Skip to main content

பாஜகவின் தோல்விகளுக்கு அமித்ஷா காரணமா..?

Published on 28/11/2019 | Edited on 29/11/2019

பல ஆண்டுகள் கடின உழைப்பு, பல மாநிலங்களின் ஆட்சி மாற்றத்திற்கு காரணகர்த்தா, காவி காலூன்ற முடியாது என மார்தட்டிய பல மாநிலங்களில் காவியை வேரூன்ற வைத்தவர் என பல அடுக்கடுக்கான செயல்களால் அமித்ஷா பெற்ற சாணக்கிய பட்டத்தை சற்றே அசைத்துப் பார்த்திருக்கிறது சமீபத்திய அரசியல் சூழல். இப்படி சமூகவலைதளங்களில் அமித்ஷாவின் சாணக்கிய பட்டம் கேலிக்குள்ளாக்கப்படுவதற்கு காரணம் மஹாராஷ்டிராவில் அக்கட்சி சந்தித்த சறுக்கல் மட்டும்தானா..? என்றால், இல்லை என்பதே பதிலாக இருக்கும். அப்படியென்றால் அமித்ஷாவின் சாணக்கிய பட்டத்தையும், பாஜகவின் அரசியல் வியூகங்களையும் இப்படி விமர்சனத்துக்குள்ளாக்கியது எது..? 

 

rise and fall of bjp in last decade

 

 

2014 நாடாளுமன்ற தேர்தலின் போது நாடு முழுவதும் வீசிய மோடி அலை காங்கிரஸ் உள்ளிட்ட பல முக்கிய கட்சிகளை சுருட்டி வீசியது என்றே கூறலாம். அப்படி ஒரு மிகப்பெரிய மக்கள் ஆதரவுடன் தனிப்பெரும்பான்மை கொண்ட அரசாங்கமாக மத்தியில் பதவியேற்ற பாஜக, அதன் பின்னர் நடந்த பல சட்டசபை தேர்தலில்களிலும் வெற்றிபெற்று இந்தியா முழுவதையும் காவிமயமாக்குவது என்பதை நோக்கி நகர்ந்துகொண்டிருந்தது. பாஜகவின் இந்த வளர்ச்சி என்பது ஒரே நாளிலோ அல்லது ஒரே ஆண்டிலோ நடந்தது அல்ல. பல தசாப்தங்களை கடந்த கடின உழைப்பு, எதிர்கட்சியினரை திணறடிக்கும் அதிரடி வியூகங்கள் என படிப்படியாக உயர்ந்து இந்திய அரசியலில் அசைக்க முடியாத ஒரு இடத்தை பாஜக பிடித்தது.

2014 ஆம் ஆண்டு வெறும் 7 மாநிலங்களில் மட்டுமே ஆட்சியிலிருந்த பாஜக அடுத்த நான்கு ஆண்டுகளில் 21 மாநிலங்களை தனது ஆளுகையின் கீழ் கொண்டு வந்தது. பஞ்சாப், ராஜஸ்தான், சத்தீஸ்கர், மத்தியப்பிரதேசம், குஜராத், ஜார்கண்ட், கோவா என 7 மாநிலங்களில் மட்டுமே 2014 ல் ஆட்சி செய்த பாஜக அடுத்தடுத்து நடந்த தேர்தல்களில் தங்களது அரசியல் சாதுரியத்தால் ஆட்சியை பிடித்தது. தேர்தலுக்கு முன் கூட்டணி, தேர்தல் முடிவுகளுக்கு பிந்தைய கூட்டணி என ஒவ்வொரு மாநிலத்திற்கும் ஒவ்வொரு திட்டத்தை முன்கூட்டியே தயாராக வைத்திருந்தது பாஜக. 

 

rise and fall of bjp in last decade

 

2014 ல் 7 மாநிலங்களை ஆட்சி செய்த பாஜக, 2015 ல் 13 மாநிலத்திலும், 2016 ல் 15 மாநிலங்களிலும், 2017 ல் 19 மாநிலங்களிலும் தனது ஆட்சியை நிறுவியது. இறுதியாக 2018 ஆம் ஆண்டு இந்தியா முழுவதும் 21 மாநிலங்களில் பாஜக ஆட்சி அமைத்திருந்தது. பாஜகவின் இந்த அசுரத்தனமான வளர்ச்சி மற்றும் தொடர் தேர்தல் வெற்றிகள் என அனைத்திற்கும் முக்கிய காரணமாக பலராலும் பேசப்பட்டது அமித்ஷாவின் வியூகம் எனலாம்.  இப்படி தொடர் வெற்றிகளில் முக்கிய பங்காற்றி சம்பாதித்த சாணக்கிய பட்டம் இன்று கேலிக்குள்ளாக்கப்படுவதற்கான விதை 2018 ஆம் ஆண்டுதான் இடப்பட்டது எனலாம். 2018 ஆம் ஆண்டிலிருந்து நடந்த தேர்தல்களில் பாஜகவின் வியூகங்கள் சறுக்க தொடங்கிய சூழலில் தற்போது பாஜக அல்லது அதன் கூட்டணி கட்சிகள் ஆளும் மாநிலங்களின் எண்ணிக்கை 17 ஆக குறைந்துள்ளது. 

2018 ஆம் ஆண்டு மிசோரம் போன்ற எதிர்பார்க்கப்படாத இடங்களில் பாஜக வெற்றியை சுவைத்தாலும், மத்தியப் பிரதேசம், ராஜஸ்தான் மற்றும் சத்தீஸ்கர் என பலம்பொருந்திய அதன் கோட்டைகளை தவறவிட்டது. அதேபோல ஆந்திராவில் தெலுங்கு தேசம் கட்சியுடனான கூட்டணியில் பிளவு ஏற்பட்டது. அதனை தொடர்ந்து ஜம்மு காஷ்மீரிலும் பாஜக கூட்டணி ஆட்சி முடிவுக்கு வந்து குடியரசு தலைவர் ஆட்சி அமல்படுத்தப்பட்டது. இதில் கர்நாடகா மட்டுமே பாஜகவுக்கு சற்று ஆறுதலாக அமைந்தது எனலாம். தற்போது மஹாராஷ்டிராவில் நடந்தது போன்ற ஒரு மிகப்பெரிய குழப்பத்தை கர்நாடகாவும் கடந்த ஆண்டு சந்தித்தது. 

 

rise and fall of bjp in last decade

 

கர்நாடகாவில் ஆட்சியமைக்க 113 உறுப்பினர்கள் தேவை என்ற நிலையில் எந்தக்கட்சியும் தனிப்பெரும்பான்மை பெறவில்லை. பாஜக 104 இடங்களை கைப்பற்றினாலும், காங்கிரஸ், மஜக திடீர் கூட்டணி ஆட்சியை பிடித்தது. ஆனாலும் அடுத்த சில மாதங்களில் அதிருப்தி எம்.எல்.ஏ க்கள் உருவாகி ஆட்சியை கலைத்ததால் மீண்டும் பாஜக ஆட்சியில் அமர்ந்தது. இருப்பினும் அடுத்த மாதம் நடைபெற உள்ள 15 தொகுதிகளுக்கான இடைத்தேர்தல் கர்நாடக அரசியலில் யார் ஆட்சியில் இருப்பார்கள் என்பதை முடிவு செய்யும் என்பதால், கர்நாடகா பாஜகவுக்கு சிக்கலையே கொடுத்துள்ளது எனலாம். 

இறுதியாக தற்போது நடந்த மகாராஷ்டிரா தேர்தலிலும் பாஜக கூட்டணி வெற்றி பெற்றாலும், அரசாங்கம் அமைப்பதில் கூட்டணி கட்சியான சிவசேனாவிடம் நடத்திய பேச்சுவார்த்தையில் தோல்வியடைந்தது. இதனால் 30 ஆண்டுகால கூட்டணியை முறித்து கொண்டு காங்கிரஸ், தேசியவாத காங்கிரஸ் கட்சிகளுடன் இணைந்து ஆட்சியமைக்க தயாரானது. அதன்பின்பும் குடியரசு தலைவர் ஆட்சி, திடீர் பதவியேற்பு என பல திருப்பங்கள் நிகழ்த்தப்பட்டும் பாஜகவால் இரண்டு நாட்களுக்கு மேல் ஆட்சியில் நிலைத்திருக்க முடியவில்லை. கர்நாடகாவில் எடுத்த அதே மாதிரியான ஒரு முடிவை மீண்டும் மஹாராஷ்டிராவிலும் எடுத்து அதே போன்ற ஒரு முடிவை பாஜக மீண்டும் சந்தித்துள்ளது. 

 

rise and fall of bjp in last decade

 

அருணாச்சல பிரதேசம், ஹரியானா என சில மாநிலங்களை தக்கவைத்துக் கொண்டாலும், மத்திய பிரதேசம், ராஜஸ்தான் என முக்கிய மாநிலங்கள் பலவற்றை இழந்தது பாஜக. 2017 ஆம் ஆண்டு இந்தியாவின் 71 சதவீத பகுதிகளை ஆட்சி செய்த பாஜக இன்றைய நிலையில் நாட்டின் 40 சதவீத பகுதியை மட்டுமே ஆட்சி செய்யும் நிலைக்கு வந்துள்ளது. பாஜகவின் வெற்றிகளுக்கு அமித்ஷாவின் சாணக்கியத்தனம் காரணமாக இருக்கலாம் எனினும், தோல்விகளுக்கான காரணமாக அமித்ஷா என்ற ஒற்றை நபரின் வியூகங்களை மட்டுமே கேலிக்குள்ளாக்குவதை கடந்து பாஜகவின் ஆட்சி மீதான மக்களின் பின்னூட்டமாகவும் இதனை பார்க்க வேண்டியுள்ளது. 

மத்தியில் பாஜக மேற்கொண்ட சில நடவடிக்கைகள், சிறுபான்மையினர் மத்தியிலான அச்சம், கேள்விக்குள்ளாக்கப்படும் பொருளாதார கொள்கைகள், புதிய தொழில்துறை கொள்கைகளால் ஏற்பட்ட பாதிப்புகள், ஒவ்வொரு மாநிலத்தின் உட்புற அரசியல், நிலையற்ற கூட்டணிகள் என பல்வேறு காரணிகள் கடந்த சில ஆண்டுகளாக இந்தியா காவிமயமாகும் வேகத்தை குறைத்துள்ளது எனலாம். இந்தியா முழுமைக்கும் நடந்த மக்களவை தேர்தலில் இரண்டாவது முறையாக வெற்றிபெற்ற பாஜகவின் வியூகங்கள், சட்டப்பேரவை தேர்தலில் சமீப காலமாக சறுக்கி வருவதை பாஜக மீதான நம்பிக்கை குறைகிறதோ? என்ற கோணத்திலும் பார்க்க வேண்டியுள்ளது. அதே நேரம், வியூகங்களை கடந்து பாஜக என்பது இந்தியாவின் சில பகுதிகளில் அபரிமித பலத்தோடும், பல பகுதிகளில் பலவீனமாகவும் உள்ளது என்பதையே மக்களவை மற்றும் சட்டப்பேரவை தேர்தல்களின் வேறுபட்ட முடிவுகள் வெளிக்காட்டுவதாக அமைந்துள்ளது. 

 

 

Next Story

'எல்லா இடங்களிலும் நிச்சயமாக ஒரு மாற்றம் ஏற்படும்' -தமிழிசை பேட்டி

Published on 23/04/2024 | Edited on 23/04/2024

 

nn


'ஆளுநராக இருந்து அக்காவாக வந்திருப்பதை மக்கள் மிகவும் வரவேற்றார்கள்' எனப் பாஜக வேட்பாளர் தமிழிசை சௌந்தரராஜன் தெரிவித்துள்ளார்.

சென்னையில் செய்தியாளர்களைச் சந்தித்த தமிழிசை சௌந்தரராஜன் பேசுகையில், ''இந்தத் தேர்தலில் இன்னும் வாக்கு எண்ணிக்கை சதவீதம் அதிகரித்திருக்க வேண்டும். இதற்கு பல காரணங்கள் சொல்கிறார்கள். நேற்றைய தினம் முன்னாள் தலைமை தேர்தல் ஆணையர் கோபால்சாமி சொல்லும்போது ஆதார் கார்டுடன் இணைக்க வேண்டும். சென்னை போன்ற இடங்களில் அப்பொழுதுதான் வாக்கு சதவீதம் அதிகரிக்கும் என்று சொல்கிறார்கள். சில பேர் இரண்டு வாக்குகள் வைத்திருக்கிறார்கள். கிராமத்திலும் போய் வாக்களிக்கிறார்கள். அது ஒரே இடத்தில் இருந்தால் சென்னையில் வாக்கு சதவீதம் அதிகரிக்கும் என்று சொல்கிறார்கள்.

எது எப்படி இருந்தாலும் மக்கள் அதிகமாக வாக்களிக்க வரவேண்டும். வாக்களிக்க வந்தவர்களுக்கு மிக்க நன்றி. ஏனென்றால் அதிகாலையில் வயதானவர்கள், முடியாதவர்கள் கூட வந்து வாக்களித்தார்கள். அவர்களை நான் தலை வணங்குகிறேன். எல்லா இடங்களிலும் நிச்சயமாக ஒரு மாற்றம் ஏற்படும். பாரதிய ஜனதா கட்சிக்கு நல்ல வாய்ப்பு இருக்கிறது. வடசென்னை பகுதியாக இருக்கட்டும், தென் சென்னை, மத்திய சென்னை, தமிழகம் முழுவதும் குறிப்பாக தென் சென்னையில் நான் போட்டியிட்ட இடத்தில் மக்கள் மிகுந்த அன்பையும் ஆதரவையும் அளித்தார்கள், என்னை உணர்ச்சி வயப்படும் அளவிற்கு, நெகிழ்ச்சி அடைய வைக்கும் அளவிற்கு எல்லோரும் என்னிடம் அன்பு பாராட்டினார்கள். ஒரு ஆளுநராக இருந்து அக்காவாக வந்திருப்பதை மிகவும் வரவேற்றார்கள்''என்றார்.

Next Story

மோடியின் சர்ச்சை பேச்சு; பரப்படும் மன்மோகன் சிங்கின் விடியோ - தகிக்கும் தேர்தல் களம்

Published on 23/04/2024 | Edited on 23/04/2024
Congress accuses BJP of misrepresenting Manmohan Singh's video and spreading it

ராஜஸ்தானில் மக்களவைத் தேர்தல் பிரச்சாரத்தில் பேசிய பிரதமர் மோடி, காங்கிரஸ் கட்சி ஆட்சிக்கு வந்தால் தேசத்தின் செல்வத்தை இந்துக்களிடமிருந்து முஸ்லீம்களுக்கு கொடுத்துவிடுவார்கள் எனக் கூறி வெறுப்பு பிரச்சாரம் செய்தார். அதற்கு நாடு முழுவதம் கடும் கண்டனம் எழுந்து வருகிறது. சர்வாதிகாரியின் உண்மை முகம் வெளிவந்துள்ளதாக எதிர்க்கட்சிகள் கடுமையான கண்டனங்களைப் பதிவு செய்து வருகின்றனர்.

ராஜஸ்தான் மாநிலம் பன்ஸ்வாரா பகுதியில் நடந்த பரப்புரைக் கூட்டத்தில் பங்கேற்று பேசிய பிரதமர் மோடி, '‘காங்கிரஸ் கட்சி ஆட்சியில் இருந்தபோது,​ ​தேசத்தின் செல்வத்தில் இஸ்லாமியர்களுக்கு முதல் உரிமை உண்டு என்று சொன்னார்கள். இதன் பொருள் அவர்கள் இந்தச் செல்வத்தை அதிக குழந்தைகளைப் பெற்றவர்களுக்கும், ஊடுருவல்காரர்களுக்கும் பகிர்ந்தளிப்பார்கள். நீங்கள் கஷ்டப்பட்டு சம்பாதித்ததை ஊடுருவியவர்களுக்கு கொடுக்கப் போகிறீர்களா?’ என்றார். இதில், இஸ்லாமியர்களைப் பிரதமர் மோடி ஊடுருவல்காரர்கள் என்றும், அதிக குழந்தைகளைப் பெற்றவர்கள் எனவும் சித்தரித்து பேசியிருந்தார்.

தொடர்ந்து பேசிய மோடி, ''பெண்கள் வைத்திருக்கும் தங்கத்தை கணக்கிட்டு, அந்தச் செல்வத்தை பங்கீடு செய்வோம் என்று காங்கிரஸின் தேர்தல் அறிக்கை கூறுகிறது. மன்மோகன் சிங் தலைமையிலான அரசு, இஸ்லாமியர்களுக்கே செல்வத்தில் முதல் உரிமை உண்டு என்று கூறியது. இந்த நகர்ப்புற நக்சல் சிந்தனை என் தாய்மார்கள், சகோதரிகளின் தாலியைக்கூட விட்டுவைக்காது. எனக் கடுமையான வார்த்தைகளை பயன்படுத்தி இருந்தார். இந்திய அரசியல் வரலாற்றில் எந்தவொரு பிரதமரும், இவ்வளவு தரம் தாழ்ந்து பேசியது கிடையாது என்றும், முதல் பிரதமாராக மோடி வெறுப்பு பிரச்சாரம் செய்து வரலாற்றில் இடம் பிடித்துள்ளார் எனக் கடும் கண்டனங்கள் எழுந்து வந்தது.

தேர்தல் நடத்தை விதிகள் அமலில் இருக்கும் நேரத்தில் நாட்டின் பிரதமர் வெறுப்பு பிரச்சாரம் செய்து இருப்பதால் மோடியைத் தகுதி நீக்கம் செய்ய வேண்டும் எனக் கோரிக்கை எழுந்துள்ளது. இதனிடையே, காங்கிரஸ் சார்பில் பிரதமர் மோடி வெறுப்பு பிரச்சாரத்திற்கு எதிராக தேர்தல் ஆணையத்தில் புகார் அளிக்கப்பட்டது. ஆனால், தன்னாட்சியாக செயல்படும் இந்திய தேர்தல் ஆணையம் பிரதமர் வெறுப்பு பேச்சு தொடர்பாக கருத்து தெரிவிக்க மறுத்து விட்டது. இதற்கு முன்பு உத்தரப் பிரதேசத்தின் சஹரன்பூரில் நடைபெற்ற தேர்தல் பிரச்சாரக் கூட்டத்தில் பேசிய பிரதமர் மோடி, காங்கிரஸ் கட்சியின் தேர்தல் அறிக்கை முஸ்லிம் லீக் என்று முத்திரை குத்தி வெறுப்பு பிரச்சாரம் செய்தார். ஆனால், இந்திய தேர்தல் ஆணையம் அதற்கும் எந்த நடவடிக்கையும் எடுக்கவில்லை. அதன் நீட்சியாக பிரதமர் மோடி தொடர்ந்து இஸ்லாமியர்களை குறிவைத்து வெறுப்பு பிரச்சாரம் செய்து வரும் நிலையல், தமிழக முதல்வர் ஸ்டாலின் பிரதமரின் அப்பட்டமான வெறுப்புப் பேச்சுக்கு காது கேளாத வகையில், இந்திய தேர்தல் ஆணையம் வெட்கமின்றி நடுநிலைமையைக் கூட கைவிட்டுள்ளதாக குற்றம் சாற்றியுள்ளார். காங்கிரஸ் மூத்த தலைவர் ராகுல் காந்தி, சர்வாதிகாரியின் உண்மை முகம் மீண்டும் நாட்டின் முன் வெளிவந்துள்ளதாக சாடியுள்ளார். 

ஆனால், பிரதமர் மோடியின் வெறுப்பு பேச்சை நியாப்படுத்தும் பாஜகவைச் சேர்ந்த முன்னாள் அமைச்சர்கள், பிரதமர் மன்மோகன் சிங் பேசும் பழைய வீடியோவை கட் செய்து சமூக வலைத்தளங்களில் பரப்பி வருகின்றனர். இதனால், மன்மோகன் சிங் உண்மையில் பேசியது குறித்து காங்கிரஸ் தரப்பில் விளக்கம் தரப்பட்டுள்ளது. அதில்,  கடந்த 2006 ஆம் ஆண்டு நடைபெற்ற நிகழ்வொன்றில் பேசும் அப்போதைய பிரதமர் மன்மோகன் சிங், தேசத்தின் பல்வேறு வளர்ச்சிகள் சார்ந்த முன்னுரிமைகளை விளக்குகிறார். “பட்டியல் மற்றும் பழங்குடி வகுப்பினர், ஓபிசி பிரிவினர், சிறுபான்மையினர், பெண்கள், குழந்தைகள், குறிப்பாக, முஸ்லிம் சிறுபான்மையினர் வளர்ச்சியின் பலன்களில் சமமாகப் பங்குபெறும் வகையில், புதுமையான திட்டங்களை வகுக்க வேண்டும். வளங்கள் மீதான முதல் உரிமையை அவர்கள் பெற்றிருக்க வேண்டும். நாட்டின் வளங்களில் மத்திய அரசுக்கு எண்ணற்ற பிற பொறுப்புகள் உள்ளன. அது நாட்டு மக்கள் அனைவருக்கும் சென்று சேரவேண்டும். என மன்மோகன் சிங் பேசியுள்ளார்.

அப்போதே அவரது பேச்சு பொதுவெளியில் வேறாக புரிந்துகொள்ளப்பட்டதால் பிரதமர் அலுவலகத்தில் இருந்து விளக்கமும் கொடுத்ததாக சொல்லப்படுப்படுகிறது. ஆனால், பாஜகவினர், 'குறிப்பாக முஸ்லிம் மக்கள்' என  மன்மோகன் சிங் பேசுவதை மட்டும் கட் செய்து சமூக வலைத்தளங்களில் வெறுப்பு பிரச்சாரம் செய்து வருவதாக காங்கிரஸ் கட்சியினர் குற்றச்சாட்டுகின்றனர். நாட்டில் 10 ஆண்டுகளாக ஆட்சி செய்யும் பாஜக ஆட்சிகால சாதனைகளைக் கூற முடியாமல் 18 வருடங்களுக்கு முன் நடந்த சம்பவத்தை திரித்து வெறுப்பு பிரச்சாரம் செய்வதாக கண்டனம் எழுந்து வருகிறது. பிரதமர் மோடி உண்மைக்கு மாறான தகவலைத் தந்துள்ளார் எனவும், காங்கிரஸ் தனது தேர்தல் அறிக்கையில் மோடி பேசியது எதையும் கூறவில்லை என்றும் அக்கட்சித் தலைவர்கள் விளக்கம் அளித்துவருகின்றனர். ஆனால், இதனிடையே உத்திரபிரதேசத்திற்கு தேர்தல் பரப்புரைக்கு சென்ற மோடி இஸ்லாமியர்களுக்கு ஆதரவாக பேசியுள்ளார். முன்னதாக நாடு முழுவதும் கடும் எதிர்ப்பு எழுந்த நிலையில், இடத்திற்கு இடம் பிரதமர் மோடி மாற்றி பேசி வருவதாக குற்றச்சாட்டு எழுந்துள்ளது