Skip to main content

துரை வையாபுரி டூ துரை வைகோ; பிசினஸ்மேன் பொலிடிசியன் ஆன கதை!

Published on 26/03/2024 | Edited on 27/03/2024
 The story of a businessman becoming a politician!

2024 ஆம் ஆண்டு நாடாளுமன்ற தேர்தல் அறிவிக்கப்பட்டுள்ளது. தமிழகத்தில் அரசியல் கட்சிகள் கூட்டணி பேச்சுவார்த்தையை இறுதி செய்து விட்டன. அந்த வகையில் திமுகவின் கூட்டணியில் அங்கம் வகிக்கும் மறுமலர்ச்சி திராவிட முன்னேற்றக் கழகம் தொகுதி ஒதுக்கீடு பேச்சுவார்த்தையில் ஈடுபட்டது. கடந்த நாடாளுமன்ற தேர்தலில் மதிமுக ஒரு மக்களவை தொகுதியும், ஒரு ராஜ்ய சபா சீட்டும் திமுக கூட்டணியில் பெற்றநிலையில், இம்முறை ஒரு எம்.பி தொகுதி மட்டுமே கிடைத்தது. இந்தமுறை காங்கிரஸ் வசமிருந்த திருச்சி நாடாளுமன்ற தொகுதி, மதிமுகவிற்கு ஒப்பந்தம் செய்யப்பட்டது. மதிமுக பொதுச் செயலாளர் வைகோ முழுமனதுடன் திமுக தலைவரும், தமிழக முதல்வருமான மு.க.ஸ்டாலினை சந்தித்து, தொகுதி ஒப்பந்தத்தில் போட்டியிட கையெழுத்திட்டார். 

இதையடுத்து, யார் திருச்சியில் மதிமுக சார்பில் போட்டியிடுவார்கள்? என்ற கேள்வி எழுந்த நிலையில், அக்கட்சியினர் வேட்பாளராக துரை வைகோ ஒருமனதாக களமிறங்கியுள்ளார். துரை வையாபுரியாக இருந்தவர், வாரிசு அரசியலை விரும்பாத வைகோவின் கட்சியிலே வேட்பாளராக வளர, பல தடைகளை கடந்து இந்த உச்சத்தை எட்டியுள்ளார் என்கின்றனர் அரசியல் விமர்சர்கள். வைகோ - ரோணுகாதேவி தம்பதியின் மகன் துரை வைகோ. கல்லூரி படிப்பு வரை துரை வையாபுரிக்கு அரசியலில் ஈர்ப்பு கிடையாது. கோவையில் கல்லூரி முடித்த பிறகும், அவர் தந்தையின் அரசியல் பாதையின் மீது அதிகம் ஈடுபாடு வாலிப பருவத்தில் இல்லாத காரணத்தால், தனியாக பிசினஸ் செய்து வந்தார். அதன்பிறகு, அரசியல் மீது ஈர்ப்பு ஏற்பட, ஒருபுறம் மதிமுக கட்சிப் பணிகளை ஒருங்கிணைப்பது, மாநில நிர்வாகிகளுடன் தொடர்பில் இருப்பது என கட்சி பணிகளை மேற்கொண்டு வந்தார். ஆனால், கட்சி நிர்வாகிகளை தவிர பொதுவில் வெளிக்காட்டியது இல்லை.

பொடா வழக்கில் வைகோ கைதான சமயத்தில் கிட்டத்தட்ட இரண்டு ஆண்டுகள் வரை கட்சி பணிகளை கவனித்துள்ளார். 1993 ஆம் ஆண்டு, கட்சித் தொடங்கிய வைகோ, தொண்டர்கள் மத்தியில் என் குடும்பத்தினர் அரசியலுக்கே வரமாட்டார்கள் என பேசிவந்தார். இதற்கு கட்சியின் தொண்டர்கள் கடுமையான எதிர்ப்பு தெரிவித்துள்ளனர். கட்சியின் முக்கிய பொறுப்பிற்கு வராமலே, கட்சிக்காக பல பணிகளை செய்து வரும் துரை வையாபுரி கட்சியில் இணைய வேண்டும் என்றும், கட்சிப் பணியிலும் களப் பணியிலும் ஈடுபடுவரை தடுக்க வேண்டாம் எனவும் கோரிக்கை வைத்துள்ளனர். அதனை பரிசீலனை செய்த வைகோ தொண்டர்களின் விருப்பத்தை உணராமல், கட்சிக்காக பணியாற்றும் ஒருவரை தடுக்கக் கூடாது என முடிவெடுத்தார். ஆனால், எளிதாக தனது மகனிற்கு பதவி கொடுக்க வைகோ விரும்பவில்லை. 

மதிமுக கட்சியின் முக்கிய நிர்வாகிகள் கூட்டத்தை கூட்டி, வாக்கெடுப்பு நடத்தினார். அதில் 104 பேர் அவருக்கு ஆதரவு தெரிவித்தனர். 2 பேர் வாய்ப்பு வழங்க கூடாது என்றனர். இதையடுத்து, பெரும்பான்மை அடிப்படையில் மதிமுக தலைமை கழக செயலாளர் துரை வையாபுரி நியமிக்கப்பட்டார். மதிமுக கூட்டத்தில், இந்திய நாட்டின் அரசியல் வரலாற்றில் தியாக தழும்புகளை ஏற்று மிசா, தடா போன்ற அடக்குமுறை சட்டங்களை சந்தித்து குடும்ப சுகபோகங்களை மறந்து தமிழினம், தமிழ் மொழிக்காக அல்லும் பகலும் உழைத்து வரும் திராவிட இயக்கத்து போர்வாள் வைகோ அவர்களின் புதல்வர் துரை வைகோ அவர்களை உரிய இடத்தில் வைத்து மதிமுகவில் பணியாற்றிட வாய்ப்பு அளிக்க வேண்டும் என தீர்மானம் கட்சியில் நிறைவேற்றப்பட்டது. ஆனால், பதவி வந்தபிறகும் விடாமல் துரை வையாபுரி முழுவீச்சில் கட்சிப்பணியிலும் களப்பணியிலும் ஈடுபட்டார். 

தமிழகத்தின் பல மாவட்டங்களில் சுற்றுப்பயணம் மேற்கொண்டு வந்தார். மதிமுக தொண்டர்களின் வீடுகளில் நடக்கும் சுப நிகழ்ச்சிகள், துக்க காரியங்கள் என அனைத்திலும் அவர் பங்கேற்றார். இதனிடையே குறுங்காடுகள் அமைப்பது போன்ற பணிகளையும் தேர்ந்தெடுத்து சூழலியல் ஆர்வலராகவும் துரை வையாபுரி வலம் வந்தார். இத்தனை பணிகளை செய்துதான் துரை வையாபுரி அரசியலில் துரை வைகோவாக மாறியதாக மதிமுக கட்சியைச் சேர்ந்தவர்கள் கூறுகின்றனர். இந்த நிலையில்தான், துரை வைகோ திருச்சி நாடாளுமன்ற வேட்பாளராக அறிமுகப்படுத்தப்பட்டுள்ளார். மகன் போட்டியிடுவது பற்றிய பேசிய வைகோ, ''தொண்டர்களை வசீகரிக்கக்கூடிய திறமை துரை வைகோவிற்கு இருக்கிறது. மனிதாபிமானம் இருக்கிறது. பொதுவாழ்வில் வெற்றிபெற தேவையான அனைத்து குணமும் அவருக்கு இருக்கிறது. எனவே துரை வைகோ வெல்வார் என்ற நம்பிக்கை உள்ளது..'' என நம்பிக்கை தெரிவித்துள்ளார். 

திருச்சி நாடாளுமன்ற தேர்தலை பொருத்தவரை இதுவரை நடைபெற்ற தேர்தல்களில் வென்றவர்களில் செல்வராஜ், அடைக்கலராஜ், குமார் மூவர் மட்டுமே மண்ணின் மைந்தர்கள். அந்த வகையில் நெல்லை மாவட்டத்தைப் பூர்வீகமாகக்கொண்ட வைகோவின் மகன் துரை வைகோவும் வெற்றி பெறுவார் என மதிமுகவினர் நம்பிக்கை தெரிவிக்கின்றனர். திமுகவைப் பொறுத்தவரை பெரும்பாலும் கூட்டணிக் கட்சிகளுக்குத்தான் திருச்சி தொகுதி ஒதுக்கப்பட்டு வந்திருக்கிறது. 2004 ஆம் ஆண்டு இந்தத் தொகுதியில் மதிமுகவின் எல்.கணேசன் வெற்றிபெற்றிருப்பதால் அதை காரணமாக கூறி திருச்சி தொகுதியைத் தங்களுக்கு ஒதுக்க வேண்டும் என மதிமுக கேட்டு பெற்றுள்ளதாக கூறப்படுகிறது. தேர்தல் அரசியலில் முதன் முறையாக காலடி எடுத்து வைக்கும் துரை வைகோ பெருவாரியான வாக்கு வித்தியாசத்தில் வெற்றி பெறுவதற்கு அனைத்து பணிகளையும் அவரது கட்சியினர் செய்து வருகின்றனர். நாடாளுமன்ற தேர்தலுக்கு நாட்கள் குறைவாக இருப்பதால், மதிமுகவினர் தேர்தல் பணிகளில் அதிரடி காட்டத் தொடங்கியுள்ளனர்.

Next Story

முதல்கட்ட வாக்குப்பதிவு; ஏற்பாடுகள் தீவிரம்!

Published on 18/04/2024 | Edited on 18/04/2024
First Phase Voting; Preparations are intense

நாடாளுமன்ற மக்களவைத் தேர்தல் ஏழு கட்டங்களாக நடைபெற உள்ளது. அந்த வகையில் முதற்கட்டமாக தமிழகம், புதுச்சேரி உள்ளிட்ட 21 மாநிலங்களில் உள்ள 102 மக்களவைத் தொகுதிகளுக்கு நாளை (19.04.2024) வாக்குப்பதிவு நடைபெற உள்ளது. இதில் தமிழகத்தில் உள்ள 39 தொகுதிகளிலும், புதுச்சேரியில் உள்ள ஒரு தொகுதியிலும் என 40 தொகுதிகளில் ஒரே கட்டமாக நாளை வாக்குப்பதிவு நடைபெறுகிறது. இந்த வாக்குப்பதிவு காலை 7.00 மணி முதல் மாலை 6.00 மணி வரை நடைபெற உள்ளது. அதன்படி முதற்கட்டமாக வாக்குப்பதிவு நடைபெற உள்ள தொகுதிகளில் தேர்தல் பரப்புரை நேற்று (17.04.2024) மாலை 6 மணியுடன் நிறைவு பெற்றது. அதாவது தேர்தல் பிரச்சாரத்திற்கான கடைசி நாளில் அனைத்துக் கட்சிகளும் இறுதிக்கட்ட பிரச்சாரத்தில் இறங்கின. இதற்கான வாக்கு எண்ணிக்கை ஜூன் 4 ஆம் தேதி நடைபெறவுள்ளது.

முதற்கட்ட தேர்தலில் தமிழகத்தின் 950 வேட்பாளர்கள் உள்பட 1,625 வேட்பாளர்கள் களத்தில் உள்ளனர். இந்த முதல் கட்ட தேர்தலில் மத்திய அமைச்சர்களான நிதின் கட்கரி, கிரன் ரிஜிஜு, எல். முருகன், ஜிதேந்திர சிங், சர்வானந்த் சோனோவால், அர்ஜுன்ராம் மேக்வால் மற்றும் சஞ்சீவ் பல்யான் என 8 பேர் போட்டியில் உள்ளனர். தெலங்கானாவின் முன்னாள் ஆளுநரும், புதுச்சேரியின் பொறுப்பு துணைநிலை ஆளுநருமான தமிழிசை சௌந்தரராஜன் களத்தில் உள்ளார். மேலும் திரிபுரா முன்னாள் முதல்வர் பிப்லப் குமார் தேவ், அருணாசலப் பிரதேச முன்னாள் முதல்வர் நபம் துகி, தமிழகத்தின் முன்னாள முதல்வர் ஓ. பன்னீர்செல்வம் ஆகியோர் தேர்தலில் போட்டியிடுகின்றனர்.

அதே சமயம் முதற்கட்ட தேர்தலுடன் தமிழகத்தின் விளவங்கோடு தொகுதி இடைத்தேர்தலுக்கான வாக்குப்பதிவும் நாளை நடைபெறுகிறது. இதே போன்று திரிபுரா மாநிலம் ராம்நகர் சட்டமன்ற தொகுதிக்கான இடைத்தேர்தலும் நாளை நடைபெறவுள்ளது. இந்நிலையில் தமிழகத்தின் 39 தொகுதிகளில் வாக்குப்பதிவு நடைபெறவுள்ள நிலையில் 68 ஆயிரத்து 320 வாக்குச்சாவடிகள் தயார் நிலையில் உள்ளன. தமிழகத்தில் பதற்றமான 45 ஆயிரம் வாக்குச்சாவடிகளில் வெப்கேமரா மூலம் தொடர்ந்து கண்காணிக்க தேர்தல் ஆணையத்தின் சார்பில் ஏற்பாடு செய்யப்பட்டுள்ளது. மிகவும் பதற்றமான 8 ஆயிரத்து 50 வாக்குச்சாவடிகளில் நவீன ஆயுதங்களுடன் துணை ராணுவத்தினர் பாதுகாப்பு பணியில் ஈடுபட்டுள்ளனர். இத்தகைய சூழலில் தமிழகம் முழுவதும் வாக்குப்பதிவு இயந்திரங்களை வாக்குச்சாவடிகளுக்கு அனுப்பும் பணியும் தீவிரமடைந்துள்ளது. 

Next Story

வாக்காளர்களுக்கு பணம்; கையும் களவுமாக சிக்கிய பாஜக பிரமுகர்! 

Published on 18/04/2024 | Edited on 18/04/2024
Money for Voters BJP leader caught handed

நாடாளுமன்ற மக்களவைத் தேர்தல் ஏழு கட்டங்களாக நடைபெற உள்ளது. அந்த வகையில் முதற்கட்டமாக தமிழகம், புதுச்சேரி உள்ளிட்ட 21 மாநிலங்களில் உள்ள 102 மக்களவைத் தொகுதிகளுக்கு நாளை (19.04.2024) வாக்குப்பதிவு நடைபெற உள்ளது. இந்த வாக்குப்பதிவு காலை 7.00 மணி முதல் மாலை 6.00 மணி வரை நடைபெற உள்ளது. அதன்படி முதற்கட்டமாக வாக்குப்பதிவு நடைபெற உள்ள தொகுதிகளில் தேர்தல் பரப்புரை நேற்று (17.04.2024) மாலை 6 மணியுடன் நிறைவு பெற்றது. மேலும் இதற்கான வாக்கு எண்ணிக்கை ஜூன் 4 ஆம் தேதி நடைபெறவுள்ளது. அந்த வகையில் முதற்கட்டமாக தமிழகத்திலும், புதுச்சேரியிலும் வாக்குப்பதிவு நடைபெற உள்ளதால் மக்களவைத் தேர்தலுக்கான பரப்புரை நேற்றுடன் ஓய்ந்தது.

அதே சமயம் தேர்தல் நடத்தை விதிமுறைகள் அமலுக்கு வந்துள்ளதால், வாக்காளர்களுக்கு பணம் மற்றும் பரிசுப் பொருட்கள் கொடுப்பதைத் தடுக்கும் வகையில் தேர்தல் பறக்கும் படையினர் தீவிர கண்காணிப்பு பணியில் ஈடுபட்டு வருகின்றனர். அதன் ஒரு பகுதியாக அரசியல் கட்சித் தலைவர்கள், எம்பிக்கள், அமைச்சர்கள், முன்னாள் அமைச்சர்கள் மற்றும் வேட்பாளர்களின் வாகனங்களில் பறக்கும் படையினர் தீவிரமாக சோதனை நடத்தி வருகின்றனர். இந்நிலையில் பொள்ளாச்சி மக்களவைத் தொகுதியில் பாஜக சார்பில் வசந்த ராஜன் போட்டியிடுகிறார். இவருக்கு ஆதரவாக வாக்களிக்கக் கோரி நேற்று நள்ளிரவில் பூலுவப்பட்டியில் உள்ள தேநீர் கடையில் வார்டு வாரியாக ஆலந்துறை பாஜக மண்டல தலைவர் ஜோதி மணி என்பவர் வாக்காளர்களுக்கு பணம் கொடுத்துள்ளார்.

இது குறித்து கிடைத்த ரகசியத் தகவலின் அடிப்படையில் தேர்தல் பறக்கும் படை அதிகாரிகள் சம்பவ இடத்திற்கு விரைந்து சென்று பணம் விநியோகம் செய்த பிடித்து விசாரணை மேற்கொண்டனர். அப்போது அவரிடம் இருந்த ரூ.81 ஆயிரம் ரொக்கப்பணத்தையும், வாக்காளர் பெயர்கள் அடங்கிய பட்டியலையும் பறக்கும்படை அதிகாரிகள் பறிமுதல் செய்தனர். பறக்கும் படை அதிகாரிகள் நடத்திய விசாரணையில் ஏற்கனவே சில வார்டுகளில் பணம் விநியோகம் செய்த நிலையில் மேலும் சில வார்டுகளுக்கு பணம் கொடுக்க முயன்றது தெரிய வந்துள்ளது.