Skip to main content

சென்னையில் உணவுப் பொருட்களுக்கு தட்டுப்பாடு ஏற்படும் அபாயம்! -காவல்துறை கெடுபிடி!  

Published on 23/04/2020 | Edited on 23/04/2020

சென்னை கொத்தவால்சாவடியில்தான் அரிசி, ரவை, மைதா, கோதுமை, பருப்பு, தானியங்கள், எண்ணெய் உள்ளிட்ட அனைத்து வகையிலான உணவு மற்றும் மளிகை பொருட்களின் மொத்த வியாபார கடைகள் இருக்கின்றன. இங்கிருந்துதான் சென்னை, திருவள்ளூர், காஞ்சிபுரம் மாவட்டங்களிலுள்ள மொத்த வியாபார கடைகளுக்கும், சில்லரை கடைகளுக்கும்  மளிகை பொருட்கள் சென்று வருகின்றன. 


இந்த நிலையில், திடீரென்று இன்று (23.4.2020) இரவு 7 மணியிலிருந்து அத்யாவசிய உணவு பொருட்களை ஏற்றிச் செல்லும் லாரி உள்ளிட்ட வாகனங்களை  நகரத்துக்குள் அனுமதிக்காமலும்  கொத்தவால்சாவடி மொத்த வியாபார கடைகளை இழுத்து மூடுமாறும் சென்னை காவல்துறை ஏகத்துக்கும் கெடுபிடி காட்டி வருவதால் திகைத்து நிற்கிறார்கள் வியாபாரிகள். இதனால், சென்னை உள்ளிட்ட 3 மாவட்டங்களில் உணவு பொருட்களுக்கு தட்டுப்பாடு ஏற்படும் அபாயம் சூழ்ந்துள்ளது!     
                 
  kottivakkam murugan

  
இது குறித்து நம்மிடம் பேசிய தென்சென்னை கிழக்கு மாவட்ட த.மா.கா. தலைவரும், நெல்லை-தூத்துக்குடி நாடார் மகமை பரிபாலன சங்கத்தின் மாநில செயலாளருமான கொட்டிவாக்கம் முருகன், “ஊரடங்கு அமலில் இருக்கும் சூழலில் உணவு பொருட்கள் சப்ளைக்கு தடை கிடையாது.  அத்யாவசிய பொருட்களை ஏற்றிச் செல்லும் வாகனங்களை தடுக்காமலும் அவைகள் தடையின்றி செல்லவும் காவல்துறை உரிய நடவடிக்கைகளை மேற்கொள்ள வேண்டும் என துவக்கத்திலேயே தமிழக அரசு உத்தரவிட்டிருக்கிறது. 
 

nakkheeran app

 

அதற்கேற்ப சென்னை கொத்தவால்சாவடியில் உள்ள உணவு மற்றும் மளிகை பொருட்களின் மொத்த வியாபாரிகள், தினமும் மாலை 6 மணியிலிருந்து காலை 6 மணிக்குள் பொருட்களை மாவட்டத்திலுள்ள அந்தந்த பகுதிகளுக்கு அனுப்பிவிட வேண்டும் என்கிற தகவலும் அரசு தரப்பிலிருந்து  மொத்த வியாபாரிகளுக்கு தெரிவிக்கப்பட்டது. அதனடிப்படையில் சென்னை உள்ளிட்ட 3 மாவட்டங்களிலுள்ள மொத்த வியாபார கடைக்காரர்களிடமிருந்தும், சில்லரை கடைக்காரர்களிடமிருந்தும் ஆர்டர்கள் பெறப்பட்டன!  
                    
பெறப்படும் ஆர்டர்களின்படி, கொத்தவால்சாவடியில் சமூக இடைவெளியை கடைபிடித்தும், முக கவசம் அணிந்தும் பொருட்களை வாகனங்களில் ஏற்றி அனுப்பி வைக்கப்பட்டுக்கொண்டிருக்கிறது. அதன்படி இன்று மாலை 6 மணிக்கு பொருட்களை ஏற்றிக்கொண்டு 7 மணிக்கெல்லாம் லாரிகள் புறப்பட்டு சென்றபோது சென்னையில் பல்வேறு பகுதிகளில் லாரிகளை மடக்கி, மேற்கொண்டு போகாமல் தடுத்து நிறுத்தி வைக்கிறது காவல்துறை. 
                        
அத்யாவசியப் பொருட்களை ஏன் தடுக்கிறீர்கள் என லாரி ட்ரைவர்கள் கேட்டதற்கு, கொத்தவால்சாவடியில் உள்ள மொத்த வியாபார கடைகளை இழுத்து மூட வேண்டும் எனவும்,  அங்கிருந்து வரும் லாரிகளை அனுமதிக்க வேண்டாம் எனவும் மாநகராட்சி தரப்பிலிருந்து எங்களுக்கு உத்தரவு. அதனால், தடுத்து நிறுத்துகிறோம் என போலீசார் தெரிவிக்கிறார்கள். இதனால் மொத்த வியாபாரிகள் அனைவரும் அதிர்ச்சியடைந்திருக்கிறார்கள். சென்னை உள்ளிட்ட 3 மாவட்டங்களிலும் எடுக்கப்பட்டுள்ள ஆர்டர்கள் இன்னும் நிலுவையில் இருக்கிறது. 
                 
அந்த ஆர்டர்படி பொருட்களை மொத்த வியாபாரிகள் சப்ளை செய்தால்தான் அடுத்து வரும் 10 நாட்களுக்கு சென்னை மக்களுக்கு பொருட்கள் கிடைக்கும். இல்லையெனில், பொருட்கள் தட்டுப்பாடு அதிகரிக்கும் ஆபத்து இருக்கிறது. திடீரென இன்றி இரவு வாகனங்களை தடுத்து நிறுத்தியிருப்பதால் சென்னை முழுவதும் உள்ள கடைகளுக்கு பொருட்கள் போய்ச்சேர்வதிலும் தடை ஏற்பட்டிருக்கிறது. இதனை அனுமதிக்காமல் போனால் நாளை மறுநாளிலிருந்து பொருட்களுக்கு தட்டுப்பாடு ஏற்படுவதுடன் விலையும் தாறுமாறாக அதிகரிக்கும் அபாயமும் உண்டு! இது குறித்து சென்னை மாநகராட்சி கமிஷனர் பிரகாஷ் ஐ.ஏ.எஸ்.சிடம் முறையிடுவதற்காக  முயற்சித்தபோது, அவரை தொடர்புகொள்ளவே முடியவில்லை” என்கிறார் கொட்டிவாக்கம் முருகன்.

 

 

Next Story

சிகிச்சையின் போது இளைஞர் பலி; சுகாதாரத்துறை விசாரணை!

Published on 29/04/2024 | Edited on 29/04/2024
Youth sacrifice during treatment Health investigation

புதுச்சேரி மாநிலம், முத்தியால்பேட்டை பகுதியைச் சேர்ந்தவர் செல்வநாதன். மார்க்கெட் கமிட்டி ஊழியராக பணிபுரிந்து வரும் செல்வநாதனுக்கு ஹேமச்சந்திரன், ஹேமராஜன் என இரண்டு மகன்கள் இருந்தனர். 26 வயதான ஹேமச்சந்திரன், தனியார் நிறுவனத்தில் டிசைனராக பணிபுரிந்து வந்தார். இத்தகைய சூழலில் உடல் பருமனாக இருந்த ஹேமச்சந்திரன், சுமார் 150 கிலோவுக்கு மேல் இருந்துள்ளார். இதனால், மன உளைச்சலில் இருந்த ஹேமச்சந்திரன் உடல் எடையை குறைக்க சென்னையில் உள்ள தனியார் மருத்துவமனை ஒன்றில் மருத்துவ ஆலோசனை பெற்று வந்தார். அங்கு அவரது உடல் பருமனை குறைப்பதற்காக, அறுவை சிகிச்சை மூலம் கொழுப்பு நீக்க சிகிச்சை மேற்கொள்ள முடிவு செய்யப்பட்டது.

அதன்படி, ஹேமச்சந்திரன் கடந்த 22 ஆம் தேதி (22.04.2024) மருத்துவமனையில் சிகிச்சைக்காக அனுமதிக்கப்பட்டார். அதன் பின்னர் அங்கு அவருக்கு அறுவை சிகிச்சை தொடங்கிய 15 நிமிடங்களிலேயே, மாரடைப்பு ஏற்பட்டு கடந்த 24 ஆம் தேதி (24.04.2024) ஹேமச்சந்திரன் பரிதாபமாக உயிரிழந்தார். இதனையடுத்து, ஹேமச்சந்திரன் இறப்பில் சந்தேகம் இருப்பதாக கூறி அவரது பெற்றோர்கள் புதுச்சேரி காவல் நிலையத்தில் புகார் அளித்தனர். இந்தப் புகாரின் பேரில், போலீசார் தீவிர விசாரணை மேற்கொண்டு வருகின்றனர். உடல் பருமனைக் குறைக்க சிகிச்சை மேற்கொண்ட 26 வயது இளைஞர் உயிரிழந்த சம்பவம் மக்கள் மத்தியில் பெரும் அதிர்ச்சியையும், சோகத்தையும் ஏற்படுத்தி இருந்தது.

இதனையடுத்து உடல் பருமன் சிகிச்சையால் இளைஞர் மரணமடைந்தது குறித்து குழு அமைத்து விசாரணை செய்யப்படும் என உயிரிழந்த இளைஞரின் பெற்றோரிடம் தொலைபேசியில் பேசிய தமிழக மருத்துவம் மக்கள் நல்வாழ்வுத்துறை அமைச்சர் மா. சுப்ரமணியன் உறுதியளித்திருந்தார். அப்போது மகனை இழந்த பெற்றோருக்கு தனது ஆறுதலையும் அமைச்சர் மா. சுப்ரமணியன் தெரிவித்திருந்தார். அதனைத் தொடர்ந்து இது தொடர்பாக விசாரணை நடத்த 2 இணை இயக்குநர்கள் கொண்ட குழுவை அமைத்து தமிழக மருத்துவத்துறை உத்தரவிட்டிருந்தது. இந்த குழு 2 நாட்களில் விசாரணை அறிக்கையை சமர்ப்பிக்கவும் அந்த உத்தரவில் தெரிவிக்கப்பட்டிருந்தது. இந்நிலையில் ஹேமச்சந்திரன் உயிரிழந்தது தொடர்பாக சம்பந்தப்பட்ட மருத்துவமனையில் சுகாதாரம் மற்றும் குடும்ப நலத்துறை அதிகாரிகள் ஆய்வு மேற்கொண்டனர். மேலும் செங்கல்பட்டு மாவட்ட சுகாதாரத்துறை இணை இயக்குநர் மருத்துவர் தீர்த்தலிங்கம் தலைமையில் விசாரணை நடத்தப்பட்டு வருகிறது. 

Next Story

2024 ஆம் ஆண்டிற்கான விசிக விருதுகள் அறிவிப்பு!

Published on 29/04/2024 | Edited on 29/04/2024
2024 Vck Awards Announcement!

விடுதலைச் சிறுத்தைகள் கட்சியின் சார்பில் தமிழகம் மற்றும் இந்திய அளவில் ஆண்டுதோறும் பல்வேறு தளங்களில் சாதனைகள் படைத்தவர்களுக்கு விருதுகள் வழங்கப்பட்டு வருகிறது. அதாவது சமூகம், அரசியல், பண்பாடு, கலை-இலக்கியம் போன்ற தளங்களில் சீரிய முறையில் தொண்டாற்றுபவர்கள் உள்ளிட்ட பல்வேறு ஆளுமையினருக்கு, “அம்பேத்கர் சுடர், பெரியார் ஒளி, காமராசர் கதிர், அயோத்திதாசர் ஆதவன், காயிதேமில்லத் பிறை மற்றும் செம்மொழி ஞாயிறு” ஆகிய விருதுகள் 2007 முதல் ஆண்டுதோறும் வழங்கப்பட்டு வருகிறது. 2022 ஆம் ஆண்டு முதல் ‘மார்க்ஸ் மாமணி’ விருதும் வழங்கப்பட்டு வருகிறது.

அதன்படி தமிழகத்தின் முன்னாள் முதல்வர் கலைஞர், தமிழக முதல்வர் மு.க.ஸ்டாலின், கேரள முதலமைச்சர் பினராயி விஜயன், மேனாள் கர்நாடக முதலமைச்சர் சித்தாரமையா, திராவிடர் கழக தலைவர் கி.வீரமணி, எழுத்தாளர் அருந்ததி ராய், தோழர் து.ராஜா, இலக்கியச் செல்வர் குமரிஅனந்தன், தமிழ்நாடு காங்கிரஸ் தலைவர் கே.எஸ். அழகிரி, பாவலரேறு பெருஞ்சித்திரனார், உணர்ச்சிப் பாவலர் காசி ஆனந்தன், சொல்லின் செல்வர் ஆ.சக்திதாசன், பாவலர் வை.பாலசுந்தரம், பேராசிரியர் காதர்மொய்தீன், பேராசிரியர் ஜவாஹிருல்லா, ஏ.எஸ். பொன்னம்மாள், கிருஷ்ணம்மாள் ஜெகந்நாதன் உள்ளிட்டோருக்கு  இதுவரை விசிக விருதுகள் வழங்கப்பட்டுள்ளன.

இந்நிலையில் 2024 ஆம் ஆண்டுக்கான விசிக - விருதுகள் அறிவிக்கப்பட்டுள்ளன. அதில் அம்பேத்கர் சுடர் விருது - நடிகர் பிரகாஷ்ராஜ், பெரியார் ஒளி விருது - வழக்கறிஞரும், திராவிடர் கழக பிரச்சாரச் செயலாளருமான அருள்மொழி, மார்க்ஸ் மாமணி விருது - இந்திய கம்யூனிஸ்ட் கட்சியின் மாநிலச் செயலாளர் இரா. முத்தரசன், காமராசர் கதிர் விருது - இந்திய சமூக நீதி இயக்கத்தின் தலைவர் பேராயர் எஸ்றா சற்குணம், அயோத்திதாசர் ஆதவன் விருது - பேராசிரியர் ராஜ்கௌதமன், காயிதேமில்லத் பிறை விருது - வெல்ஃபேர் பார்ட்டி ஆஃப் இந்தியா அமைப்பின் முன்னாள் மாநிலத் தலைவர்  எஸ்.என். சிக்கந்தர், செம்மொழி ஞாயிறு விருது - கல்வெட்டியலறிஞர் எ. சுப்பராயலுவுக்கும் வழங்கப்பட உள்ளது. இந்த விருதுகள் வழங்கும் விழா மே 25 ஆம் தேதி (25.05.2024) சென்னையில் நடைபெற உள்ளது. இதற்கான அறிவிப்பை விசிக தலைவர் தொல். திருமாவளவன் எம்.பி. வெளியிட்டுள்ளார்.