Skip to main content

அதிமுக சரவணனின் மறுபக்கம்; எடப்பாடி டிக் அடித்ததின் பின்னணி என்ன?

Published on 02/04/2024 | Edited on 02/04/2024
  other side of AIADMK candidate Saravanan

தமிழகத்தில் மக்களவைத் தேர்தல் நெருங்கி வரும் நிலையில், அரசியல் கட்சிகள் வேட்பாளர்களை முன்னிறுத்தி தீவிரப் பரப்புரை செய்து வருகின்றனர். அந்த வகையில் மதுரை மக்களவைத் தொகுதியில் அதிமுக சார்பில் களம் இறக்கப்பட்ட வேட்பாளர் டாக்டர் சரவணன். இவர், மதுரையில் உள்ள பிரபலமான சரவணா மருத்துவமனை குழுமத்தின் தலைவராகவும், சூர்யா டிரஸ்ட்டின் நிறுவனராகவும் உள்ளார்.

இந்த முறை மதுரை மக்களவைத் தொகுதி தேர்தல் போட்டி சவால்கள் நிறைந்ததாக இருக்கும் என சொல்லப்படுகிறது. திமுக கூட்டணி சார்பில் சு.வெங்கடேசன் ஸ்டார் வேட்பாளராக நிறுத்தப்பட்டுள்ளார். அவருக்கு கடுமையான  போட்டியை ஏற்படுத்த வேண்டும் என இந்த முறை அதிமுக தலைமை டாக்டர் சரவணனுக்கு வாய்ப்பு அளித்துள்ளது. டாக்டர் சரவணன் மருத்துவப் படிப்பை முடித்த கையோடு 1996 ஆம் ஆண்டிலிருந்து சூர்யா டிரஸ்ட்டை நடத்தி வருகிறார். அதன் மூல பல ஏழை நோயாளிகளுக்கு இலவச மருத்துவம் செய்துவருகிறார். இதனால், மதுரை மாவட்ட மக்களிடம் நன்கு அறிந்த முகமாக டாக்டர் சரவணன் இருப்பதால் அதிமுக தலைமை அவருக்கு ‘சீட்’ வழங்க முன்னுரிமை அளித்ததாகச் சொல்லப்படுகிறது. டாக்டர் சரவணன் நடத்தி வரும் சூர்யா டிரஸ்ட்டின் நோக்கமே , ''பொருளாதார சூழ்நிலையால் எந்த நோயாளிக்கும் மருத்துவ சிகிச்சை கிடைக்காமல் போகக் கூடாது..'' என்பதாகும்.

தொண்டு நிறுவனம் நடத்தி வரும் அதிமுக மக்களவை வேட்பாளரும், டாக்டருமான சரவணன் 1992 ஆம் ஆண்டு முதல் தனது சொந்த மருத்துவமனையில் பொருளாதார ரீதியாக மிகவும் பின்தங்கிய நோயாளிகளுக்கு குறைந்த செலவிலும், சில சமயம் இலவசமாகவும் சிகிச்சை வழங்கி வருகிறார். தொடர்ந்து, 30 வருடமாக மருத்துவ சேவையை டாக்டர் சரவணன் வழங்கி வருகிறார். இதனிடையே, தொடர்ந்து கால்கள் இழந்த நோயாளிகளுக்கு செயற்கை கால்களை தனது தொண்டு நிறுவனம் மூலம் இலவசமாகப் பொருத்தி மதுரையில் மருத்துவ சேவையை கொடையாக செய்து வருகிறார்.

இந்த நிலையில்தான், வேட்பாளராக டாக்டர் சரவணன் களம் இறக்கப்பட்டுள்ளதாக அவரது ஆதரவாளர்கள் தகவல் தெரிவிக்கின்றனர். அவரின் சேவை குணம் வாக்கு வங்கியாக மாறும் என மதுரை மாவட்ட அதிமுகவினர் நம்பிக்கை  தெரிவிக்கின்றனர். மருத்துவத்துறையில் கொடிகட்டி பறந்து வரும் டாக்டர் சரவணன்.. மீண்டும் அதிமுகவின் கோட்டையாக மதுரையை மாற்றுவார் என அதிமுக தலைமை நம்பிக்கை வைத்துள்ளது.

எடப்பாடியை கவர்ந்த வேட்பாளரான டாக்டர் சரவணன், திரையுலகிலும் சில காலம் பயணித்தார். அகிலன் என்ற திரைப்படத்தை தயாரித்து தனது நடிப்பு திறமையும் வெளியுலகத்திற்கு காண்பித்தார். தொடர்ந்து, மருத்துவத்தில் செய்த மக்கள் சேவையை  அரசியலிலும் செய்ய நினைத்தார். அதன் காரணமாக மதிமுகவில் தொடங்கிய அவரது அரசியல் பயணம் இன்று அதிமுக வரை நீண்டுள்ளது. தொடர்ந்து, களத்தில் இறங்கி தீவிர வேலை செய்வதன் மூலம் கட்சித் தலைமையிடம் நற்பெயரைத் தொடர்ந்து பெற்று வந்தார்.

இந்த நிலையில், தான் மதுரை நாடாளுமன்றத் தொகுதி தேர்தலில் அதிமுக அணியின் வேட்பாளராக டாக்டர் சரவணன் களம் காண்கிறார். இந்த முறை அவரது வெற்றியை உறுதி செய்ய அவரது கட்சியினர் தீவிரமாக தேர்தல் வேலைகளை செய்து வருகின்றனர். களமும் இருமுனை போட்டியாக இருப்பதால் அதிமுக கட்சியினர் சூறாவளி பிரச்சாரத்தில் வேட்பாளர் டாக்டர் சரவணனை முன்னிறுத்தி ஈடுபட்டு வருகின்றனர். மதுரை டாக்டரின் மருத்துவ சேவை ஓட்டு வங்கியாக பிரதிபலிக்குமா? என்பதை ஜூன் 4 ஆம் தேதி தான் பதில் சொல்லும்.  

மதுரை மக்களவை அதிமுக வேட்பாளர் டாக்டர் சரவணன் அரசியல் கடந்து தொண்டு நிறுவனம் தொடங்கி மருத்துவ சேவையில் ஈடுபட்டு வருவது அப்பகுதி மக்களிடையே வரவேற்பை பெற்றுள்ளது. தொடர்ந்து, டாக்டர் சரவணனின் மருத்துவ சேவையை, அவரது ஆதரவாளர்கள் சமூக வலைத்தளங்கள் மூலம் மக்களிடையே கொண்டு சென்று தீவிர தேர்தல் பரப்புரையில் ஈடுபட்டு வருகின்றனர். அதிமுக பொதுச்செயலாளர் எடப்பாடியை கவர்ந்த வேட்பாளர் டாக்டர் சரவணன் என்பது குறிப்பிடத்தக்கது.

Next Story

''அதற்காக என்ன பாஜகவினரைச் சுட்டா வீழ்த்த முடியும்''-எடப்பாடி பழனிசாமி பேச்சு

Published on 13/04/2024 | Edited on 13/04/2024
 'Who will go missing will be known after June 4'-Edappadi Palaniswami speech

நாடாளுமன்ற மக்களவைத் தேர்தல் ஏழு கட்டங்களாக நடைபெற உள்ளது. அதன்படி, முதற்கட்டமாக ஏப்ரல் 19 ஆம் தேதி தமிழகத்தில் வாக்குப்பதிவு நடைபெற இருக்கிறது. இதற்கான வாக்கு எண்ணிக்கை ஜூன் 4 ஆம் தேதி நடைபெறவுள்ளது. ஏற்கெனவே அரசியல் கட்சிகள் தேர்தல் பணிகளில் தீவிரம் காட்டி வரும் நிலையில், தேர்தல் தேதி அறிவிக்கப்பட்டதால் தேர்தல் களம் அனல் பறக்க ஆரம்பித்து விட்டது. அதே சமயம் தமிழக அரசியல் கட்சிகள் வேட்பாளர்களை அறிவித்து பிரச்சாரங்களைத் தொடங்கியுள்ளன.

அரசியல் கட்சிகள் சார்பில் தேர்தல் பரப்புரைகள் தீவிரமாக நடைபெற்று வருகிறது. இந்நிலையில் அரியலூரில் நடைபெற்று வரும் பிரச்சாரக் கூட்டத்தில் சிதம்பரம் அதிமுக வேட்பாளர் சந்திரகாசனை ஆதரித்து எடப்பாடி பழனிசாமி பிரச்சாரம் மேற்கொண்டார். இந்தக் கூட்டத்தில் அவர் பேசுகையில், ''எங்களை மிரட்டி பார்க்கும் வேலையெல்லாம் வேண்டாம். அதிமுக என்ற கட்சி அதிக தொண்டர்களைக் கொண்டது. அதிமுகவை அழிக்க நினைத்தவர்கள் தான் அழிந்து போய் உள்ளனர். எங்களைச் சீண்டி பார்க்காதீர்கள். அப்படி பார்த்தால் எப்படி இருக்கும் என அதிமுக தொண்டர்கள் காட்டுவார்கள்.

வெயில் காலத்தில் உஷ்ணம் அதிகமாகி விட்டதால் சிலர் எதை எதையோ உளறிக் கொண்டிருக்கிறார்கள். பூச்சாண்டிகளுக்கு எல்லாம் அதிமுக என்றைக்கும் பயப்படாது. அதிமுகவை அழிக்க நினைத்த சிலர் தற்போது பழத்தை தூக்கிக் கொண்டு அலைகின்றனர்.  உண்மையில் யார் காணாமல் போவார்கள் என்பது ஜூன் 4-ஆம் தேதிக்குப் பிறகு தெரியவரும். அண்மையில் பார்த்தால் திமுக அயலக அணி துணை அமைப்பாளர் என்ற திமுக நிர்வாகி இரண்டு ஆண்டு காலமாக வெளிநாட்டுக்கு போதைப் பொருளை கடத்தி கொண்டிருக்கிறார். நீங்களே பாருங்கள்'' என முதல்வருடன் ஜாபர் சாதிக் எடுத்த புகைப்படத்தைக் காட்டினார். பின்னர் உதயநிதி ஸ்டாலின் உடன் ஜாபர் சாதிக் இருக்கும் புகைப்படத்தையும் காட்டினார்.

பின்னர் மீண்டும் பேச தொடங்கிய எடப்பாடி, ''முதலமைச்சரோடு நெருக்கமாக போட்டோ எடுத்துள்ளார். பின்னர் விளையாட்டுதுறை அமைச்சருடன் நெருக்கமாக போட்டோ எடுத்துள்ளார். போட்டோ எடுத்துக் கொள்ளட்டும் வேண்டாம் என்று சொல்லவில்லை. நான் வரும்போது கூட நிறைய போட்டோ எடுத்தாங்க. ஆனால் அவருடைய கட்சி நிர்வாகி, பொறுப்பில் உள்ள நிர்வாகி போட்டோ எடுத்துள்ளார். தனிப்பட்ட முறையில் புகைப்படம் எடுத்துள்ளார்கள். இதுதான் சந்தேகத்தை ஏற்படுத்தியுள்ளது. போதைப்பொருள் கடத்திய ஆசாமிக்கும் இவர்களுக்கும் என்ன தொடர்பு என மக்கள் கேட்கிறார்கள். மக்களுக்கு பதில் சொல்ல வேண்டிய கடமை முதல்வருக்கும் விளையாட்டுதுறை அமைச்சருக்கும் இருக்கிறது.

ஆறு மாதத்திற்கு முன்பு திமுகவின் பொதுக்குழு கூட்டம் நடைபெற்றது. அதில் பேசிய முதல்வர் ஸ்டாலின் 'நான் இரவில் படுத்து தூங்கி காலையில் கண்விழித்து பார்க்கும் பொழுது என்னுடைய கட்சிக்காரர்களால் என்ன பிரச்சனை வந்து விடுமோ என்ற அச்சத்தில் கண் விழிக்கிறேன்' என்கிறார். இதை நான் சொல்லவில்லை திமுக தலைவர் சொல்கிறார். அப்படி என்றால் அந்தக் கட்சியினர் எப்படி அராஜகத்தில் ஈடுபடுகிறார்கள் என்பதை அவரே சொல்லிவிட்டார். நாம் சொன்னால் கூட வேண்டுமென்று எதிர்க்கட்சி குற்றம் சுமத்துகிறார்கள் என்று சொல்வார்கள். ஆனால் திமுக தலைவரே அவருடைய கட்சிக்காரர்களைப் பற்றி நன்கு தெரிந்து வைத்துள்ளார். மக்களுக்கு எதிரான திட்டங்களை பாஜக கொண்டுவந்தால் அதை எதிர்க்கும் திறன் அதிமுகவிற்கே உள்ளது. ஆனால் அதேநேரம் நல்ல திட்டங்களைக் கொண்டு வந்தால் பாராட்டவும் செய்வோம். எதிர்க்கும் போது எதிர்ப்போம்; பாராட்டும் போது பாராட்டுவோம் என்பதே அதிமுகவின் ஸ்டைல். கூட்டணியை நம்பி அதிமுக தேர்தலைச் சந்திக்கவில்லை. மக்களை நம்பியே இந்தத் தேர்தலைச் சந்திக்கிறோம். கூட்டணியிலிருந்த வரை பாஜகவிற்கு விசுவாசமாக இருந்தோம். தற்பொழுது விலகி விட்டோம். பாஜகவை எதிர்க்கவில்லை என்கின்றனர், அதற்காக என்ன பாஜகவினரைச் சுட்டா வீழ்த்த முடியும்'' என்றார்.

 

Next Story

கணவன் முகமூடியுடன் களத்தில் இறங்கிய மனைவி

Published on 13/04/2024 | Edited on 13/04/2024
The wife entered the field with her husband masked

நாடாளுமன்ற மக்களவைத் தேர்தல் ஏழு கட்டங்களாக நடைபெற உள்ளது. அதன்படி, முதற்கட்டமாக ஏப்ரல் 19 ஆம் தேதி தமிழகத்தில் வாக்குப்பதிவு நடைபெற இருக்கிறது. இதற்கான வாக்கு எண்ணிக்கை ஜூன் 4 ஆம் தேதி நடைபெறவுள்ளது. ஏற்கெனவே அரசியல் கட்சிகள் தேர்தல் பணிகளில் தீவிரம் காட்டி வரும் நிலையில், தேர்தல் தேதி அறிவிக்கப்பட்டதால் தேர்தல் களம் அனல் பறக்க ஆரம்பித்து விட்டது. அதே சமயம் தமிழக அரசியல் கட்சிகள் வேட்பாளர்களை அறிவித்து பிரச்சாரங்களைத் தொடங்கியுள்ளன.

இந்த நிலையில் புதுச்சேரியில் அதிமுக சார்பில் போட்டியிடும் தமிழ்வேந்தன் மனைவி, அதிமுக கட்சியினருடன் சேர்ந்து பரப்புரையில் ஈடுபட்டார். அப்போது அவருடைய கணவர் தமிழ்வேந்தனின் முகமூடியை அணிந்தபடி அந்தப் பகுதியில் உள்ள கடைகளில் வாக்கு சேகரிப்பில் ஈடுபட்டார். அதன் பிறகு செய்தியாளர்களைச் சந்தித்த அவர் பேசுகையில், ''அதிமுகவில் ஒரு புதிய வாய்ப்புக் கொடுத்துள்ளார்கள். ஒரு இளைஞருக்கு வேட்பாளராக வாய்ப்பு கொடுத்துள்ளார்கள். அவருக்கு 34 வயது தான் ஆகிறது. அவர் என்னுடைய கணவர் என்பதை விடவும், இளைஞர் ஒருத்தர் தேர்தலில் நிற்கிறார் என்பதே முக்கியம்.
 

அவங்களோட வாக்குறுதிகள் இன்னும் எல்லாருக்கும் போய் ரீச் ஆக வேண்டும் என்பதற்காக நான் வந்திருக்கிறேன். போதைப்பொருளை ஒழிப்பதும், கல்வியை அனைவருக்கும் சமமாக்குவது என்பதுதான் அவருடைய இலக்காக இருக்கிறது. அவருக்கு சப்போர்ட்டாக இங்கு நான் வந்து இருக்கேன். மக்களுக்கு நல்லாவே தெரியும் ஆட்சியில் இருக்கின்ற பாஜகவாக இருக்கட்டும் எதிர்க்கட்சியாக இருக்கட்டும் அவர்களுக்கு நிறைய வாய்ப்புகள் இருக்கு. அவர்களுக்கு எதுக்கு இன்னொரு வாய்ப்பு. ஆட்சிக்கு வரும்போது செய்ய வேண்டும் என்று நினைத்திருந்தால் அவர்கள் செய்திருப்பார்கள். ஆனால் எதுவும் செய்யவில்லை. அதனால் தான் ஆட்சிக்கு வந்தால் இதை செய்வோம் அதை செய்வோம் என்று சொல்கிறார்கள். ஜெயலலிதா வழியில் எடப்பாடி பழனிசாமியாக இருக்கட்டும் அன்பழகனாக இருக்கட்டும் அவர்கள் ஒரு நல்ல வாய்ப்பை எனது கணவருக்கு கொடுத்துள்ளார்கள்''என்றார்.