Skip to main content

ரஜினிக்கு பிடித்தமான வைர மோதிரத்தில் கை வைத்த திருடன் - ஓய்வு பெற்ற காவல்துறை அதிகாரி ராஜாராம் 

Published on 24/03/2023 | Edited on 24/03/2023

 

 Retrd AC Rajaram Interview

 

சூப்பர் ஸ்டார் ரஜினிகாந்தின் மகள் ஐஸ்வர்யா ரஜினிகாந்த் வீட்டில் சமீபத்தில் நகைகள் திருடு போன வழக்கு பரபரப்பாக பேசப்பட்டது. அதுகுறித்தும் இதற்கு முன்பு ரஜினி வீட்டில் நடந்த ஒரு திருட்டு குறித்தும் பல்வேறு தகவல்களை நம்மோடு பகிர்ந்து கொள்கிறார் ஓய்வுபெற்ற உதவி கமிஷனர் ராஜாராம் அவர்கள்.

 

தன்னுடைய வீட்டின் லாக்கரில் இருந்த 60 சவரன் நகைகளைக் காணவில்லை என்று ஐஸ்வர்யா ரஜினிகாந்த் தேனாம்பேட்டை காவல் நிலையத்தில் புகார் கொடுத்தார். நான்கு ஆண்டுகளுக்கு முன்பு தான் அணிந்த நகைகள் அவை என்றும், தன்னுடைய வீட்டின் பணியாளர்கள் மீது சந்தேகம் இருப்பதாகவும் தன்னுடைய புகாரில் அவர் தெரிவித்திருந்தார். அதில் ஈஸ்வரி என்கிற பெண் 6 மாதங்களுக்கு முன்பு வேலையை விட்டு விலகியிருந்தார். போலீசார் வழக்குப் பதிவு செய்து விசாரித்தனர். ஈஸ்வரியை விசாரித்தபோது புகார்களை அவர் முதலில் மறுத்தார். அவருடைய வங்கிக் கணக்குகளை சோதனை செய்து பார்த்தபோது லட்சக்கணக்கான பணப் பரிவர்த்தனை நடந்திருப்பது தெரிந்தது. அவரையும் அவருடைய கணவரையும் விசாரித்தபோது சோழிங்கநல்லூரில் 95 லட்சம் ரூபாய்க்கு நிலம் வாங்கியிருப்பது தெரிந்தது. வங்கியில் கடன் வாங்கி இரண்டே வருடங்களில் அதை அடைத்துள்ளனர். இந்த நகைகளை விற்றுத்தான் அனைத்தையும் செய்துள்ளனர் என்பது விசாரணையில் கண்டுபிடிக்கப்பட்டுள்ளது. விசாரணை தொடர்ந்து நடைபெற்று வருகிறது. 

 

23 ஆண்டுகளுக்கு முன்பு ரஜினிகாந்த் வீட்டில் ஒருமுறை திருடு போனது. அவருடைய போயஸ் கார்டன் வீட்டிற்கு அப்போது பெயிண்ட் அடித்துக் கொண்டிருந்தார்கள். அப்போது இரவில் ஒரு திருடன் ஏணி வைத்து ஏறி வீட்டுக்குள் நுழைந்து, வைர நகைகளைத் திருடி, வெளியேறி தன்னுடைய சொந்த ஊரான புதுக்கோட்டைக்கு பஸ்ஸில் திரும்பிக் கொண்டிருந்தான். திருடிய நகைகளிலிருந்து ஒரு மோதிரத்தைத் தன் கையில் அணிந்துகொண்டான். நடுவில் சாப்பிட இறங்கும்போது அந்த மோதிரம் தொலைந்து போனது. ஊருக்குச் சென்று குழி தோண்டி, திருடிய நகைகளை அதில் புதைத்தான். அதன் பிறகு செய்திகளில் ரஜினிகாந்த் வீட்டில் திருடு போயிருக்கிறது என்பதைப் பார்த்த பிறகு தான், தான் ரஜினிகாந்த் வீட்டில் திருடியிருக்கிறோம் என்பதே அவனுக்குத் தெரிந்தது. சில காலம் கழித்து அதே போயஸ் கார்டன் பகுதியில் உள்ள ஒரு வீட்டில் அவன் திருடச் சென்றான். அந்த வீட்டுப் பெண் இவனைப் பார்த்துக் கத்த ஆரம்பித்ததும் பயத்தில் வெளியேறினான். அந்தப் பெண் போலீசில் புகாரளித்தார். பதுங்கியிருந்த இவனைப் போலீசார் கண்டறிந்தனர்.

 

விசாரணையில் அவனைப் பற்றிய அனைத்து விவரங்களும் தெரிந்தன. குண்டர் சட்டத்தில் அவன் கைது செய்யப்பட்டான். ரஜினிகாந்த் வீட்டில் அவன் திருடியவையும் பறிமுதல் செய்யப்பட்டன. ஆனால் தனக்கு மிகவும் பிடித்தமான ஒரு வைர மோதிரம் மிஸ் ஆவதாக ரஜினிகாந்த் தெரிவித்தார். இடையில் உணவு அருந்தும்போது அது காணாமல் போனதாக அவன் கூறினான். போலீசார் அந்த இடத்திற்கே சென்று அந்த மோதிரத்தைக் கண்டுபிடித்தனர். சிறை சென்று வெளியே வந்த பிறகும் திருடுவதை அவன் விடவில்லை. மீண்டும் போலீசாரால் அவன் கைது செய்யப்பட்டான். திருடச் சென்ற ஒரு வீட்டில் ஒரு பெண்ணிடம் தான் தவறாக நடந்து கொண்டதையும் விசாரணையில் தெரிவித்தான். தன் தங்கைக்குத் திருமணம் செய்வதற்காகத் திருட ஆரம்பித்த அவன், ரஜினிகாந்த் வீட்டிலேயே திருடி தென் சென்னையையே கலக்கும் திருடனாக மாறி அதன்பிறகு என்கவுண்டரில் சுட்டுக் கொல்லப்பட்டான்.

 

 

 

Next Story

ஆந்திராவில் இருந்து தென்மாநிலங்களுக்குக் கடத்தப்படும் கஞ்சா; சுற்றிவளைத்த தமிழக போலீஸ்

Published on 13/07/2024 | Edited on 13/07/2024
cannabis smuggled from Andhra, Telangana to Tamil Nadu, Karnataka, Kerala by car and train

ஆந்திராவில் இருந்து தமிழகத்திற்குக் கஞ்சா கடத்திய வரப்படுவதாக வந்த ரகசியத் தகவல் போலீசாருக்கு கிடைத்துள்ளது. அதனடிப்படையில் மாவட்ட காவல் கண்காணிப்பாளர் மணிவண்ணன் உத்தரவின் பேரில் தமிழக ஆந்திர எல்லையோரம் உள்ள வேலூர் மாவட்டம் சைணகுண்டா சோதனை சாவடி அருகே குடியாத்தம் தாலுகா போலீசார் தீவிர வாகன தணிக்கையில் ஈடுபட்டனர்.

அப்போது கர்நாடகா பதிவு எண் கொண்ட சொகுசு காரை தடுத்து நிறுத்தி சோதனை செய்த போது அதில் 12 கிலோ கஞ்சா கடத்திவரப்பட்டது தெரியவந்தது.  கஞ்சாவைக் கடத்தி வந்த குடியாத்தம் பகுதியைச் சேர்ந்த குடியரசன் (24) கோகுல்குமார் ( 26) மாதேஷ் (21) மற்றும் பெரம்பலூர் மாவட்டத்தைச் சேர்ந்த வெங்கடேசன்( 23) ஆகிய நான்கு பேரையும் கைது செய்து கடத்தலுக்குப் பயன்படுத்தப்பட்ட காரை பறிமுதல் செய்த குடியாத்தம் தாலுகா போலீசார் வழக்குப் பதிவு செய்து விசாரணை மேற்கொண்டு வருகின்றனர். இதில் கைது செய்யப்பட்ட குடியரசன் மற்றும் கோகுல்குமார் ஆகிய இருவரும் மீது கொலை வழக்கு உள்ளிட்ட பல்வேறு வழக்குகள் நிலுவையில் உள்ளது குறிப்பிடத்தக்கது.

இதேபோல் ராணிப்பேட்டை மாவட்டம் அரக்கோணம் வழியாக டாடா நகர் பகுதியில் இருந்து எர்ணாகுளம் செல்லும் எர்ணாகுளம் எக்ஸ்பிரஸில் கஞ்சா கடத்தப்படுவதாக வேலூர் மதுவிலக்கு மற்றும் அமலாக்கப் பிரிவு காவல்துறையினருக்கு ரகசியத் தகவல் கிடைத்தது. அதன் பேரில் அரக்கோணம் மதுவிலக்கு மற்றும் அமலாக்கப் பிரிவு காவல் துறையினருடன் இணைந்து ரயிலில் சோதனை மேற்கொண்டனர். 

முன்பக்க சாதாரண பெட்டியில் சந்தேகம் அளிக்கக் கூடிய வகையிலிருந்த நபர்களைப் பிடித்து விசாரணை மேற்கொண்ட போது கஞ்சா கடத்தி வருவது தெரியவந்தது. அவர்களிடம் இருந்து 10 பாண்டல்களில் இருந்த சுமார் 14 கிலோ எடையுள்ள கஞ்சாவை பறிமுதல் செய்த காவல்துறையினர் கஞ்சா கடத்திய குற்றத்திற்காக கர்நாடகா மாநிலம் பெங்களூரைச் சேர்ந்த சுப்ரமணியம் (21) மற்றும் அப்துல் (18) ஆகிய இருவரைக் கைது செய்து விசாரணை மேற்கொண்டு வருகின்றனர்.

ஆந்திரா மற்றும் தெலுங்கானாவில் வனப்பகுதிகளில் இருந்து கடத்தி வரப்படும் கஞ்சா தமிழ்நாடு, கர்நாடகா பகுதிகளுக்குள் நுழைந்து மாநில இளைஞர்களைப் போதைக்கு அடிமையாக்கி வருகிறது. இதனைத் தடுக்க காவல்துறை பெரும் முயற்சிகள் எடுத்தாலும் கஞ்சா கடத்தி வருவதற்காக அனுப்பப்படும் குருவிகளுக்குத் தரப்படும் ஆயிரக்கணக்கான ரூபாய் பணம் அவர்களை இந்த தொழிலைக் கச்சிதமாகச் செய்யவைக்கிறது. 

Next Story

சாராயம் காய்ச்சி குடித்த நபர்கள் மருத்துவமனையில் அனுமதி!

Published on 12/07/2024 | Edited on 13/07/2024
People admitted to hospital after drinking liquor

செங்கல்பட்டு மாவட்டம் மதுராந்தகம் அருகே மழுவங்கரணை கிராமத்தைச் சேர்ந்தவர் தேவன்(65).  அடுப்புக்கரி வியாபாரம் செய்து வரும் இவர் தன்னிடம் வேலை செய்யும் தொழிலாளர்களுக்காக சாராயம் காய்ச்சி வந்ததாகக் கூறப்படுகிறது. இது குறித்த தகவல் மேல்மருவத்தூர் காவல் ஆய்வாளர் ஏழுமலைக்குத் தெரியவர, உடனடியாக  மதுவிலக்கு அமல் பிரிவு போலீசாருடன் தேவன் வீட்டிற்குச் சென்று சோதனை நடத்தியுள்ளார்.

சோதனையில்  சாராயம் காய்ச்சுவதற்காக வைத்திருந்த ஊறல் மற்றும் காய்ச்சி வைத்திருந்த 20 லிட்டர் சாராயத்தைக் கைப்பற்றினர். மேலும் தேவனை போலீசார் கைது செய்து விசாரணை நடத்தியபோது, சாராயத்தைக் காய்ச்சி தன்னிடம் வேலை செய்யும் மணி, பெருமாள், அய்யனார், ராதா கிருஷ்ணன், மதுரை ஆகிய 5 பேருக்கு குடிக்கக் கொடுத்ததாகத் தெரிவித்தார்.

இதனைத் தொடர்ந்து மருத்துவ குழுவினர் அதில் 3 பேரை  பிடித்து முழு மருத்துவ பரிசோதனை செய்தனர். மூவருக்கும் எந்த பாதிப்பு ஏற்படவில்லை என்று  மருத்துவர்கள் தெரிவித்தனர். இருப்பினும் முன்னெச்சரிக்கைக்காக அவர்கள் செங்கல்பட்டு அரசு மருத்துவமனையில் அனுமதிக்கப்பட்டு கண்காணிக்கப்பட்டு வருகின்றனர். எஞ்சியுள்ள 2 பேருடன் சேர்த்து 5 பேரும் நலமுடன் இருப்பதாகத் தெரிவிக்கப்பட்டுள்ளது.