Skip to main content

முதலமைச்சரின் பொருளாதார ஆலோசனைக் குழு; என்ன செய்திருக்கிறார்கள் இந்த ஐவர்..?

Published on 22/06/2021 | Edited on 22/06/2021

 

 

economic advisory team in tn govt

 

16- வது தமிழக சட்டப்பேரவையின் முதல் கூட்டம் நேற்று (21/06/2021) காலை 10.00 மணிக்கு சென்னை கலைவாணர் அரங்கத்தில் தமிழக ஆளுநர் பன்வாரிலால் புரோஹித் உரையுடன் தொடங்கியது. தமிழக ஆளுநர் உரையில் பொருளாதார ஆலோசனை குழு உள்ளிட்ட பல அறிவிப்புகள் இடம் பெற்றிருந்தது. 

 

அதில், தமிழக முதலமைச்சருக்கான பொருளாதார ஆலோசனை குழு அமைப்பது குறித்த அறிவிப்பு பலரையும் ஆச்சரியப்படுத்தியது. நோபல் பரிசுப் பெற்ற எஸ்தர் டஃப்லோ, ரிசர்வ் வங்கியின் முன்னாள் ஆளுநர் ரகுராம் ராஜன், முன்னாள் பொருளாதார ஆலோசகர் அரவிந்த் சுப்ரமணியன், நாராயண், பொருளாதார நிபுணர் ஜீன் ட்ரீஸ் உள்ளிட்ட ஐந்து பேர் இந்த பொருளாதார ஆலோசனை குழுவில் இடம் பெற்றுள்ளனர். இவர்களில் மூன்று பேர் தமிழகத்தைப் பூர்வீகமாகக் கொண்டவர்கள். இக்குழுவில் இடம்பெற்றுள்ளவர்களின் பின்னணி குறித்து இத்தொகுப்பில் பார்ப்போம்.

 

ரகுராம் ராஜன்:

தமிழகத்தைப் பூர்வீகமாகக் கொண்டவர் ரகுராம் ராஜன். இவர் இந்திய ரிசர்வ் வங்கியின் ஆளுநர் என்ற மிகப்பெரிய பதவியில் இருந்தவர். கடந்த 2008- 2009 ஆம் ஆண்டில் அமெரிக்கப் பொருளாதாரம் பின்னடைவைச் சந்திக்கும் என முன்கூட்டியே கணித்து எச்சரிக்கை மணியை அடித்தவர். முன்னாள் பிரதமர் மன்மோகன் சிங்கின் முதன்மை ஆலோசகராக இருந்தவர். மத்திய பா.ஜ.க. அரசின் பண மதிப்பு நீக்க நடவடிக்கைக்கு எதிராகப் போர்க்கொடி உயர்த்தியவர். பண மதிப்பு நீக்கம், சரியான முறையில் அமல்படுத்தப்படாத ஜி.எஸ்.டி. போன்றவை பொருளாதாரத்தின் வேகத்தைக் குறைத்து விட்டதாக மத்திய அரசைச் சாடியவர்.

 

அரவிந்த் சுப்ரமணியன்: 

தமிழகத்தைப் பூர்வீகமாகக் கொண்ட அரவிந்த் சுப்ரமணியன் உலக வங்கியில் முக்கிய பதவிகளை அலங்கரித்தவர். பிரதமர் நரேந்திர மோடியின் பொருளாதார ஆலோசகர் குழுவில் 2014- ஆம் ஆண்டு முதல் மூன்று ஆண்டுகள் இடம் பதவி வகித்தார். பண மதிப்பு நீக்கத்தின் போது தலைமைப் பொருளாதார ஆலோசகராக இருந்தார். இவரது பதவிக்காலத்தை நீட்டிக்க மத்திய அரசு முன் வந்த போதும், அதை மறுத்துவிட்டு அமெரிக்கா சென்றார். அங்கிருந்து இந்தியா திரும்பிய பின் ஹரியானா மாநிலத்தில் உள்ள அசோகா பல்கலைக்கழகத்தில் அவர் பேராசிரியராகப் பணியாற்றினார். 

 

எஸ்தர் டஃப்லோ: 

பிரான்ஸ் நாட்டைப் பூர்வீகமாகக் கொண்டவர் எஸ்தர் டஃப்லோ. இவர் அமெரிக்காவில் உள்ள மசாசூசெட்ஸ் தொழில்நுட்பக் கழகத்தின் பேராசிரியராக உள்ளார். வறுமை ஒழிப்பு குறித்து இந்தியா மட்டுமின்றி உலகமெங்கும் ஆய்வுகளை நடத்தியுள்ளார். 2019- ஆம் ஆண்டுக்கான நோபல் பரிசை கணவர் அபிஜித் பானர்ஜியுடன் இணைந்து பெற்றுள்ளார். ஏழை, எளியோரின் வறுமையைப் போக்குவதற்கான ஆய்வுகளை முன்னிலைப்படுத்தியவர். 2013- ஆம் ஆண்டு அப்போதைய அமெரிக்க அதிபர் பராக் ஒபாமாவின் கீழ் செயல்பட்ட உலகளாவிய பொருளாதார ஆணையத்தின் ஆலோசகராகப் பணியாற்றியுள்ளார். 

 

ஜீன் ட்ரீஸ்:

பெல்ஜியம் நாட்டைச் சேர்ந்த பொருளாதார நிபுணர் ஜீன் ட்ரீஸ். இவர் மகாத்மா காந்தி ஊரக வேலை வாய்ப்புத் திட்டத்தைக் கொண்டு கிராமப் புறங்களில் உள்ள ஏழை, எளிய மக்களுக்கு வேலை வாய்ப்புகளை உருவாக்கியவர். இவர் சமூக செயற்பாட்டாளரும் கூட. ஆண், பெண் பாகுபாடின்றி அனைவரும் சமம் என்ற கோட்பாட்டை முன்னெடுத்தவர். முன்னாள் பிரதமர் மன்மோகன் சிங்கின் ஆட்சிக் காலத்தில், பொருளாதார ஆய்வுக் குழு உறுப்பினராக இருந்துள்ளார். கல்வி, வேலை வாய்ப்பு, குழந்தைப் பராமரிப்பு போன்ற சமூகப் பணிகளில் ஈடுபட்டு வருகிறார். 

 

எஸ்.நாராயண்:

தமிழகத்தைப் பூர்வீகமாகக் கொண்ட எஸ்.நாராயண் சென்னையைச் சேர்ந்தவர். இவர் ஓய்வுபெற்ற ஐ.ஏ.எஸ். அதிகாரி ஆவார். 1965- ஆம் ஆண்டு முதல் 2004- ஆம் ஆண்டு வரை மாநில அளவிலும், மத்திய அரசிலும் பல்வேறு உயர் பதவிகளை வகித்தவர். நிதி, தொழில்,  வர்த்தகம், கப்பல் போக்குவரத்து, எரிபொருள், விவசாயம், சாலை வசதி எனப் பல துறைகளில் தலைமை வகித்தவர். முன்னாள் பிரதமர் மன்மோகன்சிங்கின் ஆலோசகராகவும் இருந்துள்ளார். அதேபோல், முன்னாள் பிரதமர் வாஜ்பாய் ஆட்சிக் காலத்தில் மத்திய அரசின் நிதிச் செயலாளராக இருந்துள்ளார். பணி ஓய்வுபெற்ற பிறகும், பல தொழில் நிறுவனங்களுக்கு இன்றும் ஆலோசகராக இருந்து வருகிறார். 

 


 

சார்ந்த செய்திகள்

 

Next Story

அரசு உதவிபெறுமம் பள்ளிகளிலும் காலை சிற்றுண்டித் திட்டம்; மாணவர்களுடன் உணவருந்திய அமைச்சர்

Published on 15/07/2024 | Edited on 15/07/2024
 Minister Anbil Mahesh having breakfast with students

தமிழக முதல்வரின் கனவு திட்டமான காலை சிற்றுண்டி திட்டத்தை திருவெறும்பூர் சட்டமன்ற உறுப்பினர் தமிழக பள்ளிக்கல்வித்துறை அமைச்சர்ரும்மான அன்பில் மகேஸ் பொய்யாமொழி தனது தொகுதிக்கு உட்பட்ட அசுர் ஊராட்சியில் அரசு உதவி பெறும் பள்ளியில் திட்டத்தினை துவக்கி வைத்தார். 

தமிழக முதல்வர் பள்ளி குழந்தைகளின் நலன் கருதி தமிழக முழுவதும் அரசு பள்ளிகளில் காலை சிற்றுண்டி திட்டத்தினை துவக்கி வைத்தார். மேலும் இதனை அடுத்து தமிழக முழுவதும் அரசு உதவி பெறும் பள்ளிகளில் ஊரகப் பகுதிகளில் உள்ளபள்ளி மாணவர்களும் பயன்பெறும் வகையில் தமிழக முதல்வர்  காலை சிற்றுண்டி திட்டத்தை இன்று திருவள்ளூர் மாவட்டத்தில் இன்று துவக்கி வைத்தார்.

இதனைத் தொடர்ந்து திருவெறும்பூர் சட்டமன்ற  உறுப்பினரும் தமிழக பள்ளிக்கல்வித்துறை அமைச்சர்ரும்மான அன்பில் மகேஸ் பொய்யாமொழி இன்று தனது சட்டமன்ற தொகுதிக்கு உட்பட்ட அசூர் ஊராட்சியில் அரசு உதவி பெறும் பள்ளியான  ஸ்ரீ முருகன் அரசு உதவி பெறும் பள்ளியில் திட்டத்தினை துவக்கி வைத்தார். இப்பள்ளியில் 64 மாணவ மாணவிகள் படித்து வருகின்றனர். 

இந்நிகழ்வில்  மாவட்ட மகளிர் திட்ட இயக்குனர் ரமேஷ் குமார் மாவட்ட முதன்மை கல்வி அலுவலர் கிருஷ்ணப்பிரியா மாவட்ட கல்வி அலுவலர் பேபி மற்றும் பள்ளி தாளாளர் கார்த்திகேயன் தலைமை ஆசிரியர் சுமதி உட்பட  மாவட்ட வருவாய் அலுவலர் ராஜலட்சுமி தாசில்தார் ஜெயபிரகாசம் வட்டார வளர்ச்சி அலுவலர்கள் நரசிம்மன் ஸ்ரீதர் , தலைமை செயற்குழு உறுப்பினர் சேகரன் திருவெறும்பூர் தெற்கு ஒன்றிய செயலாளர் கங்காதரன், வடக்கு ஒன்றிய கழகச் செயலாளர் கருணாநிதி ஒன்றிய குழு தலைவர் சத்யா கோவிந்தராஜ், அசுர் ஊராட்சி மன்ற தலைவர் ராணி குமரகுரு உட்பட கட்சி நிர்வாகிகள் தொண்டர்கள் என ஏராளமானோர் கலந்து கொண்டனர்.

Next Story

“தமிழகத்திற்குத் தண்ணீர் திறந்துவிட முடியாது” - கர்நாடக முதல்வர் திட்டவட்டம்

Published on 12/07/2024 | Edited on 12/07/2024
Karnataka  refusal to open water to Tamil Nadu

தமிழகத்திற்கு நாள் ஒன்றுக்கு 1 டிஎம்சி தண்ணீர் திறக்க வேண்டும் என்று காவிரி ஒழுங்காற்று குழு பரிந்துரை செய்திருந்தது. இந்த நிலையில் கர்நாடக முதல்வர் சித்தராமையா மற்றும் துணை முதல்வர் டி.கே.சிவக்குமார் தலைமையில் தமிழகத்திற்குத் தண்ணீர் திறப்பது குறித்து அதிகாரிகளுடன் ஆலோசனை நடத்தப்பட்டது. இதையடுத்து, தமிழகத்திற்குத் தண்ணீர் தரவே முடியாது என்று கர்நாடக முதல்வர் சித்தராமையா திட்டவட்டமாகத் தெரிவித்துள்ளார்.

இது தொடர்பாகச் செய்தியாளர்களைச் சந்தித்த கர்நாடக முதல்வர் சித்தராமையா, “காவிரி பாசனப் பகுதியில் 28 சதவீதம் தண்ணீர் பற்றாக்குறை உள்ளது. கர்நாடகாவின் வலியுறுத்தலை மீறி தண்ணீர் திறக்க காவிரி ஒழுங்காற்று குழு உத்தரவிட்டுள்ளது. கர்நாடகாவில் பற்றாக்குறை இருப்பதால் தற்போதைக்கு தமிழகத்திற்கு தண்ணீர் திறந்துவிட  முடியாது” என்று தெரிவித்தார். மேலும் இது குறித்து ஆலோசனை நடத்தக் கர்நாடக மாநிலத்தில் உள்ள அனைத்து கட்சியினருக்கும் முதல்வர் சித்தராமையா அழைப்பு விடுத்துள்ளார்.