Skip to main content

இந்திராவைப் போல ராகுல் தலைமையில் புதிய காங்கிரஸ் உருவாகுமா?

Published on 09/07/2019 | Edited on 09/07/2019

1969ல் காமராஜர், மொரார்ஜி போன்ற பெரு முதலாளிகளின் வேலைக்காரர்கள், இந்திராவின் முற்போக்கு திட்டங்களுக்கு முட்டுக்கட்டை போட்டனர்..
 

indira gandhi rahul gandhi


வங்கிகள் தேசிய மயம், மன்னர்களுக்கு மானியம் ஒழிப்பு, தொழில்துறை வளர்ச்சி, பசுமைப் புரட்சி போன்ற யோசனைகளை நிறைவேற்ற முடியாமல் இந்திரா தவித்தார்.

நேரு இறந்தபிறகு, சோவியத் ஆதரவு நிலையை கைவிட்டு, அமெரிக்க ஆதரவு நிலைக்கு திரும்ப வேண்டும் என்று காங்கிரஸ் கட்சியிலிருந்த பெருந்தலைகள் கூறத்தொடங்கினார்கள். ஆனால், தனது தந்தை வழியில் அணிசேரா மூன்றாம் உலகநாடுகளின் அமைப்பில் இருந்துகொண்டே, சோவியத் ஆதரவு நிலையை மேற்கொண்டார் இந்திரா.
 

sanjeeva reddy v v giri


சோவியத் யூனியனின் சில சமூகப் பாதுகாப்புத் திட்டங்களை இந்தியாவில் அமல்படுத்த அவர் முயற்சித்தார். அவருடைய நோக்கத்திற்கு திட்டங்களை நிறைவேற்ற வேண்டுமென்றால், குடியரசுத்தலைவர் தனக்கான ஆளாக இருக்க வேண்டுமே? அதற்காக காங்கிரஸ் தலைமை குடியரசுத்தலைவர் பதவிக்கு அறிவித்த சஞ்சீவரெட்டியை எதிர்த்து தனது வேட்பாளராக வி.வி.கிரியை அறிவித்தார் இந்திரா.

அது மிக பரபரப்பான அரசியல். இந்திராவின் பதவி பறிபோகும் அபாயம் உருவானது. காங்கிரஸ் எம்.பி.க்களில் இந்திராவுக்கு போதுமான ஆதரவு கிடைக்கவில்லை. அத்தகைய நிலையில்தான் கலைஞர் தலைமையிலான திமுக இந்திரா காந்தியை ஆதரிக்க முன்வந்தது. ஆட்சியை காப்பாற்றியது மட்டுமின்றி, இந்திரா அறிவித்த வி.வி.கிரியை குடியரசுத்தலைவர் தேர்தலில் ஜெயிக்க வைத்ததிலும் திமுக முக்கிய பங்கு வகித்தது. திமுக நினைத்திருந்தால் அந்த நேரத்திலேயே இந்திராவின் அமைச்சரவையில் இடம்பெற்றிருக்க முடியும்.

ஆனால், இந்திராவின் முற்போக்கு திட்டங்களுக்காவே திமுக ஆதரித்தது. தமிழகத்திற்கு சேலம் உருக்காலையைப் பெற்றுக் கொடுத்தது திமுக. காங்கிரஸின் மூத்த பிற்போக்குத் தலைவர்களை ஓரங்கட்டிவிட்டு இந்திரா தனக்கான காங்கிரஸ் கட்சியை 1969ல் உருவாக்கினார்.
 

kamarajar


இப்போது 2019ஆம் ஆண்டு. காங்கிரஸ் கட்சியில் ஊழல் மற்றும் பிற்போக்குத் தனங்கள் நிரம்பிய, பதவியாசை பிடித்த மூத்த தலைவர்கள் பெருகிவிட்டார்கள். காங்கிரஸின் பிரகாசமான வெற்றிவாய்ப்பை கெடுத்து படுதோல்வியடையச் செய்ததில் இவர்கள் முக்கிய பங்காற்றினார்கள். இந்தியாவை 50 ஆண்டுகளுக்கு பின்னால் தள்ளும் பாஜகவின் முயற்சியை தடுப்பதைக் காட்டிலும் தங்கள் பிள்ளைகள் எம்.பி. ஆவதில்தான் இவர்கள் குறியாக இருந்தார்கள்.

ராகுல் காந்தியும் அவருடைய சகோதரி பிரியங்காவும் மட்டுமே கடுமையான உழைப்பைக் கொடுத்தார்கள். அவர்களுடைய உழைப்பு அத்தனையும் வீணாகும் அளவுக்கு மூத்த தலைவர்களின் செயல்பாடுகள் அமைந்தன. இந்தியாவின் மொத்த ஜனத்தொகையில் 65 சதவீதம்பேர் 35 வயதுக்கு கீழானவனர்கள். இவர்களுக்கான அரசியலை முன்னெடுக்க வேண்டிய அவசியம் காங்கிரஸுக்கு உண்டு. இளம் தலைவரான ராகுல் இவர்களை தனது பக்கம் ஈர்க்க வேண்டிய கட்டாயத்தில் இருக்கிறார்.

இதை நிறைவேற்ற வேண்டும் என்றால் ஒரு இளம் தலைவர் தலைமையில் புதிய காங்கிரஸ் உருவாக்கப்பட வேண்டும். மத்தியப் பிரதேசத்தில் ஜோதிராதித்திய சிந்தியாவை முன்னிறுத்தி போஸ்டர்கள் ஒட்டப்பட்டு பரபரப்பை ஏற்படுத்தியிருக்கிறது.
 

jyotiraditya scindia



திறமையான, காங்கிரஸ் கட்சியை தலைமையேற்று நடத்தக்கூடிய ஒரு தலைமையை ராகுல் உருவாக்க வேண்டும். இந்திய இளைஞர்களின் பிரச்சனைகளை முன்னெடுத்து, மாட்டுக் காவலர்கள் என்ற பேரிலும், ராமர் ஆதரவாளர்கள் என்ற பேரிலும் சிறுபான்மை மற்று தலித் மக்களை கொன்று குவிக்கும் கூட்டத்திடம் இருந்து இந்தியாவை காப்பாற்ற முயற்சிக்க வேண்டும்.

தென்னிந்தியாவில் முன்னெடுக்கப்படும் சமூகநீதி அரசியலை இந்தியா முழுமைக்கும் ராகுல் கொண்டு செல்ல வேண்டும் என்று காங்கிரஸில் ஒரு பிரிவினர் விருப்பம் தெரிவிக்கிறார்கள்.

ராகுல் ராஜினாமா முடிவில் உறுதியாக இருப்பது, காங்கிரஸ் கட்சியை சீரமைக்கும் ஆபரேஷனுக்காகத்தான் என்று இன்னொரு பிரிவினர் கூறுகிறார்கள்.

மூத்த தலைவர்கள் பதவி விலகி இளய தலைமுறைக்கு வழிவிடத் தவறினால், புதிய காங்கிரஸ் உருவாவதை தடுக்க முடியாது என்பதே பெரும்பான்மையான இளம் தலைமுறை காங்கிரஸாரின் கருத்தாக இருக்கிறது.

 

 

Next Story

“காவிரி நீர் வேணுமா... ஈரோட்டில் கூட காவிரி ஓடுது பாருங்க...” - ஈ.வி.கே.எஸ். இளங்கோவன் பதிலால் எழுந்த விமர்சனம்

Published on 28/03/2024 | Edited on 28/03/2024
'Oh Cauvery water...? Even in Erode, see the Cauvery running'- Criticism caused by EVKS Elangovan's response

நாட்டின் 18 ஆவது நாடாளுமன்ற மக்களவைத் தேர்தலுக்கான தேதிகள் அறிவிக்கப்பட்டு, மொத்தமாக ஏழு கட்டங்களாகத் தேர்தல் நடத்தப்படவுள்ள நிலையில், முதற்கட்டமாகத் தமிழ்நாட்டில் ஏப்ரல் 19 ஆம் தேதி வாக்குப்பதிவு நடைபெற இருக்கிறது. இதற்கான வாக்கு எண்ணிக்கை ஜூன் 4 ஆம் தேதி நடைபெறவுள்ளது. ஏற்கெனவே தமிழகத்தில் உள்ள அரசியல் கட்சிகள் தேர்தல் பணியில் தீவிரம் காட்டி வரும் நிலையில், தேர்தல் தேதி அறிவிக்கப்பட்டதால் தேர்தல் களம் அனல் பறக்க ஆரம்பித்துவிட்டது.

ஈரோட்டில் செய்தியாளர்களைச் சந்தித்த காங்கிரஸ் எம்.எல்.ஏ ஈ.வி.கே.எஸ். இளங்கோவன் பேசுகையில், ''ஸ்டாலின் தலைமையில் அமைந்திருக்கின்ற கூட்டணி என்பது சாதி மதங்களைக் கடந்த கூட்டணி. மத வெறித்தனத்திற்கு அப்பாற்பட்ட கூட்டணி. மக்கள் ஒற்றுமையாக இருக்க வேண்டும், எல்லா மதத்தைச் சார்ந்தவர்களும் ஒன்றாக இருக்க வேண்டும் என்ற ஒரு நல்ல கொள்கைக்காக தான் இந்த கூட்டணி இருக்கிறது.

மற்ற கூட்டணிகளை எடுத்துக் கொண்டால் குறிப்பாக பாஜக கூட்டணியில் இருக்கின்ற கூட்டணியாக இருந்தாலும் சரி, அதிமுக தலைமையில் இருக்கின்ற கூட்டணியாக இருந்தாலும் சரி அவர்கள் கொள்கைக்காக ஒன்று சேரவில்லை. சில கோடி ரூபாய் பேரம் பேசி பெறுவதற்காக அந்த கூட்டணியில் இருக்கிறார்கள்'' என்றார்.

அப்பொழுது செய்தியாளர் ஒருவர், 'ஒரு சொட்டு தண்ணீர் கூட தரமாட்டேன் என்று சொல்கின்ற காங்கிரசுக்கு பத்து சீட்டுகள் கொடுத்தது நியாயமா என சீமான் கேள்வி எழுப்பி உள்ளாரே' எனக் கேள்வி எழுப்பினார். அதற்குப் பதிலளித்த இளங்கோவன், ''இல்லை காங்கிரசினுடைய கொள்கையே ஒரு சொட்டு நீர் கூட கொடுக்கக் கூடாது என்பதுதான். மக்கள் குடிப்பதால் கெட்டுப் போயிருக்கிறார்கள். மக்களுடைய சிந்தை மாறி போயிருக்கிறது. அதனால் காங்கிரசை பொறுத்தவரை எங்களுடைய மகாத்மா காந்தியினுடைய கொள்கையே ஒரு சொட்டு மது தண்ணீர் கூட மக்களுக்கு கொடுக்கக் கூடாது என்பதுதான்'' என்றார்.

உடனே செய்தியாளர் 'காவிரி தண்ணீர்' என சொல்ல, ''காவிரி தண்ணீரா... காவிரி தண்ணீர் வந்து கொண்டிருக்கிறது. ஈரோட்டில் இருக்கின்ற காவிரி ஆற்றை பார்த்தீர்கள் என்றால் கூட, இன்னைக்கு பாருங்கள் இருக்கின்ற பாறை எல்லாம் மறைக்கும் அளவிற்கு தண்ணீர் போய்க் கொண்டிருக்கிறது. வேண்டிய அளவிற்கு தண்ணீர் தர கர்நாடகா தயாராக இருந்தாலும் அவர்களுக்கு தண்ணீர் பற்றாக்குறை ஏற்பட்டு இருக்கின்ற காரணத்தால் சில தடங்கல்கள் இருக்கிறது'' என்றார்.

காவிரி நீர் குறித்த கேள்விக்கு ஈ.வி.கே.எஸ்.இளங்கோவன் கொடுத்த பதிலுக்கு சமூக வலைத்தளங்களில் விமர்சனங்கள் எழுந்து வருகிறது.

Next Story

“கோட்சே பேரன்களின் கொள்கை தோற்கடிக்கப்பட வேண்டும்” - காங்கிரஸ் எம்.பி. மாணிக்கம் தாகூர் பிரச்சாரம்!

Published on 28/03/2024 | Edited on 28/03/2024
 Politics of Godse's grandsons must be defeated said Congress candidate Manickam Tagore

விருதுநகர் மாவட்டம் – ஸ்ரீவில்லிபுத்தூரை அடுத்துள்ள கிருஷ்ணன் கோயிலில் நடந்த தேர்தல் பிரச்சாரக் கூட்டத்தில் தென்காசி பாராளுமன்ற திமுக வேட்பாளர் ராணி ஸ்ரீகுமார் மற்றும் விருதுநகர் பாராளுமன்ற காங்கிரஸ் வேட்பாளர் மாணிக்கம் தாகூரை ஆதரித்து தமிழ்நாடு முதலமைச்சர் மு.க. ஸ்டாலின் பிரச்சார உரையாற்றினார்.

இந்தக் கூட்டத்தில் விருதுநகர் பாராளுமன்ற உறுப்பினரும் விருதுநகர் தொகுதியின் காங்கிரஸ் வேட்பாளருமான மாணிக்கம் தாகூர் பேசியபோது, “என்னுடைய பார்வையில், தளபதி மு.க. ஸ்டாலின் ஒவ்வொரு கட்டத்திலும் தொடர்ந்து உயர்ந்த நிலைக்கு சென்றபடியே இருக்கிறார். நாளை என்னவாக உயர்வார் என்பதற்குக் காலம் பதில் சொல்லும்.

 Politics of Godse's grandsons must be defeated said Congress candidate Manickam Tagore

ஆனால் அவர் இந்தியாவினுடைய பிரதமராக ராகுல் காந்தி வருவதற்கு முழு ஆதரவு தருவார் என்பது மட்டும் நம் அனைவருக்கும் தெரிந்த விஷயம். ஏப்ரல் 19 ஆம் தேதி நடக்கவிருக்கின்ற தேர்தல், இரு கொள்கைகளுக்கான தேர்தல். ஒரு பக்கம் கோட்சேவின் பேரன்களும் அவருடைய கொள்கைகளும். 20 கோடி சிறுபான்மையின மக்களை அடிமைகளாக சிக்க வைக்க வேண்டும் என்ற ஆர்.எஸ்.எஸ்.ஸின் கொள்கை. பெரும் பணக்காரர்களாக இருக்கின்ற அதானிக்கு இந்தியாவின் செல்வங்களை அள்ளிக் கொடுக்கத் துடிக்கும் மோடி, அமித்ஷாவின் கொள்கை.

இன்னொரு பக்கம், அனைவருக்கும் சமமான இந்தியாவை உருவாக்க வேண்டுமென்று மகாத்மா காந்தி மற்றும் தந்தை பெரியார் பேரன்களின் இந்தக் கூட்டணி. இந்த இந்தியா கூட்டணி அனைவருக்கும் அனைத்தும் என்ற கொள்கையைக் கொண்ட கூட்டணி. இந்தக் கூட்டணி வெல்ல வேண்டுமென்றால், உங்களுடைய ஆதரவு முழுமையாகத் தேவை. இந்தக் கூட்டணி வெல்ல வேண்டுமென்றால் கோட்சே தோற்கடிக்கப்பட வேண்டும். கோட்சேவின் கொள்கை தோற்கடிக்கப்பட வேண்டும். காந்தியா? கோட்சேவா? என்ற நிலையிலே இன்று நிற்கிறோம். மோடியா? ராகுல் காந்தியா? என்ற நிலையிலே நிற்கிறோம். இதிலே தளபதியார் ராகுல் காந்தியோடு நிற்கிறார். அவருடைய ஆசியோடு கை சின்னத்துக்கு வாக்கு தாருங்கள் என்று இரு கரம் கூப்பி வேண்டி விடைபெறுகிறேன்.”  எனப் பேசினார்.