Skip to main content

ஈவிகேஎஸ்சுக்கு ஆதரவு எப்படி இருக்கிறது?

Published on 12/04/2019 | Edited on 12/04/2019

உள்ளூர் ஆட்கள் முட்டி மோதிக் கொண்டிருக்கும் தேனி மக்களவைத் தொகுதியில் ஈவிகேஎஸ் இளங்கோவன் திமுக கூட்டணி வேட்பாளராக களம் இறங்கிக் கலக்கிக் கொண்டிருக்கிறார். இவரை வெளியூர் வேட்பாளர் என்று விமர்சனம் செய்தாலும், தன்னை தமிழகத்தின் பொதுவேட்பாளராக அறிவித்துக்கொண்டு பிரச்சாரத்தை தீவிரப்படுத்தி வருகிறார்.

 

evks elangovan



அதிமுக சார்பில் ஓபிஎஸ் மகன் ரவீந்திரநாத் குமார், அமமுக சார்பில் தங்கதமிழ்செல்வன் ஆகியோர் அதிமுகவின் வாக்குகளை யார் அதிகமாக கூறுபோடுவது என்று பணத்தை வாரி இரைத்துக் கொண்டிருக்கிறார்கள். ஆனால், தன்னிடம் பணம் இல்லை என்று அறிவிக்கும் ஈவிகேஎஸ், அதிமுக, அமமுகவிடம் 500 ஆயிரம் 1000 ரூபாய் வாங்காதீர்கள் என்றும் 5 ஆயிரம் 10 ஆயிரம் ரூபாய் வாங்குங்கள் என்றும், வாக்குகளை தனக்கு போடும்படியும் வித்தியாசமாக பிரச்சாரம் செய்கிறார்.


அவருடைய போல்டான பேச்சு ஏற்கெனவே தமிழக மக்களுக்கு அறிமுகமானதுதான். ஆனாலும், தேனித் தொகுதியில் கிராமப்புற வாக்காளர்கள் பெரியாரின் பேரன் பேசும் பேச்சை கேட்க அதிக அளவில் கூடுகிறார்கள். ஈவிகேஎஸ் வெற்றிபெற்றால் நிச்சயமாக மத்திய அமைச்சராகும் வாய்ப்பு இருப்பதால் தங்கள் தொகுதிக்கு நல்லது கிடைக்கும் என்ற எதிர்பார்ப்பும் அதிகரித்துள்ளது.


மிக லேட்டாக பிரச்சாரத்தை தொடங்கிய ஈவிகேஎஸ் தொகுதி முழுவதும் முக்கியமான இடங்களைத் தேர்வு செய்து பிரச்சாரத்தை மேற்கொள்கிறார். அவருக்குத் துணையாக தொகுதி முழுவதும் ஈவிகேஎஸ்சின் மனைவி, மகன் திருமகன் ஈவெரா ஆகியோர் தனித்தனியாக கூட்டணிக் கட்சித் தலைவர்களுடன் முக்கிய பிரமுகர்களை சந்தித்து ஆதரவு கேட்கிறார்கள்.


ஈவிகேஎஸ் பிரச்சாரத்துக்கு போகிற இடங்களில் தலைவர்களின் சிலைகளுக்கு மாலை அணிவிப்பதை வழக்கமாக கொண்டிருக்கிறார். சில நாட்களுக்கு முன் அலங்காநல்லூர் பகுதியில் பிரச்சாரம் மேற்கொண்டபோது பெரும்பிடுகு முத்தரையர் சிலை, தீரன்சின்னமலைக் கவுண்டர் சிலை, காமராஜர் சிலை, பசும்பொன் முத்துராமலிங்கத் தேவர் சிலை, அம்பேத்கர் சிலை ஆகியவற்றுக்கு மாலை அணிவித்து மரியாதை செலுத்தினார்.
 

evks elangovan


அவருடைய பிரச்சாரத்தை மதுரை வடக்கு மாவட்டச் செயலாளர் பி.மூர்த்தி, வடக்கு மாவட்ட மகளிர் அணி அமைப்பாளர் ரேணுகா ஈஸ்வரி கோவிந்தராஜ், ஒன்றியச் செயலாளர் இரா.கென்னடி, தலைமை செயற்குழு உறுப்பினர் தனராஜ் உள்ளிட்டோர் ஒருங்கிணைக்கிறார்கள்.


பிரச்சாரத்தில் ஒபிஎஸ், இபிஎஸ் ஆகியோரை ஒரு பிடிபிடிக்கிறார். மோடியை தெறிக்கவிடுகிறார். இவருக்கு ஆதரவாக திமுக தலைவர் ஸ்டாலின் பிரச்சாரம் செய்துவிட்டார். அப்போது மிகப்பெரிய மக்கள் எழுச்சியை பார்க்க முடிந்தது. இவருக்கு ஆதரவாக முதல்கட்டமாக உசிலம்பட்டி பகுதியில் பிரச்சாரம் செய்த குஷ்பூ, இன்று அலங்காநல்லூர் பகுதியில் பிரச்சாரம் செய்கிறார்.


அதிமுக வேட்பாளர் ரவீந்திரநாத் குமார் வாக்காளர்களுக்கு பணத்தை வாரி இரைத்துக் கொண்டிருக்கும் நிலையில், அவரைப் பின்னுக்குத் தள்ளி அதிமுக வாக்குகளை பிரித்து மேய்கிறார் தங்கதமிழ்செல்வன். இப்போதைய நிலையில் தங்கதமிழ்செல்வனுக்கும் ஈவிகேஎஸ் இளங்கோவனுக்கும் இடையில்தான் போட்டி என்ற நிலை உருவாகி இருக்கிறது. ரவீந்திரநாத் மூன்றாவது இடத்துக்கு தள்ளப்பட்டிருப்பதாக கூறுகிறார்கள். அதிமுகவினரால் பிரிக்கமுடியாத சில சாதியினரின் வாக்குகளுடன் மத்தியா மாநில அரசுகளுக்கு எதிரான வாக்குகள் மொத்தமாக ஈவிகேஎஸ்சுக்கு கிடைக்கும் என்பதால், தேனி தொகுதி மத்திய அமைச்சரின் தொகுதியாக வாய்ப்பிருக்கிறது என்கிறார்கள்.


 

 

 

Next Story

ஆஜரான எம்.ஆர்.விஜயபாஸ்கர்; அதிரடி உத்தரவிட்ட நீதிமன்றம்

Published on 22/07/2024 | Edited on 22/07/2024
nn

கரூர் மாவட்டம் வாங்கல் குப்பிச்சிபாளையத்தைச் சேர்ந்த பிரகாஷ் என்பவர் கரூர் காவல் நிலையம் மற்றும் எஸ்.பி. அலுவலகத்தில் புகார் ஒன்றை அளித்திருந்தார். அதில், தோரணக்கல்பட்டி மற்றும் குன்னம்பட்டியில் தனக்குச் சொந்தமான ரூ.100 கோடி மதிப்புள்ள 22 ஏக்கர் நிலத்தை அதிமுக முன்னாள் அமைச்சர் எம்.ஆர். விஜயபாஸ்கர் மற்றும் அவரது ஆதரவாளர்கள் தனது மனைவி மற்றும் மகளை மிரட்டி மோசடியாகப் பத்திரப்பதிவு செய்து உள்ளனர் என்று கூறியிருந்தார்.

மேலும் இது தொடர்பாக மேலக்கரூர் பொறுப்பு சார்பதிவாளரும் கரூர் நகரக் காவல் நிலையத்தில் புகார் அளித்திருந்தார். அதனைத் தொடர்ந்து இந்த வழக்கு சிபிசிஐடிக்கு மாற்றப்பட்டது. அதே சமயம் இந்த வழக்கில் தனது பெயர் சேர்க்கப்படலாம் என்று கருதி முன்னாள் அமைச்சர் எம்.ஆர். விஜயபாஸ்கர் முன்ஜாமீன் கேட்டு கரூர் மாவட்ட முதன்மை அமர்வு நீதிமன்றத்தில் மனுத்தாக்கல் செய்திருந்தார். இதையடுத்து நில அபகரிப்பு வழக்கில் எம்.ஆர். விஜயபாஸ்கரின் முன் ஜாமீன் மனுக்களை நீதிபதி தள்ளுபடி செய்து உத்தரவிட்டிருந்தார்.

இதற்கிடையே தலைமறைவாக கேரளாவில் பதுங்கி இருந்த எம்.ஆர். விஜயபாஸ்கர் தனிப்படை போலீசாரால் கடந்த 16 ஆம் தேதி (16.07.2024) கைது செய்யப்பட்டார். இத்தகைய பரபரப்பான சூழலில் எம்.ஆர். விஜயபாஸ்கருக்கு வரும் 31ஆம் தேதி வரை என 15 நாட்கள் நீதிமன்ற காவல் விதிக்கப்பட்டு திருச்சி மத்தியச் சிறையில் அடைக்கப்பட்டிருந்தார்.

இந்நிலையில் சிபிசிஐடி போலீசார் தாங்கள் தொடர்ந்த வழக்கு தொடர்பாக எம்.ஆர்.விஜயபாஸ்கரை போலீஸ் காவலில் எடுத்து விசாரிக்க வேண்டும் என ஏழு நாட்கள் அனுமதி கோரி மனுத்தாக்கல் செய்திருந்தது. குற்றவியல் நடுவர் நீதிமன்றத்தில் விசாரணைக்கு வந்த இந்த வழக்கில் இரண்டு மணி நேரம் விசாரணை நடைபெற்றது. விசாரணைக்குப் பின்னர் நீதிமன்ற நடுவர் பரத்குமார் இரண்டு நாட்கள் எம்.ஆர் விஜயபாஸ்கரை போலீஸ் காவலில் வைத்து விசாரிக்க சிபிசிஐடி போலீசாருக்கு அனுமதி அளித்து உத்தரவிட்டுள்ளார்.

Next Story

அதிமுக திமுக காரசார விவாதம்; வாக்குவாதத்தில் முடிந்த நகர் மன்ற கூட்டம்!

Published on 22/07/2024 | Edited on 22/07/2024
DMK AIADMK political debate in Kallakurichi Municipal Council meeting

கள்ளக்குறிச்சி நகராட்சியில் சாதாரண நகர மன்ற கூட்டம் இன்று நடைபெற்றது. இந்த கூட்டம் நடைபெறுவதற்காக அனைத்து கவுன்சிலர்களுக்கும் ஏற்கனவே நகராட்சி கூட்டம் குறித்து நோட்டீஸ் அனுப்பப்பட்டது. அதை கண்ட அதிமுக கவுன்சிலர்கள் தமிழகத்தையே உலுக்கிய கள்ளச்சாராயம் சம்பவத்தில் கள்ளக்குறிச்சியில் 67 பேர் உயிரிழந்த நிலையில் அதற்கு ஒரு இரங்கல் தீர்மானம் இல்லாததாலும், மேலும் நகர மன்ற கூட்டத்தில் இரங்கல் தீர்மானத்தை எழுத்துப்பூர்வமாக நிறைவேற்ற வேண்டும் என்பதை வலியுறுத்தி கருப்பு சட்டை அணிந்து அதிமுக கவுன்சிலர்கள் நகராட்சி கூட்டத்தில் கலந்து கொண்டனர். இதை கண்ட சேர்மன் சுப்பராயலு  வாய்மொழியாக ஒரு நிமிடம் மௌன அஞ்சலி தெரிவிக்கப்படும் என தெரிவித்து கூட்டத்தை தொடங்கினார்.

இந்த கூட்டத்தில் பேசிய அதிமுக நகரச் செயலாளரும், 11-வது வார்டு கவுன்சிலருமான பாபு, “கள்ளச்சாராயம் குடித்து 67 பேர் உயிரிழந்த சம்பவம் பெரும் பரபரப்பு ஏற்படுத்திய நிலையில் அது தொடர்பாக ஒரு தீர்மானம் கூட நிறைவேற்றாமல் இரங்கல் தீர்மானம் இல்லாமல் இந்த கூட்டம் நடப்பதால் இதிலிருந்து நாங்கள் வெளியேறுகிறோம்” என்று கூட்டத்திலிருந்து வெளியேறினர். அப்போது நகராட்சி சேர்மன் சுப்புராயலு உடனடியாக எழுந்து மைக்கை பிடித்து மக்கள் முதல்வர் வாழ்க என கோஷம் எழுப்பினார்.

இதற்கு அதிமுக கவுன்சிலர்களும், “எதிர்க்கட்சித் தலைவர் எடப்பாடி பழனிச்சாமி வாழ்க...” என முழக்கம் எழிப்பினர். இதனால் திமுக கவுன்சிலர்களும், அதிமுக கவுன்சிலர்களும் தங்கள் தலைவர்கள் புகழைப் பாடிக்கொண்டு கோஷம் எழுப்பினர். மேலும் ஒரு கட்டத்தில் வாக்குவாதம் ஆக மாறி  பெரும் கூச்சல் குழப்பம் ஏற்பட்டது. அப்போது திமுக கவுன்சிலர்கள் தங்கள் ஆட்சியில் செய்த சாதனைகளை சொல்லியும் அதிமுக கவுன்சிலர்கள் இந்த திமுக ஆட்சியில் நிறைவேற்றப்படாத பல்வேறு குற்றச்சாட்டுகளை முன்வைத்தும் வலுவாக கோஷம் எழுப்பி மேஜயை தட்டி பயங்கர வாக்குவாதத்தில் ஈடுபட்டதால் கூட்டு அரங்கம் முழுவதும் பெரும் பரபரப்பு ஏற்பட்டது.

மேலும் கள்ளச்சாராயம் குடித்து  உயிரிழந்த பட்டியலின மக்களுக்கு விரோதமாக நகராட்சி ஆணையரும் தமிழக முதல்வரும் செயல்படுவதாக அதிமுக கவுன்சிலர்கள் கோஷம் எழுப்பியவாறு வெளிநடப்பு செய்தனர். இதனால் அந்தப் பகுதியில் பெரும் பரபரப்பு ஏற்பட்டது. பின்னர் அதிமுக கவுன்சிலர் வெளியேறிய பின்பு திமுக கவுன்சிலர்கள் கலந்து கொண்ட கூட்டம் நடைபெற்றது.