Skip to main content

எனக்கு நடக்க இருந்த சாத்தான்குளச் சம்பவம்... தப்பித்தது எப்படி..? - பியுஷ் மனுஷ் பேச்சு!

Published on 09/07/2020 | Edited on 09/07/2020

 

h


சமூக ஆர்வலர் பியுஷ் மனுஷ் நான்கு ஆண்டுகளுக்கு முன்பு தான் கைது செய்யப்பட்டது தொடர்பாக ஒரு வீடியோ வெளியிட்டுள்ளார். அதில் காவல்துறையினர் தன்னை எப்படித் தாக்கினார்கள் என்று தெரிவித்துள்ளார். அவர் இதுதொடர்பாக பேசியதாவது, "சரியாக நான்கு ஆண்டுகளுக்கு முன்பு இதே நாளில் காவல் துறையினரால் நான் கைது செய்யப்பட்டுச் சிறையில் தாக்குதலுக்கு உள்ளானேன். அதற்கான காரணத்தைத் இப்போது நான் கூற வேண்டும் என்று நினைக்கிறேன். தற்போது நான் நின்று கொண்டிருக்கிற இடத்தில் தொடங்கப்பட்டுள்ள இந்தப் பாலம்தான் அந்தப் பிரச்சனைகள் அனைத்திற்கும் காரணம். நான்கு ஆண்டுகளுக்கு முன்பு தொடங்கப்பட்ட இந்தப் பாலம் தற்போது எந்தக் கதியில் இருக்கிறது என்று பாருங்கள்.

 

நீங்களே பாருங்கள் வானம் தெரிகிறது. பின்பக்கம் இன்னும் எந்த வேலையும் ஆரம்பிக்கவில்லை. வேலை ஆரம்பிக்கப்பட்ட உடன் அப்படியே இந்தப் பாலம் நிற்கிறது. இந்தப் பாலம் அமைக்கப்பட குழிதோண்டிய போதே நாங்கள் சில கோரிக்கைகளை வைத்தோம். இந்த இடத்திற்கு அருகில் உள்ள மசூதிக்கு இடையே இணைத்துப் பால வேலைகளைத் துவங்க வேண்டும், அதுவரை ஒரு தற்காலிக சாலையை அமைத்துத் தர வேண்டும் என்று கோரிக்கையை நாங்கள் முன் வைத்துப் போராட்டத்தை ஆரம்பித்தோம். அப்போது ரயில்வே அதிகாரிகள் மாநில அரசு அதிகாரிகள் அனைவரும் வந்து பார்த்து நீங்கள் சொல்வது சரிதான் என்று ஏற்றுக்கொண்டார்கள். பிறகு என்ன நினைத்தார்களோ தெரியவில்லை, நீ என்ன சொல்வது நாங்கள் என்ன கேட்பது என்ற முடிவுக்கு வந்தார்கள்.

 

என்னை வலுக்கட்டாயமாகக் கைது செய்து சேலம் சிறையில் அடைந்தார்கள். சிறையில் கடுமையான தாக்குதலுக்கு உள்ளானேன். பாதத்திலும், கன்னத்திலும் அடித்தார்கள். வெளியே தெரியாதபடி காவல்துறையினர் என்னை அடித்துத் துன்புறுத்தினார்கள். ஒரு வாரம் கழித்து என்னுடன் கைதானவர்கள் சிலருக்கு ஜாமின் கிடைத்து அவர்கள் வெளியே சென்றார்கள். எனக்கு ஜாமீன் கிடைக்கவில்லை. பிறகு என்னை ஜெயிலில் வைத்து கொன்று விடுவதற்கான அனைத்து ஏற்பாடுகளையும் காவல்துறையினர் செய்தார்கள். அந்தத் தகவலை சிறையில் இருந்த சில காவலர்கள் என்னிடம் கூறினார்கள். அப்போது என் மனைவியிடம் பேசுவதற்கான வாய்ப்பு எனக்குக் கிடைத்தது. நான் அங்கே நடப்பவற்றை அனைத்தையும் என் மனைவியிடம் கூறினேன். அவர் உடனடியாக மீடியாவைச் சந்தித்து அதுபற்றி கூறினார்.

 

உடனடியாக இணையத்தளங்கள் வாயிலாகவும் ஊடகங்கள் வாயிலாகவும் எனக்கு மக்கள் ஆதரவு பெருகியது. அதன் பிறகே அந்தக் கொலை முயற்சியில் இருந்து அவர்கள் பின்வாங்கினார்கள். நான் சிறையில் இருந்து வெளியே வந்தது சிறையில் நான் தாக்கப்பட்டது தொடர்பாக நீதிமன்றத்தில் வழக்குத் தொடர்ந்திருந்தேன். அந்த வழக்கில் சிறை அதிகாரிகள் மீது வழக்குப் பதிவு செய்ய நீதிமன்றம் உத்தரவிட்டது. இத்தனை மாதங்கள் ஆகியும் அந்த உத்தரவு நடைமுறைப் படுத்தப்படவில்லை. நீதிமன்றத் தீர்ப்பைக் கூட அவர்கள் மதிக்கவில்லை. இதுதான் அவர்களின் நடைமுறையாக இருந்து வருகிறது. இன்றைக்குச் சாத்தான் குளம் சம்பவத்திலும் அதுதான் நடைபெற்றது" என்றார்.

 

 

Next Story

பறந்த முத்தம்; பதறிய பாஜக எம்பிக்கள் - வெளுத்து வாங்கும் பியூஷ்மனுஷ்

Published on 12/08/2023 | Edited on 12/08/2023

 

Piyush Manush interview

 

சமீபத்திய பாராளுமன்ற நிகழ்வுகள் குறித்து தன்னுடைய கருத்துக்களை நம்மோடு பகிர்ந்துகொள்கிறார் சமூக செயற்பாட்டாளர் பியூஸ் மனுஷ் அவர்கள்...

 

கொடுக்கப்படாத ஃப்ளையிங் கிஸ் ஸ்மிருதி இரானியால் பாராளுமன்றத்தில் அரசியலாக்கப்பட்டது. மணிப்பூரில் வெளியான வீடியோவிலேயே இவ்வளவு கொடூரங்கள் நிகழ்த்தப்பட்டுள்ளது என்றால், இன்னும் வெளியாகாத விஷயங்கள் எவ்வளவு இருக்கும்? மணிப்பூர் முதலமைச்சரே சொல்கிறார் இதுபோன்ற நூற்றுக்கணக்கான சம்பவங்கள் அங்கு நடைபெற்றுள்ளது என்று. பாஜகவினர் தேசத்துரோகிகள் என ராகுல் காந்தி சரியாகச் சொன்னார். பாஜகவினர் பல்வேறு ஊழல்களில் ஈடுபட்டுள்ளனர். மணிப்பூர் கலவரங்களுக்கு அரசின் ஆதரவு இல்லையென்றால் ஏன் உடனடியாக நடவடிக்கை எடுக்கவில்லை?

 

இவர்கள் நடவடிக்கை எடுக்காததால் தான் இதில் அரசியல் இருக்கிறது என்கிறோம். மணிப்பூரில் நடந்தது அரசாங்கத்தால் ஊக்குவிக்கப்பட்ட வன்முறை. சம்பந்தமில்லாத ஒரு விஷயத்தில் மக்களைத் துன்புறுத்துவது தான் தீவிரவாதம். 24 மணி நேரமும் இவர்களுடைய சிந்தனை மதம் குறித்தே இருக்கிறது. மக்கள் துன்பப்படுவதை மணிப்பூர் முதலமைச்சரால் நிறுத்த முடியவில்லை. ஆனால் அவரை மாற்றுவதற்கு பாஜக தயாராக இல்லை. சொந்த மாநிலத்தில் மக்கள் அகதிகளாக வாழ்ந்து வருகின்றனர். 

 

கொஞ்சமாவது மனசாட்சி இருந்திருந்தால் மணிப்பூர் முதலமைச்சரை இவர்கள் மாற்றியிருப்பார்கள். மணிப்பூர் மக்கள் யாரும் அவரை விரும்பவில்லை. ராகுல் காந்தி யாருக்கும் ஃப்ளையிங் கிஸ்  கொடுத்தது போல் வீடியோவில் தெரியவில்லை. ஆனால் இவர்கள் பொய்யைப் பரப்புகின்றனர். மணிப்பூரில் அவ்வளவு பெண்கள் பாதிக்கப்பட்ட விஷயத்தை விட்டுவிட்டு, எந்த விஷயத்துக்காக இவர்கள் சபாநாயகரிடம் புகார் கொடுக்கிறார்கள் என்பதைப் பாருங்கள். சொந்த மக்களையே இவர்கள் இன அழிப்பு செய்கிறார்கள். 

 

பிரதமரைப் பேச வைப்பதற்காகத் தான் நம்பிக்கையில்லாத் தீர்மானம் கொண்டுவரப்பட்டது. ஆனால் அவர் பேசுவதற்கு தயாராக இல்லை. பஸ்ஸில் 10 கிலோமீட்டர்கள் சென்றுவிட்டு வெறும் 2 கிலோமீட்டர்கள் மட்டும் நடப்பது தான் அண்ணாமலையின் நடைபயணம். இந்த 9 ஆண்டுகளில் மோடி அரசு என்ன மக்கள் நலத்திட்டத்தை அறிமுகப்படுத்தியுள்ளது? சிலிண்டர் விலையை உயர்த்தியது, மக்கள் சொத்துக்களை அதானியிடம் கொடுப்பது தான் சாதனையா? இவர்கள் வாயைத் திறந்தாலே பொய்தான் பேசுகிறார்கள். இவர்கள் நாட்டை மொத்தமாகக் கொள்ளையடிக்கிறார்கள்.

 

 

 

Next Story

“இளம்பெண்கள் கடத்தல்; மோடி ஊரில் நடக்கும் அவலம்” - பியூஷ் மனுஷ்

Published on 10/05/2023 | Edited on 10/05/2023

 

Piyush Manush  Interview

 

குஜராத் மாநிலத்தில் பெண்கள் கடத்தப்படும் சம்பவம் மற்றும் பல்வேறு அரசியல் நிகழ்வுகள் குறித்து நம்மோடு சமூக செயற்பாட்டாளர் பியூஷ் மனுஷ் பகிர்ந்துகொள்கிறார்.

 

அவர் பேசியதாவது: “குஜராத் மற்றும் வட மாநிலங்களில் பல்வேறு கொடுமைகள் தொடர்ந்து நடந்து வருகின்றன. பெண் சிசுக் கொலை அங்கு அதிகம் நடக்கிறது. பெண்கள் கடத்தப்பட்டு விபச்சாரத்தில் தள்ளப்படுகின்றனர். ஆனால், வட இந்திய மக்களுக்கு இதெல்லாம் பெரிய விஷயமாகத் தெரியாது. அவர்களுக்கு மதம் தான் முக்கியம். காங்கிரஸ் ஆட்சியில் தீமைகள் இருந்தாலும் பல நன்மைகளும் இருந்தன. பாஜக ஆட்சியில் தீமைகள் மட்டும் தான் இருக்கின்றன. குஜராத் மாநிலத்தில் 5 ஆண்டுகளில் 40000 பெண்கள் கடத்தப்பட்டுள்ளனர்.

 

இந்தக் குற்றச்சாட்டுகள் எதன் மீதும் மோடி நடவடிக்கை எடுக்கவில்லை. சங்கிகளுக்கு இஸ்லாமியர்கள் மீதான வெறுப்பு மட்டும் தான் அரசியல். ஏழை மக்கள் இருக்கும் பகுதிகளை எப்போதும் தடுப்பு வைத்து மறைக்கவே விரும்புபவர் மோடி. அவருக்கு இதுபற்றியெல்லாம் கவலை இருக்காது. மணிப்பூரில் கலவரத்தால் இவ்வளவு பேர் இறந்த பிறகும் மோடிக்கு கர்நாடக தேர்தலின் மீதுதான் ஆர்வம் இருக்கிறது. அவர் என்ன செய்தாலும் அவருடைய பக்தர்கள் கைதட்டுவார்கள். உக்ரைன்-ரஷ்யா போரைக் கூட அவரால் நிறுத்த முடியும் என்று நம்புவார்கள். 

 

மணிப்பூரில் நடைபெறும் கலவரம் பாஜக உருவாக்கியது தான். கலவரம் குறித்து மோடி, அமித்ஷா வாய் திறக்கவே இல்லை. கர்நாடகத் தேர்தல் பிரச்சாரத்தில் இருவரும் பிசியாக இருந்தனர். மோடிக்கு இந்து பெண்கள் பற்றிக் கவலையில்லை. அவர்களின் கல்விக்கு நீட் மூலம் தடை போட்டுள்ளார். பெண்களின் முன்னேற்றத்துக்காக எதையும் செய்யவில்லை. தேர்தலைச் சுற்றி மட்டும் தான் அவருடைய வாழ்க்கை ஓடிக்கொண்டிருக்கிறது. அவருடைய பிரச்சார அணிவகுப்பில் மக்களையே காண முடியவில்லை. கட்சிக்காரர்களே நின்று பூக்களை அவர் மேல் தூவுகின்றனர். மத ரீதியான 'தி கேரளா ஸ்டோரி' படத்தை இவர்கள் ப்ரமோட் செய்கின்றனர். 

 

தமிழ்நாடு குறித்து மணிஷ் காஷ்யப் அவதூறு பரப்பி வருவதை முதன்முதலில் நான் தான் வெளிப்படுத்தினேன். அந்த நேரத்தில் அவர்களால் முடிந்த அளவு அவதூறு செய்திகளைப் பரப்பினர். அதன் பிறகு மணிஷ் காஷ்யப் கைது செய்யப்பட்டான். அவனுக்கு தண்டனை வாங்கித் தருவது தான் அடுத்து என்னுடைய வேலை. இதுபோன்ற ஆர்எஸ்எஸ் நபர்கள் தமிழ்நாட்டில் கலவரம் ஏற்படுத்தத் தொடர்ந்து முயன்று வருகின்றனர். இதற்கு எதிராக நாம் தொடர்ந்து போராடுவோம்.”