Skip to main content

"கமல், ஒருத்தரை பார்த்த உடனே ரெண்டு விஷயத்தை கண்டுபிடிச்சுருவார்!" -முரளி அப்பாஸ் சிறப்பு பேட்டி

Published on 07/11/2020 | Edited on 07/11/2020
Murali Abbas

 

 

முரளி அப்பாஸ்... கமல்ஹாசனால் தொடங்கப்பட்ட மக்கள் நீதி மய்யத்தின் குரலாக தொடர்ந்து ஒலித்துக்கொண்டிருப்பவர். கமல் மனதில் நினைப்பதை செய்தியாக்குபவர். தனது சினிமா இயக்குனர் அடையாளத்தை விடுத்து, மக்கள் நீதி மய்யத்தின் தொண்டராக பங்காற்றி வருபவர். கமல்ஹாசனின் பிறந்த நாளை முன்னிட்டு பரபரப்பாக இருந்த மக்கள் நீதி மய்யத்தின் செய்தித் தொடர்பாளர் முரளி அப்பாஸை அழைத்து சிறிது நேரம் பேசினோம்.  

 

கமல்ஹாசனை நடிகராக சந்தித்தீர்களா? கட்சி தலைவராக சந்தித்தீர்களா? முதல் சந்திப்பு எப்போது?

 

1983ல் சினிமா ஆசையில் சென்னைக்கு வந்த நான், அசிஸ்டெண்ட் டைரக்டர், டைரக்டராக இருந்திருக்கிறேன். 2018 வரையில் கமல்ஹாசனை சந்தித்ததில்லை. நான் ஒரு சினிமா இயக்குநர் என்ற முறையில் தொலைக்காட்சி விவாதங்களில் கலந்து கொள்வது வழக்கம். பெரும்பாலும் நான் பங்கேற்கும் விவாதம் அரசியல் சார்ந்தவையாக சென்றது. நடிகர்கள் அரசியலுக்கு வரலாமா என்ற விவாதத்தில் வரலாம் என்று பேச ஆரம்பித்தேன். அதனுடைய நீட்சியாக ம.நீ.ம. கட்சியில் இணைந்தேன்.

 

ம.நீ.ம. கட்சி 21.பிப்.2018ல் தொடங்கப்பட்டது. பிப்ரவரி 15ஆம் தேதி கமலை சந்தித்து இந்த கட்சியில் இணைந்தேன். ஆறு நாட்களுக்கு முன்பு அவரை சந்தித்து கட்சியில் இணைந்தேன். ஏறத்தாழ 30 ஆண்டுகள் சினிமாவில் இருந்தும் அவரை நான் பார்த்தது இல்லை. ஒரு பொதுநிகழ்ச்சியில் கூட நான் பார்த்தது இல்லை. நான் முதல் முதலில் பார்த்தது 15.பிப்.2018ல்தான். எங்கள் தலைவருடன் சேர்ந்து பயணிக்கத்தான் சென்னைக்கே வந்தேன் என்று இப்பத்தான் தெரிகிறது.

 

கமலுடனான உங்கள் மனதுக்கு நெருக்கமான தருணம் என்று எதை சொல்வீர்கள்?

 

தொலைக்காட்சி விவாதங்களில் பங்கேற்பதால் அதனை தொடர்ந்து கமல் கவனிப்பார். அரசியலில் தெளிவு இருக்கிறது என்பதால் என்னை செய்தித் தொடர்பாளராக நியமித்தார். செய்தித் தொடர்பாளர் என்பது கட்சியின் குரல் போன்றது. அதனால் தலைவரின் கொள்கையை கவனமாக கையாள வேண்டிய மிகப்பெரிய பொறுப்பு உள்ளது. அத்தகைய பொறுப்பை உடனே கொடுத்தது என் மீது அவர் வைத்துள்ள நம்பிக்கையை புரிந்து கொண்டேன். அவர் ஏதாவது செய்தி சொல்லிவிட்டு, அதைப் பற்றிய விவாதம் வந்தால் அதை இப்படி சொல்லுங்கள் என்று என்னிடம் இதுவரை சொன்னதே இல்லை. நானும் கேட்டுக்கொண்டதும் இல்லை. அவர் சொன்னதை புரிந்துகொண்டு விவாதங்களில் பங்கேற்பேன்.

 

தினமும் விவாதங்களுக்கு போறீங்களே? உங்க தலைவர் உங்களை பாராட்டுவாரா? என என் மனைவி என்னிடம் ஒரு முறை கேட்டார். பாராட்டியதில்லை. ஆனால் ஏதாவது தவறாக பேசியிருந்தால் ஐந்து நிமிடத்தில் கூப்பிட்டிருப்பார். இதை தவிர்த்திருக்கலாம், அப்படி சொல்லியிருக்கலாம் என்று மற்றவர்களுக்கு சொல்லியதை கேட்டிருக்கிறேன். ஆனால் இந்த இரண்டரை வருடத்தில் என்னை அப்படி கூப்பிட்டு சொன்னதில்லை. இதைவிட பெரிய பாராட்டு இல்லை. பிப்ரவரியில் கட்சி தொடங்கப்பட்டது, செப்டம்பரில் இந்த பதவியை எனக்கு கொடுத்தார். மிகச்சிறந்த தேர்வாளர் கமல். 40 வருடத்தில் சினிமாத்துறையில் பல அனுபவங்களை பெற்றவர். ஒரு மனிதரை சீக்கிரம் எடை போட்டுவிடுவார். அவரது பார்வையில் இரண்டு விசயங்களை பிடித்துவிடுவார். ஒன்று திறமை. இன்னொன்று நேர்மை. திறமை கம்மியாக இருந்தால் கூட அதனை தயார் செய்வார். ஆனால் நேர்மை கம்மியாக இருந்தால் அவரிடம் ஒட்ட முடியாது. ரொம்ப கவனமாக இருக்க வேண்டும்.

 

இப்போது உள்ள அரசியல் சூழலில் எந்த நம்பிக்கையில் அவருடன் பயணிக்கிறீர்கள்?

 

நம்பிக்கை எது சார்ந்தது என்பதை பார்க்க வேண்டும். என்னைப் பொறுத்தவரையில் நான் சினிமாத்துறையில் நுழைந்ததில் இருந்து அரசியலை கவனித்து வருகிறேன். அசிஸ்டெண்ட் டைரக்டராக இருந்தபோது அரசியல் பேசிக்கொண்டிருப்பேன். அந்த அரசியல் இன்று பயன்படுகிறது. நான் பேசிய அரசியலை பார்த்த எனது நண்பர்கள், இதைத் தவிர வேறு அரசியல் கட்சிக்கு நான் போயிருந்தால் நிச்சயமாக என்னை கேலி செய்திருப்பார்கள், சிரித்திருப்பார்கள். இங்க வந்ததால்தான் என்னை கௌரவமாக பார்த்தார்கள்.

 

நான் எனது கட்சியை விரும்புகிறேன். விரும்புவதற்கு காரணம், ஐம்பது ஆண்டு அரசியலில் இருந்து வேறொரு அரசியல் தமிழ்நாட்டுக்கு வரவேண்டுமென்றால் ஒரே கதவு கமல்தான். 67க்குப் பிறகு திமுக அரசியலை மாற்றியது. தற்போது தமிழகம் மீண்டும் மாற வேண்டிய கட்டாயத்திற்கு வந்துவிட்டது. ஏனென்றால் அது மிகப்பெரிய பழையதாகப் போய்விட்டது.

 

அரசியல் மாற்றம் புதுப்பிக்கப்பட வேண்டும். அதற்கு கமல்தான் வரவேண்டும். வருவாரா வரமாட்டாரா என்ற கேள்வியை நான் பார்ப்பது இல்லை. வரவைக்கணும், வந்தாகணும். எவ்வளவு சாதகமான அம்சங்கள் இருக்கிறது, பாதகமான அம்சங்கள் இருக்கிறது என்று எங்களுக்கு தெரியும். பாதகமான அம்சங்களை பார்த்து நாங்கள் தளரவில்லை. அதனை உடைக்க முடியும் என்ற நம்பிக்கை உள்ளது. எங்கள் தலைவர் சொல்லுவார் 'என்னுடைய மிச்ச காலம் மக்களுக்காக' என்று. நான் தெளிவாக சொல்கிறேன், என்னுடைய மிச்ச காலம் அவருக்காக பிரச்சாரம் செய்வதுதான். நான் என்னுடைய அனுபவத்தில் இவ்வளவு நேர்மையான மனிதரை சந்தித்தது இல்லை. தைரியமான மனிதரை பார்த்திருக்கலாம், திறமையான மனிதரை பார்த்திருக்கலாம். இந்த மூன்றையும் ஒன்றாக நான் அவரிடம் பார்க்கிறேன்.

 

இந்த நேர்மை நம்ம அரசியலுக்கு தேவைப்படுகிறது. இந்த திறமை தமிழ்நாட்டுக்கு தேவைப்படுகிறது. இந்த தைரியம் இன்று ரொம்ப அவசியமாக தேவைப்படுகிறது. பிராந்திய மாநிலத்தில் இருந்து சென்ட்ரலில் மோதி காரியம் சாதிக்க வேண்டுமென்றால் தைரியம் தேவைப்படுகிறது. பயன்படுத்திக்கொண்டால் தமிழ்நாட்டுக்கு அதிர்ஷ்டம். பயன்படுத்தாமல் விட்டால் துரதிருஷ்டம். இந்த கட்சியை அடுத்த கட்டத்திற்கு எடுத்து செல்வதே எங்களது நோக்கம். அதனைத் தவிர வேறு எதுவும் நாங்கள் சிந்திக்கவில்லை.

 

 

 

Next Story

“கமல்ஹாசனின் நடிப்பை அதிகளவில் பார்க்க முடியும்” - இந்தியன் 2 குறித்து ஷங்கர்

Published on 25/06/2024 | Edited on 25/06/2024
Shankar on Indian 2 to praise kamalhaasan

கமல் - ஷங்கர் கூட்டணியில் நீண்ட காலமாக உருவாகி வரும் படம் இந்தியன் 2. இப்படம் இந்தியன் 3 ஆகவும் இரண்டு பாகங்களாக வெளியாகவுள்ளது. லைகா நிறுவனம் தயாரிக்கும் இப்படத்தில் காஜல் அகர்வால், சித்தார்த், ரகுல் ப்ரீத் சிங், எஸ்.ஜே.சூர்யா, பாபி சிம்ஹா, பிரியா பவானி சங்கர், பிரம்மானந்தம், சமுத்திரக்கனி உள்ளிட்ட பலர் நடித்துள்ளனர். அனிருத் இசையமைக்கும் இப்படத்தின் முன்னோட்ட வீடியோ ஒன்று கடந்த ஆண்டு நவம்பரில் வெளியானது. இந்தியன் 2 திரைப்படம் ஜூலை 12ஆம் தேதி வெளியாகவுள்ளது. இதையொட்டி படத்தின் இசை வெளியிட்டு விழா, கடந்த ஜூன் 1ஆம் தேதி சென்னை உள் விளையாட்டு அரங்கத்தில் நடைபெற்றது. 

இந்த நிலையில், இந்தியன் 2 படத்தின் டிரைலர் இன்று மாலை 7 மணிக்கு வெளியாக இருக்கிறது. இது தொடர்பாக இன்று சென்னையில் பத்திரிகையாளர் சந்திப்பு நடைபெற்றது. அதில், இந்தியன் 2 படத்தின் படக்குழு கலந்து கொண்டது. அதில் பேசிய இயக்குநர் ஷங்கர், “இன்றைய காலக்கட்டத்தில் இந்தியன் தாத்தா வந்தால் எப்படி இருக்கும் என்பது தான் இந்தியன் 2. முதல் பாகமாக இந்தியன் படம் தமிழ்நாட்டை மையமாக வைத்து எடுக்கப்பட்டது. இந்தியன் 2 தமிழ்நாட்டை தாண்டி மற்ற மாநிலங்களில் நடக்கும் சம்பவங்களின் அடிப்படையாக எடுக்கப்பட்டுள்ளது. 

முதல் பாகத்தில், 40 நாட்கள் சிறப்பு மேக்கப் (பிராஸ்தெட்டிக் மேக்கப்) போட்டு கமல் நடித்திருந்தார். ஆனால், இந்த படத்தில், சுமார் 70 நாட்கள் சிறப்பு மேக்கப் போட்டு கமல் நடித்திருக்கிறார். ஒவ்வொரு நாள் படப்பிடிப்பின் இறுதி நேரம் வரை கமல்ஹாசன் மிகவும் அர்ப்பணிப்போடு நடித்தார். முதல் பாகத்தில் இந்தியன் தாத்தாவின் மேக்கப் கமல்ஹாசனின் நடிப்பை முழுமையாக பார்க்க விடாமல் செய்தது. ஆனால், இந்த படத்தில், கமல்ஹாசனின் நடிப்பை முதல் பாகத்தில் இருந்ததை விட அதிகளவில் பார்க்க முடியும்” என்று கூறினார். 

Next Story

உலகம் முழுவதும் வெளியாகும் ‘குணா’; ரீ - ரிலிஸ் தேதி அறிவிப்பு

Published on 13/06/2024 | Edited on 13/06/2024
Kamal Haasan  Guna movie worldwide re-release date announced

சந்தான பாரதி இயக்கத்தில் 1991 ஆம் ஆண்டு தீபாவளி அன்று வெளிவந்த படம் குணா. சுவாதி சித்ரா இண்டர்நேஷனல் தயாரிப்பில் உருவான இப்படத்தை ராஜ்கமல் பிலிம்ஸ் இண்டர்நேஷனல் உலகம் முழுவதும் வெளியிட்டது. 33 வருடங்கள் கடந்த பின்னரும் கமல்ஹாசன் ரசிகர்கள் மட்டுமின்றி தலைமுறை கடந்து இன்றைய இளம் தலைமுறை குணா படத்தையும், அதில் இடம்பெற்றுள்ள வசனங்களையும், பாடல்களையும் நினைவூட்டி கொண்டாடி வருகின்றனர். இந்த வருடம் தொடக்கத்தில் மலையாள படமான மஞ்சு மெல் பாய்ஸ் திரைப்படம் தமிழ்நாட்டில் நகரம் முதல் குக்கிராமத்தில் உள்ள திரையரங்குகள் வரை திரையிடப்பட்டு வசூலை வாரிக்குவித்தது. 

மலையாள திரைப்படங்களில் 200 கோடி ரூபாய் மொத்த வசூலை கடந்த முதல் மலையாள திரைப்படம் என்கிற சாதனையை நிகழ்த்த அடிப்படை காரணிகளில் ஒன்றாக இருந்தது குணா திரைப்படத்தில் இடம்பெற்ற வசனம், பாடல்களை இப்படத்தில் பயன்படுத்தியதே. குணா திரைப்படம் வெளியானபோது கூட திரையரங்குகளில் குணா படத்தில் இடம்பெற்ற வசனங்கள், பாடல்களுக்கு இந்தளவு வரவேற்பு கிடைக்கவில்லை. இன்றைய தலைமுறை மஞ்சு மெல் பாய்ஸ் படத்தில் அதனை திரையரங்குகளில் ஆரவாரத்துடன் கொண்டாடியதைப் பார்த்து என் உடம்பு புல்லரித்து போனது என்றார் குணாபடத்தை இயக்கிய சந்தானபாரதி. 

இளையராஜா இசையமைப்பில், பாலகுமாரன் வசனத்தில், வேணு ஒளிப்பதிவில் தயாரிக்கப்பட்ட குணா படத்தில் கமல்ஹாசன்,  ரோஷினி, ரேகா,ஜனகராஜ், அஜய்ரத்தினம், எஸ். வரலட்சுமி ,கிரீஷ் கர்னாட் , எஸ். பி. பாலசுப்பிரமணியம், சரத் சக்சேனா, காகா ராதாகிருஷ்ணன், பிரதீப் சக்தி, அனந்து ஆகியோர் நடித்துள்ளனர். வாலி எழுதிய பாடல்களை, கமல்ஹாசன், எஸ்.ஜானகி, இளையராஜா, யேசுதாஸ், ஆகியோர் பாடியுள்ளனர். 

1991 ஆம் ஆண்டு வெளியான நேரடி தமிழ் திரைப்படங்களில் தமிழ்நாடு அரசு வழங்கியசிறந்த திரைப்படத்திற்கான மூன்றாவது பரிசை குணா வென்றது குறிப்பிடத்தக்கது. கமல்ஹாசன் திரையுலக வாழ்க்கையிலும், தமிழ் சினிமா வரலாற்றில் தவிர்க்க முடியாத திரைப்படமாக இருந்து வரும் குணா திரைப்படம் டிஜிட்டல் வடிவத்தில், மெருகூட்டப்பட்டு கமல்ஹாசனின் ரசிகர்களின் நீண்ட நாள் விருப்பத்தை நிறைவேற்றும் வகையில் சூன் 21 ஆம் தேதி உலகம் முழுவதும் மறுவெளியீடு செய்யப்படுகிறது. தமிழ் திரைப்பட ஆடியோ உலகில் ஐம்பது ஆண்டுகளுக்கும் மேலாக முண்ணணி நிறுவனமாக, திகழ்ந்து வந்த பிரமிட் ஆடியோ குரூப் குணா படத்தை உலகம் முழுவதும் வெளியிட உள்ளது.