Skip to main content

திருடச் சென்ற வீட்டில் திருமண பத்திரிகையைப் பார்த்ததும் பாதி நகையை அங்கேயே வைத்துவிட்டு... பலே திருடர்களின் திடுக்கிட வைக்கும் தகவல்கள்...

Published on 17/06/2020 | Edited on 17/06/2020

 

salem police

 

பூட்டிய வீடுகளை நோட்டமிட்டு தொடர்ந்து கைவரிசை காட்டி வந்த திருடர்களை காவல்துறையினர் கைது செய்துள்ளனர். விசாரணையில், அவர்கள் திருட்டு நகைகளை உருக்கி வில்லைகளாக மாற்றி விற்பனை செய்து வந்திருப்பது தெரிய வந்துள்ளது.


சேலம் சீலநாயக்கன்பட்டி காஞ்சி நகரைச் சேர்ந்தவர் மோகன். கடந்த ஜனவரி 3ஆம் தேதி, குடும்பத்துடன் வெளியூர் சென்றிருந்தார். மர்ம நபர்கள் அவருடைய வீட்டின் பூட்டை உடைத்து 31.5 பவுன் நகைகள், 85 ஆயிரம் ரூபாய் ரொக்கம் ஆகியவற்றைத் திருடிச் சென்றனர். அன்னதானப்பட்டி காவல்துறையினர் இந்த வழக்கை விசாரித்து வந்தனர். 


அதேபோல், சேலம் பொன்னம்மாபேட்டையில் வசிக்கும் சேலம் மாநகராட்சி செயற்பொறியாளர் அசோகன் வீட்டிலும் மர்ம நபர்கள், கடந்த ஜனவரி 11ஆம் தேதி, பூட்டை உடைத்து 35 பவுன் நகைகள், 1.30 லட்சம் ரூபாய் ரொக்கம் ஆகியவற்றைத் திருடிச் சென்றனர். சம்பவத்தன்று அவருடைய வீட்டில் புகுந்த மர்ம நபர்கள், அனைத்து பீரோக்களையும் திறந்து பார்த்துள்ளனர். நகை, பணத்தைத் திருடிய அவர்கள், அங்கேயே சமைத்துச் சாப்பிட்டுவிட்டும் சென்றிருந்தனர்.


நரசோதிப்பட்டியில் வசித்து வரும் அரசு மருத்துவர் வெங்கடேசன் வீட்டில் கடந்த பிப். 5ஆம் தேதி இரவு, 4 பவுன் நகைகள், வெள்ளி பொருள்கள், 7,500 ரூபாய் ரொக்கம் ஆகியவை களவு போயின. அதே இரவில், சூரமங்கலம் முல்லை நகரில் ரயில்வே ஊழியர் பசுபதி வீட்டிலும் மர்ம நபர்கள் 44 பவுன் நகைகள், வெள்ளி பொருள்களைத் திருடிச் சென்றிருப்பதும் தெரிய வந்தது.


இந்த நான்கு சம்பவங்களின் செயல்முறைகளும் (Modus Operandi) ஒரே தன்மையிலானதாக இருந்தது. இந்த இடங்களில் எல்லாமே, இரும்புக் கம்பியால் பூட்டை நெம்பி திறக்கப்பட்டு உள்ளது. இதனால், ஒரே கும்பல்தான் மேற்கண்ட நான்கு திருட்டுச் சம்பவங்களிலும் ஈடுபட்டிருக்க வேண்டும் என்று காவல்துறையினர் சந்தேகம் அடைந்தனர். 


சிசிடிவி கேமராக்களில் பதிவாகி இருந்த காட்சிகளும் அதையே உறுதிப்படுத்தின. என்றாலும், காவல்துறை வசமிருந்த பழைய குற்றவாளிகளின் படங்களுடன் ஒப்பிட்டுப் பார்த்தபோது, கேமராக்களில் பதிவாகியிருந்த முகங்கள் யாருடனும் ஒத்துப்போகவில்லை. இதனால் புதிய திருட்டுக் கும்பல்தான் சேலத்தில் ஊடுருவியிருக்க வேண்டும் என்ற முடிவுக்கு வந்தது காவல்துறை. 


இந்த நிலையில்தான், நீண்ட காலமாகக் கண்டுபிடிக்க முடியாத திருட்டு வழக்குகளை விரைந்து முடிப்பதற்காக சேலம் மாநகர காவல்துறை ஆணையர் செந்தில்குமார் தனிப்படை அமைத்து உத்தரவிட்டார். குற்றப்பிரிவு துணை ஆணையர் செந்தில் மேற்பார்வையில், உதவி ஆணையர் பூபதிராஜன் தலைமையில் தனிப்படை அமைக்கப்பட்டது.


ஒருபுறம் கரோனா நோய்த்தொற்று தடுப்புப்பணிகளில் ஈடுபட்டாலும்கூட, மற்றொரு புறம் மேற்கண்ட சம்பவங்களில் திருடர்களைப் பிடிப்பதிலும் கவனம் செலுத்தினர், தனிப்படையினர். 


கடந்த பிப். 5ஆம் தேதிக்குப் பிறகு சேலம் மாநகரம் மற்றும் மாவட்டப் பகுதிகளில் இதேபோன்ற பின்னணியிலான திருட்டுச் சம்பவங்கள் நடக்கவில்லை. அதனால் திருட்டுக் கும்பல் வேறு மாவட்டத்திற்கு முகாமை மாற்றி இருக்கலாம் எனக் கருதினர். இதையடுத்து தங்களிடம் இருந்த சிசிடிவி ஃபுட்டேஜ் காட்சிகளுடன் மற்ற மாவட்டக் காவல்துறையில் விசாரித்தபோது, அவர்களுக்கு முக்கியத் தகவல் கிடைத்தது.
 

muthuraj


சிசிடிவி காட்சிகளின் அடிப்படையில், தஞ்சாவூர் மாவட்டம் பூண்டி அருகே உள்ள விஸ்னம் பேட்டையைச் சேர்ந்த செல்வராஜ் மகன் முத்துராஜ் (32) என்பவருக்குத் தொடர்பு இருப்பதை உறுதிப்படுத்தினர். அவரைத் தேடி வந்த நிலையில், கடந்த பிப்ரவரி மாதமே முத்துராஜை ஈரோடு மாவட்ட காவல்துறையினர் அங்கு நடந்த ஒரு திருட்டு வழக்கில் கைது செய்து, கோவை மத்தியச் சிறையில் அடைத்திருப்பதுத் தெரிய வந்தது. அவர் மீது மட்டும் பல மாவட்டங்களில் 60க்கும் மேற்பட்ட திருட்டு வழக்குகள் இருப்பதும் காவல்துறைக்குச் சற்று அதிர்ச்சியாகத்தான் இருந்தது. 


முத்துராஜின் கூட்டாளிகளான ராமநாதபுரம் மாவட்டம் திருப்புலானியைச் சேர்ந்த முத்துராமலிங்கம் மகன் அன்பு மணிகண்டன் (20), மண்டபம் வாலந்தராவியைச் சேர்ந்த மலைக்கண்ணன் மகன் மகேந்திரன் (28) ஆகியோரும் முத்துராஜூவுடன் கைது செய்யப்பட்டு, கோவை மத்தியச் சிறையில் அடைக்கப்பட்டு இருந்தனர்.  


அவர்கள் கோவை மத்தியச் சிறையில் இருந்து பிணையில் வெளியே வந்து, சேலம் பகுதிகளில் மீண்டும் கைவரிசை காட்ட சுற்றிக் கொண்டிருப்பது தெரிய வந்தது. இதையடுத்து அவர்கள் இருவரையும் ஜூன் 1ஆம் தேதி, சேலம் மாநகர தனிப்படை காவல்துறையினர் கைது செய்தனர். விசாரணையில், சேலத்தில் நடந்த மேற்குறிப்பிட்ட நான்கு திருட்டுச் சம்பவங்களிலும் தொடர்பு இருப்பதை ஒப்புக்கொண்டனர். 


இதையடுத்து, அவர்களை நீதிமன்றக் காவலில் சேலம் மத்திய சிறையில் அடைத்தனர். அவர்கள் அளித்த வாக்குமூலத்தின் அடிப்படையில், சூரமங்கலம் காவல் ஆய்வாளர் செந்தில், கோவை சிறையில் அடைக்கப்பட்டுள்ள முத்துராஜை காவலில் எடுத்து விசாரித்தனர். அவரும், சேலத்தில் தனது தலைமையில் நடந்த திருட்டுக் குற்றங்களை ஒப்புக்கொண்டார்.


விசாரணையில், பல திடுக்கிடும் தகவல்கள் கிடைத்தன. சேலம் மாநகரில் நடந்த நான்கு திருட்டுக் குற்றங்களிலும் முத்துராஜூவும், அன்பு மணிகண்டனுமே நேரடியாக ஈடுபட்டுள்ளனர். எப்பேர்பட்ட பூட்டுகளையும் கம்பியால் நெம்பி திறப்பதில் முத்துராஜ் கைதேர்ந்தவர். இந்தச் சம்பவங்களில் அன்பு மணிகண்டனை வீட்டுக்கு வெளியே காவலுக்கு மட்டுமே பயன்படுத்தி வந்திருக்கிறார் முத்துராஜ். 

 

anbumanikandan


சேலம் முல்லைநகரில் பசுபதி வீட்டில் கைவரிசை காட்டிவிட்டு வெளியேறும் காட்சிகள் அப்பகுதியில் பொருத்தப்பட்டிருந்த சிசிடிவி கேமராவில் பதிவாகி இருந்தது. அந்தக் காட்சிகள்தான் முத்துராஜை அடையாளம் காட்ட பேருதவியாக இருந்திருக்கிறது. திருட்டு நடந்தபோது, பசுபதியின் மகளுக்கு அடுத்த பத்து நாளில் திருமணம் நடக்க இருந்த நேரம். வீட்டுக்குள் நுழைந்த முத்துராஜ், திருமண பத்திரிகையைப் பார்த்ததும், திருடிய நகைகளில் பாதியை அங்கேயே வைத்துவிட்டு வந்துவிடலாம் என்றும் யோசித்தாராம். ஆனாலும் இதுவரை கண்களில் பட்ட அத்தனை நகைகளையும் வாரிச்சுருட்டியே பழக்கப்பட்டுவிட்டதால் அவர் வீட்டில் இருந்த 44 பவுன் நகைகளையும் 'லபக்கி' இருக்கின்றனர்.


மகேந்திரனும், அன்பு மணிகண்டனும் பக்கத்து பக்கத்து ஊர்க்காரர்கள் என்பதால் அவர்களுக்குள் நன்கு அறிமுகம் உண்டு. அன்பு மணிகண்டன், ஒரு கல்லூரியில் பி.இ., ஆட்டோமொபைல் இன்ஜினியரிங் முதலாம் ஆண்டு சேர்ந்திருக்கிறார். படிப்பில் பெரிதாக நாட்டம் இல்லாததால், கல்லூரிக்குச் செல்லவில்லை என்பதும் தெரிய வந்துள்ளது. 


அவசரமாக ஒரு உதவி தேவைப்படுவதாகச் சொல்லித்தான் முதன்முதலில் அன்பு மணிகண்டனை, 'தொழிலில்' இறக்கி இருக்கிறார்கள். அதன்பிறகு, நினைத்தபோதெல்லாம் உயர்ரக மதுபானமும், பெண்கள் உடனான உல்லாசமான வாழ்க்கையும் அன்பு மணிகண்டனுக்குப் பிடித்துப் போகவே, அவர்களுடனேயே ஒட்டிக்கொண்டார். மகேந்திரனும், முத்துராஜூவும் ஒரு திருட்டு வழக்கில் கைதாகி சிறையில் இருக்கும்போது நண்பர்களாகி இருக்கிறார்கள். 


ஒவ்வொரு மாவட்டமாக நாடோடி போல சுற்றி வந்து திருட்டில் ஈடுபடும் இந்த மூவர் அணி, இதற்கு முன்பு சேலத்திற்கு வந்ததில்லை. அவர்கள் கடந்த ஆண்டு நவம்பர் வாக்கில்தான் வந்துள்ளனர். மகேந்திரனின் உறவினர் மகன் ஒருவர், சேலத்தை அடுத்த வாழப்பாடியில் தனியாக அறை எடுத்துத் தங்கியிருந்ததால், அவருடைய ஏற்பாட்டின்பேரில் அதே கட்டடத்தில் மேலே ஒரு அறையை வாடகைக்கு எடுத்துத் தங்கி இருந்துள்ளனர்.


இவர்களில் மகேந்திரனுக்கு ஏதோ ஒரு சம்பவத்தில் கால் முறிந்ததால், சேலத்தில் நடந்த திருட்டுச் சம்பவங்களில் அவர் ஈடுபடவில்லை என்பது தெரிய வந்துள்ளது. தினமும் வாழப்பாடியில் இருந்து இரவு 7 மணிக்கு மேல் ஒரு பல்சர் மோட்டார் சைக்கிளில் முத்துராஜூவும், அன்பு மணிகண்டனும் கிளம்புகின்றனர். எந்தெந்த வீடுகள் பூட்டியிருக்கிறது என்பதை நோட்டமிடுகின்றனர். ஏதேனும் வீடுகள் பூட்டப்பட்டு இருப்பது தெரிய வந்தால், அதன்பிறகு இரண்டாவது சுற்றை 10 மணிக்கு மேல் தொடர்கின்றனர். அப்போதும் அவர்கள் முன்பு பார்த்த வீடுகள் பூட்டியே கிடக்கிறது எனில், அந்த வீடுகளை மட்டும் குறிவைத்துத் திருட்டை அரங்கேற்றி வந்துள்ளனர்.


திருடப்போகும் வீடுகளில் ஆறஅமர ஒரு மணி நேரத்திற்கும் மேலாக நிதானமாக, ஒவ்வொரு அறையாகச் சென்று பீரோ, இரும்புப் பெட்டிகள் எனத் தேடிப்பார்த்து, திருடியிருக்கிறார்கள்.


இவ்வாறு திருடிய நகைகளை அப்படியே விற்பதும், பாதுகாப்பதும் கடினம் என்பதால் உடனுக்குடன் அவற்றை உருக்கி, தங்க வில்லைகளாக மாற்றி விடுகின்றனர். சேலத்தைச் சேர்ந்த உதயகுமார் என்பவர் தங்க நகைகளை உருக்கிக் கொடுக்கும் வேலைகளைச் செய்து கொடுத்துள்ளார். 
 

http://onelink.to/nknapp


மூவரின் சொந்த ஊர்களிலும் அவர்களது வாழ்வியல் பின்னணி குறித்தும் சேலம் மாநகர காவல்துறை நேரில் விசாரித்துள்ளது. அவர்களின் பெற்றோர் வசதி வாய்ப்புகளின்றி மிகச்சாதாரணமாக ஏழ்மை நிலையில் இருப்பதும் தெரிய வந்தது. திருட்டு நகைகளைப் பணமாக்கி, உல்லாசமாக வாழ்வது ஒருபுறம் இருந்தாலும், தங்களை வழக்குகளில் இருந்து பிணையில் எடுப்பது உள்ளிட்ட வேலைகளுக்காக வழக்கறிஞர் ஒருவருக்கு கேட்ட பணத்தைத் தண்ணீராக இறைத்துள்ளனர். 


சேலத்தில் கடந்த ஜனவரி, பிப்ரவரி மாதங்களில் நான்கு வீடுகளில் மொத்தம் 114.5 பவுன் நகைகளும், 2.22 லட்சம் ரொக்கமும் திருடியுள்ளனர். கைது செய்யப்பட்ட மகேந்திரன், அன்பு மணிகண்டன் ஆகியோரிடம் இருந்து மட்டும் தற்போது 35 லட்சம் ரூபாய் மதிப்பிலான 100 பவுன் வில்லைகளை சேலம் மாநகர தனிப்படைய காவல்துறையினர் கைப்பற்றியுள்ளனர். திருட்டுக்குப் பயன்படுத்தப்பட்ட 'பல்சர்' மோட்டார் சைக்கிளை வேறு ஒரு வழக்கில் ஏற்கனவே ஈரோடு காவல்துறையினர் பறிமுதல் செய்துள்ளனர்.


கைதான நபர்களை மீண்டும் காவலில் எடுத்து விசாரித்தால் அவர்களிடம் இருந்து மேலும் பல திடுக்கிடும் தகவல்கள் கிடைக்கலாம் என்கிறார்கள் தனிப்படையினர். ஐந்து மாதங்களுக்கு மேலாகக் கண்டுபிடிக்க முடியாமல் தேங்கிக் கிடந்த திருட்டு வழக்குகளில் குற்றவாளிகளைக் கைது செய்ததால் சேலம் மாநகர காவல்துறையினரும், மக்களும் நிம்மதி பெருமூச்சு அடைந்துள்ளனர்.  
 

 

 

சார்ந்த செய்திகள்

Next Story

முதல் தலைமுறையினர் வாக்கு யாருக்கு? சுவாரஸ்யமான தகவல்கள்

Published on 23/04/2024 | Edited on 23/04/2024
Interesting facts about who the first generation voted for

நாடாளுமன்றத் தேர்தலில் முதல்முறையாக வாக்களித்த இளைஞர்கள் மாநிலக் கட்சிகளுக்கே முக்கியத்துவம் அளித்து வாக்களித்திருப்பதும், சமூக  நலத்திட்டங்கள், ஊழல் ஆகிய அம்சங்களை கருத்தில் கொண்டு  வாக்களித்திருப்பதும் தெரிய வந்துள்ளது.

தமிழகம் மற்றும் புதுச்சேரியில் உள்ள 40 நாடாளுமன்றத் தொகுதிகளுக்கும் ஏப். 19ஆம் தேதி தேர்தல் நடந்தது. தமிழகத்தில் திமுக, அதிமுக, பாஜக, நாதக என நான்கு முனை போட்டி நிலவியது. தமிழகத்தில் மொத்தம் 6.23 கோடி வாக்காளர்கள் உள்ளனர். இவர்களில் முதல் தலைமுறை வாக்காளர்கள் 10.92 லட்சம் பேர். முதல் முறையாக வாக்களிக்கும் இளைஞர்களின் ஆதரவு யாருக்கு? என்பதில் அரசியல் கட்சிகளிடையே பெரும் எதிர்பார்ப்பு நிலவியது.

இந்நிலையில், சேலம் நாடாளுமன்றத் தொகுதியில் முதன் முதலாக வாக்களித்துவிட்டு வந்த இளைஞர்கள், இளம்பெண்களிடம் பேசினோம். அவர்கள் ஊழல் மற்றும் சமூக நலத்திட்டங்களின் அடிப்படையில் வாக்களித்து இருப்பதும், பெரும்பாலானோர் மாநிலக் கட்சிகளுக்கே முக்கியத்துவம் அளித்திருப்பதும் தெரிய வந்தது.

இதில் இன்னொரு சுவாரஸ்ய தகவலும் கிடைத்தது. முதல் முறை வாக்களித்தவர்களில் இளம்பெண்கள் மாநில அரசின் செயல்திட்டங்களின் அடிப்படையிலும், இளைஞர்கள் சீமானின் நாம் தமிழர் கட்சிக்கு ஆதரவு அளித்திருப்பதும் தெரிய வந்துள்ளது. அதாவது ஒரே வயதாக இருந்தாலும் இளம்பெண்கள், இளைஞர்களின் சிந்தனை வேறு வேறாக இருக்கிறது. என்றாலும், அவர்கள் எந்தக் கட்சிக்கு வாக்களித்தோம் என்பதை வெளிப்படையாக கூற மறுத்துவிட்டனர். எனினும், நம்முடைய கேள்விகளுக்கு அவர்கள் அளித்த பதில்கள் மூலம், யாருக்கு வாக்களித்தார்கள் என்பதை கிட்டத்தட்ட யூகிக்க முடிந்தது.

முதல்முறையாக வாக்களித்த அனுபவம் எப்படி இருந்தது?, யாருக்கு வாக்களிக்க வேண்டும் என்பதில் பெற்றோரின் தலையீடு இருந்ததா?, உங்கள் வாக்கு தேசிய கட்சிக்கா? அல்லது மாநில கட்சிக்கா?, எதன் அடிப்படையில் வாக்களித்தீர்கள்?, உங்களைக் கவர்ந்த தமிழக அரசின் திட்டங்கள் என்னென்ன? ஆகிய கேள்விகளை முன்வைத்தோம். சேலம் வடக்கு சட்டமன்றத் தொகுதியில் முதல் தலைமுறை வாக்காளர்கள் சிலரைச் சந்தித்தோம். அவர்கள் கூறியதாவது..

 Interesting facts about who the first generation voted for

அக்ஷய பிரியா(பி.எஸ்சி., மாணவி): முதல்முறையாக வாக்குச்சாவடிக்கு வந்து  வாக்களித்ததே ஜாலியான அனுபவமாக இருந்தது. யார் அதிகாரத்திற்கு வந்தால் பெண்களுக்கு பாதுகாப்பு கிடைக்குமோ அதை மனதில் வைத்தும், புதியவர்கள் அதிகாரத்திற்கு வர வேண்டும் என்பதை கருத்தில்கொண்டும் வாக்களித்தேன்.

 Interesting facts about who the first generation voted for

பூர்ணிமா(பி.இ., மாணவி): ஒரு குடிமகளாக வாக்களிப்பது நமது கடமை. யாருக்கு ஓட்டுப் போடணும் என்று அப்பா, அம்மா உட்பட யாருடைய தலையீடும் இல்லாமல் நானாக சிந்தித்து வாக்களித்தேன். யார் வந்தால் நல்லது செய்வாங்களோ அவர்களுக்கு வாக்களித்தேன். நான் தேசியக் கட்சிகளுக்கு வாக்களிக்கவில்லை. மாநிலக் கட்சிக்குதான் வாக்களித்தேன். இப்போதுள்ள அரசு செயல்படுத்தி வரும் நலத்திட்டங்களில் உள்ள நல்லது, கெட்டது பற்றி எனக்கு எதுவும் தெரியாது.

 Interesting facts about who the first generation voted for

அகல்யா(பி.காம்., சி.ஏ., மாணவி): முதல் முறையாக வாக்களிக்கப் போகிறோம் என்பதே சந்தோஷமாகத்தான் இருந்தது. எங்களுக்குனு ஒரு அடையாள அட்டை கிடைத்திருக்கிறது. தமிழகத்தில் இப்போதுள்ள அரசும் நல்லாதான் செயல்படுகிறது. இன்னும் சிறப்பாக இருந்தால் நன்றாக இருக்கும்.

சவுந்தர்யா(எம்.ஏ., மாணவி, அகல்யாவின் சகோதரி): இந்த நாட்டுக்கு ஒரு நல்ல தலைவரை தேர்ந்தெடுக்கப் போகிறோம் என்ற பொறுப்பை எங்களிடம் கொடுத்திருக்கிறார்களே என்று பெருமையாக இருக்கிறது. நானும், என் சகோதரி அகல்யாவும் ஒரு தேசியக் கட்சிக்குதான் ஓட்டுபோட்டோம். நாடு நல்ல நிலையில் செல்ல வேண்டும் என்பதாலும், வலிமையான பிரதமர் வேண்டும் என்பதாலும் வாக்களித்தோம். இப்போதுள்ள மத்திய அரசும், தமிழகத்தில், திமுக அரசும் நன்றாகத்தான் செயல்படுகிறது.

 Interesting facts about who the first generation voted for

நிவேதா(பி.ஏ., மாணவி): முதன் முதலாக வாக்குச்சாவடிக்கு வந்து வாக்களித்தது புது அனுபவமாக இருந்தது. நல்லவங்களுக்கு ஓட்டு போட்டிருக்கேன். பாரம்பரியான தேசியக்கட்சி ஆட்சிக்கு வரவேண்டும் என்று சிந்தித்து வாக்களித்தேன். அரசு கலைக் கல்லூரியில் படிக்கிறேன். தமிழக அரசின் மகளிருக்கான இலவச பேருந்து திட்டமும், புதுமைப்பெண் திட்டமும் பிடித்திருக்கிறது.

 Interesting facts about who the first generation voted for

வெற்றிவேல் (பி.இ., மாணவர்): 140 கோடி மக்களுக்கான அரசை தேர்ந்தெடுக்கப் போகிறோம் என்ற பொறுப்பை உணர்ந்து எல்லோருமே வாக்களிப்பது அவசியம். வாக்குப்பதிவு குறைவதை தடுக்க, இரண்டு கட்டங்களாக தேர்தல் நடத்தலாம். வெளியூர்களில் வேலைக்குச் சென்றவர்களால் சொந்தஊருக்குச் சென்று வாக்களிக்க முடியாததும் வாக்குப்பதிவு குறைய முக்கிய காரணம். தமிழ்நாட்டில் படித்தவர்கள் அதிகமாக இருந்தும், போதிய வேலைவாய்ப்பு இல்லாததால் வெளிமாநிலங்களுக்கு வேலை தேடிச்செல்வது அதிகரித்துள்ளது. அதனால் நம் மாநிலத்திலேயே புதிய வேலைவாய்ப்புகளை உருவாக்க வேண்டும். அதற்கு புதிய சிந்தனையுடன் புதியவர்கள் ஆட்சிக்கு வரவேண்டும். நம்மை நாம்தான் ஆள வேண்டும் என்பதை மனதில் வைத்து வாக்களித்தேன். தமிழ்நாட்டில் இதற்கு முன்பும் கஞ்சா போன்ற போதைப் பொருட்கள் புழக்கத்தில் இருந்தாலும், இப்போது அதிகமாக புழக்கத்தில் இருக்கிறது. எங்கள்  கல்லூரியில் ஜூனியர் மாணவர்கள்கூட கஞ்சா பயன்படுத்துவதை நேரடியாக பார்த்திருக்கிறேன். இதுவரை ஆட்சியில் இருந்த கட்சிகளுக்கு வாக்களிக்காமல், புதியவர்கள் அதிகாரத்திற்கு வர வேண்டும் என்ற எண்ணத்தில் வாக்களித்திருக்கிறேன். இங்கு எல்லோருக்கும் எல்லாமும் போய்ச் சேருவதில்லை. சாமானியர்களால் எந்தத் தேவையையும் பூர்த்தி செய்து கொள்ள முடியாத நிலை உள்ளது.

 Interesting facts about who the first generation voted for

பிரதீப்குமார் (பி.இ., மாணவர்): வாக்களிப்பது நமது கடமை என்பதால், முதல் தலைமுறை வாக்காளர்கள் கண்டிப்பாக வாக்களிக்க வேண்டும். யாருக்கு ஓட்டுப்போட வேண்டும் என்பதில் யாரும் தலையிடக்கூடாது என்று என் பெற்றோரிடம் ஏற்கெனவே கூறிவிட்டேன். பிறரை குற்றம் சொல்வதை விட, நான் அதிகாரத்திற்கு வந்தால் என்ன செய்யப்போகிறேன் என்று சொல்வதை வைத்து வாக்களித்தேன். இதுவரை மாறி மாறி ஆட்சியில் இருந்தவர்கள் எந்த வகையிலாவது மக்களை ஏமாற்றிக் கொண்டுதான் இருந்துள்ளனர். எனக்கு தேசியக் கட்சிகள் மீது பெரிதாக ஆர்வம் இல்லாததால், மாநிலக் கட்சிக்குதான் வாக்களித்தேன். மாணவர்களுக்கு தரமான கல்வி கிடைக்க வேண்டும் என்பதை யார் தொடர்ந்து முன்வைத்து வருகிறார்களோ அவர்களுக்கு வாக்களித்தேன். ஏற்கனவே ஆட்சியில் இருந்தவர்கள் மீண்டும் அதிகாரத்திற்கு வருவதை விரும்பவில்லை. அதனால் புதியவருக்குதான் வாக்களித்தேன்.

 Interesting facts about who the first generation voted for

பவித்ரா (பிகாம்., மாணவி): முதல்முறையாக ஓட்டு போட்டபோது நான் கொஞ்சம் பெரிய பொண்ணாகிட்டேன் என்றும், பொறுப்புமிக்க குடிமகள் ஆகிட்டேன் என்ற உணர்வும் ஏற்பட்டது. எனக்கு மட்டுமின்றி, எல்லோருக்கும் நல்லது நடக்க வேண்டும் என்று யோசித்து வாக்களித்தேன். என்னைப்போன்ற இளம் தலைமுறையினருக்கு தரமான கல்வி கிடைக்க வேண்டும். ஒரே கல்வித் தகுதி இருந்தும் சிலருக்கு முன்னுரிமை கிடைக்கிறது. சிலர், சில காரணங்களால் ஒதுக்கப்படுகின்றனர். இப்படி எந்த விதமான மத, சாதி வேறுபாடுகளும் இருக்கக்கூடாது என்றுயோசித்து வாக்களித்தேன். சாதி, மத வேறுபாடுகளின்றி எல்லோரையும் சமமாக நடத்த வேண்டும். தமிழக அரசின் பெண்களுக்கு இலவச பேருந்து திட்டம், மாணவ, மாணவிகளுக்கு ஸ்காலர்ஷிப் திட்டங்கள் பிடித்திருக்கிறது. எல்லோருக்கும் இந்த அரசு உணவு கொடுப்பது பிடித்திருக்கிறது. நான் ஒருமாநிலக் கட்சிக்குதான் வாக்களித்தேன்.

 Interesting facts about who the first generation voted for

அக்ஷயா (பி.ஏ., தமிழ்): எனக்கு வாக்காளர் அடையாள அட்டை கிடைத்ததில் இருந்தே முதன் முறையாக வாக்களிக்கப் போவதை எண்ணி ஆர்வமாக இருந்தேன். இந்த நாட்டுக்கு பிரதமரை தேர்ந்தெடுக்க வாக்களிக்கப் போகிறோம் என்ற எதிர்பார்ப்பும் இருந்தது. இதுவரை ஆட்சியில் இருக்கும் கட்சிக்குதான் வாக்களித்தேன். அவர்களை ஆதரிப்பதன் மூலம் மேலும் நல்ல திட்டங்கள் கிடைக்கும் என நம்புகிறேன். பெண்களுக்கு இலவச பஸ், மூவலூர் ராமாமிர்தம் திட்டத்தின் கீழ் மாணவிகளுக்கு மாதம் 1000 ரூபாய் தருவது மேற்படிப்புக்கு உதவியாக இருக்கிறது. தமிழக அரசு, பெண்களுக்கு முன்னுரிமை கொடுத்து செயல்படுகிறது. பெண்களை ஊக்குவிக்கும் விதமாக மகளிர் உரிமைத் தொகை கொடுப்பதைவரவேற்கிறேன். இதை பிச்சை என்று சிலர் விமர்சிப்பதை ஏற்க முடியாது. நாம் யாரை தேர்ந்தெடுத்தோமோ அவர்கள்தான் நமக்கு உரிமைத் தொகையாக தருகிறார்கள். அதை பிச்சை என்றுசொல்ல முடியாது.

 Interesting facts about who the first generation voted for

சுரேகா (பி.இ., மாணவி): முதல் முறையாக தேர்தலில் வாக்களித்தது மகிழ்ச்சியாக இருக்கு. மக்களுக்கு நல்லது செய்யும் கட்சிக்கு ஓட்டுப் போடும்படி அம்மா சொன்னாங்க. அவர் சொன்ன கட்சிக்கே வாக்களித்தேன். மாநிலக் கட்சிக்குதான் வாக்களித்தேன். இலவச பஸ் திட்டமும், மகளிருக்கு உரிமைத்தொகை திட்டமும் பிடிச்சிருக்கு. குறிப்பாக, பெண்களுக்கு முக்கியத்துவம் கொடுத்து இந்த அரசு செயல்படுகிறது.

 Interesting facts about who the first generation voted for

பூஜா மற்றும் ராகுல்: ராஜஸ்தான் மாநிலம்தான் எங்களுடைய பூர்வீகம். தமிழ்நாட்டில் செட்டில் ஆகிவிட்டோம். நாங்கள் பிறந்தது, படித்தது எல்லாம் இங்குதான். எங்கள் மாநிலத்தை விட தமிழ்நாட்டு கலாச்சாரமும், உணவும் பிடித்திருக்கிறது. ஆனாலும் நாங்கள் தேசியக்கட்சிக்குதான் வாக்களித்தோம். இவ்வாறு இளம் தலைமுறை வாக்காளர்கள் தங்கள் அனுபவங்களையும், கருத்துகளையும் பகிர்ந்துகொண்டனர்.

Next Story

2 வருட காதல்... இளைஞர் எடுத்த விபரீத முடிவு - சேலத்தில் பரபரப்பு

Published on 22/04/2024 | Edited on 22/04/2024
Boyfriend lost their life because girlfriend's marriage was arranged with someone else

சேலம் மாவட்டம் அயோத்தியா பட்டினம் பகுதியைச் சேர்ந்தவர் பிரகாஷ்(27). இவர் அதே பகுதி சேர்ந்த இளம் பெண் ஒருவரை கடந்த இரண்டு ஆண்டுகளாக காதலித்து வந்துள்ளார். இதுகுறித்து  கடந்த சில மாதங்களுக்கு முன்பு பிரகாஷ் தனது வீட்டு பெரியவர்களின் மூலம் அப்பெண்ணின் வீட்டிற்கு சென்று பெண் கேட்டதாக கூறப்படுகிறது. அதற்கு பெண் வீட்டார் தரப்பில் இருந்து முதலில் வீட்டை கட்டி முடியுங்கள், பிறகு திருமணத்தை பார்த்துக் கொள்ளலாம் எனக் கூறப்படுகிறது.

இதையடுத்து வீடுகட்டும் பணியில் பிரகாஷ் தீவிரமாக ஈடுபட்டு வந்துள்ளார். இந்த நிலையில் அந்தப் பெண்ணிற்கு அவரது பெற்றோர்கள்  வேறு இடத்தில் மாப்பிள்ளை பார்த்து வந்ததாக கூறப்படுகிறது. இதனைத் தொடர்ந்து பிரகாஷ் தனது பெற்றோரிடம் பெண்ணின் வீட்டில் சென்று மீண்டும் திருமணத்திற்கு பேசுமாறு கூறியிருக்கிறார். ஆனால் அவரது பெற்றோர் அதனை பிறகு பார்த்துக் கொள்ளலாம் என்று காலதாமதம் செய்ததாக கூறப்படுகிறது.

இந்த நிலையில் விரக்தி அடைந்த பிரகாஷ் நேற்று முன்தினம் விஷம் அருந்தி மயங்கி கிடந்துள்ளார். இதனை அறிந்த அக்கம்பக்கத்தினர் அவரை மீட்டு சேலத்தில் உள்ள தனியார் மருத்துவமனையில் அனுமதித்துள்ளனர். அங்கு அவருக்கு தீவிர சிகிச்சை அளிக்கப்பட்டு வந்த நிலையில் பிரகாஷ் சிகிச்சை பலனின்றி உயிரிழந்தார். இது குறித்து போலீசார் வழக்கு பதிவு செய்து விசாரணை நடத்தி வருகின்றனர்.