இறைவா...
பூவுலகின் தலைவா...
விண்ணுக்கும், மண்ணுக்கும்
இடையில்,
கண்ணுக்கு தெரியாத
ஒரு கிரிமியோடு,
நாங்கள்
மூன்றாவது உலகப் போரை
நடத்திக் கொண்டிருக்கிறோம் !
*
இது விசிறிக்கும்
வியர்க்கின்ற கோடை காலம்!
கூடவே
'கொரணா' காலம் !
*
அரசர்களுக்கும், அதிபர்களுக்கும்,
பிரதமர்களுக்கும் கலக்கம் !
வல்லரசுகளுக்கு நடுக்கம் !
சாதனைகள் எல்லாம்
சோதனைகளாக்கப்பட்டுள்ளன.
ஆட்டம் போட்டவர்கள்
எல்லாம் அடங்கி கிடக்கிறார்கள்
*
ஆனாலும்
என் தேசம் எனும்
பூங்காவனத்தில்
அமைதி புறாக்கள்
சிறகொடிந்து கிடக்கின்றன.
கொத்துக் கொத்தாய்
மனித உயிர்கள்
மாண்டுப் போகும் நிலையிலும்
மதங்கொண்ட
யானைகள் மட்டும்
மோதிக் கொண்டிருக்கின்றன.
பிணம் திண்ணும்
கழுகுகள்
சுற்றிக் கொண்டிருக்கின்றன.
*
சிலர்
வெறுப்பை விழுங்கி
நெருப்பை கக்குகிறார்கள்.
இதயங்களை
கிழிக்கிறார்கள்.
உறவுகளை பிரிக்கிறார்கள்.
*
சங்கரின் அடையாளம்
சகிப்புத் தன்மை!
சலீமின் அடையாளம்
சமாதானம்!
சைமனின் அடையாளம்
மன்னிப்பு!
இப்போது
சங்கரும், சலீமும்,
சைமனும்
கைக்கோர்த்த வீதிகளில்
கருநாகங்கள்
படை எடுப்பது
பதை பதைக்கிறது!
*
இறைவா...
சமயங்களில்
நெறிகளை படைத்தாயே...
சில சமயங்களில்
இவர்கள்
வெறியோடு அலைவதை
தடுப்பாயா?
'கொரணா' காலத்திலும்
'கொரில்லா'க்களைப் போல
தாக்கிக் கொள்கிறார்களே..
இது நியாயம்தானா?
*
அவர்களை இவர்களும்
இவர்களை அவர்களும்
சுட்டிக்காட்டி
சண்டைகளை போடுகிறார்கள்
விரட்டுகிறார்கள்.
சமூகத்தின் 'கணையங்களாக'
இருக்க வேண்டிய
இணைய தளங்களில்
சமாதிகளை கட்டுகிறார்கள்.
பதிலுக்கு பதில்
பழி தீர்க்கிறார்கள்.
அமைதிக்கு வேட்டு!
நட்புக்கு பூட்டு?
*
இறைவா...
மனிதர்களுக்கு
பேசும் கிளிகளும்
கூவும் குயில்களும்
ஆடும் மயில்களும்
வாழும்
நந்தவனங்களை
காட்டு...
அன்பையும்,
சகிப்புத்தன்மையையும்
சிந்திக்கும்
சகோதரர்களை தா...
கண்ணீரை துடைத்து
கட்டியணைக்கும்
நண்பர்களை தா...
அமைதிப் பூக்களை
ஏந்தி வரும்
உறவுகளை தா...
மாசற்றுப் பழகும்
நியாயவான்களை தா...
*
இறைவா....
நல்லிணக்க நதியில்
நீந்த விரும்பும் என்னை
சுழற்சியின் சுழியில் சிக்கி
மூழ்கடித்து விடாதே...
*
மனப் புழுக்கத்தில்
உருளும் எனக்கு
ஆறுதலை தா...
*
இறைவா...
உன்னிடம் மன்றாடி
கேட்கிறேன்...
என் கனவுகளை
விழிகளிலேயே
சிறை வைத்து விடாதே...
இது என் நலத்துக்கான
பிரார்த்தனை அல்ல...
நான் வாழும் நிலத்துக்கான
பிரார்த்தனை!