Skip to main content

‘தமிழக வெற்றி கழகம்’ - திட்டம் என்ன? 

Published on 10/02/2024 | Edited on 10/02/2024
'Tamilaka Vetri Kazhagam' - What is the plan?

‘தமிழக வெற்றி கழகம்’ எனும் பெயரில் தனது அரசியல் கட்சியைத் துவக்கிய நடிகர் விஜய், அக்கட்சியின் முதற்செயற்குழுக் கூட்டத்தையும் நடத்தி முடித்துள்ளார். இதற்கு பாராட்டுதல்கள், வாழ்த்துகள், விமர்சனங்கள் வரிசை கட்டிக்கொண்டு எதிரொலித்தபடி இருக்கின்றன. யாருடைய வாக்குகளை அவர் அறுவடை செய்யப்போகிறார்? எந்த கட்சிக்கு பாதிப்பு ஏற்படும்? பா.ஜ.க.வின் பின்னணியில்தான் கட்சியை இப்போதே பதிவு செய்கிறார் என்றெல்லாம் ஆராயத் தொடங்கிவிட்டன தமிழக அரசியல் கட்சிகள். இதனையெல்லாம் பொருட்படுத்தாமல் ‘கோட்' படத்தில் நடிக்கச் சென்றுவிட்டார் விஜய்.

இப்படி பல்வேறு விஷயங்கள் விஜய்யை சுற்றி வட்டமடிக்கும் நிலையில் விஜய்யின் புதிய அவதாரம் குறித்து பலதரப்பில் விசாரித்தோம். பல்வேறு தகவல்கள் கிடைத்தன. தற்போதைய சூழலில் தமிழகத்தில் தி.மு.க.வும் அதன் தலைவர் மு.க.ஸ்டாலினையும் தவிர்த்துப் பார்த்தால் ஆளுமைமிக்க தலைவர்கள் யாரும் இல்லாத நிலையே இருக்கிறது. இதனை பயன்படுத்தியே, சட்டமன்றத் தேர்தலில் களமிறங்க 2 ஆண்டுகளுக்கு முன்பே கட்சியை தொடங்கி, அதனை வெளிப்படையாக அறிவித்ததுமல்லாமல் தேர்தல் ஆணையத்தில் கட்சியை பதிவு செய்யவும் விண்ணப்பித்திருக்கிறார் விஜய்.

சட்டமன்றத் தேர்தலுக்கு இன்னும் இரண்டு ஆண்டுகள் இருக்கும் நிலையில் இப்போதே கட்சியைத் துவக்குகிறார் எனில் நாடாளுமன்றத் தேர்தலில் பா.ஜ.க.வுக்காக மறைமுகமாக உதவுகிறாரா? என்கிற கேள்வியை முன்வைக்கிறார்கள் அரசியல் விமர்சகர்கள்.

அவர்களிடம் நாம் பேசியபோது, "சட்டமன்றத் தேர்தலுக்குத்தான் நான் வருவேன் என நாடாளுமன்றத் தேர்தல் நெருங்கும் சூழலில் அவர் கட்சியை பதிவு செய்ய துணிந்ததில்தான் சந்தேகம் வருகிறது. சட்டமன்றம்தான் உங்களுடைய இலக்கு என்றால் நாடாளுமன்றத் தேர்தல் முடிந்ததும் கட்சியை ஆரம்பிக்கலாமே! அதைத்தவிர்த்து, ஏன் இவ்வளவு அவசரம் காட்ட வேண்டும்? ஆக, உங்களுடைய நோக்கம் 2026 என்றாலும் 2024-ல் பா.ஜ.க.வுக்கு உதவ வேண்டும் என்பதுதான்.

அதாவது, விஜய்யின் ரசிகர்கள் தி.மு.க., அ.தி.மு.க., காங்கிரஸ் உள்ளிட்ட பல்வேறு கட்சிகளின் ஆதரவாளர்களாக இருக்கின்றனர். ரசிகர்மன்றத்தை விஜய் மக்கள் இயக்கமாக மாற்றிய நிலையில், அதன் உறுப்பினர்களாக இருப்பவர்கள்கூட தேர்தல் நேரத்தில் பல்வேறு கட்சிகளுக்கு ஓட்டளித்திருக்கிறார்கள். இதில், விஜய்யின் விருப்பம் எது? யாருக்கு வாக்களிக்க வேண்டும்? என்கிற நிலைப்பாடெல்லாம் எதுவும் அவர்களுக்கு இல்லை. பிடித்த கட்சிக்கு வாக்களிப்பார்கள்.

இந்த நிலையில், நாடாளுமன்றத் தேர்தலில் அதே பாணியில் தங்களுக்குப் பிடித்த கட்சிக்கு ஆதரவாக வாக்களிப்பதே விஜய் மக்கள் இயக்கத்தினரின் நிலைப்பாடாக இருந்தது. இதனை பா.ஜ.க. உணர்ந்திருக்கிறது. அந்த வகையில் தி.மு.க., அ.தி.மு.க. கட்சிகளுக்கு விஜய் ரசிகர்களின் வாக்குகள் செல்லாமல் தடுப்பதற்காகவே அரசியல் கட்சி துவக்கம் என்கிற இந்த யுக்தியை விஜய்யை வைத்து பயன்படுத்தியிருக்கிறது பா.ஜ.க.

அதாவது, நாடாளுமன்றத் தேர்தலுக்கு முன்பாக அரசியல் கட்சித் துவக்குவதை அறிவித்துவிட்டால், தனது ரசிகர்கள் யாருக்கு வாக்களிக்க வேண்டும் என்பதை விஜய் சொல்லவேண்டும் என்கிற எதிர்பார்ப்பு ஏற்படும். அப்போது, எந்த கட்சி நல்லது என நினைக்கிறீர்களோ அதற்கு வாக்களியுங்கள் என விஜய் சொன்னால், ஏதோ ஒரு கட்சி நல்ல கட்சியாக இருக்கிறது என்று பொருள் வரும். அப்புறம் எதற்கு நீங்கள் ஒரு கட்சியை ஆரம்பித்தீர்கள்? என்கிற கேள்வியும் விமர்சனங்களும் வரும். அதனால், யாருக்கும் வாக்களிக்க வேண்டாம் என்று வெளிப்படையாகவும் சொல்ல முடியாது.

அதேசமயம், வெளிப்படையாகச் சொல்லாமல், இந்த தேர்தலில் எனது மக்கள் இயக்கத்தினர் பங்கெடுக்கமாட்டார்கள் என விஜய் சொல்லக்கூடும். அது மக்கள் இயக்கத்தினருக்கு சொல்லப்படும் மறைமுக உத்தரவு. பங்கெடுக்க வேண்டாம் எனச் சொன்னால் வாக்களிக்காதீர்கள் என சொல்கிற பொருள்தான். அதனால், அவருடைய ரசிகர்கள் நாடாளுமன்ற தேர்தலில் வாக்களிக்காமல் புறக்கணிப்பார்கள்.

இதனால் இதுவரை தி.மு.க., அ.தி.மு.க., காங்கிரசுக்கு வாக்களித்த அவரது ரசிகர்கள் வாக்களிக்காமல் தவிர்த்தால் அது பா.ஜ.க.வுக்கு சாதகம். ஒரு கட்சியை ஆதரித்தால்தான் அது சாதகம் என்பதல்ல; அக்கட்சியின் எதிர்க்கட்சிகளுக்கு செல்லும் வாக்குகளை தடுத்தாலும் அது அக்கட்சிக்கு சாதகம்தான். இந்த கோணத்தில்தான் விஜய்யின் அரசியல் இருக்கிறது. கட்சியை ஆரம்பித்துவிட்டு நாடாளுமன்ற தேர்தலுக்கு வரமாட்டேன் என சொல்வதன் பின்னணியின் யுக்தியும் இதுதான். ஆக, கட்சியை அவசர, அவசரமாக பதிவு செய்திருப்பதின் நோக்கமே, பா.ஜ.க.வுக்கு சாதகமான களம் உருவாகவேண்டும் என்பதுதான்.

இல்லையெனில், கட்சியின் பெயராக ஒரே ஒரு பெயரை தேர்வு செய்து தேர்தல் ஆணையத்தில் விண்ணப்பிக்கமுடியுமா? பொதுவாக, புதிதாக ஒரு கட்சியை பதிவு செய்வதாக இருந்தால், தாங்கள் விரும்பும் பெயரையும், அதற்கு மாற்றாக 2 பெயர்களையும் விண்ணப்பத்தில் குறிப்பிடுவார்கள். ஆனால், விஜய், ஒரே ஒரு பெயரை மட்டுமே குறிப்பிட்டிருக்கிறார். அப்படியானால் அந்த ஒரு பெயரும் ஓ.கே. ஆகிவிடும் என்பதுதானே? தேர்தல் ஆணையத்தின் உதவி இல்லாமல் இது சாத்தியமாகாது. தலைமை தேர்தல் ஆணையம் பா.ஜ.க.வின் கட்டுப்பாட்டில் இருக்கிறது என்பது தெரிந்த விஷயம்தான். அதனால், எப்படி சுத்திச் சுத்தி வளைத்துப் பார்த்தாலும் பா.ஜ.க.வுக்கு மறைமுகமாக உதவுகிற யுக்திதான் அவசரம் அவசரமாக அரசியல் கட்சியை அறிவித்தது'' என்று விரிவாக சுட்டிக்காட்டுகிறார்கள்.

இதுகுறித்து, விஜய் மக்கள் இயக்கத்தினரிடம் விசாரித்தபோது, "விஜய் தனது அறிக்கையில் தனது அரசியல் நிலைப்பாட்டினை தெளிவாக விவரித்திருக்கிறார். குறிப்பாக, ஆட்சி அதிகார அரசியல், ஊழல் அரசியல், மத அரசியல், சாதி அரசியல் ஆகியவைகளை கடுமையாக விமர்சித்திருக்கிறார். இதன்மூலம், தி.மு.க., அ.தி.மு.க., பா.ஜ.க., சாதி கட்சிகள் என பல கட்சிகளையும் தாக்கியுள்ளார். அதனால் தி.மு.க., அ.தி.மு.க.வை எப்படி பார்க்கிறாரோ அப்படித்தான் பா.ஜ.க.வையும் பார்க்கிறார்.

நாடாளுமன்றத் தேர்தலில் போட்டியிடாமல் தவிர்ப்பதற்கும், இப்போதே கட்சியை பதிவு செய்ய விண்ணப்பித்தற்கும் காரணங்கள் நிறைய இருக்கிறது. ஒரு தேர்தலில் போட்டியிடுவது, நேரடியாகக் களமிறங்குவது அவ்வளவு சாதாரண விசயம் கிடையாது. அடிப்படையில் கட்சியின் கட்டமைப்பை வலிமையாக வைத்துள்ள தி.மு.க.வே, நாடாளுமன்ற தேர்தலை எதிர்கொள்ள கிட்டத்தட்ட 8 மாதங்களுக்கு முன்பாகவே தேர்தல் வேலையில் இறங்கிவிட்டது. அதுவும் ஆளும் கட்சியாக இருக்கும் சூழலிலும்கூட.

அப்படியிருக்கும்போது தேர்தலுக்கு இன்னும் 2 மாதங்களே இருக்கும் மிக மிகக் குறுகிய கால சூழலில் ஒரு கட்சியை ஆரம்பித்து தேர்தலில் போட்டியிட முடியுமா? முடியாது. அதனால், குறைந்தபட்சம் ஒன்றரை வருடங்களாவது தேவை என உணர்ந்துதான், கட்சியை முதலில் பதிவு செய்வோம்; கட்சியை பதிவு செய்துவிட்டு, மக்கள் இயக்கத்தினரை அரசியல் கட்டமைப்புக்குள் நிறுவுவதற்கான வேலையைத் துவக்கலாம் என்கிற திட்டத்தில்தான் பதிவு செய்ய முன்வந்தார் விஜய்.

இதுமட்டுமல்ல; இந்திய தேர்தல் ஆணையம் திடீர் திடீரென புதிய புதிய விதிகளைக் கொண்டு வருகிறது. நாடாளுமன்றத் தேர்தலுக்குப் பிறகு இன்னும் பல விதிகளைக் கொண்டு வரலாம். அதனால், அந்த சிக்கல்களை தவிர்ப்பதற்காகவே தற்போதைய விதிகளின்படி முதலில் விண்ணப்பித்துவிடுவோம் என்கிற கோணத்தில்தான் பதிவு செய்யும் முடிவை எடுத்திருக்கிறார்.

அதேபோல, ஒரே ஒரு பெயரை மட்டும் வைத்து எப்படி விண்ணப்பிக்க முடியும்? பா.ஜ.க.வின் உதவியில்லாமல் தேர்தல் ஆணையத்தில் இன்புளூயன்ஸ் செய்திட முடியுமா? என்றெல்லாம் கேள்வி கேட்கிறார்கள். உண்மையில், கட்சியின் முக்கிய பெயரோடு மேலும் சில பெயர்கள் தேர்வு செய்யப்பட்டிருந்தன. ஆனால், இந்திய அளவில் ஆராய்ந்தபோது, தமிழக வெற்றி கழகம் எனும் பெயரில் எந்த மாநிலத்திலும் அரசியல் கட்சி செயல்படவில்லை. தேர்தல் ஆணையத்திலும் அந்த பெயரில் யாரும் விண்ணப்பிக்கவோ, பதிவு செய்யவோ இல்லை.

இதையெல்லாம் ஆராய்ந்த பிறகுதான், ஒரே ஒரு பெயர் போதும் என முடிவு செய்து அதனையே குறிப்பிட்டிருக்கிறார் விஜய். இதுதான் உண்மை. இந்த தேர்தலில் யாருக்கு வாக்களிக்க வேண்டும்; வாக்களிக்கக் கூடாது என்றெல்லாம் விஜய் சொல்லப்போவதில்லை. இப்படியிருக்க, பா.ஜ.க.வுக்காக அவர் இயங்குகிறார்; பா.ஜ.க. அவரை இயக்குகிறது என்பதெல்லாம் அவரது வருகையால் பயப்படும் கட்சிகளின் உளறல்; சதி. மாற்று அரசியலை முன் வைத்து வருகிறார். வரும்போதே இல்லாத குற்றச்சாட்டுகளை விமர்சனங்களாக வைத்து அவரை முடக்கிவிடாதீர்கள். அவர் சரியானவர் இல்லை எனில் மக்கள் நிராகரிக்கட்டும்; விமர்சனம் எனும் பெயரில் இல்லாத ஒரு பூச்சாண்டியை (பா.ஜ.க.) காட்டி அவரது அரசியலை கொச்சைப்படுத்தாதீர்கள்'' என்கின்றனர் தமிழக வெற்றி கழகத்தில் இணையும் விஜய் மக்கள் இயக்கத்தினர்.

Next Story

“அதுக்கு நிறைய தைரியம் வேண்டும்” - விஜய் குறித்து பிரசாந்த்

Published on 26/02/2024 | Edited on 26/02/2024
prashanth about vijay

நெல்லை மாவட்டம் பாளையங்கோட்டை பகுதியில் ஹெல்மெட் குறித்த விழிப்புணர்வு நிகழ்ச்சியில் பிரசாந்த் கலந்து கொண்டார். அதில் பொதுமக்களுக்கு இலவசமாக ஹெல்மெட் வழங்கினார். இதையடுத்து செய்தியாளர்களைச் சந்தித்த அவர், அவர்களின் பல்வேறு கேள்விகளுக்கு பதிலளித்தார். 

அவர் பேசுகையில், “தலைக்கவசம் உயிர்க்கவசம் என்பார்கள். என்னை பொறுத்தவரை அது உயிரைத் தாண்டி ஒரு குடும்பத்தை காக்கும் கவசம். இன்றைக்கு நடக்கும் நிறைய விபத்துகளில் உயிர் பலியாவது தலைக்கவசம் அணியாதது தான் காரணம் என புள்ளி விவரங்கள் சொல்கின்றன. அதனால் மக்களுக்கு தலைக்கவசம் வழங்கி வருகிறேன். அதன் மூலம் ஒருத்தர் உயிர் காப்பாற்றப்பட்டாலும் எனக்கு பெருமைதான்” என்றார்.  

அடுத்தடுத்த படங்கள் குறித்துப் பேசிய அவர், “அந்தணன் படம் முடிந்துவிட்டது. விரைவில் ரிலீஸாகும். அதற்கான பணிகள் நடைபெற்று வருகிறது. விஜய் சாருடன் சேர்ந்து ஒரு படம் நடிச்சிட்டு இருக்கேன். இன்னும் இரண்டு மூன்று புது ப்ராஜெக்ட் வந்திருக்கு. அதிலும் நடிக்க போறேன். விஜய்யுடன் நடிக்கும் படம் சூப்பரா போயிட்டு இருக்கு. உங்க எதிர்பார்ப்புக்கு மேல் அந்த படம் இருக்கும்” என்றார். 

மேலும், விஜய்யின் அரசியல் வருகை குறித்து பேசிய அவர், “விஜய்யை என்னுடைய சகோதரர் என்று கூட சொல்லலாம். மக்களுக்கு சேவை செய்யும் பணி உண்மையிலே உழைப்பும், கடமைகளும் நிறைந்தது. அது விஜய் சார்கிட்ட இருக்கு. அதை நான் வாழ்த்துகிறேன்.  எனக்கு அது ரொம்ப கஷ்டம். அதுக்கு நிறைய தைரியம் வேண்டும். அவர் இறங்கியிருக்கிறார், வாழ்த்துகள்” என்றார். 

Next Story

ரீ ரிலீஸில் ஹிட்டடிக்கும் பழைய படங்கள்

Published on 26/02/2024 | Edited on 26/02/2024
re release movie gets good response

வெற்றி பெற்ற பழைய படங்களை மீண்டும் ரசிகர்களுக்கு விருந்தளிக்கும் விதமாக ரீ ரிலீஸ் செய்யப்படுவது நீண்ட காலமாக இருந்து வருகிறது. முதல் கொரனா முடிந்த சமயத்தில் புதுப் படங்கள் பெரிதளவு தியேட்டரில் ரிலீஸாகாமல் இருந்ததால், ரசிகர்களின் வரவேற்பை பெற்ற படங்களான பருத்தி வீரன், எம்.எஸ். தோனி உள்ளிட்டவை ரீ ரிலீஸ் செய்யப்பட்டன. மேலும் சமூக வலைத்தளங்களில் ரசிகர்களின் ஆதரவு எந்த படத்திற்கு அதிகமாக இருக்கிறதென்பதை வாக்கெடுப்பு நடத்தி அதன் மூலம் படங்களை ரீ ரிலீஸ் செய்து வந்தன பிரபல திரையரங்குகள். இதில் ஆயிரத்தில் ஒருவன், புதுப்பேட்டை, அன்பே சிவம் உள்ளிட்ட படங்கள் வெளியாகின. இந்த படங்கள் வெளியான சமயத்தில் வரவேற்பு பெறவில்லை என்றாலும் ரீ ரிலீஸுக்கு பெரும் வரவேற்பு கிடைத்தது. 

குறிப்பாக கல்ட் க்ளாசிக் என்று அடையாளப்படுத்தப்பட்ட படங்கள் காலத்தை கடந்து ரசிக்கும்படியாக இருக்கும் படங்கள், இன்றைய காலத்து இளைஞர்களை வெகுவாக கவர்ந்துள்ளது. அதனால் மேற்குறிப்பிட்ட அடையாளப்படுத்தப்பட்ட படங்கள் எல்லாம் திரையரங்கிற்கு வருவதை ரசிகர்கள் கொண்டாடுவதோடு ஆரவாரமாக ஆதரித்தும் வருகின்றனர். பிடித்த படங்களை ரீ ரிலீஸ் செய்யும்படியும் திரையரங்க உரிமையாளர்களுக்கு சமூக வலைத்தளங்களில் கோரிக்கை வைத்து வருகின்றனர். 

இந்த வரிசையில் சமீப காலமாக ரீ ரிலீஸ் செய்யும் படங்கள் அதிகரித்து வருகின்றன. எம்.ஜி.ஆர், சிவாஜி தொடங்கி தற்போது இருக்கும் முன்னணி நடிகர்களின் படங்களும் இந்த லிஸ்டில் இருக்கின்றன. எம்.ஜி.ஆரின் உலகம் சுற்றும் வாலிபன், சிவாஜியின் வசந்த மாளிகை, ரஜினியின் அண்ணாமலை, கமலின் வேட்டையாடு விளையாடு, விஜய்யின் காதலுக்கு மரியாதை, ஷாஜகான், திருமலை, அஜித்தின் வாலி, சிட்டிசன், பில்லா, காதல் மன்னன், சூர்யாவின் வாரணம் ஆயிரம், தனுஷின் வட சென்னை, 3, யாரடி நீ மோகினி, விஜய் சேதுபதியின் 96, ஜீவாவின் சிவ மனசுல சக்தி, பிரபு தேவாவின் மின்சாரக் கனவு என ஏகப்பட்ட படங்கள் அடங்கும். இதில் பல படங்கள் ரீ ரிலீஸ் செய்யப்பட்டு தற்போது வரை திரையரங்குகளில் வெற்றிகரமாக ஓடிக்கொண்டு வருகிறது. 

இதுபோக கில்லி படம் அடுத்த மாதம் ரீ ரிலீஸாகவுள்ளது. தொடர்ந்து ஹிட்டடித்த படங்கள் ரீ ரிலீஸ் செய்யப்பட்டு வருவதால் மேலும் பல சூப்பர் ஹிட் படங்கள் ரீ ரிலீஸாகும் என எதிர்பார்க்கப்படுகிறது.