இங்க வந்தும் இதைத்தான் பாக்குறீங்களா? கூகுள் நிறுவனத்தை அதிர வைத்த தமிழர்கள்

தங்களது படைப்பாற்றலை வெளிப்படுத்த சினிமாவையும் தொலைக்காட்சி சேனல்களையும் நம்பி, துரத்தி, வாய்ப்புக்காகக் காத்திருந்த லட்சக்கணக்கான இளைஞர்கள், யூ-ட்யூபில் தங்கள் திறமையை வெளிப்படுத்தி லட்சக்கணக்கான ரசிகர்களை சென்றடைந்தனர். அதன் மூலம் நல்ல வருமானத்தையும் ஈட்டினர். இந்த நிலவரத்தை உணர்ந்த திரைப்படத்துறையும் யூ-ட்யூப் பக்கம் வந்தது. பாடல்கள், ட்ரெயிலர்கள் யூ-ட்யூபில் வெளியிடப்பட்டன. இன்று அது, திரைப்பட தயாரிப்பாளர்களுக்கு கூடுதல் வருமானத்தைத் தரும் வாய்ப்பாக அமைந்துள்ளது.

திரைப்படங்களுக்கு போட்டியாக 90களில் பெரிய ஊடகமாக உருவெடுத்தது தொலைக்காட்சி. முதலில் வாரத் தொடர்களாக வந்தவை மக்களின் வரவேற்பைப் பார்த்து மெகா சீரியல்களாக தினமும் ஒளிபரப்பாகின. பத்து ஆண்டுகளுக்கும் மேலாக கோலோச்சிய தமிழ் மெகா சீரியல்களுக்கு அச்சுறுத்தலாக டப்பிங் சீரியல்கள் இடையில் வந்தன. சிறிது இடைவெளிக்குப் பிறகு தற்போது மீண்டும் தமிழ் சீரியல்கள் வெற்றிநடை போடுகின்றன. மெகா சீரியல்களை வெறித்தனமாகப் பார்ப்போரை கிண்டல் செய்வதும் தமிழகத்தில் உண்டு. தொலைக்காட்சித்துறையும் மெதுவாக யூ-ட்யூபை முக்கியமாகக் கருதத் தொடங்கியது. மெகா சீரியல்கள் யூ-ட்யூபிலும் வரத் தொடங்கின. ஒவ்வொரு தொலைக்காட்சி சேனலும் தங்களுக்கென தனி யூ-ட்யூப் சேனல் தொடங்கி அதிலும் சீரியல்கள் உள்ளிட்ட பல நிகழ்ச்சிகளை ஒளிபரப்பினர். இன்று யூ-ட்யூப் மற்றும் பிற ஆன்லைன் வீடியோ ஒளிபரப்பு தளங்கள் தொலைக்காட்சி சேனல்களுக்கு பெரிய போட்டியாக உருவெடுத்துள்ளன.