Skip to main content

பட்ஜெட் 2020: முக்கியத்துவம் பெருகின்றவை எவை? – ஒரு பார்வை!

பெரிதும் எதிர்பார்க்கப்பட்ட 2020-2021 ஆண்டுக்கான மத்திய பட்ஜெட்டை நிதியமைச்சர் நிர்மலா சீதாராமன் இன்று நாடாளுமன்றத்தில் தாக்கல் செய்துள்ளார். சாகித்திய அகாதெமி விருதுபெற்ற காஷ்மீரி மொழிக்கவிதை ஒன்றை வாசித்துக் காட்டி, தனது பட்ஜெட் உரையைத் தொடங்கினார். இந்த பட்ஜெட் எதிர்பார்ப்பை பூர்த்தி செய்தல், பொருளாதாரத்தை மேம்படுத்துதல், சமுதாயத்தின் மீது அக்கறை செலுத்துதல் ஆகிய மூன்று நோக்கங்களின் அடிப்படையில் வகுக்கப்பட்டுள்ளது.

 

 Budget 2020: What's Increasingly Important? - one look!


விவசாயத்தைப் பெருமிதப்படுத்தி ஆத்திச்சூடியில் எழுதப்பட்டிருக்கும் பூமி திருத்தி உண் என்ற வரிகளைப் படித்துக்காட்டி, விவசாயத்திற்கு இந்த பட்ஜெட் முக்கியத்துவம் அளிப்பதாக அவர் தெரிவித்தார்.


விவசாயம்


விவசாயத் துறையை மேம்படுத்தும் விதமாக இந்த பட்ஜெட்டில் 16 அம்ச திட்டத்தை மத்திய அரசு அறிவித்திருக்கிறது. விவசாயிகளின் வருவாயை இரட்டிப்பாக்கும் விதமாக திட்டங்கள் வகுக்கப்பட்டுள்ளன. சூரிய ஒளியில் மின்சாரம் தயாரிக்கும் இயந்திரங்களை அமைக்க, 20 லட்சம் விவசாயிகளுக்கு நிதியுதவி வழங்க முடிவு செய்யப்பட்டுள்ளது.


கிராமங்களில் பெண்களின் முன்னேற்றத்திற்காக தான்யலட்சுமி என்ற திட்டம் தொடங்கப்படுகிறது. இதன்கீழ் விதைகளை சேமித்து விநியோகிக்கும் செயல்பாடுகளில் கிராமப்புற பெண்கள் ஈடுபடுவார்கள். பெண்களுக்கான திட்டங்களுக்காவே 28 ஆயிரம் கோடி ரூபாய் நிதி ஒதுக்கப்படும். விளைபொருட்களைக் கொண்டுசெல்ல தனி ரயில்கள் கிசான் ரயில் என்ற பெயரில் இயக்கப்படவுள்ளன. தேசிய, சர்வதேச விமானப் போக்குவரத்து மூலம், விவசாயப் பொருட்களை கொண்டுசெல்ல, கிருஷி உடான் என்ற புதிய திட்டம் கொண்டுவரப்படும். விவசாயிகளுக்கு 15 லட்சம் கோடி நிதி கடனாக வழங்கப்படும். மகளிர் சுய உதவிக்குழுக்களுக்கும் அதிகளவில் நிதி ஒதுக்கீடு செய்யப்படும். மொத்தமாக விவசாயத் துறைக்கு மட்டும் 2.83 லட்சம் கோடி ரூபாய் நிதி ஒதுக்கப்பட்டுள்ளது.


சுகாதாரம்


தூய்மை இந்தியா திட்டத்திற்காக 12 ஆயிரத்து 300 கோடி ஒதுக்கப்பட்டுள்ளது. மாவட்டந்தோறும் தனியாருடன் இணைந்து மருத்துவக் கல்லூரிகள். காசநோயை இந்தியாவில் இருந்து முற்றிலுமாக ஒழிக்க, 2025-ஆம் ஆண்டு காலக்கெடுவாக நிர்ணயிக்கப்படுள்ளது. கடந்த ஆண்டை விட 13 ஆயிரம் கோடி ரூபாய் கூடுதலாக ஒதுக்கியதன் மூலம், இந்த ஆண்டுக்கான சுகாதாரத்துறைக்கு 60 ஆயிரம் கோடி ரூபாய் ஒதுக்கீடு செய்யப்பட்டுள்ளது. ஆயுஷ்மான் பாரத் திட்டத்தின் கீழ் கூடுதலாக 112 மாவட்டங்களில் சிகிச்சை அளிக்க முடிவுசெய்யப்பட்டுள்ளது. இதுபோக, சுத்தமான காற்றுக்காக தனியாக 4 ஆயிரத்து 150 கோடி ரூபாயை மத்திய அரசு ஒதுக்கியுள்ளது.

 

 Budget 2020: What's Increasingly Important? - one look!



கல்வித்துறை


கல்வித்துறைக்காக இந்த ஆண்டு 99 ஆயிரத்து 300 கோடி ரூபாய் ஒதுக்கப்பட்டுள்ளது. மாவட்டங்களில் தனியாருடன் இணைந்து மருத்துவக் கல்லூரிகள் அமைக்கப்படும். விரைவில் புதிய கல்விக்கொள்கை அறிவிக்கப்படு. கல்வித்துறையில் நேரடி அந்நிய முதலீட்டுக்கு அனுமதி வழங்கப்படுகிறது. தேசிய போலீஸ் மற்றும் தேசிய தட அறிவியல் துறைக்கென பிரத்யேக பல்கலைக்கழகம் அமைக்கப்படும். திறன் மேம்பாட்டுக்கென தனியாக 3 ஆயிரம் கோடி ரூபாய் ஒதுக்கப்படும்.

அரசுப் பணியாளர் தேர்வு செய்யப்படும் முறையில், புதிய சீர்திருத்தங்கள் கொண்டுவரப் படவுள்ளன. தொடக்க நிலை அரசு பணியாளர்களைத் தேர்வுசெய்ய, தேசிய பணியாளர் தேர்வு முகமை என்ற புதிய அமைப்பு உருவாக்கப்படும்.


நீர்வளம்


இனிவரும் நாட்களில் குடிநீர்த் தட்டுப்பாடு இல்லாமல் செய்ய, நாடு முழுவதும் வீடுகளுக்கு குடிநீர்க் குழாய்கள் மூலம் நீர் வழங்க, ஜல் ஜீவன் என்ற பெயரில் புதிய திட்டம் அறிமுகமாகிறது. இதற்காக, 3.6 லட்சம் கோடி ரூபாய் ஒதுக்கப்படுகிறது. மேலும், நீர் வளத்திற்கென 11 ஆயிரத்து 500 கோடி ரூபாய் ஒதுக்கீடு செய்யப்படுகிறது.


வருமான வரி
 

 Budget 2020: What's Increasingly Important? - one look!

 

தனிநபர் வருமானத்தில் 5 லட்ச ரூபாய் வரை பெறுவோர், வருமான வரி கட்டத் தேவையில்லை. 5 லட்சம் முதல் 7.5 லட்சம் ரூபாய் வரையில் வருமானம் பெறுவோர் இனி 10 சதவீதமும், 7.5 லட்சம் முதல் 10 லட்சம் ரூபாய் வரை பெறுவோர் 15 சதவீதமும், 12.5 லட்ச ரூபாய் வரை பெறுவோர் 20 வருமான வரி செலுத்தினால் போதும். 15 லட்ச ரூபாய்க்கு மேல் வருமானம் பெறுவோருக்கான வருமான வரியில் 30 சதவீதம் என்ற பழைய நிலையே தொடரும். இதன்மூலம் ஒவ்வொரு ஆண்டும் அரசுக்கு 40 ஆயிரம் கோடி ரூபாய் இழப்பு ஏற்படுகிறது.


தாழ்த்தப்பட்டோர் மற்றும் சிறுபான்மையினர் நலனுக்காக 85 ஆயிரம் கோடி ரூபாயும், பழங்குடியினர் நலனுக்காக 53 ஆயிரம் கோடி ரூபாயும் ஒதுக்கப்படுகிறது.

மனிதக் கழிவுகளை மனிதர்களே அகற்றும் அவலத்தை முற்றிலுமாக ஒழிக்க, விரைவில் புதிய தொழில்நுட்பங்களை அறிமுகம் செய்யவுள்ளதாக அரசு தெரிவித்துள்ளது.

ஏர் இந்தியாவைத் தொடர்ந்து, எல்.ஐ.சி. காப்பீட்டு நிறுவனத்தை தனியார் மயமாக்கும் முடிவை மத்திய அரசு எடுத்திருக்கிறது. இது விவாதத்தைக் கிளப்பி இருக்கிறது. அதேபோல், நீண்ட காலமாக விவாதத்தில் இருக்கும் ஐ.டி.பி.ஐ. வங்கியின் பங்குகளை தனியாருக்கு விற்கும் முடிவு பற்றியும் நிதியமைச்சர் பேசியிருக்கிறார். மருத்துவத்துறையிலும் தனியார் மயத்திற்கு முக்கியத்துவம் தரப்படுகிறது. பொதுத்துறை பங்குகளை விற்பனை செய்து, அதன்மூலம் 2.1 லட்சம் கோடி ரூபாய் நிதி திரட்டவும் மத்திய அரசு முடிவு செய்துள்ளது.


அரசின் பொருளாதார செயல்பாடுகளின் மூலம், 2021-ஆம் ஆண்டில் இந்தியப் பொருளாதார வளர்ச்சி 10 சதவீதமாக இருக்கும். அரசின் மொத்த செலவு 30 லட்சம் கோடியாகவும், நிதிப் பற்றாக்குறை மூன்றரை சதவீதமாகவும் இருக்கும் என கணிக்கப்பட்டுள்ளதாக நிதியமைச்சர் நிர்மலா சீத்தாராமன் தெரிவித்துள்ளார்.


சுமார் 2 மணி 43 நிமிடங்கள் தனது பட்ஜெட் உரையை நிகழ்த்திய நிதியமைச்சர் நிர்மலா சீதாராமன், இதன் மூலம் மிகநீண்ட பட்ஜெட் உரையை வாசித்த இந்திய நிதியமைச்சர் என்ற பெருமையை பெற்றுள்ளார். கால அளவை பொறுத்து மிகப்பெரிய உரையாக இதனை எடுத்துக்கொண்டாலும் வேலைவாய்ப்பு, இளைஞர்களின் எதிர்காலம் போன்ற அடுத்த தலைமுறைக்கு தேவையான பல விஷயங்கள் தேடித் துழாவினாலும் கிடைக்காத வகையில், திட்டங்கள் ரீதியாக குறுகிய உரையாகவே பார்க்கவேண்டியுள்ளதாக பல கருத்துகளும் எழுந்து வருகின்றன. மிகநீண்ட பட்ஜெட் உரை என்பதை கடந்து, பல வளர்ச்சி திட்டங்கள் இதில் இருக்கின்றன என பாஜகவினர் கூறும் அதேநேரம், இது ஒரு வெற்று அறிக்கை என ஒருதரப்பு இந்த பட்ஜெட்டை கடுமையாக விமர்சித்து வருவது குறிப்பிடத்தக்கது. 

 

உங்கள் கருத்தைப் பதிவு செய்யுங்கள்
Loading...