Skip to main content

தற்கொலை செய்துகொண்ட கல்லூரி மாணவி! நிறைந்திருக்கும் மர்மங்கள்! 

Published on 11/03/2023 | Edited on 11/03/2023

 

College girl passed away in dindigul

 

கள்ளக்குறிச்சி சக்தி பள்ளி மாணவி மரணத்துக்கு அவரது பெற்றோர் நீதி கேட்டுப் போராடிக் கொண்டிருக்கும் வேளையில், செம்மடைப்பட்டி சக்தி கல்லூரியிலும் அதேபோல் ஒரு சம்பவம் நடந்துள்ளது.

 

திண்டுக்கல் மாவட்டத்திலுள்ள ஒட்டன்சத்திரம் அருகே இருக்கும் பழையபட்டியைச் சேர்ந்த கன்னியப்பன்-பழனியம்மாள் தம்பதியின் மகள் கார்த்திகா ஜோதி. இவர் செம்மடைப் பட்டியிலுள்ள சக்தி கலை மற்றும் அறிவியல் கல்லூரியில் பி.எஸ்.ஸி நர்சிங் முதலாமாண்டு படித்து வந்தார். கல்லூரி விடுதியிலேயே தங்கிப் படித்தார். இந்நிலையில் கடந்த 21-ஆம் தேதி காலை கல்லூரியின் மூன்றாவது மாடியிலிருந்து திடீரென கார்த்திகா ஜோதி குதித்திருக்கிறார்.

 

College girl passed away in dindigul

 

இதில் பலத்த காயமடைந்த மாணவியை அரசு மருத்துவமனைக்குச் கொண்டு செல்லாமல் ஒட்டன்சத்திரம் தனியார் மருத்துவமனையில் சிகிச்சைக்கு சேர்த்திருக்கிறது கல்லூரி நிர்வாகம். பெற்றோர்களுக்கு தகவல் தெரிந்து பதறியடித்து வந்த அவர்களை பெண்ணைப் பார்க்கவே அனுமதிக்கவில்லை. இந்த விஷயம் காட்டுத்தீ போல் பரவியதைக் கண்ட கல்லூரி நிர்வாகம் உடனே கல்லூரிக்கு விடுமுறை அறிவித்துவிட்டு போலீசில் புகார் செய்தது.

 

மாவட்ட காவல் கண்காணிப்பாளர் பாஸ்கரன் மருத்துவமனைக்குச் சென்று விசாரணை நடத்திவிட்டு போலீஸ் பாதுகாப்பை பலப்படுத்தினார். ஆறு நாட்களாக சிகிச்சை பெற்று வந்த மாணவி கார்த்திகா ஜோதி சிகிச்சை பலனளிக்காமல் கடந்த 26-ஆம் தேதி உயிரிழந்துவிட்டதாகக் கூறி திண்டுக்கல் அரசு மருத்துவமனைக்கு கொண்டு வந்தனர். மாணவியின் பெற்றோரும், உறவினர்களும் மாணவியின் சாவில் மர்மம் இருக்கிறது என்று கூறி மாணவியின் உடலை வாங்காமல் சாலை மறியலில் ஈடுபட்டனர். காவல்துறை அவர்களை சமாதானப்படுத்தி மாணவியின் உடலை ஒப்படைத்திருக்கிறார்கள்.

 

College girl passed away in dindigul

 

ஜனநாயக மாதர் சங்கத்தின் மாநிலத் துணைத் தலைவரும் முன்னாள் எம்.எல்.ஏ.வுமான பாலபாரதி, "கள்ளக்குறிச்சி சக்தி பள்ளியில் நடந்ததுபோல தான் சக்தி கல்லூரியில் இந்தப் பெண்ணுக்கும் நடந்திருக்கிறது. சம்பவத்தன்று காலை எட்டரை மணிக்கு மூன்றாவது மாடியிலிருந்து தற்கொலை செய்வதற்காகக் குதித்திருக்கிறார் என்று நிர்வாகத்தில் கூறுகிறார்கள். அரசு மருத்துவமனைக்குக் கொண்டு போகாமல் தனியார் மருத்துவமனைக்குக் கொண்டு சென்றிருக்கிறார்கள். அதுவும் மதியம் ஒரு மணிக்குத்தான் மருத்துவமனையில் சேர்த்திருக்கிறார்கள். இடைப்பட்ட காலத்தில் என்ன நடந்தது? அந்த மாணவி மாடியிலிருந்து குதித்தபோதே இறந்துவிட்டாரா? அல்லது உயிருக்கு போராடிக் கொண்டிருந்த மாணவியை மருத்துவமனையில் சேர்த்தார்களா? உயிரை மாய்த்துக் கொள்ளும் அளவுக்கு மாணவிக்கு என்ன பிரச்சனை? மாணவியின் பெற்றோர்களையே மகளைப் பார்க்க அனுமதிக்காதது ஏன்? என நிறைய கேள்விகள் எழுகின்றன.

 

இதுபோல் ஒரு சம்பவம் நடந்தால் ஆர்.டி.ஓ., தாசில்தார் விசாரணை செய்வார்கள். ஆனால் இது முழுக்க முழுக்க எஸ்.பி. கட்டுப்பாட்டில் நடந்திருக்கிறது. மாணவியின் பிரேதப் பரிசோதனையின் போது பாலியல்ரீதியாக ஏதும் நடந்திருக்கிறதா என்று பார்க்கவேண்டும் என்று நான் சொன்னதன் பேரில்தான் ஒரு லேடி டாக்டரையே நியமித்தனர். காவல்துறையும், பட்டியலின சமூகத்தைச் சேர்ந்த ஒரு அமைப்பும் கல்லூரி நிர்வாகத்திடம் பேரம் பேசி 10 லட்ச ரூபாயை பெண்ணின் பெற்றோருக்கு வாங்கிக்கொடுத்திருக்கிறார்கள். பணத்தைக் கொடுத்து உண்மையை மூடிமறைத்திருக்கிறார்கள். முதல்வர் இந்த விஷயத்தில் கவனம்செலுத்தி மாணவியின் சாவை மீண்டும் விசாரிக்க உத்தரவிட வேண்டும். மாணவியின் குடும்பத்திற்கு அரசு ஒரு கோடி ரூபாய் இழப்பீடு கொடுக்க வேண்டும். இந்த விஷயத்தில் தொடர்ந்து ஜனநாயக மாதர் சங்கம் போராடும்” என்றார்.

 

College girl passed away in dindigul

 

இந்த குற்றச்சாட்டுகளைப் பற்றி எஸ்.பி. பாஸ்கரனிடம் கேட்டபோது... “கல்லூரி நிர்வாகம்தான் அந்த ஆஸ்பத்திரியில் சேர்த்தது. மருத்துவமனையில் சிகிச்சை பெற்று வந்த அந்த மாணவியிடம் நீதிபதியே நேரில் வந்து வாக்குமூலம் பெற்றிருக்கிறார். அந்தக் கல்லூரி விடுதியில் ஒரே சமூகத்தைச் சேர்ந்த நான்கு மாணவிகள் தங்கியிருக்கிறார்கள். அவர்களுக்குள் ஏதோ ஈகோ பிரச்சனை ஏற்பட்டிருக்கிறது. அப்பொழுது அந்த மூன்று மாணவிகள் உன் காதலைப் பற்றி உங்க வீட்டில் சொல்லப் போகிறோம் என்று கூறியிருக்கிறார்கள். மாணவியின் பெற்றோர்களுக்கு விஷயம் தெரிய சத்தம் போட்டிருக்கிறார்கள். அதனால் மனம் உடைந்து அந்த மாணவி, அவங்க அம்மாவுக்கு கடிதம் எழுதி வைத்துவிட்டு தற்கொலை செய்திருக்கிறார்.


அந்த மூன்று மாணவிகள் மீதும் வழக்கு பதிவு செய்து தொடர்ந்து விசாரணை செய்து வருகிறோம். இதில் நாங்கள் ஏதும் உண்மையை மூடி மறைக்கவில்லை. அதுபோல் பாதிக்கப்பட்ட குடும்பத்துக்கும் நிர்வாகத்திடமிருந்து பணம் வாங்கிக் கொடுக்கவில்லை. ஒரு பொய்யான குற்றச்சாட்டைச் சுமத்தியிருக்கிறார்கள். வேண்டுமென்றால் விசாரணை செய்துகொள்ளட்டும். எங்களைப் பொறுத்தவரை மாணவி சாவில் முறையாக விசாரணை செய்து நடவடிக்கை எடுக்கப்பட்டிருக்கிறது” என்கிறார்.


மறைந்த மாணவியின் தந்தையான கன்னியப்பன், “தற்பொழுது பிள்ளையைப் பறிகொடுத்து இருப்பதால் எதுவும் பேச முடியாமல் இருக்கிறோம். ஆனால் பல விஷயங்கள் நடந்திருக்கிறது. கூடிய விரைவில் உங்களைக் கூப்பிட்டு உண்மையைச் சொல்கிறோம்” என்றார்.


சக்தி கல்லூரி சேர்மன் வேலப்பனை சந்திக்க கல்லூரிக்குச் சென்றும் கூட அவர் வெளியே போய்விட்டார் என்று கூறி கல்லூரிக்குள் அனுமதிக்கவில்லை. அவரது செல்லுக்கு (97509.....) பலமுறை தொடர்புகொண்டும் ஃபோனை அட்டெண்ட் செய்யவில்லை.

 

 

 

Next Story

‘லட்சக்கணக்கான வீடுகள் கட்டித் தர இருக்கிறோம்’ - அமைச்சர் சக்கரபாணி!

Published on 11/07/2024 | Edited on 11/07/2024
We are going to build lakhs of houses Minister Chakrapani

திண்டுக்கல் மாவட்டத்தில் உள்ள ஒட்டன்சத்திரம் தொகுதியில் உள்ள தொப்பம்பட்டியில் மக்களுடன் முதல்வர் திட்ட சிறப்பு முகாமை துவக்கி வைத்து, 53 பயனாளிகளுக்கு ரூ.12.88 இலட்சம் மதிப்பீட்டில் நலத்திட்ட உதவிகளை உணவு மற்றும் உணவு பொருள் வழங்கல் துறை அமைச்சர் சக்கரபாணி வழங்கினார். இந்த நிகழ்ச்சியில் அமைச்சர் சக்கரபாணி பேசுகையில், “தமிழ்நாடு முதலமைச்சர் மு.க.ஸ்டாலின்,, தமிழக மக்களின் நலனுக்காக பல்வேறு திட்டங்களை அறிவித்து, அந்தத் திட்டங்களின் பயன்கள் அனைத்துத் தரப்பு மக்களையும் சென்றடையும் வகையில் செயல்படுத்தி வருகிறார்.

முதலமைச்சர் எல்லோருக்கும் எல்லாம், தமிழகத்தில் சிறப்பான ஆட்சி நடத்திக் கொண்டியிருக்கிறார். அந்த வகையில் மக்களுடன் முதல்வர் சிறப்பு முகாம் ஏற்கனவே பேரூராட்சி, நகராட்சி ஆகிய பகுதியில் நடைபெற்றது. இந்த முகாமில் பெறப்பட்ட மனுக்களின் மீது உரிய நடவடிக்கை மேற்கொண்டு பொது மக்களுக்கு நலத்திட்ட உதவிகள் வழங்கப்பட்டது. அதனைத்தொடர்ந்து, அரசின் சேவைகள் விரைவாகவும், எளிதாகவும் பொதுமக்களுக்கு சென்று சேரும் வண்ணம் மக்களுடன் முதல்வர் திட்டத்தை முதலமைச்சர் தருமபுரியில் தொடங்கி வைத்துள்ளார். 

We are going to build lakhs of houses Minister Chakrapani

தமிழ்நாடு முதலமைச்சர் தருமபுரியில் தமிழகத்தில் உள்ள 37 மாவட்டங்களில் 388 ஒன்றியங்களில் உள்ள 12,525 ஊராட்சிகளில் ஒவ்வொரு பகுதிகளிலும் 5 ஊராட்சிகளை இணைத்து அல்லது 20 ஆயிரம் மக்கள் தொகை கிராம ஊராட்சிகளை தேர்ந்தெடுத்து, பொதுமக்களிடம் மனுக்களை பெற்று, அந்த மனுவின் மீது உரிய நடவடிக்கை மேற்கொண்டு நலத்திட்டம் வழங்க இருக்கிறார். அந்த வகையில் இன்றைய தினம் திண்டுக்கல் மாவட்டம், தொப்பம்பட்டி வட்டத்தில் உள்ள மேட்டுப்பட்டி, புளியம்பட்டி, கொங்கமுத்தூர், தொப்பம்பட்டி, வேலம்பட்டி, தும்மலப்பட்டி ஆகிய 6 ஊராடசிகளுக்கு உட்பட்ட பகுதிகளை சேர்ந்த மக்களிடம் மனுக்களைப் பெற்று, அதற்கு தீர்வு காணும் வகையில் மக்களுடன் முதல்வர் திட்ட முகாம் நடைபெறுகிறது.

முதலமைச்சர் தேர்தல் நேரத்தில் சொன்ன வாக்குறுதி மட்டுமல்லாமல், சொல்லாத வாக்குறுதிகளையும் நிறைவேற்றி ஒரு பொற்கால ஆட்சியினை நடத்தி வருகிறரர். எனவே முதலமைச்சர ஆட்சி பொறுப்பேற்ற பின்பு குறிப்பாக பெண்களுக்கு கலைஞர் மகளிர் உரிமைத் தொகை 1 கோடி 14 இலட்சம் நபர்களுக்கு வழங்கப்பட்டுள்ளது. மேலும், 1 இலட்சத்து 48 ஆயிரம் நபர்களுக்கு வழங்க நடவடிக்கை மேற்கொள்ளபட்டு வருகிறது. தகுதியுள்ள நபர்கள் அனைவருக்கும் கலைஞர் உரிமைத் தொகை வழங்க நடவடிக்கை மேற்கொள்ளப்படும். பெண்கள் நகர பேருந்துகளில் சென்றால் கட்டணமில்லா சலுகை வழங்கப்பட்டு வருகிறது. சுமார் 7 ஆயிரம் புதிய பேருந்துகள் இயக்குவதற்கு நடவடிக்கை மேற்கொள்ளப்பட்டு வருகிறது தமிழ்நாடு முதலமைச்சர் 1 முதல் 5 வகுப்பு வரை படிக்கின்ற சுமார் 18 இலட்சம் குழந்தைகளுக்கு காலை சிற்றுண்டி வழங்கப்படுகிறது. வருகின்ற 15 ஆம் தேதி அன்று அரசு பள்ளிகள், அரசு உதவி பெறும் பள்ளிகளில் காலை சிற்றுண்டி வழங்கும் நிகழ்வை முதலமைச்சர் துவக்கி வைக்க இருக்கிறார். 

We are going to build lakhs of houses Minister Chakrapani

புதுமைப் பெண் திட்டத்தினை ஏற்படுத்தி மாதந்தோறும் ரூ.1000 வழங்கி வருகிறார். இத்திட்டத்தினை விரிவுபடுத்தி மாணவர்களும் பயன்பெறும் வகையில் தமிழ் புதல்வன் திட்டத்தினை ஏற்படுத்தி மாணவர்களுக்கும் ரூ.1000 வழங்கப்படவுள்ளது. தமிழ்நாட்டினை குடிசை இல்லா மாநிலமாக உருவாக்க கலைஞர் கனவு இல்லம் திட்டத்தின்கீழ் தமிழ்நாட்டில் 8 இலட்சம் வீடுகள் கட்டிதர நடவடிக்கை மேற்கொள்ளப்பட்டு வருகிறது. தமிழ்நாடு முதலமைச்சர் இப்பகுதி பொதுமக்களுக்கு குடிநீர் பிரச்சனைகளை தீர்ப்பதற்கு ரூ.1000 கோடி மதிப்பீட்டில் நிதி ஒதுக்கீடு செய்யப்பட்டு, காவேரியிலிருந்து குடிநீர் கொண்டு வரும் பணிகள், துரிதமாக நடைபெற்று வருகிறது. திண்டுக்கல் மாவட்டத்தில் உள்ள நியாயவிலைக்கடைகளுக்கு சொந்த கட்டிடம் கட்டும் பணிகள் நடைபெற்று வருகிறது.

திண்டுக்கல் மாவட்டத்தில் மக்களுடன் முதல்வர் சிறப்பு  முகாம்கள் 306 கிராமப்புற பஞ்சாயத்து பகுதிகளில் 11.07.2024 முதல் 23.08.2024  வரை 23 நாட்கள்  68 முகாம்கள் காலை 10.00 மணி முதல் பிற்பகல் 3.00 மணி வரை  நடைபெறவுள்ளது. அன்றாடம் பொதுமக்கள் அணுகும் வருவாய்த்துறை, ஊரக வளர்ச்சித்துறை, காவல்துறை, மின்சாரத்துறை, வீட்டு வசதி வாரியத்துறை, மருத்துவத்துறை, மாவட்ட தொழில் மையம், பால்வளத்துறை, மாற்றுத்திறனாளிகள் நலத்துறை, சமூக நலத்துறை, ஆதிதிராவிடர் மற்றும் பிற்படுத்தப்பட்டோர் நலத்துறை, கூட்டுறவுத்துறை, தாட்கோ, வேலைவாய்ப்புத்துறை, வேளாண்மைத்துறை, மீன்வளத்துறை, கால்நடை பராமரிப்புத்துறை, தொழிலாளர் நலத்துறை, பொது மேலாளர் (முன்னோடி வங்கி), மற்றும் மகளிர் திட்டம் ஆகிய 22 துறைகள் தொடர்புடைய கோரிக்கை மனுக்கள் இச்சிறப்பு முகாம்களில் பெறப்பட உள்ளது.

இவ்வாறு பெறப்படும் அனைத்து மனுக்களும் சம்மந்தப்பட்ட துறையினரால் பரிசீலனை செய்யப்பட்டு 30 தினங்களுக்குள் தகுதியின் அடிப்படையில் தீர்வு வழங்கப்படும். அரசின் திட்டங்கள் கடைகோடி மக்களுக்கும் சென்று சேரும் வகையில், மக்களுக்காகவே இந்த அரசு என்ற வகையில் செயல்பட்டு, இந்தியாவிலேயே எந்த மாநிலத்திலும் செயல்படுத்தப்படாத திட்டங்களை செயல்படுத்தி, பொற்கால ஆட்சி நடத்தி வருகிறார்” என்று கூறினார். 

Next Story

பழனி கோவில் நிர்வாகத்தை கண்டித்து போராட்டம் அறிவிப்பு

Published on 10/07/2024 | Edited on 10/07/2024
Notice of protest against Palani temple management

பழனி தேவஸ்தான நிர்வாகத்தை கண்டித்து ஜூலை 13 தேதி கவன ஈர்ப்பு கடையடைப்பு நடைபெறும் என பழனி நகர் மன்றம் சார்பில் அறிவிப்பு வெளியாகியுள்ளது.

திண்டுக்கல்லில் அமைந்துள்ள பிரசித்தி பெற்ற கோவிலான பழனி தண்டாயுதபாணி முருகன் கோவிலின் கிரிவலப் பாதை 1948 ஆம் ஆண்டு முதல் பழனி நகராட்சி நிர்வாகத்திற்கு கட்டுப்பாட்டில் இருந்தது. இந்நிலையில் அண்மையில் நீதிமன்றத்தில் தொடுக்கப்பட்ட வழக்கு ஒன்றில் பழனி கிரிவலப் பாதையில் உள்ள ஆக்கிரமிப்புகளை அகற்றவும், கிரிவலப் பாதையில் எந்த விதமான வாகனங்கள் செல்லவும் தடை விதித்து தனி நீதிபதி உத்தரவிட்டிருந்தார்.

மேலும் கிரிவலப் பாதையில் உள்ள ஆக்கிரமிப்புகளை அகற்றவும், அதனை ஆய்வு செய்யவும் ஓய்வு பெற்ற நீதிபதி பாரதிதாசன் தலைமையில் குழு ஒன்று அமைக்கப்பட்டது. அதனைத் தொடர்ந்து பழனி அடிவாரம் பகுதியில் உள்ள 150க்கும் மேற்பட்ட ஆக்கிரமிப்பு கட்டிடங்கள் அகற்றப்பட்டது. இதனால் ஆயிரக்கணக்கான சிறு குறு வியாபாரிகள் பாதிக்கப்பட்டதாக போராட்டங்கள் எழுந்தது. இதற்கான மாற்று ஏற்பாடுகளை செய்ய வேண்டும் என நகராட்சி மன்ற கூட்டத்தில் பழனி கோவில் நிர்வாகத்திற்கு எதிராக தீர்மானங்கள் நிறைவேற்றப்பட்டது. இந்நிலையில் கோவில் நிர்வாகத்தைக் கண்டித்து நகர்மன்றம் சார்பில் ஜூலை 13ம் தேதி அனைத்து கடைகளும் அடைக்கப்பட்டு கவன ஈர்ப்பு போராட்டம் நடைபெறும் என அறிவிக்கப்பட்டுள்ளது. ஜூலை 13ஆம் தேதி ஓய்வு பெற்ற நீதிபதி பாரதிதாசன் தலைமையிலான குழு வர உள்ள நிலையில், அந்த தேதியில் போராட்டம் அறிவிக்கப்பட்டது குறிப்பிடத்தகுந்தது.