Skip to main content

ஸ்டாலினை நான் பார்த்துகிறேன்... நீங்க நான் சொல்றத பண்ணுங்க... அமைச்சர்களிடம் கறார் காட்டிய எடப்பாடி! 

Published on 12/12/2019 | Edited on 12/12/2019

புதிதாகப் பிரிக்கப்பட்ட மாவட்டங்களில் வார்டு வரையறை, தாழ்த்தப்பட்டோர் மற்றும் பழங்குடியினருக்கான இட ஒதுக்கீடு உள்ளிட்டவைகளை சரி செய்யாமல் உள்ளாட்சித் தேர்தலை நடத்த முன்வந்த மாநில தேர்தல் ஆணையத்தை எதிர்த்து ஏற்கனவே தி.மு.க. தொடர்ந்த வழக்கில், 9 மாவட்டங்களில் தேர்தல் நடத்த தடை விதித்தும், நாடாளுமன்றத்தில் நிறைவேற்றப்பட்ட பஞ்சாயத்துராஜ் சட்ட விதிகளின்படி தேர்தலை நடத்தவும் கடந்த 6-ந்தேதி உத்தரவு பிறப்பித்தது உச்சநீதிமன்றம். அதனையேற்ற எடப்பாடி அரசின் கண் அசைவில் இயங்கும் தேர்தல் ஆணையத்தின் ஆணையர் பழனிசாமி, கடந்த 7-ந்தேதி தேர்தலுக்கான புதிய அறிவிப்பைச் செய்தார். அதில், ஏற்கனவே அறிவிக்கப்பட்ட இரண்டு கட்ட தேர்தல் தேதியில் எந்த மாற்றமும் செய்யப்படவில்லை. மனுதாக்கல், பரிசீலனை, வாபஸ் பெறுதல் உள்ளிட்ட தேதிகளில் மட்டும் மாற்றம் செய்யப்பட்டது.

 

admk



இந்த நிலையில்தான் இதனையும் எதிர்த்து நீதிமன்றப்படிகளில் மீண்டும் ஏறியுள்ளது தி.மு.க.. இது குறித்து மூத்த வழக்கறிஞரும் எம்.பி.யுமான வில்சனிடம் பேசியபோது, "கடந்த 6-ந்தேதி தீர்பளித்த உச்சநீதிமன்றம், பஞ்சாயத்து ரிசர்வேசன் மற்றும் ரொட்டேஷன் விதிகள் 1995, பிரிவு 6-ன் படி விதிகளை கடைப்பிடித்து தேர்தலை நடத்த வேண்டும்'' என உத்தரவிட்டது. ஆனால், இதனை ஒரு பொருட்டாகவே மதிக்காத மாநில தேர்தல் ஆணையம், மீண்டும் தேர்தல் தேதியை அறிவித்துள்ளது. இது அரசியலமைப்பு சட்டத்துக்கு எதிரானது.
 

dmk



நிறுத்திவைக்கப்பட்டுள்ள 9 மாவட்டங்களில் வார்டு வரையறையை முறையாக பிரிக்கப்பட்ட பிறகே இட ஒதுக்கீட்டின் அளவை சரியாக கணக்கிட முடியும். ஆனால், இதனை செய்யாமல், பெண்களுக்கான 50 சதவீத இடஒதுக்கீட்டையும் தாழ்த்தப்பட்டோருக்கான 18 சதவீத இட ஒதுக்கீட்டையும் எப்படி தீர்மானிக்க முடியும்? 9 மாவட்டங்களில் வார்டு வரையறையை முடித்து 4 மாதத்திற்குள் தேர்தலை நடத்த வேண்டும் என்றுதான் உச்சநீதிமன்றம் உத்தரவிட்டுள்ளது. அதை செய்து முடித்து ஒட்டுமொத்த கிராம பஞ்சாயத்துகளுக்கும் தேர்தலை நடத்தலாமே? வார்டு வரையறையை கேட்டால், 2016-ல் நடந்த வார்டு வரையறையை காட்டுகிறார்கள். அது எப்படி இந்த தேர்தலுக்குப் பொருந்தும்?

ஏற்கனவே இப்படிப்பட்ட தில்லுமுல்லுகளைத்தான் செய்தார்கள். இப்போதும் பழைய தில்லுமுல்லுகளின்படியே நடத்துகிறார்கள். உச்சநீதிமன்றம் கண்டித்தும் மாநில தேர்தல் ஆணையம் திருந்தவில்லை. இதனை எதிர்த்துதான் மீண்டும் கோர்ட்டுக்கு வந்திருக்கிறோம். உள்ளாட்சித் தேர்தல் நடக்கக்கூடாது என உறுதியாக இருக்கும் எடப்பாடி பழனிசாமிக்கு. எடுபிடியாக செயல்படும் ஆணையத்தின் பித்தலாட்டங்களை நீதிமன்றத்தில் அம்பலப்படுத்துவோம். பழனிசாமி அரசும் பழனிசாமி ஆணையமும் இணைந்து நாடகம் ஆடுகின்றன. நீதிமன்றத்தில் நிச்சயம் எங்களுக்கு வெற்றி கிடைக்கும்'' என்கிறார் மிக அழுத்தமாக.

 

dmk



புதிய தேர்தல் தேதியை அறிவித்த ஆணையம், கிராம ஊராட்சிகளுக்கான தேர்தலை டிசம்பர் 27 மற்றும் 30-ந்தேதிகளில் இரண்டு கட்டமாக நடத்துகிறது. ஆனால், முதல் கட்டத்தில் எந்தெந்த ஊராட்சிகளிலும், இரண்டாவது கட்டத்தில் எந்தெந்த ஊராட்சிகளிலும் தேர்தல் நடக்கிறது என்கிற பட்டியலை தேர்தல் தேதி அறிவித்த அன்று வெளியிடாமல் ரகசியமாகவே வைத்திருந்தது தேர்தல் ஆணையம். இது குறித்து ஆணையத்தை தொடர்புகொண்டு எதிர்க்கட்சிகள் விசாரித்தபோது, அந்த பட்டியலை தராமல் அடாவடித்தனமாக பதில் தந்திருக்கிறது. அதேசமயம், அ.தி.மு.க. தலைமைக்கும் மாவட்ட ஆட்சியாளர்களுக்கும் மட்டும் அந்த பட்டியலை முன்கூட்டியே அனுப்பி வைத்திருக்கிறார்கள் தேர்தல் அதிகாரிகள். இந்த வில்லங்கம் பிரச்சனையாவதையறிந்து மனு தாக்கல் துவங்கிய 9-ந்தேதி 10 மணிக்கு மேல் அந்த பட்டியலை வெளியிடுகிறது ஆணையம்.


ஆணையத்தின் அடாவடிகள் இப்படி இருக்க, தேர்தலை எதிர்கொள்வது குறித்து தங்கள் கட்சியின் மா.செ.க்கள் மற்றும் எம்.எல்.ஏ.க்களுடன் அ.தி.மு.க.வும் தி.மு.க.வும் ஆலோசனை நடத்தி முடித்திருக்கின்றன. அ.தி.மு.க. தரப்பினர் ஆலோசனை குறித்து விசாரித்தபோது, "ஆலோசனை கூட்டத்தில் பேசிய எடப்பாடி, "இங்கு அமைச்சர்களாக இருக்கும் பலரும் மா.செ.க்களாகத்தான் இருக்கிறீர்கள். உங்களுக்கு நம் வியூகம் தெரியும். அமைச்சர்களை தவிர்த்து மற்றவர்களுக்காக சில விசயங்களை சொல்லவேண்டியதிருக்கிறது. தி.மு.க.வும் ஸ்டாலினும் போடும் கணக்குகள் எதுவும் வொர்க் அவுட் ஆகாது. ஸ்டாலினை நாங்கள் பார்த்துக் கொள்கிறோம். உங்கள் கவனம் தேர்தலில்தான் இருக்கணும். ஒவ்வொரு வார்டிலும் தகுதியான வேட்பாளர்களை தேர்வு செய்து போட்டியிட வைக்க வேண்டும். அமைச்சர்கள் உங்களிடம் சில பட்டியல்களை தருவார்கள். அதன்படி வேட்பாளர்களை களமிறக்க வேண்டும்.

கிராம வார்டுகளில் கட்சியோ சின்னமோ இல்லையென்பதை நினைவில் வைத்துக்கொள்ளுங்கள். அதற்கேற்ப, நாம் நிறுத்தும் வேட்பாளரையும் அவர் போட்டியிடும் சின்னத்தையும் மக்களிடம் அழுத்தமாக பதிவு செய்வதில் கவனமாக இருக்க வேண்டும். மேலும், கூட்டணிக் கட்சிகளிடத்தில் சமரசம் ஆகாமல் அவர்களை கையாள வேண்டும். ஒவ்வொரு ஊராட்சியிலும் பெரும்பான்மை இடங்களில் அ.தி.மு.க. போட்டியிடுகிற மாதிரி பார்த்துக்கொள்ளுங்கள் என அட்வைஸ் செய்த எடப்பாடி, "ஏதேனும் ஒரு பிழையை கண்டுபிடித்து கோர்ட்டுக்கு தி.மு.க. போகும். அதில் எப்படிப்பட்ட உத்தரவு வந்தாலும் நமக்கு நல்லதுதான்' என்றிருக்கிறார். அப்போது, "தேர்தல் நடக்குமா? நடக்காதா?' என தென்மாவட்ட மா.செ.க்கள் கேள்வி எழுப்ப, "தேர்தலை நடத்துவதற்கு நாம் தயாராக இருக்கிறோம். மக்களுக்கு பொங்கல் பரிசு அறிவித்ததும் அதற்காகத்தான். அதனால், நம்பிக்கையாக இருங்கள்' என அழுத்தமாக சொன்னார் எடப்பாடி''’ என்கிறார்கள் கூட்டத்தில் கலந்துகொண்ட மா.செ.க்கள்.


இதற்கிடையே கூட்டணிக் கட்சிகளிடத்திலும் பேச்சுவார்த்தையை நடத்தியிருக்கிறது அ.தி.மு.க. தலைமை. மாநகராட்சி மேயர் பதவிகளும், நகராட்சி தலைவர் பதவிகளும் இத்தனை இடங்கள் வேண்டுமென எதிர்பார்ப்பில் இருந்த தோழமைக் கட்சிகள், தற்போது அந்த யோசனைகளை விட்டுவிட்டு கிராம ஊராட்சிகளில் கணிசமான இடங்களை கைப்பற்ற துடித்துக்கொண்டிருக்கின்றன.

அ.தி.மு.க.வைப் போலவே மா.செ.க்கள் மற்றும் எம்.எல்.ஏ.க்கள் கூட்டத்தை நடத்தியது தி.மு.க. மு.க.ஸ்டாலின் தலைமையில் ஜெகத்ரட்சகன் எம்.பி.க்கு சொந்தமான சென்னை அக்கார்ட் ஹோட்டலில் நடந்த ஆலோசனைக் கூட்டத் தில் பேசிய அனைவருமே, "எடப்பாடியும் தேர்தல் ஆணையரும் இணைந்து தேர்தலை நடத்துவது போல நாடகம் ஆடுகிறார்கள். உச்சநீதிமன்றத்தின் தீர்ப்பை உதாசீனப்படுத்துகிறார்கள். கோர்ட் அவமதிப்பு வழக்குப் போட வேண்டும்' என வலியுறுத்தினர். முன்னாள் அமைச்சர்கள் பொன்முடி, எ.வ.வேலு, நேரு போன்றவர்கள், தங்கள் மாவட்ட ஊராட்சிகளில் உள்ள வார்டு குளறுபடிகளை பற்றி விவரித்தனர். நீதிமன்ற உத்தரவுகளும் விதிகளும் எப்படியெல்லாம் மீறப்பட்டது என்பதும் கூட்டத்தில் எதிரொலித்தது. குறிப்பாக, வழக்கறிஞர் என்.ஆர். இளங்கோ அதனை சுட்டிக்காட்டினார். ஜெ.அன் பழகனின் பேச்சுதான் கூட்டத்தை சூடாக்கியது.

இது குறித்து தி.மு.க. மா.செ.க்களிடம் விசாரித்தபோது, ‘ஸ்டாலினிடம் சில கேள்விகளை முன் வைத்தார் அன்பழகன். அதாவது, "சட்டமன்ற தோல்வியை ஆராய கட்சி நிர்வாகிகளுடன் கள ஆய்வை நடத்தினீர்கள். பலரும் புகார் வாசித்தார் கள். தவறு செய்தவர்கள் மீது நடவடிக்கை எடுப்பதாக சொன்ன நீங்கள் எடுக்கவில்லை. இடைத்தேர்தல் தோல்விக்குப் பிறகும் அதே ரீதியிலான அணுகுமுறைதான். நடவடிக்கை எடுத்தீர்களா? பல பேர் அ.தி.மு.க. தலைமையோடு நெருக்கமாக இருக்கிறார்கள். நம்முடைய கூட்டணியில் இருந்த ஒரு கட்சியின் தலைவரே, முதல்வரை சந்திக்கிறார். ஆலோசிக்கிறார். அப்படின்னா என்ன அர்த்தம்?

"அவர்களையெல்லாம் கூட்டணியிலிருந்து கழட்டி எறியுங்கள்' என காட்டமாக சொல்ல, கூட்டமே அதிர்ச்சியாக ஸ்டாலினை பார்த்தது. அதேசமயம், அன்பழகனின் பேச்சுக்கு எதிர்ப்பும் வந்தது. அப்போது பேசிய நேரு, "கூட்டணிக் கட்சிகளை நாமாக கழட்டிவிடுவதில்லை. அவர்களாகவே கழண்டு போகும் யுக்தியை கலைஞர் கடைப்பிடிப்பார். அது போன்று தலைவர் ஸ்டாலினும் செய்வார்' என சொன்னார். இறுதியாக பேசிய ஸ்டாலின், அன்பழகன் சொன்னதை மனதில் நிறுத்தி, "எடப்பாடியோடு பிஸ்னெஸ் ரீதியாக தொடர்பு வைத்திருப்பவர்கள் இப்போதே தொடர்பை துண்டித்துக் கொள்ள வேண்டும்' என எச்சரித்தார் என சுட்டிக்காட்டினார்கள்.

இதற்கிடையே, உள்ளாட்சித் தேர்தலில் 50 சதவீத இட ஒதுக்கீடு மகளிர்க்கு இருப்பதால் தி.மு.க. மகளிர் அணி கூட்டத்தை ஹோட்டல் சவேராவில் நடத்திய கனிமொழி எம்.பி., தேர்தலை எதிர்கொள்வது குறித்து விவாதித்தார். இந்தச் சூழலில், விதிகளுக்குப் புறம்பாக நடக்கும் தேர்தலுக்கு தடை கிடைத்துவிடும் என்கிற நம்பிக்கையில் இருக்கிறது தி.மு.க.

 

 

Next Story

'இந்தியா கூட்டணி ஆட்சிக்கு வருவது அவசியம்' - தமிமுன் அன்சாரி பேட்டி

Published on 19/03/2024 | Edited on 19/03/2024
'It is necessary for the India coalition to come to power' - Tamimun Ansari interview

நாட்டின் 18வது நாடாளுமன்ற மக்களவைத் தேர்தலுக்கான தேதிகள் அறிவிக்கப்பட்டுள்ள நிலையில், முதற்கட்டமாகத் தமிழ்நாட்டில் ஏப்ரல் 19 ஆம் தேதி நாடாளுமன்றத் தேர்தல் நடைபெற இருக்கிறது. இந்த நாடாளுமன்றத் தேர்தலின் வாக்குப்பதிவு எண்ணிக்கை, ஜூன் 4 ஆம் தேதி நடைபெறவுள்ளது. ஏற்கெனவே தமிழகத்தில் உள்ள அரசியல் கட்சிகள் கூட்டணி, தொகுதிப் பங்கீடு எனத் தீவிரம் காட்டி வரும் நிலையில், தேர்தல் தேதி அறிவிக்கப்பட்டதால் தேர்தல் களம் அனல் பறக்க ஆரம்பித்துவிட்டது.

இந்நிலையில் மனிதநேய ஜனநாயக கட்சியின் தமிமுன் அன்சாரி திமுக கூட்டணிக்கு தனது ஆதரவை தெரிவித்துள்ளார். முன்னதாக அவர் அதிமுக கூட்டணிக்கு ஆதரவு தெரிவிப்பதாக தகவல்கள் வெளியாகி இருந்த நிலையில், இன்று அண்ணா அறிவாலயத்திற்கு வந்து முதல்வரை சந்தித்து விட்டு பின்னர் செய்தியாளர்களைச் சந்தித்த தமிமுன் அன்சாரி பேசுகையில், ''இந்த தேர்தலை பொறுத்தவரை மனிதனை ஜனநாயக கட்சி வெறும் அரசியல் காளமாக இதனைப் பார்க்கவில்லை.

மாறாக ஜனநாயகத்திற்கும் பாசிசத்திற்கும் இடையேயுமான சித்தாந்த போராட்டமாக பார்க்கிறது. அந்த அடிப்படையில் இந்த முடிவை மனிதநேய ஜனநாயக கட்சி எடுத்திருக்கிறது. திமுக தலைவர் மு.க.ஸ்டாலினை சந்தித்து எங்களுடைய ஆதரவை வழங்கி இருக்கிறோம். இந்தியாவுடைய ஜனநாயகம், பன்முக கலாச்சாரம், அரசியல் சாசன சட்டத்துடைய மாண்புகள், சமூக நல்லிணக்கம் ஆகியவை காப்பாற்றப்பட வேண்டும் என்றால் இந்தியா கூட்டணி ஆட்சிக்கு வருவது அவசியமாகிறது' என்றார்.

Next Story

'ஒன்றுபட்டு நிற்போம்! வென்றுகாட்டியே தீருவோம்' - திமுக தலைவர் ஸ்டாலின்

Published on 19/03/2024 | Edited on 19/03/2024
'The impossibility situation really saddens me too'-DMK President Stalin

நாட்டின் 18ஆவது நாடாளுமன்ற மக்களவைத் தேர்தலுக்கான தேதிகள் அறிவிக்கப்பட்டுள்ள நிலையில், முதற்கட்டமாகத் தமிழ்நாட்டில் ஏப்ரல் 19 ஆம் தேதி நாடாளுமன்றத் தேர்தல் நடைபெற இருக்கிறது. இந்த நாடாளுமன்றத் தேர்தலின் வாக்குப்பதிவு எண்ணிக்கை, ஜூன் 4 ஆம் தேதி நடைபெறவுள்ளது. ஏற்கெனவே தமிழகத்தில் உள்ள அரசியல் கட்சிகள் கூட்டணி, தொகுதிப் பங்கீடு எனத் தீவிரம் காட்டி வரும் நிலையில், தேர்தல் தேதி அறிவிக்கப்பட்டதால் தேர்தல் களம் அனல் பறக்க ஆரம்பித்துவிட்டது.

நாளை திமுக மாவட்ட செயலாளர்கள் கூட்டம் நடைபெறும் என அக்கட்சியின் பொதுச் செயலாளர் துரைமுருகன் அறிவித்துள்ளார். இந்தநிலையில் 'ஒன்றுபட்டு நிற்போம்! வென்றுகாட்டியே தீருவோம்' என திமுக தலைவர் ஸ்டாலின் அறிக்கை வெளியிட்டுள்ளார்.

அந்த அறிக்கையில், 'இந்திய ஒன்றியத்தின் பன்முகத்தன்மையை காக்கவும், மதவெறி சக்திகளை வீழ்த்தி மதநல்லிணக்கம் தழைக்கவும், அரசியலமைப்புச் சட்டம் வழங்கியுள்ள ஜனநாயகத்தை மீட்கவும் ‘இந்தியா’ கூட்டணியை 2024 நாடாளுமன்றத் தேர்தல் களத்தில் வெற்றிபெறச் செய்ய வேண்டும் என்கிற ஒரே இலக்குடன் திராவிட முன்னேற்றக் கழகத்துடன் இணைந்து நிற்கும் தோழமைக் கட்சியினர் அனைவரையும் வரவேற்கிறேன்.

கடந்த 10 ஆண்டுகாலமாக இந்திய ஒன்றியத்தை ஆட்சி செய்த பா.ஜ.க. அரசின் மக்கள் விரோத – மாநில உரிமைகளைப் பறித்த ஆட்சியை விரட்டிட, 2024 நாடாளுமன்றத் தேர்தல் களமே சரியான வாய்ப்பாகும் என்கிற உறுதியான நம்பிக்கையுடன் இந்தியா கூட்டணியில் - திராவிட முன்னேற்றக் கழகத்திற்குத் தோள் கொடுக்கும் தோழமைக் கட்சிகளுடன் களத்தைச் சந்திக்கிறோம்.

2019 நாடாளுமன்றத் தேர்தலுக்கு முன்பே தோழமைக் கட்சியினருடன் ஏற்பட்ட கொள்கை உறவு, தேர்தல் கூட்டணியாக இணைந்து 2019நாடாளுமன்றத் தேர்தல் களம், 2021 சட்டமன்றத் தேர்தல் களம், ஊரக உள்ளாட்சித் தேர்தல் களம், மாநகராட்சி - நகராட்சித் தேர்தல் களம் என அனைத்திலும் தொடர் வெற்றியைப் பெற்று வருகிறோம். ஐந்தாவது முறையாகத் தொடரும் இந்த கொள்கை அடிப்படையிலான வெற்றிக் கூட்டணியை அமைத்துள்ள தோழமைக் கட்சியினருக்கு உரிய வகையில் இடங்களை ஒதுக்கி, தொகுதிப் பங்கீடுகளைச் செய்யும் ஜனநாயகப்பூர்வமான நடைமுறையை திராவிட முன்னேற்றக் கழகம் தொடர்ந்து கடைபிடித்து வருகிறது.

பாசிசத்தை வீழ்த்திட வேண்டும் என்கிற ஒற்றை இலக்குடனான இந்தப் பயணத்தில், ஒரு சில ஜனநாயக இயக்கங்களுக்குத் தொகுதி ஒதுக்க இயலாத சூழல் ஏற்பட்டிருப்பது உண்மையில் எனக்கும் வருத்தத்தைத் தருகிறது.  தொகுதிகளின் மொத்த எண்ணிக்கையையும் கூட்டணியின் வலிமையையும் கருத்தில் கொண்டு, இதுகுறித்து அனைத்துத் தோழமை இயக்கங்களிடமும் என் சார்பிலும் கழகத்தின் சார்பிலும் விளக்கப்பட்டுள்ளது.

நடைபெறவிருக்கும் நாடாளுமன்றத் தேர்தல் களத்தில் யாரை வீழ்த்த வேண்டும், அதற்கு எந்த வகையில் தங்கள் பங்களிப்பை வழங்க வேண்டும் என்பதைத் தொகுதிப் பங்கீட்டில் வாய்ப்பு பெறாத தோழமைக் கட்சியினரும் உணர்ந்து, உளப்பூர்வமான ஆதரவை நல்கி, தேர்தல் பணியாற்ற முடிவெடுத்திருப்பது ஆக்கப்பூர்வமான ஜனநாயகப் பண்பை எடுத்துக் காட்டுவதாக உள்ளது.

சட்டமன்றத் தேர்தலில் வெற்றி பெற்ற மனிதநேய மக்கள் கட்சிக்கும், தமிழக வாழ்வுரிமைக் கட்சிக்கும் நாடாளுமன்றத் தேர்தலில் இடம் ஒதுக்க இயலாமல் போன நிலையிலும், மதவெறி பாசிசத்தை வீழ்த்திடத் தி.மு.க தலைமையிலான கூட்டணிக்குப் பக்கபலமாக இருப்போம் என அக்கட்சிகளின் நிர்வாகிகள் முடிவெடுத்து ஆதரவைத் தெரிவித்திருப்பதை வரவேற்கிறேன். மனதார நன்றி தெரிவித்துக் கொள்கிறேன்.

அதுபோலவே, இந்தியா கூட்டணி வெற்றி பெறக் களப்பணியாற்ற முன்வந்துள்ள அனைத்து ஜனநாயக இயக்கங்களுக்கும், நேரில் வந்து ஆதரவு தெரிவித்து வரும் அமைப்பினருக்கும் நன்றியினை உரித்தாக்குவதோடு, 2024 நாடாளுமன்றத் தேர்தல் களத்தில், “நாற்பதும் நமதே! நாடும் நமதே!” என்கிற வகையில் இந்தியா கூட்டணி மகத்தான வெற்றி அடைந்திடவும், இந்திய ஒன்றியத்தில் ஆட்சி மாற்றத்தை நிகழ்த்திக் காட்டிடவும் தங்கள் அனைவரின் ஒத்துழைப்பையும் வேண்டுகிறேன். ஒன்றுபட்டு நிற்போம்! வென்றுகாட்டியே தீருவோம்!' என தெரிவிக்கப்பட்டுள்ளது.