Skip to main content

"புத்துயிர் பெறும் ஓலைப்பெட்டிதொழில்... ஊக்குவிக்குமா தமிழகஅரசு.?"

Published on 13/10/2018 | Edited on 13/10/2018
palm leaves box

 

30 ஆண்டுகளுக்கு முன்பு தென்மாவட்டங்களில் சீனிமிட்டாய், காராச்சேவு எல்லாம் பார்சல் கட்டித்தருவது ஓலைப் பெட்டியில்தான். வட்டாரவழக்கில் ஓலைக் கொட்டான் என்றழைக்கப்படும் இந்த பெட்டிகளை முன்பு மக்கள் அதிகளவில் பயன்படுத்தியதால், இவற்றின் தேவை அதிகமாக இருந்தது. இதனால் பனைஓலை பொருட்கள் தொழில் மிகவும்நன்றாக இருந்தது. ஆனால் காலப்போக்கில் இந்த தொழில் நலிவடைந்துவிட்டது. ஆனால்,தூத்துக்குடி மாவட்டம் விளாத்திகுளம் அருகே உள்ள நாகலாபுரம் கிராமத்தில் இன்னமும் இந்த தொழில் நடைபெற்றுவருகிறது.

 
இந்த கிராமத்தில் 30 ஆண்டுகளுக்குமுன்பு பனை ஓலையினால் செய்யப்படும் பொருட்களின் உற்பத்தியானது மிகவும் சிறந்து விளங்கியது. குறிப்பாக மிட்டாய் வைக்க பயன்படுத்தும் பனை ஓலைப்பெட்டிகள் அதிக அளவில் உற்பத்தி செய்யப்பட்டன. ஏனென்றால் இப்பகுதியானது பனைமரங்கள் நிறைந்த பகுதியாகும். ஆகவேபனை ஓலையினால் செய்யக்கூடிய பொருட்களான முறம், கல்யாணசீர்வரிசைப் பெட்டி, வீட்டை சுற்றிஅமைக்கப்படும் பனைமட்டை வேலி, இனிப்பு வகைகளை வைக்க பயன்படும் ஓலைப்பெட்டி போன்றவை இங்கு தயாரிக்கப்பட்டு வெளியூர்களுக்கு விற்பனைக்காக அனுப்பி வைக்கப்பட்டன.


 

palm leaves box


 

பூவோடு சேர்ந்த நாறும் மணக்கும் என்பதற்கேற்றார்போல் ஓலைப்பெட்டியில் வைக்கப்படும் உணவுப் பொருளும் பனைஓலைப்பெட்டியால் தனி மணத்தை பெறும். இதனாலேயே, தினமும் ராஜபாளையம், சாத்தூர், திருச்செந்தூர் போன்ற ஊர்களுக்கு செல்லும் பேருந்துகளின் மேல்பகுதியில் பனைஓலைப் பெட்டிகள் ஏற்றி அனுப்பிவைக்கப்படும். சங்கரன்கோவில் ஆடித்தபசு திருவிழாவின்போது நாகலாபுரத்தில் இருந்து சுமார் 80,000முதல் ஒரு லட்சம் வரை பெட்டிகள் அனுப்பப்பட்டு வந்தது.
 

திருவிழாக் காலங்களில் உறவினர்கள் நண்பர்களின் இல்லங்களுக்கு செல்பவர்கள் ஓலைப்பெட்டிகளில் வைக்கப்பட்டுள்ள பண்டங்களை விரும்பி வாங்கிச் செல்வார்கள் என்பதால் அனைத்து இனிப்பு வகைளிலுமே பனை ஓலைப்பெட்டிகளில் வைத்தே பண்டங்களை வைத்திருப்பார்கள். நாளடைவில் பிளாஸ்டிக் பைகள் மற்றும் அட்டைப்பெட்டிகளின் வருகையை தொடர்ந்து ஓலைப் பெட்டிகளின் பயன்பாடானது குறையத் தொடங்கியது. இதனால் பெரும்பான்மையானவர்கள் ஈடுபட்டுவந்த இத்தொழிலில், தற்பொழுது ஒரு குடும்பத்தைச் சேர்ந்தவர்கள் மட்டும் ஈடுபடக்கூடிய நிலை ஏற்பட்டுவிட்டது.

 

palm leaves box


 

இந்த தொழிலில் ஈடுபட்டிருக்கும் தனிக்கோடி என்பவர் நம்மிடம், "முன்னே எங்க தெருவுல எல்லாருமே இந்த தொழில் செய்தோம், எங்க வீட்டுக்காரக இறந்த பிறகு நான் இந்த தொழில்செய்து வருகிறோம். மற்ற குடும்பங்கள் இந்த தொழிலை கைவிட்டுட்டாக, அவங்க பெயிண்ட் வேலை, சித்தாள் வேலைன்னு, கிடைச்ச வேலைக்கு போய்கிட்டு இருக்கிறாங்க. முன்னமாதிரி பனை ஓலையும் இப்போது கிடைக்கிறது கிடையாது. நாங்க இந்தத்தொழில் செய்தாலும், எங்களுக்கு பனைஏறத் தெரியாது. பக்கத்தில இருக்கிற ஆற்றாங்கரையில் இருந்து பனை ஓலை, பனை மட்டை வாங்கி வருவோம். அங்கேயும் இப்ப யாரும் பனைத்தொழில் செய்றது கிடையாது. கூடுதல் முதல் போட்டு வந்து வாங்கி வந்து ஓலைக் கொட்டான் செய்தாலும், ஜோடி 8ரூபாய்க்கு வித்தாத்தான் எங்களுக்கு கட்டுபடியாகும். அந்த அளவுக்கு இருக்குது விலைவாசி" என்றார்.
 

பிளாஸ்டிக் பைகள் பயன்படுத்த எளிதாக இருக்கும். ஆனால் அதில் சூடான தின்பண்டங்களை பார்சல் செய்யும்பொழுது வேதிப்பொருட்கள் கலப்பதால் நச்சுத்தன்மை ஏற்பட்டு உடல்நலத்திற்கு கேடு விளைவிக்கின்றது. அதேபோல், சுற்றுச் சூழலுக்கும் கேடுவிளைவிக்கும் என்பதால், தமிழக அரசே 01-01-2019 முதல் பிளாஸ்டிக் பைகள் பயன்பாட்டிற்கு தடை விதித்துள்ளது. ஆனால் பனை ஓலைப்பெட்டிகளில் வைக்கப்படும் திண்பண்டங்கள் பத்துநாட்கள் ஆனாலும் கெட்டுப்போகாது. உணவுப்பொருளுக்கு புதிய மணமும்,உடலுக்கு ஆரோக்கியமும் தரக்கூடியது.ஆகவே உடல் நலத்திற்கு தீங்குவிளைவிக்காத பனைஓலைப்பெட்டிகளை பயன்படுத்துவதன்மூலம், உடல் நலத்தை காக்கலாம்.


 

palm leaves box


 

எனவே, இதுபோன்ற குடிசைத் தொழில் ஈடுபடுபவர்களுக்கு அரசு ஊக்குவிக்கவேண்டும். குறிப்பாக அரசே இந்தபெட்டிகளை கொள்முதல் செய்யலாம்.குறிப்பாக மகளிர் சுய உதவிக்குழுவினருக்கு இந்த பெட்டிகளை தயாரிக்க கற்றுக் கொடுத்து, அவர்கள் வாழ்க்கையில் முன்னேற ஊக்கம் அளிக்கலாம். பனை ஓலைப் பெட்டிகளை மதிப்பு கூட்டப்பட்ட பொருட்களாக மாற்றி சந்தைப்படுத்த அரசு உதவி செய்யலாம்.
 

இனிமேல், பிளாஸ்டிக் பை பயன்படுத்தக்கூடாது என்று அரசாங்கமே சொல்லிவிட்டதால், தனியார் வர்த்தக நிறுவனங்களும் இது போன்ற ஓலைப்பெட்டிகளை கொள்முதல் செய்து, அதற்கான விலையை பொருட்களின் விலையில் சேர்த்துக் கொள்ளலாம். அதன் மூலம் இந்த தொழிலை நம்பியிருக்கும் தொழிலாளர்கள் வளம்பெறலாம். சுற்றுச் சூழல் பாதிப்பிலிருந்து மண்ணும் நலம் பெறலாம்..!

 

 

 

Next Story

‘வெளிநாட்டு வேலை...’ - அயலக தமிழர் நலத்துறை எச்சரிக்கை!

Published on 26/05/2024 | Edited on 26/05/2024
'Foreign work...' - Neighborhood Tamil welfare department alert

பல்வேறு வேலை வாய்ப்புகளுக்காக தமிழ்நாட்டு இளைஞர்கள் வெளிநாடுகளுக்கு புலம்பெயர்வது அதிகரித்து வருகிறது. இந்நிலையில் சமீபகாலமாக தகவல் தொழில்நுட்ப பணி என்ற பெயரில், கம்போடியா. தாய்லாந்து, மியான்மர் (பர்மா) ஆகிய நாடுகளுக்கு சுற்றுலா விசாவில் அழைத்துச் செல்லப்பட்டு, அங்கு சென்றவுடன் சட்டவிரோதமான இணையதள நடவடிக்கைகளில் ஈடுபடும்படி அவர்கள் கட்டாயப்படுத்தப்படுகின்றனர். அம்மாதிரி சட்டவிரோதமான இணையதள பணிகளை செய்ய மறுக்கும் நபர்களைக் கடுமையாக துன்புறுத்துகிறார்கள். இதுவரை மேற்குறிப்பிட்ட நாடுகளில் இருந்து கடந்த வருடம் மட்டும் 83 தமிழர்களை அயலகத் தமிழர் நலத்துறை மீட்டு வந்துள்ளது.

அண்மைக்காலங்களில் தாய்லாந்து வழியாக லாவோஸ் நாட்டிற்கு தகவல் தொழில்நுட்ப பணி என்றும் டிஜிட்டல் சேவைகளை சந்தைபடுத்துகின்ற மேலாண்மை பணி என்றும் நமது இளைஞர்களை அழைத்துச் சென்று சட்டவிரோத செயல்களில் ஈடுபட கட்டாயப்படுத்தப்படுகின்றனர். இம்மாதிரியாக இளைஞர்களை கவர்ந்து அழைத்து செல்லும் முகவர்கள் துபாய், தாய்லாந்து. சிங்கப்பூர் மற்றும் இந்தியாவில் செயல்பட்டு வருகின்றனர். இம்முகவர்கள் இளைஞர்களுக்குத் தகவல் தொழில்நுட்ப பணிக்கென்று மிக எளிமையான நேர்காணல் வழியாகவும், எளிமையான தட்டச்சு தேர்வு வைத்துத் தெரிவு செய்வதோடு அதிக சம்பளம், தங்குமிட வசதி, நாடு திரும்புவதற்கான விமானப் பயணச் சீட்டு மற்றும் விசா ஏற்பாடு செய்யப்படும் என்று ஆசை வார்த்தைகளைச் சொல்லி இளைஞர்களை பணிக்குத் தேர்வு செய்கின்றனர்.

தகவல் தொழில்நுட்ப பணி என்று நம்பி சென்ற இளைஞர்கள் சட்டவிரோதமாகத் தாய்லாந்து எல்லை வழியாக லாவோஸ் நாட்டிற்கு அழைத்துச் செல்லப்பட்டு, லாவோஸில் உள்ள தங்க முக்கோணம் (Golden Triangle) என்ற சிறப்பு பொருளாதார மண்டலத்தில் கடுமையான மற்றும் கட்டுப்பாடான நிலைமைகளின் கீழ் பணிபுரிய சிறைபிடிக்கப்படுகின்றனர். தாய்லாந்து அல்லது லாவோஸ் நாடுகளில் வருகைக்கான விசா (Arrival visa) வேலைவாய்ப்பை அனுமதிக்காது. மேலும், அத்தகைய விசாவில் லாவோஸுக்கு வருபவர்களுக்கு லாவோஸ் நாட்டு அதிகாரிகள் வேலைக்கான அனுமதியை (Work Permit) வழங்குவதில்லை. சுற்றுலா விசா, சுற்றுலா நோக்கத்திற்காக மட்டுமே பயன்படுத்தப்பட வேண்டும் என்பது குறிப்பிடத்தக்கது. லாவோஸில் மனித கடத்தல் குற்றங்களில் ஈடுபடுபவர்களுக்கு 18 ஆண்டுகள் வரை சிறைத்தண்டனை விதிக்கப்படும்.

இதுபோன்ற மோசடி வலையில் நமது இளைஞர்கள் மாட்டிக்கொள்ளாமல் எச்சரிக்கை உணர்வுடன், ஆட்சேர்ப்பு முகவர் மற்றும் வேலை செய்யவிருக்கும். நிறுவனத்தைப் பற்றி நன்றாக விசாரித்து பணிக்குச் செல்லவும் அறிவுறுத்தப்படுகிறது. மேலும் வேலைக்கான விசாவின் உண்மைத்தன்மை மற்றும் முறையான பணி ஒப்பந்தம் (Work Permit) குறித்து பயணிப்பதற்கு முன் பணிபுரியச் செல்ல உள்ள நாட்டிலுள்ள இந்திய தூதரகம் அல்லது இந்தியாவிலுள்ள அந்நாட்டின் தூதரகம் மூலம் கட்டாயம் அறிந்து கொள்ளவேண்டும். லாவோஸ் மற்றும் கம்போடியாவில் வேலை வாய்ப்புகள் குறித்த விவரங்களை லாவோஸ் நாட்டிலுள்ள இந்திய தூதரகத்தின் தொலைபேசி எண் 856-2055536568, மின்னஞ்சல் cons.vientianne@mea.gov.in மற்றும் கம்போடியாவில் உள்ள இந்திய தூதரகத்தின், மின்னஞ்சல் cons.phnompehh@mea.gov.in. மற்றும் visa.phnompehh@mea.gov.in ஆகியவற்றின் மூலம் சரிபார்க்க கேட்டுக்கொள்ளப்படுகிறார்கள்.

அயலக வேலைவாய்ப்பு தொடர்பான விவரங்கள் மற்றும் அயல்நாடுகளில் உள்ள தமிழர்கள் சந்திக்கும் இன்னல்கள் குறித்து தீர்வு காண தமிழ்நாடு அரசின் அயலகத் தமிழர் நலத்துறையின் கட்டணமில்லா தொலைபேசி எண்களை தொடர்பு கொள்ளுமாறு கேட்டுக்கொள்ளப்படுகிறது. அதன்படி இந்தியாவிற்குள் இருப்பவர்கள் 18003093793 என்ற எண்ணிலும், அயல்நாடுகளிலிருந்து தொடர்பு கொள்பவர்கள் 8069009901 என்ற எண்ணிலும், மிஸ்டு கால் கொடுப்பவர்கள் 8069009900 என்ற எண்ணையும் தொடர்புகொள்ளலாம்.

மேலும் சென்னையில் உள்ள குடிப்பெயர்வு பாதுகாப்பு அலுவலரின் (Protector of Emigrants. Chennai) உதவி எண் - 90421 49222 ஐ தொடர்பு கொள்ளலாம். தமிழ்நாட்டில் மத்திய அரசில் பதிவு பெறாமல் வெளிநாட்டு வேலைக்கு ஆட்களை அனுப்பும் முகவர்கள் மற்றும் முகமைகள் மீது காவல்துறை மூலம் கடுமையான சட்ட நடவடிக்கை மேற்கொள்ளப்படும் என தமிழ்நாடு அரசின் சார்பில் தெரிவித்துக்கொள்ளப்படுகிறது என அயலகத் தமிழர் நலத்துறை ஆணையர் பா.கிருஷ்ணமூர்த்தி தெரிவித்துள்ளார். 

Next Story

வாக்குப்பதிவு நாளில் ஊதியத்துடன் கூடிய விடுமுறை; மறுக்கப்பட்டால் புகார் தெரிவிக்கலாம்

Published on 17/04/2024 | Edited on 17/04/2024
Holiday with pay on polling day; Complaint can be filed if denied

நாடாளுமன்ற மக்களவைத் தேர்தல் ஏழு கட்டங்களாக நடைபெற உள்ளது. அதன்படி, முதற்கட்டமாக ஏப்ரல் 19 ஆம் தேதி தமிழகத்தில் வாக்குப்பதிவு நடைபெற இருக்கிறது. இதற்கான வாக்கு எண்ணிக்கை ஜூன் 4 ஆம் தேதி நடைபெறவுள்ளது.தேர்தல் தேதி அறிவிக்கப்பட்டதில் இருந்து தேர்தல் களம் அனல் பறக்க ஆரம்பித்து விட்டது. தமிழகத்தில் அரசியல் கட்சிகள் வேட்பாளர்களை அறிவித்து பிரச்சாரங்கள் சூடு பறக்க நடத்தினர்.

இன்று தேர்தல் பிரச்சாரத்திற்கான கடைசி நாள் என்பதால் அனைத்துக் கட்சிகளும் இறுதிக்கட்ட பிரச்சாரத்தில் இறங்கியது. திமுக சார்பில் மு.க.ஸ்டாலின்  பெசன்ட் நகரிலும், அதிமுக சார்பில் எடப்பாடி பழனிசாமி சேலத்திலும், நாம் தமிழர் கட்சியின் சீமான் சென்னயிலும், விசிகவின் தொல்.திருமாவளவன் சிதம்பரத்திலும், பாமகவின் அன்புமணி ராமதாஸ் தர்மபுரியில் இறுதிக்கட்ட பிரச்சாரம் செய்த நிலையில் தற்போது தமிழகம் மற்றும் புதுச்சேரியில் 2024 மக்களவைத் தேர்தலுக்கான அனல் பறந்த பிரச்சாரம் ஓய்ந்தது. நாளை மறுநாள் தமிழகம் மற்றும் புதுச்சேரியில் வாக்குப்பதிவு நடைபெற உள்ளது.

இந்நிலையில் ஈரோடு தொழிலக பாதுகாப்பு மற்றும் சுகாதார இணை இயக்குநர்கள் வெளியிட்டுள்ள செய்திக் குறிப்பில் கூறியிருப்பதாவது, 'தமிழ்நாட்டில் வரும் 19ஆம் தேதி பாராளுமன்ற பொதுத்தேர்தல் மற்றும் விளவங்கோடு சட்டமன்ற இடைத்தேர்தல் நடைபெற உள்ளது. எனவே தேர்தல் நாளன்று தொழிற்சாலைகள், செங்கல் சூளைகள், கட்டுமான பணியிடங்கள் மற்றும் அனைத்து பொதுத்துறை நிறுவனங்களில் பணிபுரியும் தினக்கூலி தொழிலாளர்கள், தற்காலிக தொழிலாளர்கள், ஒப்பந்த தொழிலாளர்கள் உள்ளிட்ட அனைத்து தொழிலாளர்களும் தங்கள் ஜனநாயக கடமையை நிறைவேற்றும் பொருட்டு தேர்தலில் வாக்களிக்க ஏதுவாக மக்கள் பிரதிநிதித்துவ சட்டப்படி ஒரு நாள் ஊதியத்துடன் கூடிய விடுப்பு வழங்கப்பட வேண்டும். மேலும் வெளிமாநில தொழிலாளர்களைப் பொறுத்தவரை அவரவர் சொந்த மாநிலங்களில் தேர்தல் நடக்கும் நாளன்று தேர்தலில் வாக்களிக்க ஏதுவாக அந்தந்த மாநிலங்களுக்கு முன்கூட்டியே செல்ல தொழிற்சாலை நிர்வாகம், செங்கல் சூளை நிர்வாகம் மற்றும் கட்டுமான நிறுவனங்களில் வேலை அளிப்பவர்கள் முழுமையான வாக்குப்பதிவை உறுதி செய்யும் வகையில் உரிய நடவடிக்கை மேற்கொள்ள வேண்டும். அவ்வாறு தேர்தல் நாளன்று ஊதியத்துடன் கூடிய விடுப்பு வழங்காத நிர்வாகங்கள் தொடர்பான புகார்களைத் தொழிலக பாதுகாப்பு மற்றும் சுகாதார இணை இயக்குநர், ஈரோடு வினோத்குமார் செல் - 9994380605, 0424 - 22195 21, மற்றும் தொழிலக பாதுகாப்பு மற்றும் சுகாதாரம் ஈரோடு இணை இயக்குநர் சிவகார்த்திகேயன் செல்- 9865072749, 0424-2211780 ஆகிய எண்களில் புகார் தெரிவிக்கலாம்' இவ்வாறு அதில் கூறப்பட்டுள்ளது.