Skip to main content

காரைக்கால் துறைமுகத்தில் ஆவணங்கள் இல்லாத விசைபடகுகள்; கடத்தலுக்கு பயன்படுத்துவதாக மீனவர்கள் வேதனை...

Published on 02/09/2020 | Edited on 02/09/2020

 

Undocumented boat in Karaikal port being used for smuggling

 

 

காரைக்கால் மீன்பிடி துறைமுகத்தில் எந்தவித ஆவணங்களோ, பதிவு எண்களோ,  இல்லாத ஏராளமான விசைப்படகுகள் மீன்பிடி தொழில் என்கிற பெயரில் புழக்கத்தில் இருப்பதாகவும், அந்த படகுகள் மூலம் மது பாட்டில்கள், கஞ்சா உள்ளிட்ட  போதைப்பொருட்களைக் கடத்துவதாகவும் மீனவர்கள் மத்தியில் புகையத்துவங்கியுள்ளது.

 

பதிவு செய்திடாத படகுகளை வைத்திருப்பவர்கள், மீனவர்கள் மத்தியில் பசுந்தோல் போர்த்திய புலிகளைப்போல தலைவர்களாக இருந்துகொண்டு, கட்டப்பஞ்சாயத்து, ரவுடிசம், பாலியல் தொல்லை கொடுப்பதும், தட்டிக்கேட்பவர்களின் குடும்பங்களை கிராமத்தைவிட்டு ஒதுக்கிவைத்து கொடுமைப்படுத்துவதாககுமுறுகிறார்கள் மீனவர்கள். 

 

காரைக்கால் மாவட்டத்தை சேர்ந்த மீனவர்களின் நலனுக்காக கடந்த 2010 ஆம் ஆண்டில் மீன்பிடித் துறைமுகம் காரைக்காலில் உருவாக்கப்பட்டது. அங்கு காரைக்கால் மாவட்டத்தை சேர்ந்த சுமார் 200 விசைப்படகுகள் நிறுத்தி வைக்கப்பட்டு மீன்பிடித் தொழிலுக்கு சென்றுவருகின்றனர். அதோடு தமிழக பகுதிகளை சேர்ந்த சில மீனவர்களும்  தங்களின் விசைப் படகுகளை அங்கு நிறுத்தி வைத்துக்கொண்டு மீன்பிடி தொழிலை செய்துவருகின்றனர். அப்படி நிறுத்திவைத்து மீன்பிடிக்க செல்வதற்கு முறையாக பதிவு செய்திருக்க வேண்டும். அப்படி எந்தவித அனுமதியும், பதிவும் செய்திடாத சில ராட்சத படகுகள் தான் மீன்பிடி என்கிற பெயரில் கடத்தல் தொழிலை செய்கின்றனர். என்கிறார்கள் மீனவர்கள் சிலர்.

 

Undocumented boat in Karaikal port being used for smuggling

 

 

இது குறித்து மீனவ அதிகாரி ஒருவரிடம் விசாரித்தோம், "சாதாரணமாக மீன் பிடிக்க செல்லும் படகுகள் அனைத்துமே முறைப்படி பதிவு செய்யப்பட்டிருக்க வேண்டும். மீன்பிடி உரிமை பெற்றிருக்க வேண்டும். மீன்பிடித் துறைமுகத்தில் அனுமதி சீட்டு பெற்றே கடலுக்கு செல்ல வேண்டும். கடலுக்கு மீன்பிடிக்க செல்லும் மீனவர்கள் கட்டாயம் அடையாள அட்டை வைத்திருக்க வேண்டும். இவ்வளவு எல்லையை தாண்டி செல்லக்கூடாது, வலைகள் கட்டுப்பாடு என்று ஏராளமான விதிமுறைகள் உள்ளன. உண்மையாக மீன்பிடி தொழிலை மட்டும் செய்பவர்கள் ஆவணங்கள் அனைத்தையும் சரியாக வைத்திருப்பார்கள். அதே போல 24 மீட்டர் நீளம் மற்றும்  147 திறன் கொண்ட விசைப்படகுகள் மட்டும் பதிவு செய்யப்படும். அதற்கு மேற்பட்ட விசைப்படகுகள் பதிவு செய்யப்படுவதில்லை. ஆனால் அதிக திறன் கொண்ட இன்ஜினுடன் கூடிய சட்டவிதிகளுக்கு உட்படாத வகையில் உள்ள ராட்சத விசைப்படகுகள் காரைக்கால் மீன்பிடி துறைமுகத்தில் புழக்கத்தில் இருக்கிறது, நிறுத்தி வைக்கப்பட்டு மீன்பிடித் தொழிலுக்கு செல்கிறது என்பது மீனவர்களுக்கும் அதிகாரிகளுக்கும் கூட தெரியும். ஆனாலும் எந்தவித நடவடிக்கையும் எடுப்பதில்லை. இந்த படகுகள் அனைத்துமே மீனவர்கள் மத்தியில் பெரும் புள்ளிகளாக இருப்பதால் அதிகாரிகளும், காவல்துறையும் கண்டுகொள்வதில்லை. இதை சாதகமாக்கிக்கொண்டு உள்ளூரில் உள்ள மீனவர்களிடம் ஆதிக்கம் செலுத்துகின்றனர். இதற்கு மாவட்ட ஆட்சியரும், எஸ்,பியும், மீன்வளத்துறை ஆணையரும் நினைத்தால் முடிவுகட்டமுடியும்," என்கிறார் விவரமாக.

 

காரைக்கால் பகுதியைச்சேர்ந்த மீனவர்கள் ஒருவர் கூறுகையில், "காரைக்கால் துறைமுகம் சமீப காலமாகவே கட்டுபாடுகளை இழந்துவிட்டது, சில மாதங்களுக்கு முன்புகூட கடல்வழியாக வெளிநாடுகளுக்கு ஆட்களை கடத்திசென்று ஒருசில படகுகள் மாட்டிக்கொண்டன. தங்கம்போதைப்பொருட்கள் மற்றும் மதுபானங்களை கடத்தி மாட்டிக்கொண்ட படகுகளும், அது தொடர்பான வழக்குகளும் நிலுவையில் இருக்கின்றன.

 

இவை அனைத்துமே பதிவு செய்யப்படாத விசைப்படகுகள் மூலமே நடக்கிறது. அதோடு ராட்சத இயந்திரங்களுடன் படகுகளில் மீன்பிடிக்க செல்வதால் ஒரு மாதம் பிடிக்கவேண்டிய மீன்களை ஒரு வாரத்தில் பிடித்துக்கொண்டு வந்துடுவாங்க. அவர்களிடம் எந்த அனுமதியும் கிடையாது, ஆனாலும் அதிகாரிகள் நடவடிக்கை எடுக்க மறுக்கிறாங்க. அதனால அவங்க எங்களை போன்ற மீனவர்கள் மத்தியில் அராஜகம் செய்கின்றனர். கிளிஞ்சல்மேட்டில் ஊர் தலைவர்கள் என்கிற போர்வையில் அவர்கள் செய்யும் அட்டகாசத்திற்கு அலவே இல்லாமல் போய்விட்டது. அவர்களால் பல குடும்பங்கள் நடுவீதிக்கு வந்துள்ளது, பல பெண்கள் பாலியல் ரீதியாக வெளியில் சொல்லமுடியாத துன்பங்களை அனுபவிக்கின்றனர்.எனவே மாவட்ட நிர்வாகமும் மாவட்ட காவல் துறையும் உடனடியாக பதிவு செய்யப்படாத படகுகள் அனைத்தையும் கண்டுபிடித்து நடவடிக்கை எடுக்க வேண்டும்," என்கிறார் வேதனையுடன்.

 

 

 

Next Story

ராமேஸ்வரம் மீனவர்களுக்கு மீண்டும் நீதிமன்றக் காவல் விதிப்பு!

Published on 18/07/2024 | Edited on 18/07/2024
Rameswaram Fishermen remanded in court

தமிழகம் மற்றும் புதுவைச் சேர்ந்த மீனவர்கள் எல்லை தாண்டி மீன் பிடித்ததாகக் கூறி இலங்கை கடற்படையால் கைது செய்யப்படும் சம்பவம் தொடர்ந்து நிகழ்ந்து வருகிறது. அதோடு மீனவர்களின் படகுகளைப் பறிமுதல் செய்து அரசுடைமையாக்குவது போன்ற நடவடிக்கைகளையும் இலங்கை அரசு மேற்கொண்டு வருகிறது. இதனால் மீனவர்களின் வாழ்வாதாரம் வெகுவாக பாதிக்கப்படும் சூழலும் நிலவி வருகிறது.

இத்தகைய சூழலில் தான கடந்த ஜூன் 22 ஆம் தேதி (22.06.2024) காலை வழக்கம் போல் ராமநாதபுரம் மற்றும் புதுக்கோட்டை மாவட்டத்தைச் சேர்ந்த 600க்கும் மேற்பட்ட விசைப்படகில் சுமார் 2 ஆயிரம் மீனவர்கள் மீன்பிடிக்கக் கடலுக்குச் சென்றனர். அதன்படி கச்சத்தீவு - நெடுந்தீவு இடையே மீனவர்கள் மீன்பிடித்து கொண்டிருந்தனர். அப்போது அங்கு ரோந்து வந்த இலங்கை கடற்படையினர் ராமேஸ்வரத்தைச் சேர்ந்த மீனவர்கள் 22 பேரைக் கைது செய்தனர். 

Rameswaram Fishermen remanded in court

அதாவது கச்சத்தீவு அருகே மீன்பிடித்துக் கொண்டிருந்த போது எல்லை தாண்டி மீன் பிடித்ததாகக் கூறி மீனவர்கள் கைது செய்யப்பட்டனர். அதனைத் தொடர்ந்து கைதான 22 மீனவர்களையும் காங்கேசன் நீதிமன்றத்தில் ஆஜர்படுத்தினார். அதன் பிறகு யாழ்ப்பாணம் சிறையில் அடைத்தனர். மேலும் தமிழக மீனவர்களின் 3 விசைப்படகுகளையும் இலங்கைக் கடற்படையினர் சிறை பிடித்து பறிமுதல் செய்தனர். எல்லை தாண்டி மீன் பிடித்ததாகக் கூறி தமிழ்நாடு மீனவர்கள் 22 பேரைக் கைது செய்யப்பட்ட சம்பவம் மீனவர்கள் மத்தியில் அதிர்ச்சியை ஏற்படுத்தி இருந்தது.

அதே சமயம் தமிழக மீனவர்கள் நீதிமன்றத்தில் ஆஜர் படுத்தியபோது கடந்த 5ஆம் தேதி வரை யாழ்ப்பாணம் சிறையில் அடைக்க நீதிமன்றம் உத்தரவு பிறப்பித்திருந்தது. அதனைத் தொடர்ந்து கடந்த 5 ஆம் தேதி நீதிமன்றத்தில் 2வது முறையாக மீனவர்கள் ஆஜர்படுத்தப்பட்டனர். அப்போது ஜூலை 18 வரை நீதிமன்ற காவலை நீட்டித்து நீதிபதி உத்தரவு பிறப்பித்திருந்தார்.

இந்நிலையில் மூன்றாவது முறையாக இன்று (18.07.2024) மீண்டும் ராமேஸ்வரம் மீனவர்கள் நீதிமன்றத்தில் ஆஜர்படுத்தப்பட்டனர். அப்போது இந்த வழக்கை விசாரித்த நீதிபதி மூன்றாவது முறையாக மீண்டும் ஜூலை 24 ஆம் தேதி வரை நீதிமன்ற காவலில் வைக்க உத்தரவு பிறப்பித்துள்ளார்.

Next Story

மத்திய அமைச்சருக்குத் தமிழக முதல்வர் மு.க.ஸ்டாலின் கடிதம்!

Published on 11/07/2024 | Edited on 11/07/2024
TN CM MK Stalin letter To the Union Minister

புதுக்கோட்டை மாவட்ட மீன்பிடி துறைமுகத்திலிருந்து மீனவர்கள் மீன் பிடிக்கச் சென்றுள்ளனர். இவர்களில் 13 பேரை எல்லை தாண்டி மீன் பிடித்ததாகக் கூறி நெடுந்தீவு அருகே இலங்கை கடற்படையினர் இன்று (11.07.2024) சிறை பிடித்துச் சென்றனர். இந்த சம்பவம் மீண்டும் பரபரப்பயும் அதிர்ச்சியையும் ஏற்படுத்தி இருக்கிறது. இதனையடுத்து கைது செய்யப்பட்ட 13 மீனவர்களையும் யாழ்ப்பாணம் மீன்வளத்துறை அதிகாரிகள் ஊர்க்காவல்துறை நீதிமன்றத்தில் ஆஜர்ப்படுத்தினர். அப்போது மீனவர்கள் 13 பேருக்கும் ஜூலை 25ஆம் தேதி வரை நீதிமன்றக் காவல் விதித்து உத்தரவிடப்பட்டது.

இந்நிலையில் இலங்கைக் கடற்படையினரால் சிறைபிடிக்கப்பட்டுள்ள மீனவர்களையும், அவர்களது மீன்பிடிப் படகுகளையும் உடனடியாக விடுவித்திட வலியுறுத்தி மத்திய வெளியுறவுத் துறை அமைச்சர் ஜெய்சங்கருக்கு தமிழக முதலமைச்சர் மு.க. ஸ்டாலின் இன்று (11-7-2024) கடிதம் எழுதியுள்ளார். அந்த கடிதத்தில், “தமிழ்நாட்டைச் சேர்ந்த 13 மீனவர்கள், IND-TN-08-MM-364, IND-TN-16-MM-2043 மற்றும் IND-TN-08-MM-1478 ஆகிய பதிவெண்கள் கொண்ட மீன்பிடிப் படகுகளில் மீன்பிடிக்கச் சென்றிருந்தனர். அப்போது இலங்கைக் கடற்படையினரால் இன்று (11-7-2024) கைது செய்யப்பட்டுள்ளனர். மீன்பிடித் தொழிலையே தங்களது வாழ்வாதாரமாகக் கொண்டுள்ள நம் நாட்டு மீனவர்கள். வரலாறு காணாத நெருக்கடியை எதிர்கொள்கின்றனர். தற்போது 173 மீன்பிடிப் படகுகளும், 80 மீனவர்களும் இலங்கை அதிகாரிகளின் கட்டுப்பாட்டில் உள்ளது.

மீனவர்கள் இதுபோன்று சிறை பிடிக்கப்படுவது மீனவர்களின் வாழ்வாதாரத்தைக் கடுமையாக பாதித்துள்ளதோடு, அவர்களது குடும்பத்தினரை பெரும் சோகத்திற்கு உள்ளாக்கியுள்ளது. எனவே, இந்த விவகாரத்தில் மத்திய வெளியுறவுத் துறை வலுவான மற்றும் ஒருங்கிணைந்த முயற்சிகளை உடனடியாக மேற்கொண்டு, இலங்கை வசமுள்ள அனைத்து மீனவர்களையும், மீன்பிடிப் படகுகளையும் உடனடியாக விடுவிப்பதை உறுதி செய்திட வேண்டும். இதுதொடர்பாக உரிய தூதரக நடவடிக்கைகளை முடுக்கி விட வேண்டும்” எனத் தெரிவித்துள்ளார்.