கடந்த வாரம் நாடாளுமன்றத்தில் குடியுரிமை திருத்த மசோதா தாக்கல் செய்யப்பட்டு இரண்டு அவைகளிலும் நிறைவேற்றப்பட்டது. நாடாளுமன்றத்தில் புயலை கிளப்பிய இந்த பிரச்சனையில் எதிர்கட்சிகளின் கடும் எதிர்ப்பையும் மீறி, இந்த மசோதா வெற்றிகரமாக நிறைவேற்றப்பட்டுள்ளது.  இதுதொடர்பாக பல்வேறு சர்ச்சைகள் எழுந்துள்ள நிலையில், இதுதொடர்பாக திமுக-வை சேர்ந்த தமிழன் பிரசன்னாவிடம் பல்வேறு கேள்விகளை முன்வைத்தோம். நம்முடைய கேள்விகளுக்கு அவரின் அதிரடியான பதில்கள் வருமாறு, 

 

மத்திய அரசு குடியுரிமை திருத்த மசோதாவை நாடாளுமன்றத்தில் தாக்கல் செய்து நிறைவேற்றியுள்ளது. இந்த சட்டத்தை எதிர்கட்சிகள் கடுமையாக எதிர்க்கிறார்கள். டெல்லியில் மாணவர்கள் நடத்திய போராட்டத்தில் காவல்துறையினர் தடியடி நடத்தியுள்ளனர். இந்த சம்பவத்தை எப்படி பார்க்கிறீர்கள்?

தனது சொந்த நாட்டு மக்களை பிரிக்க, ஆர்எஸ்எஸ்ஸின் கோல்வாக்கர் கொள்கையை புகுத்தி அவர்களை தனிமைப்படுத்த கொண்டுவரப்பட்டதுதான் குடியுரிமை திருத்த சட்டம். காலங்காலமாக இந்த மண்ணில் இருப்பவர்களை அழித்தொழிக்க இந்த பாசிசி மத்திய அரசால் இந்த சட்டம் திட்டமிட்டு கொண்டுவரப்பட்டுள்ளது. இன்றைக்கு போராடும் மாணவர்கள் மீது கண்மூடி தனமான தாக்குதல்கள் நடைபெற்று வருகிறது. காவல்துறையினர் வாகனங்களை கொளுத்தி தீவைக்கிறார்கள். அதற்கான ஆதாரங்கள் அனைத்தும் தற்போது வெளிவந்துள்ளது. காவல்துறையினர்தான் கொளுத்தினார்கள் என்பதை நாமும் கூட வீடியோக்களில் பார்த்தோம். இது அரசாங்கம் செய்ய வேண்டிய வேலையா? இன்று முஸ்லிம் மாணவர்கள் மட்டும் தான் போராட்டத்தில் ஈடுபடுகிறார்களா என்றால், அனைத்து சமூதாயத்தை சேர்ந்தவர்களும் போராடுகிறார்கள். நான் இந்த அரசாங்கத்தை பார்த்து ஒன்றுதான் கேட்க விரும்புகிறேன். 

மக்கள் எங்களுக்கு பெரும்பான்மை பலத்தை கொடுத்துள்ளார்கள், நாங்கள் தேர்தல் அறிக்கையில் கூறியவற்றை கண்டிப்பாக நிறைவேற்றுவோம் என்று அமித்ஷா கூறுகிறார். தேர்தல் அறிக்கையில் ஆண்டுக்கு ஒரு கோடி பேருக்கு வேலை வாய்ப்பை உருவாக்குவோம் என்று கூறினார்கள். அவ்வாறு கூறியவாறு நிறைவேற்றினார்களா? நம் நாட்டு இளைஞர்கள் அரசாங்க வேலைவாய்ப்பை எதிர்பார்த்து காத்திருக்க கூடாது என்று தேர்தல் பிரச்சார கூட்டத்தில் சொன்னார்கள். ஆனால் உங்கள் ஆட்சியில் பக்கோடா போடுவதற்கு வெங்காயம் வாங்க கூட முடியவில்லை. வெங்காய விலை உச்சத்தில் இருக்கிறது. இந்த லட்சணத்தில் அவர்களின் ஆட்சி செயல்பட்டு வருகிறது. பொருளாதாரம் சரிந்திருக்கிறது, மக்களின் வாங்கும் சக்தி குறைந்திருக்கிறது, மாடுகளை விட மனிதன் மதிப்பு குறைந்திருக்கிறது, சாதிய ரீதியான பிளவுகள் அதிகரித்துள்ளது. மத ரீதியான பிளவு உச்சத்தில் இருக்கிறது. இவற்றை எல்லாம் சரி செய்வதை விட்டுவிட்டு அவர்களுடைய ஆர்எஸ்எஸ் கொள்கைகளை நாட்டில் உள்ள மக்களிடம் திணிக்க பார்க்கிறார்கள். 

இந்த குற்றச்சாட்டுக்களை நீங்கள் தொடர்ந்து முன் வைத்துக் பேசியபோதுதான், அவர்கள் நாடாளுமன்ற தேர்தலில் முன்பை விட அதிக இடங்களில் வெற்றிபெற்றார்களே?

அவர்கள் பெரும்பான்மை பெற்றிருக்கலாம், ஆனால் அதற்காக அவர்கள் மேற்கொண்ட உக்திகளை பற்றி பேசாமல் இருக்க முடியாது. மவுண்ட் பேட்டன் காலத்தில் செய்த பிரித்தாலும் சூழ்ச்சியை செய்து இந்த வெற்றியை பெற்றுள்ளார்கள். அவர்கள் பெரும்பான்மை பெற்றிருந்தாலும் வாக்கு சதவீதத்தை கவனிக்க வேண்டும்.  கடந்த நாடாளுமன்ற தேர்தலில் திமுக இந்தியாவிலேயே அதிக அளவு வாக்கு சதவீதம் வாங்கி வெற்றிபெற்றது. ஆனால் பாசிசி பாஜக வாங்கிய வாக்கு சதவீதம் என்பது 32 என்ற அளவில்தான் உள்ளது. இந்த வாக்கு சதவீதத்தில் தான் அவர்கள் 300க்கும் மேற்பட்ட இடங்களில் வெற்றி பெற்றிருக்கிறார்கள். இந்த மோடி நாட்டுக்கு கேடு என்று நாங்கள்தான் சொன்னோம், இந்த அமித்ஷா நாட்டுக்கு கேடு என்று நாங்கள்தான் சொன்னோம், இந்த பாஜக நாட்டை துண்டாடுகிறது என்று நாங்கள்தான் முதலில் சொன்னோம். இப்போது இயற்றப்பட்டுள்ள குடியுரிமை சட்டத்தை தமிழ்நாட்டு மக்கள் எவ்வாறு புரிந்து வைத்துள்ளார்கள என்று கேள்வி எனக்குள் வருகிறது. அவர்களுக்கு அம்பேத்காரின் வழியில் இதற்கான விளக்கத்தை அவர்களுக்கு அளிக்க வேண்டியது நம்முடைய கடமையாக நான் பார்க்கிறேன்.

பாகிஸ்தான், வங்கதேசம், ஆப்கானிஸ்தான் முதலிய நாடுகளில் உள்ள இந்துக்களுக்காக இந்த சட்டம் கொண்டு வரப்பட்டுள்ளதாக கூறுவதை பற்றி?

பாகிஸ்தான், வங்கதேசம் உள்ளிட்ட நாடுகளில் உள்ள சிறுபான்மையினர் தாக்கப்படுவதாக இவர்கள் கூறுகிறார்கள், இந்தியா என்பது ஒருதாய் மக்களை கொண்ட நாடு. இவர் இந்து என்றோ. முஸ்லிம் என்றோ, கிருஸ்துவர் என்றோ பிரிக்க மாட்டார்கள். இந்தியாவில் மத ரீதியாக யாரும் யாரையும் பிரித்து பார்க்கவில்லை. இந்தியவின் அடையாளம் என்ன, மற்ற நாடுகளை போல மத அடையாளமா, அப்படி இல்லையே. அமெரிக்கா கிருஸ்துவ நாடு, பாகிஸ்தான் முஸ்லிம் நாடு, நேபாளம் இந்து நாடு. ஆனால், இந்தியா மதச்சார்பற்ற நாடு. இதை இந்திய அரசியல் அமைப்பே மிகத் தெளிவாக கூறியிருக்கிறது. வேற்றுமையில் ஒற்றுமையே இந்தியா என உலக நாடுகளில் இருந்து இந்தியா வேறுபட்டு இருக்கிறது. படேலுக்கு சிலை வைத்தால் மட்டுமே போதாது. அவர் கூறியவற்றை செயல்படுத்த வேண்டும். இந்த நாட்டில் உள்ள முஸ்லிம்களும் இதே மண்ணை சேர்ந்தவன்தான் என்று அவர் கூறியதை மட்டும் ஏன் நடை முறைபடுத்தமாட்டேன் என்கிறார்கள்.