Skip to main content

தமிழ்நாட்டில் ஆட்சியை கலைக்கும் அளவுக்கு தெம்போ, திராணியோ யாருக்கும் கிடையாது - திருமாவளவன் தடாலடி பேச்சு!

Published on 13/09/2021 | Edited on 13/09/2021

 

jkl

 

தமிழ்நாடு சட்டப்பேரவை கூட்டத்தொடர் கடந்த சில வாரங்களாக நடைபெற்று வருகிறது. பல்வேறு முக்கிய அறிவிப்புகளை அமைச்சர்கள் தொடர்ந்து வெளியிட்டுவருகிறார்கள். அந்த வகையில் சில தினங்களுக்கு முன்பு பேரவையில் பேசிய முதலமைச்சர் மு.க. ஸ்டாலின், பெரியார் பிறந்த தினம் இனி சமூகநீதி நாளாக கொண்டாடப்படும் என்று அறிவித்தார். அந்த அறிவிப்புக்குப் பலர் மகிழ்ச்சி தெரிவித்த நிலையில், பாஜக உள்ளிட்ட கட்சிகளைச் சேர்ந்தவர்கள் பெரியார் மட்டும்தான் கொண்டாடப்பட வேண்டியவரா? அவரையும் தாண்டி கொண்டாட தகுதியான நபர்கள் தமிழ்நாட்டில் உள்ளனர் என்று கருத்து தெரிவித்திருந்தனர். 

 

இந்நிலையில், நிகழ்ச்சி ஒன்றில் கலந்துகொண்ட விடுதலைச் சிறுத்தைகள் கட்சித் தலைவர் திருமாவளவன் இந்த சம்பவம் தொடர்பாகவும், தமிழ்நாட்டில் ஆளுநர் மாற்றம் தொடர்பாகவும் தன்னுடைய கருத்துகளைத் தெரிவித்தார். இதுதொடர்பாக அவர் கூறியதாவது, "பெரியார் சமூகநீதிக்காக இறுதி காலம்வரை பாடுபட்டவர். சமூகநீதி விவகாரத்தில் அவர் இறக்கும்வரையில் பின்வாங்காதவர். வருகின்ற 17ஆம் தேதி பெரியாருக்கு மாலை அணிவித்து மரியாதை செய்ய உள்ளோம். அப்போது சமூகநீதி தொடர்பாக பேரவையில் தெரிவித்த கருத்துகளை அவர் சிலை முன் முழக்கமிட உள்ளோம். பெரியாரை யாரும் புறக்கணித்துவிட முடியாது. தற்போது தமிழகத்தில் ஆளுநர் மாற்றம் செய்யப்பட்டுள்ளது. இதுதொடர்பாக பல்வேறு சந்தேகங்களைக் காங்கிரஸ் கட்சி எழுப்பியுள்ளது. அவர்களின் ஐயங்கள் புறந்தள்ள கூடியதாக இல்லை. 

 

அவர் நாகலாந்தில் என்ன செய்தார் என்று நாம் தற்போது சமூகவலைதளங்களில் வரும் கருத்துகளைப் பார்த்தால் தெரிந்துகொள்ள முடியும். உளவுப்பிரிவு அதிகாரியாக இருந்துள்ளார். மேலும், மொழி உணர்வு போன்ற எண்ணங்களை முளையிலேயே கிள்ளி எறிய வேண்டும் என்ற எண்ணம் உடையவராக அவர் இருப்பதாக தகவல் வெளிவருகிறது. எனவே திட்டமிட்டு அவரை நாகலாந்தில் இருந்து தமிழகத்திற்கு மத்திய அரசு மாற்றியுள்ளது. விடுதலைச் சிறுத்தைகளும் மத்திய அரசு ஏதோ உள்நோக்கத்தோடு இந்த ஆளுநர் நியமனத்தை செய்துள்ளதாகவே பார்க்கிறோம். எனவே மத்திய அரசு, புதிய ஆளுநர் நியமனத்தை ரத்து செய்துவிட்டு, ஜனநாயகப்பூர்வமாக செயல்படுபவரை ஆளுநராக நியமனம் செய்ய வேண்டும் என்று கேட்டுக்கொள்கிறேன். யாரை ஆளுநராக நியமித்தாலும் தமிழ்நாட்டில் அவர்களால் எதுவும் செய்துவிட முடியாது. ஆட்சியைக் கலைக்கின்ற அளவுக்கு அவர்களுக்குத் தெம்போ, திராணியோ கிடையாது" என்றார்.

 

 

 

Next Story

'கள்ளச்சாராய உயிரிழப்பு அதிர்ச்சியளிக்கிறது'-தமிழக ஆளுநர் இரங்கல்

Published on 19/06/2024 | Edited on 19/06/2024
nn

கள்ளக்குறிச்சி நகரப் பகுதியான ஏழாவது வார்டில் கருணாபுரம் பகுதியில் கள்ளச்சாராயம் விற்பனை செய்வது தொடர்ந்து வருவதாக குற்றம் சாட்டபடுகிறது. இந்நிலையில் நேற்று அப்பகுதியில் கள்ளச்சாராயம் விற்கப்பட்டதாகவும், இதனைப் பலர் வாங்கி குடித்ததாகவும் கூறப்படுகிறது. முதலில் 4 பேர் உயிரிழந்த நிலையில் தற்போது உயிரிழப்பு 16 ஆக உயர்ந்துள்ளது.

பாதிக்கப்பட்ட 60 க்கும் மேற்பட்டோர்  ஜிப்மர் மருத்துவமனையில் அனுமதிக்கப்பட்டு தீவிர சிகிச்சை பெற்று வருகின்றனர். உயிரிழப்புக்கு பாக்கெட் கள்ளச்சாராயம் காரணமாக இருக்கலாம் என தமிழக அரசு தெரிவித்துள்ளது. மேலும் இறந்தவர்களின் உடல்கள் உடற்கூறு ஆய்வு செய்யப்பட்ட பிறகே  முழுமையான காரணம் தெரிய வரும் எனவும் தமிழக அரசு தெரிவித்துள்ளது. அதேநேரம் கள்ளக்குறிச்சி மாவட்ட ஆட்சியர் ஷ்ரவன் குமார் பணியிட மாற்றம் செய்யப்பட்டு புதிய ஆட்சியராக எம்.எஸ்.பிரசாந்த் நியமனம்  செய்யப்பட்டுள்ளார்.

அதேபோல் கள்ளக்குறிச்சி மாவட்ட காவல் கண்காணிப்பாளர் உட்பட 9 பேர் பணியிடை நீக்கம் செய்யப்பட்டுள்னர். கள்ளக்குறிச்சி மாவட்ட காவல் கண்காணிப்பாளர் சமய்சிங் மீனா தற்காலிகமாக பணி நீக்கம் செய்யப்பட்டுள்ளார். புதிய மாவட்ட காவல் கண்காணிப்பாளராக ரஜத் சதுர்வேதி நியமனம் செய்யப்பட்டுள்ளார். மதுவிலக்கு அமலாக்க பிரிவைச் சேர்ந்த காவல்துறை கண்காணிப்பாளர் தமிழ்ச்செல்வன், மதுவிலக்கு பிரிவைச் சேர்ந்த கவிதா, பாண்டி, செல்வி,பாரதி, ஆனந்தன், சிவச்சந்திரன், காவல் உதவி ஆய்வாளர் பாஸ்கரன், மனோஜ் உள்ளிட்டோரையும் பணியிடை நீக்கம் செய்து தமிழக அரசு அறிவித்துள்ளது. மேலும் இந்த வழக்கு சிபிசிஐடிக்கு மாற்றப்பட்டுள்ளது.

இந்நிலையில் கள்ளச்சாராயம் அருந்தி உயிரிழந்த குடும்பத்திற்கு தமிழக ஆளுநர் ஆர்.என்.ரவி இரங்கல் தெரிவித்துள்ளார். இதுகுறித்த அறிவிப்பில், 'கள்ளக்குறிச்சியில் கள்ளச்சாராயம் குடித்து பலர் உயிரிழந்தது அதிர்ச்சியளிக்கிறது. உயிரிழந்தவர்களின் குடும்பத்திற்கு நெஞ்சார்ந்த இரங்கலை தெரிவித்துக் கொள்கிறேன். தமிழகத்தில் அவ்வப்போது கள்ளச்சாராய உயிரிழப்பு குறித்த செய்திகள் வெளிவருகின்றன. சட்டவிரோத மதுபான தயாரிப்பு, நுகர்வை தடுப்பதில் உள்ள குறைபாட்டை இது பிரதிபலிக்கிறது' என தெரிவித்துள்ளார்.

உயிரிழந்தவர்களின் விவரம்: சுரேஷ், பிரவீன், மற்றொரு சுரேஷ், தனக்கொடி, வடிவு, சேகர், கந்தன், ஆறுமுகம், ஜெகதீஷ், மணிகண்டன், மணி, கிருஷ்ணமூர்த்தி, இந்திரா, நாராயணசாமி, ராமு, சுப்பிரமணி, டேவிட்.  

Next Story

‘உடனடியாக வெளியேறுங்கள்’; போலீசாருக்கு மேற்கு வங்க ஆளுநர் உத்தரவு?

Published on 17/06/2024 | Edited on 17/06/2024
West Bengal Governor's order to police?

மேற்கு வங்க மாநிலத்தை ஆளும் திரிணாமுல் காங்கிரஸுக்கும், அம்மாநில ஆளுநர் சி.வி.ஆனந்த்போஸுக்கும் இடையே சில மாதங்களாக மோதல் போக்கு நிலவி வருகிறது. ஏற்கெனவே, ஆளுநர் மாளிகையில் ஒப்பந்த பணியாளராக பணியாற்றும் பெண் ஒருவர், ஆளுநர் சி.வி.ஆனந்த்போஸ் மீது பாலியல் புகார் அளித்திருந்தார். இது தொடர்பாக போலீசார் வழக்குப் பதிவு செய்து விசாரணை மேற்கொண்டு வருகின்றனர். 

இதற்கிடையில், தேர்தல் நேரத்தில் கொல்கத்தாவில் கடந்த ஜனவரி மாதம் நடைபெற்ற நிகழ்ச்சியில் பா.ஜ.கவின் சின்னமான தாமரை சின்னத்தை ஆடையில் அணிந்து அக்கட்சிக்கு ஆதரவாக பிரச்சாரத்தில் ஈடுபட்டதாக அம்மாநில ஆளுநர் சி.வி.ஆனந்த் போஸ் மீது திரிணாமுல் காங்கிரஸ் தேர்தல் ஆணையத்திடம் புகார் அளித்திருந்தது. இப்படிபட்ட பரபரப்பான மோதல் போக்கு நிலவி வரும் நிலையில், ஆளுநர் மாளிகையில் பாதுகாப்பு பணியில் ஈடுபட்டிருந்த போலீசார்களை உடனடியாக வெளியேற வேண்டும் என்று அம்மாநில ஆளுநர் நோட்டீஸ் அனுப்பியுள்ளதாக தகவல் வெளியாகியுள்ளது. 

மேற்கு வங்க பா.ஜ.க தலைவர் சுவேந்து அதிகாரி மற்றும் அம்மாநிலத்தில் நடைபெற்ற தேர்தலுக்கு பிந்தைய வன்முறையில் பாதிக்கப்பட்டவர்கள் சிலர் நேற்று (16-06-24) ஆளுநர் சி.வி.ஆனந்த்போஸை சந்திக்க வந்துள்ளனர். அவர்கள் ஆளுநரை சந்திக்க முறையான அனுமதி இருந்தும் அவர்களை ஆளுநர் மாளிகைக்குள் நுழையவிடாமல் போலீசார் தடுத்து நிறுத்தியதாக கூறப்படுகிறது. இதில் கோபமடைந்த ஆளுநர், ஆளுநர் மாளிகையான ராஜ்பவனில் பாதுகாப்பு பணியில் ஈடுபட்டிருந்த காவல்துறையினரை உடனடியாக வெளியேறுமாறு உத்தரவிட்டுள்ளதாகத் தகவல் வெளியாகியுள்ளது.