Skip to main content

ஸ்டாலினை ஏமாற்றும் தி.மு.க. நிர்வாகிகள்!

Published on 07/12/2020 | Edited on 07/12/2020
M. K. Stalin

 

 

ஆட்சி மாற்றத்திற்கான காரணங்களை காணொளி கூட்டங்கள் வாயிலாக வரிசையாக அடுக்கி, ஒவ்வொரு மாவட்டத்திலும் தொண்டர்களை ஊக்கப்படுத்தி வருகிறார் தி.மு.க. தலைவர் மு.க.ஸ்டாலின். ஜனவரியிலிருந்து அவர் நேரடியாகப் பிரச்சாரம் செய்ய உள்ள நிலையில் கனிமொழி, உதயநிதி, பொன்முடி, லியோனி என கட்சி நிர்வாகிகள் தமிழகம் முழுவதும் பரப்புரை பயணத்தை இப்போதே தொடங்கி விட்டனர். எடப்பாடி பழனிசாமி ஏரியாவிலிருந்து பரப்புரையைத் தொடங்கிய கனிமொழிக்கு நல்ல வரவேற்பு.

 

"மக்களிடமும் மாற்றத்திற்கான மனநிலை உள்ளது. அடிமட்டத் தொண்டர்களிடமும் வேகம் தெரிகிறது. ஆனால், நீண்டகால நிர்வாகிகளின் உள்குத்து தி.மு.க.வின் தீராத வியாதியாகப் பல மாவட்டங்களில் தொடர்கிறது. மலை மாவட்டமான நீலகிரியில் இது சிகரமாக உயர்ந்து நிற்கிறது'' என வேதனையோடு சொன்னார்கள் உடன்பிறப்புகள்.

 

காணொளி வழியே நடந்த நீலகிரி மாவட்ட முப்பெரும் விழா கூட்டத்தில், "நாம் ஆட்சிக்கு வந்ததும் கொடநாடு குற்றவாளிகளை கண்டுபிடிப்போம்'' என மு.க.ஸ்டாலின் சூளுரைத்தார். கொடநாடு மர்மக் கொலைகளின் சூத்ரதாரியான சஜீவனுக்கு அ.தி.மு.க.வின் வர்த்தக அணிப் பொறுப்பை எடப்பாடி வழங்கியதை சுட்டிக்காட்டி ஸ்டாலின் இப்படிச் சொன்ன நிலையில்... நீலகிரி தி.மு.க. நிர்வாகிகள் அ.தி.மு.க. சஜீவனுடன் அரசியல் -வர்த்தக உறவு வைத்திருப்பது மெல்ல மெல்ல அம்பலமாகி வருகிறது.

 

ddd

 

"எங்க மாவட்டச் செயலாளர் முபாரக்குக்கும், எக்ஸ் மினிஸ்டர் இளித்துறை ராமச்சந்திரனுக்கும் ஏழாம் பொருத்தம்ங்கறது எல்லாருக்குமே தெரிஞ்சதுதான். ஆனா இப்போ முபாரக் இளித்துறைகூட பின்னிப் பிணையிறாரு. பல கோடிகள் செலவழிச்சு இந்த ஊட்டியில கட்சி ஆபீஸ் கட்டியிருக்கிறோம். ஆனா இந்த ஆபீஸ் படிகள் ஏறக் கூட முபாரக்குனால முடியறதில்லை. கட்சி கூட்டம் ஏதாவது நடத்துணும்னா ஹில் பார்க்ல இருக் கற ஆ.ராசா எம்.பி.யின் படிகளே இல்லாத அலுவலகத்தைதான் பயன்படுத்துறாரு முபாரக். அதனால தி.மு.க. கட்சி ஆபீசு சும்மா இருக்குதுன்னு நினைக்காதீங்க. ஊட்டி தி.மு.க. முன்னாள் ந.செ.வும், தலைமை செயற்குழு உறுப்பினருமான ரவிக்குமார், கட்சி ஆபீஸை கட்டப்பஞ்சாயத்து, கந்துவட்டி நடத்தும் இட மாக மாற்றிக்கொண்டுவிட்டார். ஊட்டி மார்க்கெட்ல. கடை வச்சிருக்குற அத்தனை அ.தி.மு.க.காரங்களும் தி.மு.க. ஆபீசுல கூடித் தான் பஞ்சாயத்து பண்ணுறாங்க'' என்கிறார்கள் சொந்தக் கட்சிக்காரர்களே. ""கட்சி ஆபீசுக்கு லிஃப்ட் போடணும்னு சொல்லி மார்வாடிகளிலிருந்து மளிகைக் கடைவரை வசூல் நடத்தப்பட்டதால்... தி.மு.க. கொடி போட்ட கார்களைப் பார்த்தாலே ஊட்டி வியாபாரிகள் தெறித்து ஓடும் நிலை உருவாகி யுள்ளது'' என்றும் கூறுகிறார்கள்.

 

இது குறித்து அறிவாலயத்திற்குப் புகார்கள் பறந்த நிலையில், மாவட்ட அரசியலில் எலியும் பூனையு மாக இருந்த முபாரக்கும் முன்னாள் அமைச்சர் இளித்துறை ராமச்சந்திரனும் திடீர் நட்பு கொண்டிருப்பது அதிசயமாகப் பார்க்கப்படுகிறது. இதன் சூட்சுமம் குறித்தும் கட்சிக்காரர்கள் விளக்குகிறார்கள்.

 

"குன்னூரில் முபாரக்கும், ஊட்டியில் ராமச்சந்திர னும் போட்டியிடலாம் என முபாரக் தெரிவித்துள்ளார். ராமச்சந்திரனின் இளித்துறை கிராமம் குன்னூர் தொகுதியில் உள்ள நிலையில், அவரை ஊட்டிக்கு அனுப்ப முபாரக் நினைப்பதிலும் அரசியல் உள்ளது. ஊட்டியில் உள்ள வடக்கு ஒன்றியத்தின் செயலாளர் துரை, தெற்கு ஒன்றியத்தின் பரமசிவம், மேலூர் ஒன்றியத்தின் உதயதேவன் மூவருமே முபாரக் ஆதரவாளர் கள். ந.செ. ஜார்ஜ் மட்டுமே ராமச்சந்திரனுக்கு நெருக்கம். அதனால், சீட் கிடைத்தாலும் ஊட்டியில் ராமச்சந்திரன் வெற்றிக்குப் போராடவேண்டும். இது அ.தி.மு.க. வர்த்தக அணி பொறுப்புடன், நீலகிரி மாவட்ட தேர்தல் பொறுப்பாளராகவும் எடப்பாடியால் தட்டிக் கொடுத்து வளர்க்கப்படும் சஜீவனுக்கே சாதகமாகும்'' என்கிறார்கள்

 

ddd

 

தி.மு.க.வின் தலைமைக் கழகப் பேச்சாளரான ஆளன் நம்மிடம், "நான் 1986-ல இருந்து தி.மு.க.வுல இருக்கறேன். உங்களுக்கு வந்த தகவல்களில் உண்மை இருக்கு. அ.தி.மு.க.வின் தேர்தல் பொறுப்பாளராக சஜீவன் நியமனம் செய்யப்பட்ட பிறகு, தன் கட்சியினரை சந்திப்பதைவிட, தி.மு.க. நிர்வாகிகளை சந்திப்பதையே வேலையா வச்சிருக்காரு.

 

எங்க மா.செ முபாரக் ஆதரவாளரான நெல்லியா ளம் நகரச்செயலாளர் காசிலிங்கம், கேரளா வயநாடு சுல்தான் பத்தேரில இருக்கற ராபா ஆயுர்வேத ஆஸ்பத்திரியில முதுகு தண்டுவடப் பிரச்சினைக்கா அட்மிட் ஆகியிருப்பதை அறிந்து, அந்த ஆஸ்பத்தி ரிக்கே அ.தி.மு.க. சஜீவன் நேரில்போய் பார்த்து நலம் விசாரிச்சுட்டு வந்திருக்காரு. அ.தி.மு.க. தலைமை தனக்கு கொடுத்திருக்கிற தேர்தல் பொறுப்பாளர் பணியை வெற்றிகரமாக முடிக்க, தி.மு.க. நிர்வாகிகளின் ஒத்துழைப்பை சஜீவன் நாடுகிறார். அதற்காக என்ன செலவு செய்யவும் ரெடியாகிவிட்டார்.

 

நெல்லியாளம் நகராட்சியின் பல லட்சம் பெறுமானமுள்ள ரோடு காண்ட்ராக்ட், ஏற்கனவே பார்த்த காண்ட்ராக்ட் வேலைக்கான பென்டிங் பணம் 20 லட்சம்னு எல்லாமே க்ளீயராகுது. நீலகிரி தி.மு.க. வினரைப் புரிந்துகொண்டு சஜீவன் சாமர்த்தியமா வேலை பார்க்கிறார்'' என்கிறார் உண்மையாய்.

 

நாம் கேரளாவில் உள்ள ராபா ஆஸ்பிடலுக்கு நேரில் சென்று, சஜீவன்-காசிலிங்கம் சந்திப்பை உறுதிப்படுத்திக்கொண்டோம்.

 

நீலகிரி தி.மு.க.வினரிடம் பேசியபோது, "இதே நெல்லியாளம் நகராட்சியில ரோடு காண்ட்ராக்ட்டுக்கு நாங்க போய் நின்னபோது, எங்க எம்.எல்.ஏ. திராவிட மணி சப்போர்ட் பண்ணலை. அவர் சிபாரிசு லிஸ்ட்ல, அ.தி.மு.க. ஒப்பந்ததாரர்கள் பெயர் இருந்தது. ஆனா, நகராட்சியின் லேடி கமிஷனரோ, "இதில் உள்ள அ.தி.மு.க.காரங்க சாலைப்பணி செய்ய வர்ற பணியாளர்களுக்கு காப்பீட்டுத் தொகை கட்றதேயில்லை'ன்னு சொல் லிட்டாங்க. சஜீவன் தலையிட்டபோதும் லேடி கமிஷனர் உறுதியா மறுத்துட்டாங்க'' என்கிறார்கள்.

 

தி.மு.கவினரின் தன்னிச்சையான போக்குகளால் தொகுதி எம்.பி. ஆ.ராசா கோபப்பட்டதையும் உடன்பிறப்புகள் விளக்கினார்கள். "இங்கே காந்தல்னு ஒரு ஊர் இருக்கு. அங்கே உள்ள 7 வார்டுகள்லயும் சாக்கடை வசதி சரியா இல்லைனு ஆ.ராசாகிட்ட ஊர்வாசிகள் புகார் கொடுத்தாங்க. அவரும் தொகுதி மேம்பாட்டு நிதியில் இருந்து 20 லட்ச ரூபாய் கொடுத்தாரு. அவர் பி.ஏ. அந்த பொறுப்பை தலைமை செயற்குழு உறுப்பினர் ரவிக்குமார்கிட்ட கொடுத்துட்டாரு. வேலை ஏனோதானோன்னு பெயரளவுக்கு மட்டுமே நடந்தது.

 

ஆ.ராசா ஊட்டிக்கு வந்ததை தெரிஞ்சுகிட்ட காந்தல் பகுதி மக்கள் அவரைச் சந்திச்சு ரவிக்குமார் பண்ணினதை சொல்லிட்டாங்க. இதுபோன்ற தொடர் செயல்பாடு களால் நீலகிரி மாவட்ட தி.மு.க. தள்ளாடுவதை தெரிஞ்சிக்கிட்ட ராசா, நிர்வாகிகளையும் பி.ஏ.வையும் லெப்ட் அண்ட் ரைட் வாங்கிட்டாரு. காந்தல் மக்களின் பிரச்சினைகளை சரிசெய்ய தொகுதி மேம்பாட்டு நிதியில் இருந்து 23 லட்சத்தை எடுத்துக் கொடுத்திருக் காரு. அவர் மேற்பார்வையிலேயே அதிதீவிரமாக வேலைகள் நடந்துட்டு இருக்கு'' என்றனர்.

 

"நேரடிக் கண்காணிப்பு இல்லாவிட்டால், சஜீவன் போன்ற வெயிட்டான அ.தி.மு.க ஆட்களிடம் சிக்கிக்கொள்ளும் நீலகிரி தி.மு.க. நிர்வாகிகள் போல, தமிழ்நாட்டின் பல மாவட்டங்களிலும் சாதி -பணம் -டெண்டர் -பர்சன்டேஜ் என பல வகைகளில் அ.தி.மு.க.வுடன் அண்டர்ஸ்டாண்டிங்கில் இருக்கிறார்கள்.

 

கடந்த 2016 தேர்தலில் மேற்கு பகுதியில் நீலகிரி மாவட்டம் மட்டுமே தி.மு.க. கூட்டணிக்கு சாதகமாக அமைந்தது. அங்கேயே இத்தகைய நிலை என்றால், எடப்பாடி பழனிச்சாமியின் சமூகம் நிறைந்துள்ள கோவை, ஈரோடு, திருப்பூர் மாவட்டங்களில் உள்ள தி.மு.க. நிர்வாகிகளின் ஆளுந்தரப்புடனான அண்டர்ஸ்டாண்டிங் அரசியல் அதீத அளவில் உள்ளது'' என்கிறார்கள் அடிமட்டத் தொண்டர்கள்.

 

பலன் எதிர்பாராத தொண்டர்களின் உழைப்பிலும்- கச்சிதமாக வியூகம் வகுத்து தலைமை மேற்கொள்ளும் செயல்களாலும் தி.மு.க.வுக்கு விளையக்கூடிய வெற்றியை, சஜீவன் போன்ற அ.தி.மு.க. புள்ளிகள் அறுவடை செய்வதை உடன் பிறப்புகளால் ஜீரணிக்க முடியவில்லை. அறிவாலயத் திற்குப் பலமுறை புகார்கள் சென்றாலும், அதிரடி நடவடிக்கை எடுப்பதில் தி.மு.க. தலைவர் மு.க.ஸ்டாலின் தயக்கம் காட்டுகிறார்'' என்பதே உடன்பிறப்புகளின் ஆதங்கமாக இருக்கிறது.

 

"உள்ளடி என்பது தி.மு.க.வில் நிரந்தர நோயாகப் பரவியுள்ளது. ஆபரேஷன் செய்யாமல் நோய் குணமாகாது. தவறினால், ஸ்டாலினின் உழைப்பும் வியூகமும் உரிய பலனைத் தராது' என்கிறார்கள் அடிமட்டத் தொண்டர்கள்.

 

 

 

Next Story

இடைத்தேர்தல் முடிவுகள்; இந்தியா கூட்டணி அபார வெற்றி!

Published on 13/07/2024 | Edited on 13/07/2024
by election results India alliance is a huge success

தமிழகம், மேற்கு வங்கம் உட்பட நாடு முழுவதும் உள்ள 7 மாநிலங்களில் காலியாக உள்ள 13 சட்டமன்ற தொகுதிகளுக்கு இடைத்தேர்தல் நடத்தப்பட்டது. இதனையடுத்து இந்தத் தேர்தலில் பதிவான வாக்குகள் இன்று (13.07.2024) எண்ணப்பட்டன. இந்நிலையில் 13 தொகுதிகளுக்கு நடந்த இடைத்தேர்தலில் 10 தொகுதிகளில் இந்தியா கூட்டணி அபார வெற்றி பெற்றுள்ளது.

அதன்படி ஹிமாச்சல பிரதேசத்தில் உள்ள டெஹ்ரா மற்றும் நலகர் ஆகிய இரு தொகுதிகளில் இந்தியா கூட்டணி வெற்றி பெற்றுள்ளது. உத்தரகாண்ட் மாநிலத்தில் பத்ரிநாத் மற்றும் மங்களூர் ஆகிய இரு தொகுதிகளில் இந்தியா கூட்டணி வெற்றி பெற்றுள்ளது. தமிழகத்தில் விக்கிரவாண்டி தொகுதியிலும், பஞ்சாப் மாநிலத்தில் ஜலந்தர் மேற்கு தொகுதியிலும் இந்தியா கூட்டணி வெற்றி பெற்றுள்ளது. மேலும் மேற்கு வங்கத்தில் உள்ள ராய்கஞ்ச், ரணகாட் தக்ஷின், பாக்தா மற்றும் மாணிக்தலா ஆகிய நான்கு தொகுதிகளில் இந்தியா கூட்டணி வெற்றி பெற்றுள்ளது.

இந்த இடைத்தேர்தல் முடிவின் படி காங்கிரஸ் மற்றும் திரிணாமுல் காங்கிரஸ் கட்சி தலா 4 தொகுதிகளையும், ஆம் ஆத்மி, திமுக சார்பில் தலா ஒரு தொகுதிகளிலும் வெற்றி பெற்றுள்ளன. அதே சமயம் பீகாரில் உள்ள ரூபவுலி தொகுதியில் சுயேச்சை வேட்பாளர் சங்கர் சிங் வெற்றி பெற்றுள்ளார். இமாச்சல பிரதேசத்தின் ஹமீர்பூர் உள்பட இரு தொகுதிகளில் மட்டுமே பாஜக வெற்றி பெற்றுள்ளது. 

Next Story

“மக்கள் எங்களோடு இருக்கிறார்கள்” - முதல்வர் மு.க.ஸ்டாலின் பெருமிதம்!

Published on 13/07/2024 | Edited on 13/07/2024
People are with us  Chief Minister M.K. Stalin  Pride

விக்கிரவாண்டி சட்டமன்றத் தொகுதி திமுக எம்.எல்.ஏ புகழேந்தி உயிரிழந்ததைத் தொடர்ந்து அந்தத் தொகுதிக்குக் கடந்த 10 ஆம் தேதி இடைத்தேர்தல் நடைபெற்றது. இந்த இடைத்தேர்தலில் திமுக சார்பில் அன்னியூர் சிவா, நாம் தமிழர் கட்சி சார்பில் அபிநயா, பாஜக கூட்டணியில் உள்ள பாமக சார்பில் அக்கட்சியின் மாநிலத் துணைத் தலைவர் சி.அன்புமணி ஆகியோர் போட்டியிட்டனர். இந்தத் தேர்தலில் பதிவான வாக்குகள் இன்று (13.07.2024) எண்ணப்பட்டன. அதன்படி காலை 8 மணிக்கு வாக்கு எண்ணிக்கை தொடங்கிய நிலையில் முதலில் தபால் வாக்குகள் எண்ணப்பட்டது. இதனையடுத்து 20 சுற்றுகள் முடிவில் திமுக வேட்பாளர் அன்னியூர் சிவா 1 லட்சத்து 24 ஆயிரத்து 53 வாக்குகள் பெற்று 67 ஆயிரத்து 757 வாக்குகள் வித்தியாசத்தில் வெற்றி பெற்றதாக தேர்தல் ஆணையம் அதிகாரப்பூர்வமாக அறிவித்தது. அதே வேளையில் பாமக வேட்பாளர் சி.அன்புமணி 56 ஆயிரத்து 26 வாக்குகளும், நாதக வேட்பாளர் அபிநயா 10 ஆயிரத்து 479 வாக்குகளும் பெற்றனர்.

இந்நிலையில் விக்கரவாண்டி தேர்தலில் திமுக வெற்றி பெற்றது தொடர்பாக முதல்வர் மு.க. ஸ்டாலின் வெளியிட்டுள்ள அறிக்கையில், “விக்கிரவாண்டி தொகுதி இடைத்தேர்தலில் திமுகவிற்கு மகத்தான மாபெரும் வெற்றியை வழங்கிய விக்கிரவாண்டி வாக்காளர்கள் அனைவருக்கும் எனது மனமார்ந்த நன்றியைத் தெரிவித்துக் கொள்கிறேன். நடைபெற்று முடிந்த நாடாளுமன்றத் தேர்தலில் புதுவை உள்ளிட்ட தமிழ்நாட்டின் நாற்பது தொகுதியிலும் நாற்பதுக்கு நாற்பது என்ற நூறு விழுக்காடு வெற்றியை திமுக தலைமையிலான இந்தியா கூட்டணி பெற்றது. சாதாரண வெற்றியல்ல, பல லட்சம் வாக்குகள் வித்தியாசத்தில் ஒவ்வொரு தொகுதியிலும் வெற்றியைப் பெற்றோம். அதிமுக கூட்டணி படுதோல்வியை அடைந்தது. பாஜக கூட்டணி, பாதாளத்தில் விழுந்தது. இதைத் தொடர்ந்து, விக்கிரவாண்டி இடைத்தேர்தலை எதிர்கொண்டோம். 

People are with us  Chief Minister M.K. Stalin  Pride

விக்கிரவாண்டித் தொகுதியின் சட்டமன்ற உறுப்பினராகப் பணியாற்றிய புகழேந்தி உடல்நிலை காரணமாக மறைவெய்தியதைத் தொடர்ந்து இடைத்தேர்தலை எதிர்கொள்ள வேண்டிய சூழல் ஏற்பட்டது. தேர்தல் தேதி அறிவிக்கப்பட்டதும், திமுகவின் வெற்றி வேட்பாளராக அன்னியூர் சிவாவை வேட்பாளராக அறிவித்தோம். நாடாளுமன்றத் தேர்தல் படுதோல்வியில் எழ முடியாமல் இருந்த அதிமுக, விக்கிரவாண்டி இடைத்தேர்தலிலும் அதே படுதோல்வியைச் சந்திக்கத்தான் போகிறோம் என்பதை உணர்ந்து போட்டியில் இருந்து பின்வாங்கியது. பாஜக, தனது அணியில் இருக்கும் பாமகவை நிறுத்தியது. இடைத்தேர்தலிலேயே நிற்பது இல்லை என்று வைராக்கியமாக இருந்த பாமக விக்கிரவாண்டி இடைத்தேர்தலில் போட்டியிட முன் வந்த மர்மம் இன்னமும் விலகவில்லை.

தோற்கப் போகிறோம் என்று தெரிந்தே போட்டியிட்டது பாஜக அணி. அவதூறுகளையும், பொய்களையும் திமுக மீதும் குறிப்பாக என் மீதும் விதைத்து. தங்களது 100 விழுக்காடு தோல்வியை மறைப்பதற்காக மிகக் கீழ்த்தரமான பரப்புரையை பாஜக அணி செய்தது. பொய்வேஷக்காரர்களின் பகல் வேஷப் பரப்புரையை மக்கள் மதிக்கவே இல்லை. இந்த வீணர்களை விக்கிரவாண்டி மக்கள் விரட்டியடித்து விட்டார்கள். தமிழ்நாட்டின் வளர்ச்சிக்கும், மக்களின் முன்னேற்றத்துக்கும் திமுகழகவே என்றும் எப்போதும் தேவை என்பதை இந்த இடைத்தேர்தலின் மூலமாக எடைபோட்டுச் சொன்ன விக்கிரவாண்டி வாக்காளர்கள் அனைவருக்கும் எனது மனமார்ந்த நன்றியைத் தெரிவித்துக் கொள்கிறேன். நேரகாலம் பார்க்காமல் உழைத்த உழைப்புக்கும், தினந்தோறும் உருவாக்கிக் கொடுத்த திட்டங்களுக்கும் மக்கள் தெரிவித்த நன்றியின் அடையாளமாகவே இந்த வெற்றியை நான் பார்க்கிறேன். 

People are with us  Chief Minister M.K. Stalin  Pride

திமுக வேட்பாளர் அன்னியூர் சிவாவை வெற்றி பெற வைக்க பொறுப்பேற்றுக் கொண்ட திமுக துணைப் பொதுச்செயலாளரும், அமைச்சருமான க.பொன்முடி, கழக கொள்கைப் பரப்புச் செயலாளரும், நாடாளுமன்ற உறுப்பினருமான எஸ்.ஜெகத்ரட்சகன் ஆகியோர் தலைமையில் அமைச்சர்கள், மாவட்டக் கழகச் செயலாளர்கள் உள்ளிட்ட அனைவரும் களம் கண்டார்கள். நாடாளுமன்ற உறுப்பினர்கள் - சட்டமன்ற உறுப்பினர்கள் மற்றும் பல்வேறு அமைப்புகளைச் சேர்ந்த கழக நிர்வாகிகள் என பலரும் களப்பணி ஆற்றினார்கள். பொதுச்செயலாளர் துரைமுருகன், இளைஞரணிச் செயலாளர் உதயநிதி உள்ளிட்ட முன்னணியினர் பலரும் தேர்தல் பரப்புரை செய்தார்கள். நமது இந்தியா கூட்டணிக் கட்சித் தலைவர்கள், தொடர்ந்து பரப்புரையில் ஈடுபட்டார்கள். இந்தியா கூட்டணிக் கட்சித் தலைவர்களுக்கும் உடன்பிறப்புகளும் தோழமைக் கட்சித் தோழர்களும், உதயசூரியனின் வெற்றிக்கு இரவு பகல் பாராது கண்துஞ்சாது உழைத்த அனைவருக்கும் எத்தனை முறை நன்றி சொன்னாலும் தகும். விழுப்புரம் தெற்கு மாவட்டக் கழகச் செயலாளர் பொன் கௌதமசிகாமணி உள்ளிட்ட ஒன்றுபட்ட விழுப்புரம் மாவட்டக் கழக நிர்வாகிகள் அனைவருக்கும் எனது பாராட்டைத் தெரிவித்துக் கொள்கிறேன்.

இதேநேரத்தில் இந்தியா முழுமைக்கும் பல்வேறு மாநிலங்களில் நடைபெற்ற 13 சட்டமன்றத் தொகுதிகளுக்கான இடைத்தேர்தலில் இந்தியா கூட்டணி கட்சிகள் 11 இடங்களில் முன்னணியில் இருக்கிறது. பாஜக தோல்வியைத் தழுவி இருக்கிறது. நாடாளுமன்றத் தேர்தலில் ஆட்சி அமைக்கும் பெரும்பான்மையைப் பெறாத கட்சி தான் பாஜக. இறங்கி வந்து சில கட்சிகளின் தயவால் மத்தியில் ஆட்சி அமைத்துள்ளது பாஜக. அத்தகைய தோல்வி முகமே பாஜகவுக்கு இந்த இடைத்தேர்தலிலும் தொடர்கிறது. தோல்விகளில் இருந்து பாஜக பாடம் கற்றுக் கொள்ளவேண்டும். மாநில உணர்வுகளை மதிக்காமல் ஆட்சியையும் கட்சியையும் நடத்த முடியாது என்பதை பாஜக இனியாவது உணர வேண்டும். தமிழ்நாட்டைப் பொறுத்தவரை 2019 ஆம் ஆண்டு முதல் திமுக தலைமையிலான இந்தியா கூட்டணியின் வெற்றி தொடர்கிறது. 

People are with us  Chief Minister M.K. Stalin  Pride

திமுக வரலாற்றின் பொன்னெழுத்துக்களால் பொறிக்கத்தக்க வெற்றியாக விக்கிரவாண்டி இடைத்தேர்தல் வெற்றியும் அமைந்துள்ளது. இந்த வெற்றியானது எங்களுக்கு மாபெரும் உற்சாகத்தையும், எழுச்சியையும், அதேசமயத்தில் கூடுதல் பொறுப்பையும் கொடுத்திருக்கிறது. நாள்தோறும் நல்ல பல திட்டங்கள் எனச் சாதனைகள் செய்து வரும் திமுக அரசின் சாதனைகளுக்கு மகுடம் சூட்டுவதாகவும் சாதனை வெற்றியாகவும் இது அமைந்துள்ளது. நாங்கள் எங்களது சாதனைப் பயணத்தையும் வெற்றிப் பயணத்தையும் தொடர்கிறோம். மக்களோடு இருக்கிறோம். மக்கள் எங்களோடு இருக்கிறார்கள்” எனத் தெரிவித்துள்ளார்.