Skip to main content

சாதி பெருமையை அடையாளப்படுத்துவதில் என்ன பெருமை வேண்டி கிடக்கிறது - செலின் விவகாரத்தில் எவிடென்ஸ் கதிர் கேள்வி!

Published on 16/11/2020 | Edited on 16/11/2020
hj

 

 

அமெரிக்க அதிபராக புதிதாக தேர்ந்தெடுக்கப்பட்டுள்ள ஜனநாயக கட்சி வேட்பாளர் ஜோ பிடன் அமைத்துள்ள மருத்துவ குழுவில் தமிழகத்தைச் சேர்ந்த மருத்துவர் செலின் இடம் பெற்றுள்ளார். அவர் தன்னுடைய பெயருடன் தன்னுடைய சாதி பெயரையும் இணைத்துள்ளார். இது சர்ச்சையாகி வரும் வேளையில் இதுதொடர்பாக எவிடென்ஸ் கதிர் கடும் கண்டனம் தெரிவித்துள்ளார். அதில், "அமெரிக்க அதிபராக விரைவில் பொறுப்பேற்க உள்ள ஜோ பைடன் குழுவில் இந்திய வம்சாவளியை சேர்ந்த குறிப்பாக தமிழகத்தைச் சேர்ந்த மருத்துவர் செலின் அவர்கள் இடம்பெற்றிருப்பது மகிழ்ச்சி தருகிறது. நம் மாநிலத்தை சேர்ந்த ஒருவர் அமெரிக்க அதிபர் குழுவில் இடம் பெறுவது என்பது சாதாரணமானது அல்ல. ஆனால் அவர் தன்னுடைய பெயரில் செலின் கவுண்டர் என்று பதிவு செய்துள்ளார். அதிலும் எந்த தவறும் இல்லை. ஆனால் இன்றைக்கு ஒரு ட்விட் பதிவு செய்துள்ளார் அதையும் தாண்டி, அதில் என்னுடைய சாதி தான் என்னுடைய வரலாறு என்றும், அதுதான் என்னுடைய பெருமை என்றும் குறிப்பிட்டுள்ளார். அங்குதான் வருத்தமாக இருக்கிறது. நமது அரசியல் அமைப்பில் கூட சாதி கூடாது என்று கூறவில்லை, சாதிய பாகுபாடு இருக்கக்கூடாது என்றுதான் குறிப்பிடப்பட்டுள்ளது. எனவே அவர் தன்னுடைய பெயரில் சாதியை போட்டுக்கொள்வதில் எந்த தவறும் இல்லை. ஆனால் இதுதான் என்னுடைய பெருமை, இதுதான் என்னுடைய வரலாறு என்று அவர் குறிப்பிடுகிறார் என்றால் அதைத்தான் சாதிய திமிராக நாம் சுட்டிக்காட்டுகிறோம். 

 

ஒரு வெள்ளைகாரன் அமெரிக்காவுக்கு சென்று வெள்ளை நிறம்தான் என்னுடைய அடையாளம் என்று அமெரிக்காவில் சொல்ல முடியாது. அதுதான் என்னுடைய வரலாறு என்று சொல்ல முடியாது. அப்படி சொன்னால் அங்கிருப்பவர்கள் கைகொட்டி சிரிப்பார்கள். உலகமே கைதட்டி சிரிக்கும். அமெரிக்காவில் தற்போது பொறுப்பில் இருப்பவர்கள் கூட இந்த வெள்ளை தோல்தான் என்னுடைய அடையாளம் சொல்ல முடியாது. அதையும் தாண்டி 1979ம் ஆண்டு சர்வதேச அளவில் நிறவெறிக்கு எதிரான உடன்படிக்கை கொண்டு வரப்பட்டுள்ளது. அந்த உடன்படிக்கையில் நிறவெறி சம்பந்தமாக பாகுபாடு காட்டுவது கூட ஒரு வகையில் வன்மம் என்று கூறப்பட்டுள்ளது. இந்த சாதி பெருமைதான் என்னுடைய வரலாறு என்பது மறைமுகமாக சாதி பெருமையை திணிப்பது போன்று உள்ளது. அமெரிக்காவில் சாதிப்பாகுபாடு கூடாது என்று தற்போது வழக்கு ஒன்று நடைபெற்று வருகின்றது. இந்த நிலையில் ஒரு மருத்துவர் இப்படி வெளிப்படையாக சாதி பெயரை போட்டுக்கொண்டுள்ளார். மேலும் இந்தியாவில் யாருமே சாதியை போட்டுக்கொள்ளவில்லையா என்று கேட்கலாம், ஆனால் அதைக்கூட அவர்களின் உரிமையாக கூட வைத்துக்கொள்ளலாம். ஆனால் இது என்னுடைய அடையாளம், பெருமை என்று கூறுவதை எப்படி ஏற்றுக்கொள்ள முடியும். 

 

அவர்கள் இதற்காக வருத்தம் தெரிவிக்க வேண்டும். இல்லை என்றால் இதுதொடர்பாக அமெரிக்க அரசுக்கு நாம் அனைவரும் கடிதம் எழுத வேண்டும். ஏனென்றால் இந்த மாதிரியான சாதி உணர்வுகளை நாம் ஊக்குவிக்க முடியாது. அதை செடியிலேயே பிடுங்கி எறிய வேண்டும். இந்தியர்கள் எங்கெல்லாம் செல்கிறார்களோ அங்கெல்லாம் நம்முடைய வரலாற்றை கொண்டு செல்லலாம், கல்வியை கொண்டு செல்லலாம், நாட்டின் பெருமைகளை எடுத்து செல்லலாம், அப்படி எடுத்து சென்றால் அது ஒரு நாகரிகம்.  ஆனால் நான் சாதியை கொண்டு செல்வேன் என்பது ஒரு விஷம், ஒரு குப்பை. ஒரு குப்பையை அடையாளப்படுத்துவது என்பது அதைவிட கேவலம். நான் அவர் போட்டுள்ள அந்த குறிப்பிட்ட சாதியை மட்டும் சொல்லவில்லை. எல்லா சாதியையும் சேர்த்துதான் சொல்ல வருகிறேன்.  எந்த சாதியை வெளியே கொண்டு சென்றாலும் அதை ஒரு வன்மமாகத்தான் பார்க்க வேண்டியுள்ளது. இதை ஒருகாலும் ஏற்றுக்கொள்ள முடியாது" என்றார்.

 

Next Story

'வி.பி.சிங்கின் துணிச்சலை முதல்வரும் வெளிப்படுத்த வேண்டும்'-ராமதாஸ் வலியுறுத்தல்   

Published on 26/11/2023 | Edited on 26/11/2023

 

'The Chief Minister should also show the bravery of VP Singh'- Ramadoss emphasized

 

இந்தியாவின் முன்னாள் பிரதமர் வி.பி.சிங்கின் பதினைந்தாம் ஆண்டு நினைவு நாள் நாளை கடைபிடிக்கப்படவுள்ள நிலையில் சாதிவாரி கணக்கெடுப்பு நடத்துவதே அவருக்கு செலுத்தும் மரியாதை என பாமக நிறுவனர் ராமதாஸ் தெரிவித்துள்ளார்.

 

இதுகுறித்து அவர் வெளியிட்டுள்ள அறிக்கையில், 'இந்தியாவின்  முன்னாள் பிரதமர் வி.பி.சிங்கின் பதினைந்தாம் ஆண்டு நினைவு நாள் நாளை கடைபிடிக்கப்படவுள்ள நிலையில், சென்னையில் தமிழ்நாடு அரசின் சார்பில் அவரது திருவுருவச் சிலை முதலமைச்சர் மு.க. ஸ்டாலின் அவர்களால் திறந்து வைக்கப்படவுள்ளது. இது சமூகநீதிக் காவலருக்கு செய்யப்படும் மிகப்பெரிய மரியாதை ஆகும். இது வரவேற்கத்தக்கது.

 

அதேநேரத்தில், வி.பி.சிங் அவர்களின் கனவான சாதிவாரி மக்கள்தொகை கணக்கெடுப்பை நடத்துவது  தான் அவருக்கு தமிழக அரசு செலுத்தும் உண்மையான மரியாதையாக இருக்கும். வி.பி.சிங் அவர்கள்  பிரதமர் பதவியில் இருந்த போது, சாதிவாரி கணக்கெடுப்பு நடத்தப்பட வேண்டும் என்ற கோரிக்கை பெரிய அளவில் எழுப்பப்படவில்லை. எனினும், அவரது வாழ்நாளின் இறுதிக் கட்டத்தில் சாதிவாரி மக்கள்தொகை கணக்கெடுப்புக்கான தேவை எழுந்த போது, அதை உடனடியாக செய்ய வேண்டும் என்று வலியுறுத்தினார்.

 

மண்டல் ஆணையத்தின் பரிந்துரைப்படி, மத்திய அரசின் உயர்கல்வி நிறுவனங்களில் பிற பிற்படுத்தப்பட்ட மக்களுக்கு 27% இட ஒதுக்கீடு வழங்க வேண்டும் என்று 2006 & ஆம் ஆண்டு நடைபெற்ற ஐக்கிய முற்போக்கு கூட்டணித் தலைவர்கள் கூட்டத்தில்  நான் வலியுறுத்தியதன் பயனாக, அதே ஆண்டில் அதற்கான சட்டம் கொண்டு வந்து நிறைவேற்றப்பட்டது. ஆனால், சாதிவாரி கணக்கெடுப்பு விவரங்கள் இல்லாதது உள்ளிட்ட பல்வேறு காரணங்களைக் கூறி 27% இட ஒதுக்கீட்டை செயல்படுத்த உச்சநீதிமன்றம் இடைக்காலத் தடை விதித்தது. அதைத் தொடர்ந்து தேசிய அளவில் சாதிவாரி மக்கள்தொகை கணக்கெடுப்பு நடத்தப் பட வேண்டும் என்று பாட்டாளி மக்கள் கட்சி வலியுறுத்தியது. அக்கோரிக்கையை வி.பி.சிங் ஆதரித்தார்.

 

2007  ஆம் ஆண்டில் கடுமையான உடல்நலக் குறைவால் வி.பி.சிங் பாதிக்கப்பட்டிருந்தார். சிறுநீரகக் குறைபாட்டுக்காக ஒருநாள் விட்டு ஒருநாள் குருதி சுத்திகரிப்பு செய்ய வேண்டியிருந்தது. அத்தகைய சூழலிலும் உத்தரப்பிரதேச சட்டப்பேரவைத் தேர்தலில் பரப்புரை மேற்கொண்ட வி.பி.சிங், பிரண்ட் லைன் ஆங்கில இதழுக்கு  அளித்த நேர்காணலில்,‘‘ மத்திய அரசு வேலைவாய்ப்புகளில் நான் 27% இட ஒதுக்கீடு கொண்டு வந்த போது சாதிவாரி கணக்கெடுப்புக் குறித்து உச்சநீதிமன்றம் வினா எழுப்பவில்லை. ஆனால், இப்போது வினா எழுப்பும் நிலையில், சாதிவாரி கணக்கெடுப்பு நடத்தப்பட வேண்டியது அவசியம். அதை ஓராண்டுக்குள் செய்யவேண்டும்’’ என்று வலியுறுத்தினார். அதை தேசிய அளவில் செயல்படுத்த வாய்ப்பற்ற நிலையில், மாநில அளவில் இருக்கும் அதிகாரத்தை பயன்படுத்தி முதல்வர் செய்ய வேண்டும்.

 

இந்தியாவின் சமூகநீதிக் காவலர் என்று வி.பி.சிங் போற்றப்படுவதற்கு காரணம் மிகக் கடுமையான அரசியல் எதிர்ப்புகளையும் மீறி மண்டல் ஆணையப் பரிந்துரைகளை செயல்படுத்தியது தான். அதனால்,  அவர் ஆட்சியை இழந்தார்; அதன்பின் வந்த தேர்தல்களில் உயர்சாதி வாக்குவங்கியை இழந்தார்; பிற பிற்படுத்தப்பட்ட சமுதாயமும் அவரை முழுமையாக ஆதரிக்கவில்லை. அதனால், அவரது அரசியல் எதிர்காலம் முடிவுக்கு வந்தது. ஆனாலும், அதைப் பற்றிக் கவலைப்படாமல், தமது நிலைப்பாட்டில் உறுதியாக இருந்தார்.

 

‘‘மண்டல் ஆணைய அறிக்கையை செயல்படுத்துவதற்கு முன்பாக நான் செய்த அனைத்து செயல்களும் சிறப்பானவை என்று பாராட்டப்பட்டன. மண்டல் அறிக்கையை செயல்படுத்திய பிறகு நான் செய்த ஒவ்வொன்றும் நாட்டிற்கு இழைக்கப்பட்ட தீமையாக பார்க்கப்பட்டன. இந்த ஆட்டத்தில் எனது கால் உடைந்தாலும் பிற்படுத்தப்பட்டோருக்கு இட ஒதுக்கீடு என்ற கோலை (நிளிகிலி) அடித்து விட்டேன். அந்த விஷயத்தில் மகிழ்ச்சி. எந்த ஒரு பொருளுக்கும் ஒரு விலை உண்டு. அந்த விலையை நீங்கள்  செலுத்தி தான் ஆக வேண்டும். ஒரு செயலை செய்துவிட்டு, அதற்கு இப்படி ஒரு விலை கொடுக்க வேண்டியதாகிவிட்டதே என வருத்தப்படக் கூடாது. நான் கொடுத்த விலை மண்டல் ஆணையத்தின் அறிக்கையை செயல்படுத்தியதற்கானது ஆகும்’’ என்று கூறி தமது அரசியல் துணிச்சலை வி.பி.சிங் வெளிப்படுத்தினார்.

 

சமூகநீதிக் காவலர் வி.பி.சிங் அவர்களுக்கு இருந்த அரசியல் துணிச்சல் இப்போது தமிழக முதலமைச்சர்  மு.க.ஸ்டாலின் அவர்களுக்கு இருக்க வேண்டும் என்பது தான் எனது எதிர்பார்ப்பு ஆகும். 27 விழுக்காடு  இட ஒதுக்கீட்டை வி.பி.சிங் செயல்படுத்திய போது அவருக்கு அரசியல் ரீதியாகவும், சமூக ரீதியாகவும் கடுமையான எதிர்ப்பு இருந்தது. ஆனால், இப்போது சாதிவாரி மக்கள்தொகை கணக்கெடுப்பை நடத்த தமிழ்நாட்டில் அரசியல் ரீதியாகவும், சமூக ரீதியாகவும் எந்த எதிர்ப்பும் இல்லை. சாதிவாரி கணக்கெடுப்பை எதிர்க்கும் கட்சிகள் தமிழக அரசியலில் துடைத்து எறியப்படும் என்பதால் எவரும் எதிர்க்க மாட்டார்கள்.  ஓபிசி மக்களுக்கு 27% இட ஒதுக்கீடு கொடுத்து சமூக நீதி வழங்குவதற்கு வி.பி.சிங்கிற்கு எதிராக இருந்த சூழல், சாதிவாரி மக்கள்தொகை கணக்கெடுப்பு நடத்தி சமுகநீதி வழங்குவதில் மு.க.ஸ்டாலின் அவர்களுக்கு ஆதரவாக இருக்கிறது. ஆனாலும், தமிழ்நாட்டில் மாநில அரசின் சார்பில் சாதிவாரி மக்கள்தொகை கணக்கெடுப்பு நடத்தவும், அது குறித்து பேசவும் மு.க.ஸ்டாலின் அஞ்சுவது ஏன்? எனத் தெரியவில்லை.

 

எத்தனை எதிர்ப்புகள் வந்தாலும், எவ்வளவு இழப்புகள் ஏற்பட்டாலும் அதை தாங்கிக் கொண்டு சமூக நீதியை செயல்படுத்துவது தான் சமூகநீதி அரசியல் தலைவர்களுக்கு அழகு. ஆனால், எந்த இழப்பும், எந்த எதிர்ப்பும் இல்லாமல், நற்பெயரைப் பெற்றுக் கொடுத்து, வரலாற்றில் இடமளிக்கக் கூடிய சாதிவாரி  மக்கள்தொகை கணக்கெடுப்பை மாநில அரசின் சார்பில் நடத்த அஞ்சுவது அழகல்ல. எனவே, அனைத்து அச்சம் மற்றும் தயக்கங்களை தகர்த்தெறிந்து தமிழ்நாட்டில் மாநில அரசின் சார்பில் சாதிவாரி கணக்கெடுப்பு  நடத்த வேண்டும். அதற்கான அறிவிப்பை வி.பி.சிங் அவர்களின் சிலைத் திறப்பு விழாவில் வெளியிடுவதன் மூலம் வி.பி.சிங் அவர்களுக்கு உண்மையான மரியாதையை மு.க.ஸ்டாலின் அவர்கள் செலுத்த வேண்டும்' என வலியுறுத்தியுள்ளார்.

 

 

 

Next Story

'தீண்டாமை வேலியை ஏற்க முடியாது' - நீதிமன்றம் கருத்து 

Published on 09/11/2023 | Edited on 09/11/2023

 

'Fence of untouchability is unacceptable'-Court opined

 

'தீண்டாமை வேலி போன்ற குற்றச் சம்பவங்களை ஏற்க முடியாது' என உயர்நீதிமன்ற கிளை மதுரைக் கிளை கருத்து தெரிவித்துள்ளது.

 

அண்மையில் கரூர் மாவட்டம் கடவூர் பகுதியைச் சேர்ந்த சின்னமுத்து என்பவர் சாதி மறுப்பு திருமணம் செய்துகொண்ட நிலையில் சொந்த ஊருக்கு வந்துள்ளார். அப்பொழுது ஊரைச் சேர்ந்தவர்கள் அவர்கள் ஊருக்குள் வரக்கூடாது எனத் தீண்டாமை வேலி அமைத்ததாகக் கூறப்படுகிறது. இதை எதிர்த்து உயர்நீதிமன்ற மதுரை கிளையில் சின்னமுத்து சார்பில் வழக்கு தாக்கல் செய்யப்பட்டிருந்தது.

 

அதில், வேறு சமூகத்தைச் சேர்ந்தவரைத் திருமணம் செய்து கொண்டதால் தீண்டாமை வேலி அமைக்கப்பட்டுள்ளது எனத் தெரிவிக்கப்பட்டிருந்தது. இந்த வழக்கில் இன்று நடைபெற்ற விசாரணையில், தீண்டாமை வேலி போன்ற குற்றச் சம்பவங்களை சமூகத்தில் ஏற்றுக்கொள்ள முடியாது எனத் தெரிவித்த நீதிபதி இளங்கோ, அந்தப் பகுதியில் ஏதேனும் தீண்டாமை வேலி இருக்கிறதா என கரூர் ஆட்சியர், பாலவிடுதி காவல் ஆய்வாளர் ஆகியோர் ஆய்வு செய்து பதிலளிக்க உத்தரவிட்டு வழக்கு விசாரணையை வரும் 28 ஆம் தேதிக்கு ஒத்தி வைத்தார்.