Skip to main content

"ரஞ்சித், தமிழ் தேசியவாதிகளை, திமுக - அதிமுகவை விமர்சனம் செய்யட்டும். ஆனால்..." - ராஜ்மோகன்  

Published on 20/06/2019 | Edited on 20/06/2019

பேட்டியின் முதல் பகுதி

"இதெல்லாம் தெரியாமலா கலைஞர் ராஜ ராஜ சோழனுக்கு விழா எடுத்தார்?" - ரஞ்சித் விவகாரத்தில் ராஜ்மோகன்

பா.ரஞ்சித்தின் பேச்சு குறித்த ராஜ்மோகன் பேட்டியின் தொடர்ச்சி...

 

rajmohan interview



தஞ்சை பெரிய கோவில் தமிழகத்தின் அடையாளமாக இருந்தாலும், அதை கட்ட பெரிய பொருட் செலவும், மக்களின் உழைப்பு சுரண்டப்பட்டதாக கூறப்படுகிறதே?

மக்களின் உழைப்பை சுரண்டி கட்டப்பட்ட சீன பெருஞ்சுவரில் அதை கட்டியவர்களின் பெயர் இருக்கா? இல்லை, மக்களின் உழைப்பை சுரண்டி இப்போது கட்டியிருக்கீங்களே ரிப்பன் பில்டிங், அதுல கட்டியவர்கள் பெயர் இருக்கா? இல்லை. ஆனா பெரிய கோவில் கட்டிய உதவியவர்களை சிற்றரசர் அளவுக்கு ராஜராஜன் போற்றி பாதுகாத்தார். அந்த கோயிலில் அதை கட்ட உதவியவர்களின் பெயர்களை பதித்தார். ராஜராஜன் கட்டினான் என்று பெயர் வரக்கூடாது என்பதில் அவர் தெளிவாக இருந்தார்.  இந்த மாதிரியான கிரெடிட்டை இதற்கு முன் யாரும் கொடுத்ததில்லை என வரலாற்று ஆராய்ச்சியாளர்கள் தெரிவிக்கிறார்கள். தன்னை பெருமைப்படுத்திக்கொள்ள அனைத்து வாய்ப்புக்களும் இருந்த போதும் அதனை தவிர்த்து, அனைவருக்கும் சமமாக வாய்ப்புகளை ஏற்படுத்தி தந்தார்.

இதை நீங்க பெருமையா பேசுங்க. ஆனா, அந்த காலகட்டத்துல குறுநில மன்னர்களின் நிலங்களை பறித்தும், சேர பாண்டிய மன்னர்களின் சொத்துக்களை அபகரித்துதான் இந்த கோயில் உருவாக்கப்பட்டதுன்னு சொல்லப்படுதே?

புறநானூறு  முழுவதும் மன்னர்களின் போர் வெற்றிகளை மட்டும்தான் பெருமையாக பேசுகிறது. அவர்கள் போர் புரிந்ததும் உண்மைதான். அந்த கால வரலாறே அப்படிதான். ராஜராஜன் எதையும் புதிதாக செய்யவில்லை. மன்னராட்சியில் அப்படிதான் இருந்திருக்கிறது. இந்த விஞ்ஞான வளர்ச்சியான காலத்தில் கூட ஒருத்தரை ஒருத்தர் வெட்டிகிட்டு சாகிறாங்க.


அதை பற்றியெல்லாம் நீங்க வீடியோ போடலையே?

போடுவோங்க... நீங்க ஆசை பட்டீங்கன்னா ரொம்ப விரிவா வீடியோ போடுவோம். ஆனா சிறுமை படுத்தாதீங்கன்னுதான் நாங்க கேக்குறோம். நடிகர் சிவகுமார் ஒரு நல்ல நடிகர். அவர் செல்போனை தட்டிவிட்டது தப்புதான். அதற்காக அவரை வரப்போற சமூகம் மோசமானவர்னு பேசினா அது எவ்வளவு பெரிய அயோக்கித்தனம்? அவர் தமிழை பாமரன் வரைக்கும் கொண்டு சென்றார். கடைசி காலம் வரையில் சினிமாவில் ஒழுக்கமாக இருந்தார். ஒரு சிறிய தவறுக்காக அவர் செய்த நல்ல விஷயங்களை மறுப்பது என்பது ஏற்றுக்கொள்ள கூடியதல்ல. இன்னும் சில காலத்துக்கு பிறகு யார் அந்த செல்போன் தட்டிவிட்ட அயோக்கியனா என்று பேசினால், நாம் எப்படி பொறுக்க முடியும்.

  tanjai big temple



ரஞ்சித் எப்படி ராஜராஜனை தப்பா பேசலாம்னுதான் குற்றஞ்சாட்டப்படுதே?

ரஞ்சித்தே பிரச்சனை இல்லை, நெருப்புனா சுட்டுவிடாது. ரஞ்சித் காலகட்டத்துக்கு பிறகு, நானும் செத்துடுவேன், மனுஷனா பொறந்த எல்லாரும் இறந்துவிடதான் வேண்டும். அவருக்கு பிறகு யார் அவருனு பேசறப்ப, ராஜராஜ சோழனை தப்பா பேசுனாரே அந்த ரஞ்சித்தானு அவரை வரலாறு பதிவு செய்ய கூடாது. தன்னுடைய முதல்படமான அட்டகத்தியிலேயே உணவு அரசியலை பேசினாரே, மெட்ராஸ் திரைப்படத்தில் தற்கால அரசியல் நிலைமை குறித்து விரிவாக பேசினாரே, காலா படத்தில் ரஜினியை வைத்து, அதுவும் ரஜினிக்கு சோழர்களின் பெயரான கரிகாலன் பெயரை வைத்து தலித் மக்களின் உரிமையை பேசினாரே என்றுதான் வரலாறு பதிவு செய்ய வேண்டும். முன்னோர்களை மதித்தல் என்பது தமிழ் மரபு. அதைதான் செய்ய வேண்டும் என்கிறோம்.

ரஞ்சித் பேசியதில் மற்ற கருத்துக்களை எப்படி பாக்கிறீங்க, ஊரும் சேரியும் ஒன்னாகலைனு அவர் சொல்றது ஒத்துக்கொள்கிறீர்களா?

அதெல்லாம் நிச்சயம் இருக்கு. நாம் எவ்வளவு விஞ்ஞானத்துக்கு போனாலும் நவீன தீண்டாமை இன்னும் தொடர்ந்து கொண்டுதான் இருக்கு. அதை ஆயிரம் பெரியார்கள் வந்தாலும் கட்டுப்படுத்த முடியாது. அதைதான் ரஞ்சித் போன்றவர்கள் முன்னெடுத்து வருகிறார்கள். அதை அவர்கள் தொடர வேண்டும். ஜாதிங்கிற கேன்சர் கட்டிய அறவே அழிக்க வேண்டும். அதுவே சாதி ஏற்றத்தாழ்வுகளை எதிர்ப்பவர்களின் விருப்பமாகவும் இருக்கிறது.


அவர் தமிழ் தேசியவாதிகளையும் கேள்வி கேட்கிறாரே?

அவர் தமிழ் தேசியவாதிகளை கேட்கிறார், திமுக, அதிமுக-வை விமர்சனம் செய்கிறார், செய்யட்டும். இதை எல்லாம் இன்னும் ஆயிரம் ஆண்டுகள் கழித்து செய்ய முடியாது. இதையெல்லாம் உடனடியாக பேச வேண்டிய விஷயங்கள். இதை யாரும் தடுக்கவில்லை. ஆனா... அயோக்கியன் ராஜராஜசோழன்னு யரோ தப்பா சொல்லியிருக்காங்க. அதைத்தான் தவறுனு சொல்கிறோம். அப்ப ராஜபக்ஷேவுக்கும் ராஜராஜனுக்கும் வித்தியாசம் இல்லையா?

ரஞ்சித் மீதான ஜாதி ரீதியான விமர்சனங்களை எப்படி பாக்குறீங்க?

நிச்சயம் தவறு. யார் மீதும் ஜாதி ரீதியாக தாக்குதலை ஏற்றுக்கொள்ள முடியாது. அது முற்றிலும் தவறானது. யாராலும் ஏற்றுக்கொள்ள முடியாது. இது தமிழத்தின் மிகப்பெரிய கேடு. ஜாதியை சொல்லி திட்டுவதையும், விமர்சிப்பதையும் நவீன தீண்டாமையாகத்தான் பார்க்க வேண்டியுள்ளது.

 

 

 

Next Story

“அரசு மற்றும் காவல்துறையின் அலட்சியபோக்கே காரணம்” - பா.ரஞ்சித் காட்டம்

Published on 20/06/2024 | Edited on 20/06/2024
Pa. Ranjith condemned the Tamil Nadu government in the illegal liquor

கள்ளக்குறிச்சி நகரப் பகுதியான ஏழாவது வார்டில் கருணாபுரம் பகுதியில் கள்ளச்சாராயம் விற்பனை செய்வது தொடர்ந்து வருவதாகக் குற்றம் சாட்டப்படுகிறது. இந்நிலையில் நேற்று அப்பகுதியில் கள்ளச்சாராயம் விற்கப்பட்டதாகவும், இதனைப் பலர் வாங்கி குடித்ததாகவும் கூறப்படுகிறது. முதலில் 4 பேர் உயிரிழந்த நிலையில் தற்போது உயிரிழப்பு 36 ஆக உயர்ந்துள்ளது.

இந்தச் சம்பவத்தில் பாதிக்கப்பட்ட 100க்கும் மேற்பட்டோர்  ஜிப்மர் மருத்துவமனை, கள்ளக்குறிச்சி, விழுப்புரம், சேலம் எனப் பல்வேறு மருத்துவமனையில் அனுமதிக்கப்பட்டு தீவிர சிகிச்சை பெற்று வருகின்றனர். உயிரிழப்புக்கு பாக்கெட் கள்ளச்சாராயம் காரணமாக இருக்கலாம் எனத் தமிழக அரசு தெரிவித்துள்ளது. மேலும் இறந்தவர்களின் உடல்கள் உடற்கூறு ஆய்வு செய்யப்பட்ட பிறகே  முழுமையான காரணம் தெரிய வரும் எனவும் தமிழக அரசு தெரிவித்துள்ளது. அதேநேரம் கள்ளக்குறிச்சி மாவட்ட ஆட்சியர் ஷ்ரவன் குமார் பணியிட மாற்றம் செய்யப்பட்டு புதிய ஆட்சியராக எம்.எஸ்.பிரசாந்த் நியமனம்  செய்யப்பட்டுள்ளார். இந்தச் சம்பவம் தொடர்பாக 4 பேரை போலீசார் கைது செய்துள்ளனர். கள்ளச்சாராயம் குடித்து 30க்கும் மேற்பட்ட சம்பவம் தமிழ்நாட்டையே உலுக்கியுள்ளது.

இந்த நிலையில் இயக்குநர் பா.ரஞ்சித் தமிழக அரசுக்கு கண்டனம் தெரிவித்துள்ளார். இது தொடர்பாக அவர் வெளியிட்டுள்ள சமூக வலைதளப்பதிவில், “கள்ளக்குறிச்சி மாவட்டத்தில் நிகழ்ந்த கள்ளச்சாராய மரணங்கள் அதிர்ச்சியையும் பெரும் வேதனையையும் ஏற்படுத்துகிறது. தமிழக அரசு மற்றும் காவல்துறையின் அலட்சியப் போக்கே இக் கொடுந்துயரத்திற்குக் காரணமாக அமைந்திருக்கிறது. அதற்கு வன்மையான கண்டனங்கள்! சம்பந்தப்பட்ட குற்றவாளிகள், இதைத் தடுக்கத் தவறிய அரசு அதிகாரிகள், காவல்துறையினர் ஆகியோரைக் கடுமையாகத் தண்டிப்பதோடு மட்டும் அல்லாமல், இனி இதுபோன்ற நிகழ்வுகள் நடக்காத வண்ணம் கடும் தடுப்பு நடவடிக்கைகளை மேற்கொள்ள வேண்டும்.

மேலும், சமீப காலமாக தமிழ்நாட்டில் மது மற்றும் போதைப் பழக்கத்திற்கு அடிமையானவர்களின் எண்ணிக்கை வயது வித்தியாசமின்றி, நகரம், கிராமம் என்ற வேறுபாடு இல்லாமல் பெருமளவில் பெருகியிருக்கிறது என்பதை அறிய முடிகிறது. இதனால் அவர்களின் குடும்பங்களும் வாழ்வாதாரமும் மோசமான நிலைக்குத் தள்ளப்பட்டிருக்கிறது. இத்தகைய போதைப் பழக்கத்திற்கு அடிமையானவர்களை நோயாளிகளாகக் கருதி அவர்களின் நிலையை மாற்ற மாவட்ட ஒன்றியங்கள் தோறும், மறுவாழ்வு மையங்களை உருவாக்க வேண்டும் எனத் தமிழக அரசை வலியுறுத்துவோம்” எனக் குறிப்பிட்டுள்ளார். 

Next Story

“தீபக் ராஜா கொலை பற்றி எனக்கு எதுவும் தெரியாது” - ஹிப் ஹாப் ஆதி

Published on 27/05/2024 | Edited on 27/05/2024
Hip Hop Adhi said I know nothing about Deepak Raja case

திருச்சி மாரிஸ் எல்.ஏ.  திரையரங்கில் நேற்று(26.5.2024) ஹிப் ஹாப் தமிழா ஆதி நடித்த பி.டி. சார் திரைப்படம் திரையிடப்பட்டது. திரைப்படத்தின் இடைவேளையில் தோன்றிய படத்தின் கதாநாயகன் ஹிப் ஹாப் ஆதி, ரசிகர்களிடம் இந்த திரைப்படத்தை வெற்றி அடையச் செய்ததற்கு தனது நன்றியை தெரிவித்து மகிழ்ச்சியை வெளிப்படுத்தினார். பின்னர் ரசிகர்கள் அவருடன் செல்பி எடுத்துக் கொண்டனர். திரையரங்கில் ஹிப் ஹாப் பாடலை ஆதி பாட, ரசிகர்களும் அவருடன் இணைந்து பாடினர்.

முன்னதாக செய்தியாளர்களைச் சந்தித்த ஹிப் ஹாப் ஆதி, “படத்தை வெற்றி அடையச் செய்த அனைவருக்கும் நன்றி. இரவு காட்சி திருச்சியில் 800 இருக்கைகளுக்கு மேல் கொண்ட இந்த திரையரங்கில் ஹவுஸ்புல் காட்சிகளாக ஓடுவது எனக்கு மிக்க மகிழ்ச்சியை ஏற்படுத்தியுள்ளது. பெண்கள் கூட்டமாக வந்து படத்தை பார்ப்பது எனக்கு மிகவும் சந்தோஷமாக இருக்கிறது.

இங்கு வந்தபோது ரசிகர்கள் எங்களை வரவேற்ற விதம் எங்களது களைப்பை போக்கிவிட்டது. இத்தகைய ரசிகர்கள் எனக்கு கிடைத்தது மிகவும் பெருமையாக உள்ளது. நான் கொடுத்து வைத்தவன். சில யூடியூப்களில் இத்திரைப்படத்தை பற்றி நெகட்டிவ் கமெண்ட்ஸ் வருவதை பற்றி எனக்கு கவலை இல்லை. அது அவர்களின் கருத்து. திரையரங்குகளில் இந்த படத்தின்  வெற்றியை நீங்களே பார்க்கின்றீர்கள். அப்படி எதுவும் குறை இருந்தால் அதை அடுத்தடுத்த படங்களில் நிவர்த்தி செய்வேன். தொடர்ந்து நல்ல படைப்புகளை தருவேன் நடிகர்,  இசையமைப்பாளர், ஹிப் ஹாப் பாடகர் என என்னை அனைத்து பரிமாணங்களிலும் பார்க்கலாம். நான் கலைஞனாக சமுதாய கருத்துள்ள படைப்புகளை கொடுக்கவே விருப்பப்படுவேன்” என்றார்.

தொடர்ந்து பத்திரிக்கையாளர்களின் கேள்விக்கு பதிலளித்து வந்த ஆதியிடம், நெல்லையில் தீபக் ராஜா கொல்லப்பட்டதற்கு பா.ரஞ்சித்தின் கருத்து குறித்து நீங்கள் என்னை நினைக்கிறீர்கள் என்று கேள்வி எழுப்பபட்டது. அதற்கு,  ஆணவக் கொலையா? என்று கேட்ட ஆதி, எனக்கு இந்த கொலையைப் பற்றி எதுவும் தெரியாது; முதலில் என்ன நடந்தது என்று தெரிந்துகொள்கிறேன். தெரியாததைப் பற்றி எப்படி கருத்துசொல்ல முடியும். ஆணவக் கொலைக்கு என்றைக்கும் நான் எதிரானவன்; நான் மட்டுமல்ல இங்க இருக்க எல்லாரும் ஆணவக் கொலைக்கு எதிரானவர்கள்தான் என பதிலளித்தார்.

மேலும், “ஆணவக் கொலைக்கு எதிராக நான் சினிமாவிற்கு வருவதற்கு முன்பே ஹிப் ஹாப் பாடல் எழுதியுள்ளேன்” என கூறி அப்பாடலில் சில வரிகளை பாடிக் காட்டினார்.