கரோனா நோய் குறித்தான அச்சத்தையும் பீதியையும் மட்டும் பேசிக் கொண்டிருந்தால் விபரீதம் ஏற்பட்டுவிடும் - எச்சரிக்கும் திருமுருகன் காந்தி!

தொற்று நோய் குறித்து நம்மிடம் இருக்கின்ற மிக முக்கியப் பிரச்சனை நம் மனதில் இருக்கின்ற பயம். அது என்ன செய்யும் என்ற புரிதல் இல்லாத ஒரு குழப்பம். இந்தக் குழப்பத்தையும் அச்சத்தையும் போக்க வேண்டிய பொறுப்பு அரசாங்கத்திடம் இருக்கிறது. தொற்றுநோய் குறித்து அரசாங்கம் பிரச்சாரம் செய்ய வேண்டும். இந்தத் தொற்று நோய் குறித்து நாம் பதட்டப்பட வேண்டாம் என்றும், நோய்த் தொற்றுக்கு ஆளானவரகளிடம் நாம் அன்பாக, அரவணைப்பாக நடந்துகொள்ள வேண்டும் என்பதையும் அரசுக்கள்தான் மக்கள் மனதில் ஆழமாகப் புரிதலை ஏற்படுத்த வேண்டும். இன்றைக்கு இருபது ஆயிரத்துக்கும் மேற்பட்ட கரோனா நோயாளிகளை நாம் பாதுகாக்க வேண்டிய அவசியம் வந்துள்ளது.

அந்த நோயில் இருந்து குணமடைந்தவர்கள் மீது சமூக ஒதுக்கல் எதுவும் நடைபெற்றுவிடக்கூடாது என்ற பயம் நம்மிடம் இருக்கிறது. கரோனா வந்தவரை ஒதுக்குவது, அவரின் குடும்பத்தைச் சமூகத்தில் இருந்து பிரித்து பார்த்தல் என்று இது எதுவும் நடைபெற்று விடக்கூடாது என்று நாம் நினைக்கிறோம். இது எதையுமே செய்யாமல் நோய் குறித்தான அச்சத்தை, பயத்தை, பீதியைப் பற்றி பேசிக்கொண்டிருந்தோம் என்றால் நாளைக்கு சைமனுக்கு நடந்ததுதான் அனைவருக்கும் நடக்கும். அப்பாவி மக்களை அறியாமையில் இருக்கின்ற மக்களைக் குற்றம் சொல்வதில் எந்தப் பயனும் ஏற்படப் போவதில்லை. அவர்களுக்கு இந்த நோய் குறித்து முழு தகவலையும் சொல்ல வேண்டிய கடைமை அரசுக்கு இருக்கிறது. அதை அவர்கள் சரியாக செய்தால் இந்தப் பிரச்சனைகள் ஏற்படாமல் நாம் தவிர்க்கலாம்" என்றார்.