந்ததைத் தொடர்ந்து, விருதுநகர் மாவட்ட ஆட்சியர் அலுவலகத்தில் நடந்த ஆய்வுக்கூட்டத்தில், அமைச்சர் ராஜேந்திரபாலாஜியை பக்கத்தில் வைத்துக்கொண்டே, ஆட்சியர் கண்ணன் இப்படி பேசினார்; “கடைசியா நடந்த விபத்துலகூட பார்த்தீங்கன்னா.. சின்ன சின்ன வயலன்ஸ் இருந்தா வார்ன் பண்ணிட்டு வந்திருவோம். டெய்லி பிடிச்சோம். பட்டாசுத் தொழில் கொஞ்சம் சிரமத்துல இருக்கிறதுனால பார்த்துக்கிட்டு இருக்கோம். அமைச்சர் நீங்க திரும்பத் திரும்ப சொல்றீங்க.. ‘வயலன்ஸ் எல்லாம் வந்து அவங்களுக்கு எக்ஸ்ப்ளெய்ன் பண்ணுங்க.. அவங்களே திருந்திருவாங்க.. நெருக்கிப் பிடிக்காதீங்க’ன்னு.. நீங்க சொல்றதுனாலதான், நாங்களும் பெருசா எதுவும் பண்ணல.” என்று விளக்கம் தந்தார். 

 

தன்னுடைய பெயர் வெளியிடக்கூடாது என்ற நிபந்தனையுடன் நம்மிடம் பேசிய பட்டாசு ஆலை உரிமையாளர் ஒருவர், “அமைச்சர் சொல்லுறத கேட்கிறதுக்கா கண்ணன் சார் கலெக்டரா இருக்காரு? என்னமோ, ராஜேந்திரபாலாஜி மந்திரியானதுக்கு அப்புறம்தான் பட்டாசு விபத்துகள் நடக்கிற மாதிரி பேசிருக்காரு. என்கிட்ட புள்ளிவிபரம் இருக்கு. ராஜேந்திரபாலாஜி அமைச்சரானதுக்கு முன்னால உள்ள பத்து (2000 – 2010) வருஷத்துல, 162 விபத்து நடந்திருக்கு. 201 பேர் செத்திருக்காங்க. அப்பல்லாம், எந்த மந்திரி தலையிட்டு, அதிகாரிகள் ஆய்வு நடத்தாம இருந்தாங்க? ஆய்வுங்கிறது சும்மா கண்துடைப்புக்குத்தான். ஆய்வுன்னு சொல்லி லஞ்சம் லஞ்சமா வாங்கிக் குவிக்கிறதுதான் அதிகாரிகளோட வேலையே. எங்கே விபத்து நடக்கும்? எத்தனை பேரு சாவாங்க? அதை வச்சு எவ்வளவு பணம் பிடுங்கலாம்? திரும்பவும் அந்த ஃபேக்டரிய ஓட்டுறதுக்கு எம்புட்டு லஞ்சம் வாங்கலாம்? இந்தக் கணக்கு மட்டும்தான் அதிகாரிங்க மண்டைக்குள்ள ஓடும்.

 

இன்னொரு விஷயம். உலக மகா நீதிமானே வந்து பட்டாசு ஆலை நடத்தினாலும், விதிமீறல் இல்லாம நடத்த முடியாது. அந்த அளவுக்கு சிக்கலான தொழில் இது. தடை பண்ணனும்னு சுப்ரீம் கோர்ட் வரைக்கும் போயி, நொம்பலப்பட்டு இருக்கோம். கிட்டத்தட்ட பட்டாசுத் தொழிலே அழியிற நிலைமைக்கு வந்திருச்சு. ஆனாலும், அதிகாரிங்க ஆய்வுன்னு சொல்லி,  நோட்டீஸ் விட்டு பணம் பறிக்கிற வேலையை விடல. இப்படி ஒரு நிலைமையில நாங்க இருக்கிறப்ப, கலெக்டர்கிட்ட அமைச்சர் ‘பட்டாசு ஆலை நடத்துறவங்க பாவம் சார்.. ரூல்ஸ்ன்னு கறார் பண்ணி அவங்கள தொந்தரவு பண்ணாதீங்க. நடவடிக்கைக்குப் பதிலா, என்னென்ன விதிமீறல்ங்கிறத சுட்டிக்காட்டி, அதைச் சரிபண்ணச் சொல்லுங்க’ன்னு எங்க சார்பா கேட்டுக்கிட்டாரு. இந்தத் தப்பை எங்களுக்காகத்தான் அமைச்சர் பண்ணுனாரு. 

 

இன்னொரு விஷயமும் இருக்கு. பெரிய ஃபேக்டரிகள்ல பெரும்பாலும் விபத்து நடக்கிறது இல்ல. ஏன்னா, அவங்களுக்குத் தெரியும். இதெல்லாம் வேகவேகமா அவசர அவசரமா பண்ணுற தொழில் இல்லைன்னு. கூடிய மட்டிலும் விதிகளை மீறுவதில்லை. சின்ன ஃபேக்டரிகாரங்க, குறிப்பா கள்ளத்தனமா வீடுகள்ல பட்டாசு தயாரிச்சிட்டு, இப்ப கொஞ்சம் முன்னுக்கு வந்து,  குத்தகைக்கு எடுத்து, ஃபேக்டரி நடத்துறவங்க பேராசை பிடிச்சவங்களா இருக்காங்க. குறுகிய காலத்துல நெறய சம்பாதிக்கணும்னு, விதிகளைக் காற்றில் பறக்கவிட்டு, அதிகமா உற்பத்தி பண்ணுறதுலயே குறியா இருக்கிறாங்க. 21 பேர் பலியான அச்சங்குளம் விபத்துகூட, அந்தமாதிரி நடந்ததுதான். 

 

லட்சக்கணக்கான பட்டாசுத் தொழிலாளர்களை ஓட்டு வங்கியா அரசியல்வாதிகள் பார்க்கிறாங்க. பட்டாசுத் தொழிலைப் பாதுகாப்போம்னு தேர்தல் நேரத்துல ஆளாளுக்கு கிளம்புறாங்க. எடப்பாடி பழனிசாமியும், ராஜேந்திரபாலாஜியும்கூட பட்டாசுத் தொழிலின் பாதுகாவலர்களாக தங்களை விளம்பரப்படுத்துறாங்க. பசுமைப் பட்டாசுன்னு சொல்லி சென்ட்ரல் கவர்மெண்டும்  ரொம்பவே குழப்புது. 

 

பட்டாசுத் தொழிலாளர்கள் சாகணும்னா வேலைக்கு வர்றாங்க? ஆபத்தான தொழில்னு தெரிஞ்சே ரிஸ்க் எடுக்கிறாங்க. பட்டாசு ஆலை நடத்துறவங்களும், விபத்து நடக்கணும்னு தெரிஞ்சே எதுவும் பண்ணுறதில்ல. ஏன்னா, ஒரு ஃபேக்டரில விபத்து நடந்துச்சுன்னா அந்த உரிமையாளருக்கு வாழ்க்கையே இல்லாம போயிரும்.  ஆனாலும், தொழிலாளர்களின் கை மீறி விபத்துகள் நடந்து, அநியாயத்துக்கு உயிர்களும் பறிபோகுது.” என்று நொந்துகொண்டார்.

 

Virudhunagar Achankulam crackers accident collector and minister

 

நாம் விருதுநகர் மாவட்ட ஆட்சியர் கண்ணனிடம் பேசினோம். “அமைச்சர் தவறுகளுக்குத் துணை போறவர் கிடையாது. சிறு தவறுகளைக் கண்டுக்காதீங்கன்னு  ஒரு  ‘ரெக்வஸ்ட்’ வைப்பாரு. சின்ன தவறுகளா இருந்தா கொஞ்சம் பாருங்க சார்ன்னு சொல்லுவாரு. உதாரணத்துக்கு,  மஸ்டர் ரோல் இல்லைன்னா எழுதி வைங்க. இந்த மாதிரி சின்ன விஷயங்களுக்கு சஸ்பெண்ட் பண்ணாதீங்க. அன்னைக்கு அவங்களுக்கு வேலை கெட்டுப் போயிரும்பாரு. 50 பேரைக் கூட்டிட்டுப் போற வண்டியில 60 பேரைக் கூட்டிட்டுப் போகும்போது நிப்பாட்டினா, விடுங்க சார்.. கூட்டிட்டுப் போகட்டும்பாரு. மற்றபடி, அரசு அதிகாரிகள் எடுக்கிற நடவடிக்கையில அவங்க தலையிட முடியாது. போன வாரம் ஒரு கம்பெனில மூணு பசங்கள வச்சிருந்தாங்க. அதெல்லாம் சஸ்பெண்ட் பண்ணிருக்கோம். அடிப்படைத் தவறுகள் எது இருந்தாலும் நாங்க கடுமையாத்தான் நடவடிக்கை எடுத்துட்டு இருக்கோம். இதுல எந்த காம்ப்ரமைஸும்  பண்ணுறது கிடையாது. எத்தனை ஃபேக்டரிய சஸ்பெண்ட் பண்ணிருக்கோம்னு ஒரு டேட்டா எல்லாம் கொடுத்துட்டோமே. இது யாரு கிளப்பிவிட்டதுன்னு தெரியல. எந்த ஒரு மீட்டிங்கிலும், பத்திரிக்கையாளர்களைக் கவர் பண்ணிட்டு வெளியே போங்கன்னு ரெக்வெஸ்ட் பண்ணுறது வழக்கம்தான். முதல் 5 நிமிஷம் கவர் பண்ணிக்கோங்க. அப்புறம் மீட்டிங் முடிஞ்சதும், நடந்தது என்னங்கிறத, உங்களக் கூப்பிட்டு சொல்றோம்னு சொல்வோம். இதுக்கு ஏன் கோவிச்சிக்கிட்டாங்கன்னு தெரியல? மற்றபடி ஒண்ணும் இல்ல சார்.. இது வழக்கமான நடைமுறைதான்.” என்றார் கூலாக.   

 

Virudhunagar Achankulam crackers accident collector and minister


தமிழக பால்வளத்துறை அமைச்சர் கே.டி.ராஜேந்திரபாலாஜியோ, “அரசு நிர்வாகத்தில் நான் தலையிடுவதில்லை. பட்டாசுத் தொழிலுக்கும், பட்டாசுத் தொழிலாளர்களுக்கும் என்னால் முடிந்த வரையிலும் நல்லது மட்டுமே செய்து வருகிறேன். தொழிலாளர்களின் பாதுகாப்பை உறுதிபடுத்துவதற்காக, 8 பேர் கொண்ட மத்திய குழு, அனைத்து பட்டாசு ஆலைகளிலும் ஆய்வு செய்ய உள்ளது. அச்சங்குளம் பட்டாசு வெடி விபத்தில் தாய் தந்தையை இழந்த 12 வயது சிறுமி நந்தினிக்குத் தமிழக அரசு அளித்த ரூ.6 லட்சம் வங்கிக் கணக்கில் சேமிக்கப்பட்டுள்ளது. இந்தக் குழந்தையை என் சொந்தக் குழந்தையாகவே பாவித்து அனைத்து உதவிகளும் செய்து கொடுப்பேன் என்று வாக்குறுதி அளித்திருக்கிறேன். அவளுடைய படிப்புச் செலவுக்கு, என்னுடைய பங்களிப்பாக ரூ.5 லட்சம் கொடுத்திருக்கிறேன். விருதுநகர் மாவட்டத்தில் பட்டாசு வெடி விபத்தில் பாதிக்கப்பட்ட பட்டாசுத் தொழிலாளர்களுக்கு நான் பாரபட்சமின்றி உதவுவேன். இனிமேல், இதுபோன்ற விபத்துகள் ஏற்படாமல் இருப்பதற்கு அரசு உரிய நடவடிக்கைகளை மேற்கொள்ளும்.” என்றார். 

 

சம்பிரதாயமாகவே சகலமும் நடப்பதால், விபத்துகளும் உயிர்ப் பலிகளும் விதிமீறலால் தொடர்கின்றனவே! 

 

 

 

Next Story

பிரச்சாரப் பாசாங்குகள்! மக்களின் தீர்ப்பு!

Published on 06/06/2024 | Edited on 06/06/2024
Election atrocities in Virudhunagar constituency

பாராளுமன்றத் தேர்தல் முடிவுகளை அலசி ஆராய்ந்து சாமானிய அரசியல்  நோக்கர்கள் சிலர் வெளிப்படுத்திய கருத்துகள் இவை..

தோல்வி பயத்தால் உறவுகளைக் களமிறக்கி ஆழம் பார்த்த தலைவர்கள்!

தருமபுரியில் பா.ம.க.வேட்பாளராக அன்புமணி ராமதாசும், விருதுநகர் தொகுதியில் தேமுதிக வேட்பாளராக பிரேமலதாவும், பா.ஜ.க. வேட்பாளராக சரத்குமாரும் ஏன் போட்டியிடவில்லை என்ற கேள்விக்கு தேர்தல் முடிவுகள் மூலம் பதில் கிடைத்துள்ளது.

நோட்டாவுக்கு கீழ் ஓட்டு வாங்கும் பா.ஜ.க.வுடன் கூட்டணி வைப்பது தற்கொலைக்கு சமம் என்று டிடிவி தினகரன் போன்றவர்கள் விமர்சித்த நிலையில், இந்தப் பாராளுமன்றத் தேர்தலில் பா.ம.க. ஏன் பா.ஜ.க.வுடன் கூட்டணி வைத்தது? அன்புமணி ராமதாஸ் தன் மனைவி சவுமியாவை ஏன் தேர்தலில் நிறுத்தினார்? தன் கட்சியை பா.ஜ.க.வில் கரைத்துவிட்டு, மனைவி ராதிகாவை ஏன் விருதுநகர் தொகுதியில் சரத்குமார் போட்டியிட வைத்தார்? ஓபிஎஸ். டிடிவி தினகரன், சசிகலாவை ஓரம் கட்டிய பலவீனமான  அதிமுகவுடன் கூட்டணி சேர்ந்து,  தன் மகன் விஜயபிரபாகரனை ஏன் விருதுநகரில் தேமுதிக வேட்பாளராக பிரேமலதா நிறுத்தினார்?

வெற்றி வாய்ப்பில் சந்தேகம் எழுந்ததாலேயே தாங்கள் தேர்தலில் போட்டியிடாமல்,  உறவுகளைக் களமிறக்கி, அவர்களுக்கு தோல்வி திசையைக்காட்டியுள்ளனர். கூட்டணிப் பேச்சுவார்த்தையின் போது, ராஜ்யசபா சீட்டுக்கு அடிபோட்டதும் இந்தச் சுயநலத்தின் வெளிப்பாடுதான்.

ஆன்மிக அரசியலும் பொய்ப் பரப்புரைகளும் தோற்றுப்போயின!

தியானம், அங்கப்பிரதட்சணம், மடிப்பிச்சை நாடகம் எல்லாம் வேலைக்கு ஆகாதவை என்பதை விருதுநகர் பாராளுமன்றத் தொகுதியின் தேர்தல் முடிவுகள் நிரூபித்துள்ளன.

Election atrocities in Virudhunagar constituency

இரவோடு இரவாக ச.ம.க.வை கலைத்துவிட்டு, தன் மனைவி ராதிகாவுக்காக, விருதுநகர் நாடாளுமன்றத் தொகுதியை பா.ஜ.க. தலைமையிடம் கேட்டுப்பெற்றவர் சரத்குமார். சென்னையிலிருந்து கிளம்பிய சரத்குமாரும் ராதிகாவும் விருதுநகர் தொகுதியில் தங்களுக்குத் தெரிந்த  சினிமா பாணி பிரச்சாரங்களையே தொடர்ந்து மேற்கொண்டனர்.

சூர்யவம்சத்தில் தேவயானியைக் கலெக்டர் ஆக்கியதுபோல் என்னை என் கணவர் சரத்குமார் எம்.பி.யாக்குவார் என்றார் ராதிகா. நடிகர், நடிகை என்பதால் இவ்விருவரையும் வேடிக்கை பார்ப்பதற்காகக் கூட்டம் கூடியதே தவிர, ஆதரிப்பதற்காக அல்ல. வெற்றிபெற்று எம்.பி.யானால் விருதுநகரில் ராதிகா தங்குவாரா?  வழக்கம்போல் ஷூட்டிங்கிற்காக சென்னை போய்விடுவாரா? என்ற கேள்வி எழுந்தபோது,  “நான் வெற்றிபெற்றால் எங்கும் போகமாட்டேன். என் வீடு விருதுநகரில் இருக்கிறது. இங்குதான் இருப்பேன்.” என்றார் ராதிகா.

இதைக்கேட்ட விருதுநகர் வாக்காளர்கள், நமக்குத் தெரியாமல் ராதிகாவுக்கு விருதுநகரில் வீடு இருக்கிறதா? என்று  மண்டை காய்ந்தனர். பிறகுதான் தெரிந்தது, சரத்குமாரின் நண்பர் வீட்டை, தன் வீடு என்று ராதிகா கதைகட்டியது. இத்தகைய பொய்ப் பிரச்சாரம் வாக்காளர்களிடம் எப்படி எடுபடும்?“ அண்ணே, அண்ணியைக் கூட்டிக்கிட்டு கோயில் கோயிலா போங்க. ஒர்க்-அவுட் ஆகும்.” என்று உள்ளூர் பாஜகவினர் வழிகாட்ட, ஆன்மிக அரசியலைக் கையில் எடுத்தார் சரத்குமார். விருதுநகர் பராசக்தி மாரியம்மன் கோவில், திருப்பரங்குன்றம் முருகன் கோவிலுக்கெல்லாம் சென்று சாமி கும்பிட்டார். திருமங்கலம் தொகுதிக்கு உட்பட்ட கப்பலூரில்  பிரச்சாரம் செய்தபோது மடிப்பிச்சையும் எடுத்தார் ராதிகா.  

Election atrocities in Virudhunagar constituency

சிவகாசியில் நம்பர் பிளேட் இல்லாத புல்லட்டில்  ராதிகாவைப் பின்னால்  அமரவைத்து, ஹெல்மெட் அணியாமல்தானே ஓட்டிச்சென்று பரபரப்பைக் கிளப்பினார் சரத்குமார். இவ்வாறாகப் பிரச்சாரத்தை முடித்துவிட்டு இருவரும் சென்னை சென்றுவிட்ட நிலையில், எக்ஸிட்-போல் முடிவுகள்  தங்களுக்குச் சாதகமாக இல்லை என்பதை அறிந்தனர். மனைவி ராதிகாவின் எம்.பி. கனவு, தன்னுடைய பா.ஜ.க. மாநிலத்தலைவர் கனவெல்லாம் சீட்டுக்கட்டுகளாக சரிந்தபோது, அதிர்ந்து போனார் சரத்குமார். அந்த நேரத்தில்தான், மோடியின் கன்னியாகுமரி தியானம் சரத்குமாரின் மனக்கண்ணில் மின்னியது. மீண்டும் ஆன்மிகக் குளத்தில் குதித்து மூழ்க முடிவெடுத்தார்.

Election atrocities in Virudhunagar constituency

வாக்கு எண்ணிக்கை நடப்பதற்கு இரண்டு நாட்களுக்கு முன், சட்டையைக் கழற்றிவிட்டு, விருதுநகர் பராசக்தி மாரியம்மன் கோவிலில் உருண்டு புரண்டு அங்கப்பிரதட்சணம் செய்தார். இதனைத் தொடர்ந்து, ஸ்ரீவில்லிபுத்தூர் ஆண்டாள் கோவிலிலும் சாமி கும்பிட்டனர். சரத்குமாரிடம் மீடியாக்கள் கேள்வி கேட்டன. இது “மனைவி ராதிகாவின் வெற்றிக்காக அல்ல. பிரதமர் மோடியின் வெற்றிக்காக பிரார்த்தனை செய்தேன்.” என்று சமாளித்தார்.   

ஒர்க்-அவுட் ஆகாத சென்டிமென்ட்!

ஆரம்பத்தில் பா.ஜ.க.வா? அதிமுகவா? என்ற தேர்தல் கணக்குடன் இரண்டு இடத்திலும் கூட்டணிக்கு துண்டுபோட்டது தேமுதிக. பிறகுதான், திரைமறைவுப் பேரம் நடத்தி அதிமுகவுடன் கூட்டணி கண்டது. கேப்டனின் சொந்த ஊர் அருப்புக்கோட்டை பக்கமுள்ள ராமானுஜபுரம் எனச் சொல்லி,  விருதுநகர் தொகுதியைக் கேட்டுப்பெற்றார் பிரேமலதா விஜயகாந்த். விஜயபிரபாகரனும் தனது பிரச்சாரத்தில் “அப்பா கேப்டன் விஜயகாந்த் இறந்து100 நாட்கள்தான் ஆகிறது..” என்பதையே திரும்பத் திரும்பச் சொல்லி பரிதவிப்பை வெளிப்படுத்தினார்.

விஜயபிரபாகரனின் தம்பி சண்முகப்பாண்டியனும் “எங்க அப்பாவுக்கு ஏதாவது செய்யணும்னு நினைச்சீங்கன்னா என்னுடைய அண்ணன் விஜயபிரபாகரனுக்கு வாக்களியுங்கள்.” என்று கேட்டுக்கொண்டார். பிரச்சாரத்தின்போது பிரேமலதா விஜயகாந்தும் தன் பங்குக்கு  “உங்களுக்காக எங்களை கேப்டன் விட்டுச் சென்றுள்ளார்.” என்று கண்ணைக் கசக்கினார். “வெற்றி பெற்றால் விஜயபிரபாகரனுக்கு விருதுநகரில் திருமணம் நடக்கும்.” என்று உத்தரவாதம் அளித்தார்.

Election atrocities in Virudhunagar constituency

ஒவ்வொரு அரசியல் கட்சியையும், ஒவ்வொரு அரசியல் தலைவரையும் வாக்காளர்கள் அறிந்தே வைத்துள்ளனர். பிரச்சாரப் பாசாங்குகள் அவர்கள் அறியாததல்ல. விருதுநகர் தொகுதியில் விஜயபிரபாகரனுக்கு இரண்டாவது இடத்தையும், ராதிகா சரத்குமாருக்கு மூன்றாவது இடத்தையும் தந்துள்ளனர்.

இந்நிலையில், விருதுநகரில் வாக்கு எண்ணிக்கை நடந்தபோது, 13-வது சுற்றிலிருந்தே முறைகேடு நடந்துள்ளதாகவும், மறுவாக்கு எண்ணிக்கை நடத்தவேண்டுமென்றும் தலைமைத் தேர்தல் ஆணையம் வரையிலும் புகார் அளித்திருக்கிறார் தேமுதிக பொதுச்செயலாளர் பிரேமலதா விஜயகாந்த்.

Next Story

விருதுநகர் தொகுதியில் மாணிக்கம் தாகூர் தொடர்ந்து முன்னிலை!

Published on 04/06/2024 | Edited on 04/06/2024
Manickam Thakur continues to lead in Virudhunagar constituency

18வது மக்களவைத் தேர்தல் இந்தியா முழுவதும் ஒவ்வொரு மாநிலமாக 7 கட்டங்களாக நடைபெற்ற நிலையில் தேர்தலில் பதிவான வாக்குகள் இன்று எண்ணப்பட்டு முடிவுகள் வெளியாகி வருகின்றன.

இன்று வாக்கு எண்ணிக்கை நாள் என்பதால் வாக்கு எண்ணும் மையங்களில் மூன்றடுக்கு போலீஸ் பாதுகாப்பு போடப்பட்டுள்ளது. முகவர்கள் உரிய சோதனைக்குப் பிறகு அனுமதிக்கப்பட்டு வாக்கு எண்ணிக்கை தொடங்கியது. முதல் கட்டமாக தபால் வாக்குகள் எண்ணப்பட்ட நிலையில் தற்போதைய(மணி7.20) நிலவரப்படி மொத்தமுள்ள 543 தொகுதிகளில் 290 தொகுதிகள் பாஜக முன்னிலை வகித்து வருகிறது. காங்கிரஸ் 235 இடங்களிலும், மற்றவை 18 இடங்களிலும் முன்னிலை வகித்து வருகிறது. அதே போன்று தமிழகம் மற்றும் புதுச்சேரியில் உள்ள 40  தொகுதிகளில்  திமுக கூட்டணியே முன்னிலை வகித்து வருகிறது.

இந்த நிலையில் விருதுநகர் தொகுதியில் காங்கிரஸ் வேட்பாளர் மாணிக்கம் தாகூர் தொடர்ந்து முன்னிலை வகித்து வருகிறார். விருதுநகர் நாடாளுமன்றத் தொகுதியில் அதிமுக கூட்டணியில் தேமுதிக சார்பாக விஜயபிரபாகரனும், என்.டி.ஏ கூட்டணி சார்பாக ராதிகா சரத்குமாரும், இந்தியா கூட்டணி சார்பாக திமுக வேட்பாளர் மாணிக்கம் தாகூரும் போட்டியிடுகின்றனர்.

விருதுநகர் நாடாளுமன்றத் தொகுதி வாக்கு எண்ணிக்கையின் 20 வது சுற்று முடிவில் மாணிக்கம் தாகூர் 3,68,780 வாக்குகள் பெற்று முன்னிலையில் உள்ளார். விஜய பிரபாகரன் 3,63,232 வாக்குகள் பெற்றுள்ளார். பாஜக வேட்பாளர் ராதிகா சரத்குமார் 1,58769 வாக்குகளும் நாம் தமிழர் வேட்பாளர் கௌசிக் 72,871 வாக்குகள் பெற்றுள்ளனர். 5,548 வாக்குகள் வித்தியாசத்தில் காங்கிரஸ் கட்சி வேட்பாளர் மாணிக்கம் தாகூர் தொடர்ந்து முன்னிலை வகித்து வருகிறார்.