Skip to main content

ஸ்டாலினை இழுத்துட்டு வந்தாங்க... மிசாவில் நடந்த பரபரப்பு தகவல்... பாஜகவிற்கு ஏற்பட்ட டென்ஷன்! 

Published on 19/03/2020 | Edited on 19/03/2020

உள்நாட்டு பாதுகாப்பு பராமரிப்புச் சட்டம், "மிசா' என்கிற நெருக்கடி நிலைப் பிரகடனத்தை 1975, ஜூன் 25-ந் தேதி நடுஇரவில் அறிவித்தார் அப்போதைய பிரதமர் இந்திராகாந்தி. பத்திரிகைச் சுதந்திரம் நசுக்கப்பட்டது. காங்கிரஸ் அல்லாத அனைத்துக் கட்சிகளைச் சேர்ந்தவர்களும் காரணமின்றி கைதுசெய்யப்பட்டு சிறைவைக்கப்பட்டனர். ஆர்.எஸ்.எஸ். உள்ளிட்ட சங்பரிவார் அமைப்புகள் தடைசெய்யப்பட்டன. சென்னை கடற்கரையில் சத்யாக்கிரகப் போராட்டம் நடத்திய சுமார் ஆயிரத்துஐநூறு ஆர்.எஸ்.எஸ். தொண்டர்கள் மிசாவில் கைதாகி, கொட்டடியில் அடைக்கப்பட்டு சித்தரவதை செய்யப்பட்டனர்.

 

bjp



இதுநடந்து 45 ஆண்டுகள் ஆகிவிட்ட நிலையில், உத்திரப்பிரதேச உயர்நீதிமன்றம் மிசா கொடுமையால் பாதிக்கப்பட்டவர்களுக்கு, குறிப்பாக ஆர்.எஸ்.எஸ். ஊழியர்களுக்கு ஆறுதல் தரும் வகையில் தீர்ப்பு ஒன்றை வழங்கியது. இதன் மூலம், வடமாநிலங்களில் சலுகைகள் கிடைக்கின்றன. ஆனால், தமிழகம், கேரளா, கர்நாடகா, ஒருங்கிணைந்த ஆந்திரா, அசாம் போன்ற மாநிலங்களில் மிசாவால் பாதிக்கப்பட்ட தியாகி களுக்கு எந்த நலனும் ஏற்படவில்லை. எனவே, இந்த மாநிலங்களைச் சேர்ந்த ஆர்.எஸ்.எஸ். உறுப்பினர்கள், அசாமின் கோவர்த்தன பிரசாத் அடல் தலைமையில், "லோக் சங்கர்ப்ப சமிதி' எனப்படும் ஆக்ஷன் கமிட்டி அமைத்து நிவாரண உதவிகள் கேட்டு போராடி வருகின்றனர். இதன் ஒருபகுதியாக, நெருக்கடி நிலைக்கால போராட்ட வீரர்களின் சங்கமவிழாவின் மூன்றாவது மாநாடு, தென்காசி மாவட்டம் சங்கரன்கோவிலில் மார்ச் 01-ல் நடந்தது. இதில் ஆக்ஷன் கமிட்டியைச் சேர்ந்த ஆந்திராவின் அசோக்குமார் யாதவ், கர்நாடகாவின் மஞ்சுநாத், கேரளாவின் மோகனன், பா.ஜ.க. எம்.பி. கைலாஷ் சோனி உள்ளிட்ட தலைவர்களுடன், தமிழகத்தைச் சேர்ந்த ஆர்.எஸ்.எஸ். மிசா தியாகிகள் நூற்றுக் கணக்கானோர் கலந்துகொண்டனர்.
 

bjp



இந்த மாநாட்டிற்கு பா.ஜ.க. தேசிய செயற்குழு உறுப்பினர் இல.கணேசன் சிறப்பு அழைப்பாளராக வந்திருந்தார். பரபரப்புகளைப் பேசி பற்றவைக்கும் ஹெச்.ராஜா வேறொரு நிகழ்ச்சி காரணமாக மாநாட்டில் கலந்துகொள்ளவில்லை. மிசாவால் பாதிக்கப்பட்ட ஆர்.எஸ்.எஸ். நிர்வாகி, பரமக்குடியைச் சேர்ந்த நெசவுத் தொழிலாளி மோதிலால், மாநாட்டிற்கு வந்திருந்தார்.


மேடையில் அவர் பேசுகையில், “நாங்கள் சிறையில் பட்ட துயரத்தை வார்த்தைகளால் விவரிக்க முடியாது. உடம்பெல்லாம் கொடூரமா அடி விழும். வலி பொறுக்காம கத்தினா கூடுதலா லத்தியடி கிடைக்கும். எவ்வளவு பலமா அடிச்சாலும் ரத்தம் வராது. ஆனா, உள்ளுக்குள்ள தீப்பிடிச்ச மாதிரி எரியும். சிறையில் எங்களுக்குப் பக்கத்து செல்லில்தான் தி.மு.க. தலைவர் மு.க.ஸ்டாலின் அடைக்கப்பட்டிருந்தார். அப்போது அவர் இளைஞர். ஒருநாள் ஸ்டாலினை இழுத்துட்டு வந்து எங்க முன்னாடி நிறுத்தி கொடூரமா அடிச்சாங்க. அவர் தடுமாறி கீழ விழுந்தும் விட்டு நகரலை. அவர் மேல கவசம்போல நாங்கெல்லாம் விழுந்து தடுத்தோம். இப்படியே மூணுமாசம் சித்திரவதையா முடிஞ்சு, அரை உசுரா வெளியே வந்தோம். இதுமாதிரி சித்திரவதைகளை அனுபவிச்ச எங்களில் பலர், வறுமையால கஷ்டப்படுறாங்க. மோடி அரசு வந்தும் எங்க குடும்பப்பாடு தீரலை'' என்று அவர் பேசியபோதே, உடலெல்லாம் மிசா அடியை எண்ணி நடுங்கியதை உணர முடிந்தது.

கேரள கமிட்டித் தலைவரான மோகனன், "ஜெயராம் பணிக்கர் என்றொரு ஜெயில் ஆபீஸர், புதுப்புது சித்திரவதைகளைக் கண்டுபிடித்து டார்ச்சர் பண்ணினார். எங்களோட ராஜன் சிறையிலேயே அடித்துக் கொல்லப்பட்டார். இத்தனை கொடுமைகளை அனுபவித்து, தியாகம் செய்த நமக்கு, எந்தப் பலனும் இல்லாமல் போய்விட்டதே'' என்று வருந்திப் பேசினார். ஆத்திரத்தைக் கொட்டித் தீர்த்த ஆந்திர கமிட்டியின் அசோக்குமார் யாதவ், “ராஜஸ்தான், மகாராஷ்டிரா, பஞ்சாப் போன்ற மாநிலங்களுக்குக் கிடைப்பதுபோல, தென்னிந்திய மாநிலங்களுக்கும் பென்ஷன் உதவி கிடைக்க வேண்டும். இல்லையென்றால் பெரிய போராட்டமாக வெடிக்கும்'' என்று எச்சரித்தார்.


வேதனையில் வெந்துபோயிருந்தவர்களின் கொதிப்பை அடக்கும் வகையில் பேசிய இல.கணே சன், “உங்கள் கஷ்டங்களை நான் உணர்வேன். உங்களின் நெருடல் எனக்கும் உள்ளது. அதனால், அமைச்சர் அனந்தகுமார் மூலமாக மத்திய அரசிடம் கோரிக்கை வைத்திருக்கிறோம். முத்தலாக் தடை, ராமஜென்ம பூமி, சி.ஏ.ஏ. போன்றவற்றைப் போலவே, ஒரேயொரு கையெழுத்தால் நமது கோரிக்கைகளும் நிறைவேறும். நிச்சயம் நமது பிரதமர் அதை நிறைவேற்றுவார் என்கிற நம்பிக்கை எனக்கிருக்கிறது'' என்றார்.

ஏற்கனவே, சி.ஏ.ஏ. எதிர்ப்புப் போராட்டம் நாடு முழுவதும் வலுத்து வருகிறது. இதற்கிடையே, கட்சியின் தலைமை அமைப்பான ஆர்.எஸ்.எஸ்.ஸில் கிளம்பியிருக்கும் இந்த உரிமைப்போர் பா.ஜ.க.விற்கு இரட்டைத் தலைவலியை ஏற்படுத்தியிருக்கிறது.

 

 

 

Next Story

“தமிழகத்தில் சட்ட ஒழுங்கை சீர்குலைக்க பா.ஜ.க முயல்கிறது” - திருமாவளவன் குற்றச்சாட்டு

Published on 12/07/2024 | Edited on 12/07/2024
Thirumavalavan alleges BJP is trying to disrupt law and order in Tamil Nadu

தமிழக முதல்வர் மு.க.ஸ்டாலினை விடுதலை சிறுத்தைகள் கட்சித் தலைவர் தொல்.திருமாவளவன் இன்று நேரில் சந்தித்து பல்வேறு கோரிக்கை மனுக்களை வைத்திருந்தார். 

இது குறித்து திருமாவளவன் செய்தியாளர்களைச் சந்தித்து பேசியதாவது, “பகுஜன் சமாஜ் கட்சி மாநிலத் தலைவர் ஆம்ஸ்ட்ராங் கொலை வழக்கில் கைது செய்யப்பட்டவர்கள் மட்டுமின்றி, இதனை திட்டமிட்டவர்கள் இதனை நடைமுறைப்படுத்திய கூலிக்கும்பல் அனைவரையும் கைது செய்ய வேண்டும் என்று வலியுறுத்தியிருக்கிறோம். தமிழகத்தில் சட்ட ஒழுங்கை சீர்குலைத்து ஒரு பதற்றத்தை ஏற்படுத்த வேண்டும் என்று சில அரசியல் கட்சிகள் திட்டமிட்டு செயல்பட்டு வருகின்றன. 

குறிப்பாக, பா.ஜ.கவுக்கு இந்த செயல் திட்டம் இருப்பதை அறிய முடிகிறது. ஆகவே, ஆம்ஸ்ட்ராங் கொலை சம்பவத்தில் கூட ஒரு அரசியல் செயல் திட்டம் வாய்ப்பு இருப்பதாக வி.சி.க கருதுகிறது. ஆம்ஸ்ட்ராங் உயிரிழந்த சில நிமிடங்களில், பா.ஜ.கவை சேர்ந்த ஒருவர் சி.பி.ஐ விசாரணை வேண்டும் என்று கோரிக்கை வைத்திருந்தார். காவல்துறை நடவடிக்கையில் இறங்குவதற்கு முன்னதாகவே, பகுஜன் சமாஜ் கட்சி கோரிக்கை வைப்பதற்கு முன்னதாகவே, எடுத்த எடுப்பிலேயே தமிழக அரசு விசாரிக்கக் கூடாது, ஒன்றிய அரசின் கட்டுபாட்டில் இருக்கக்கூடிய சி.பி.ஐ விசாரிக்க வேண்டும் என்று பா.ஜ.கவின் குரலாக இருந்தது. ஆருத்ரா நிறுவனத்திற்கும், பா.ஜ.க.வைச் சேர்ந்த சிலருக்கும் இடையில் உள்ள உறவு குறித்து விவாதிக்கப்பட்டு வருவதை நாம் பார்க்கிறோம். சம்பந்தப்பட்டவர்கள் பா.ஜ.க கட்சியில் பொறுப்பில் இருக்கிறார்கள். 

ஆம்ஸ்ட்ராங் கொலையில், ஆருத்ரா விவகாரமும் பேசப்படுகிறது. பா.ஜ.க இதில் வலிந்து சி.பி.ஐ விசாரணை கோருகிறது. இது போன்ற விவகாரங்கள் புலனாய்வு விசாரணைக்கு உட்படுத்தக்கூடியவையாக உள்ளன. அவர்களின் செயல் திட்டம் என்பது திமுக அரசுக்கு எதிராக பதற்றத்தை ஏற்படுத்த வேண்டும், சட்ட ஒழுங்கை சீர் குலைக்க வேண்டும் என்பதாக தான் இருக்கிறது. முன்னாள் முதல்வர் கலைஞர் மீது கருத்தியல் விமர்சனங்களை வைக்கலாம். அரசியல் விமர்சனங்களை வைக்கலாம். ஆனால், அவரை கொச்சைப்படுத்துவதன் மூலம் மேலும் பதற்றத்தை உருவாக்க வேண்டும் என்று அவர்களின் நோக்கங்களை உணர முடிகிறது. ஆகவே, சட்ட ஒழுங்கை காப்பாற்றுவதற்கு அரசு நடவடிக்கை எடுக்க வேண்டும் என்று வலியுறுத்தியிருக்கிறோம். 

நீட் தேர்வு குறித்தும், திருமண சட்டங்கள் சீராய்வு தொடர்பாக மனு ஒன்றை அளித்திருக்கிறோம். நீட் விவகாரத்தில் தற்போது நாடு முழுவதும் விவாதம் நடந்துள்ளது. நாடாளுமன்றத்திலும் எதிரொலித்துள்ளது. நீட் தேர்வில் ஊழல் முறைகேடு நடந்துள்ளன. அதை மூடி மறைக்க பா.ஜ.க முயல்கிறது. நீட் எதிர்ப்பு நடவடிக்கையாக அனைத்துக் கட்சி கூட்டத்தை கூட்ட முதல்வரிடம் வலியுறுத்தினேன்” என்று கூறினார். 

Next Story

‘லட்சக்கணக்கான வீடுகள் கட்டித் தர இருக்கிறோம்’ - அமைச்சர் சக்கரபாணி!

Published on 11/07/2024 | Edited on 11/07/2024
We are going to build lakhs of houses Minister Chakrapani

திண்டுக்கல் மாவட்டத்தில் உள்ள ஒட்டன்சத்திரம் தொகுதியில் உள்ள தொப்பம்பட்டியில் மக்களுடன் முதல்வர் திட்ட சிறப்பு முகாமை துவக்கி வைத்து, 53 பயனாளிகளுக்கு ரூ.12.88 இலட்சம் மதிப்பீட்டில் நலத்திட்ட உதவிகளை உணவு மற்றும் உணவு பொருள் வழங்கல் துறை அமைச்சர் சக்கரபாணி வழங்கினார். இந்த நிகழ்ச்சியில் அமைச்சர் சக்கரபாணி பேசுகையில், “தமிழ்நாடு முதலமைச்சர் மு.க.ஸ்டாலின்,, தமிழக மக்களின் நலனுக்காக பல்வேறு திட்டங்களை அறிவித்து, அந்தத் திட்டங்களின் பயன்கள் அனைத்துத் தரப்பு மக்களையும் சென்றடையும் வகையில் செயல்படுத்தி வருகிறார்.

முதலமைச்சர் எல்லோருக்கும் எல்லாம், தமிழகத்தில் சிறப்பான ஆட்சி நடத்திக் கொண்டியிருக்கிறார். அந்த வகையில் மக்களுடன் முதல்வர் சிறப்பு முகாம் ஏற்கனவே பேரூராட்சி, நகராட்சி ஆகிய பகுதியில் நடைபெற்றது. இந்த முகாமில் பெறப்பட்ட மனுக்களின் மீது உரிய நடவடிக்கை மேற்கொண்டு பொது மக்களுக்கு நலத்திட்ட உதவிகள் வழங்கப்பட்டது. அதனைத்தொடர்ந்து, அரசின் சேவைகள் விரைவாகவும், எளிதாகவும் பொதுமக்களுக்கு சென்று சேரும் வண்ணம் மக்களுடன் முதல்வர் திட்டத்தை முதலமைச்சர் தருமபுரியில் தொடங்கி வைத்துள்ளார். 

We are going to build lakhs of houses Minister Chakrapani

தமிழ்நாடு முதலமைச்சர் தருமபுரியில் தமிழகத்தில் உள்ள 37 மாவட்டங்களில் 388 ஒன்றியங்களில் உள்ள 12,525 ஊராட்சிகளில் ஒவ்வொரு பகுதிகளிலும் 5 ஊராட்சிகளை இணைத்து அல்லது 20 ஆயிரம் மக்கள் தொகை கிராம ஊராட்சிகளை தேர்ந்தெடுத்து, பொதுமக்களிடம் மனுக்களை பெற்று, அந்த மனுவின் மீது உரிய நடவடிக்கை மேற்கொண்டு நலத்திட்டம் வழங்க இருக்கிறார். அந்த வகையில் இன்றைய தினம் திண்டுக்கல் மாவட்டம், தொப்பம்பட்டி வட்டத்தில் உள்ள மேட்டுப்பட்டி, புளியம்பட்டி, கொங்கமுத்தூர், தொப்பம்பட்டி, வேலம்பட்டி, தும்மலப்பட்டி ஆகிய 6 ஊராடசிகளுக்கு உட்பட்ட பகுதிகளை சேர்ந்த மக்களிடம் மனுக்களைப் பெற்று, அதற்கு தீர்வு காணும் வகையில் மக்களுடன் முதல்வர் திட்ட முகாம் நடைபெறுகிறது.

முதலமைச்சர் தேர்தல் நேரத்தில் சொன்ன வாக்குறுதி மட்டுமல்லாமல், சொல்லாத வாக்குறுதிகளையும் நிறைவேற்றி ஒரு பொற்கால ஆட்சியினை நடத்தி வருகிறரர். எனவே முதலமைச்சர ஆட்சி பொறுப்பேற்ற பின்பு குறிப்பாக பெண்களுக்கு கலைஞர் மகளிர் உரிமைத் தொகை 1 கோடி 14 இலட்சம் நபர்களுக்கு வழங்கப்பட்டுள்ளது. மேலும், 1 இலட்சத்து 48 ஆயிரம் நபர்களுக்கு வழங்க நடவடிக்கை மேற்கொள்ளபட்டு வருகிறது. தகுதியுள்ள நபர்கள் அனைவருக்கும் கலைஞர் உரிமைத் தொகை வழங்க நடவடிக்கை மேற்கொள்ளப்படும். பெண்கள் நகர பேருந்துகளில் சென்றால் கட்டணமில்லா சலுகை வழங்கப்பட்டு வருகிறது. சுமார் 7 ஆயிரம் புதிய பேருந்துகள் இயக்குவதற்கு நடவடிக்கை மேற்கொள்ளப்பட்டு வருகிறது தமிழ்நாடு முதலமைச்சர் 1 முதல் 5 வகுப்பு வரை படிக்கின்ற சுமார் 18 இலட்சம் குழந்தைகளுக்கு காலை சிற்றுண்டி வழங்கப்படுகிறது. வருகின்ற 15 ஆம் தேதி அன்று அரசு பள்ளிகள், அரசு உதவி பெறும் பள்ளிகளில் காலை சிற்றுண்டி வழங்கும் நிகழ்வை முதலமைச்சர் துவக்கி வைக்க இருக்கிறார். 

We are going to build lakhs of houses Minister Chakrapani

புதுமைப் பெண் திட்டத்தினை ஏற்படுத்தி மாதந்தோறும் ரூ.1000 வழங்கி வருகிறார். இத்திட்டத்தினை விரிவுபடுத்தி மாணவர்களும் பயன்பெறும் வகையில் தமிழ் புதல்வன் திட்டத்தினை ஏற்படுத்தி மாணவர்களுக்கும் ரூ.1000 வழங்கப்படவுள்ளது. தமிழ்நாட்டினை குடிசை இல்லா மாநிலமாக உருவாக்க கலைஞர் கனவு இல்லம் திட்டத்தின்கீழ் தமிழ்நாட்டில் 8 இலட்சம் வீடுகள் கட்டிதர நடவடிக்கை மேற்கொள்ளப்பட்டு வருகிறது. தமிழ்நாடு முதலமைச்சர் இப்பகுதி பொதுமக்களுக்கு குடிநீர் பிரச்சனைகளை தீர்ப்பதற்கு ரூ.1000 கோடி மதிப்பீட்டில் நிதி ஒதுக்கீடு செய்யப்பட்டு, காவேரியிலிருந்து குடிநீர் கொண்டு வரும் பணிகள், துரிதமாக நடைபெற்று வருகிறது. திண்டுக்கல் மாவட்டத்தில் உள்ள நியாயவிலைக்கடைகளுக்கு சொந்த கட்டிடம் கட்டும் பணிகள் நடைபெற்று வருகிறது.

திண்டுக்கல் மாவட்டத்தில் மக்களுடன் முதல்வர் சிறப்பு  முகாம்கள் 306 கிராமப்புற பஞ்சாயத்து பகுதிகளில் 11.07.2024 முதல் 23.08.2024  வரை 23 நாட்கள்  68 முகாம்கள் காலை 10.00 மணி முதல் பிற்பகல் 3.00 மணி வரை  நடைபெறவுள்ளது. அன்றாடம் பொதுமக்கள் அணுகும் வருவாய்த்துறை, ஊரக வளர்ச்சித்துறை, காவல்துறை, மின்சாரத்துறை, வீட்டு வசதி வாரியத்துறை, மருத்துவத்துறை, மாவட்ட தொழில் மையம், பால்வளத்துறை, மாற்றுத்திறனாளிகள் நலத்துறை, சமூக நலத்துறை, ஆதிதிராவிடர் மற்றும் பிற்படுத்தப்பட்டோர் நலத்துறை, கூட்டுறவுத்துறை, தாட்கோ, வேலைவாய்ப்புத்துறை, வேளாண்மைத்துறை, மீன்வளத்துறை, கால்நடை பராமரிப்புத்துறை, தொழிலாளர் நலத்துறை, பொது மேலாளர் (முன்னோடி வங்கி), மற்றும் மகளிர் திட்டம் ஆகிய 22 துறைகள் தொடர்புடைய கோரிக்கை மனுக்கள் இச்சிறப்பு முகாம்களில் பெறப்பட உள்ளது.

இவ்வாறு பெறப்படும் அனைத்து மனுக்களும் சம்மந்தப்பட்ட துறையினரால் பரிசீலனை செய்யப்பட்டு 30 தினங்களுக்குள் தகுதியின் அடிப்படையில் தீர்வு வழங்கப்படும். அரசின் திட்டங்கள் கடைகோடி மக்களுக்கும் சென்று சேரும் வகையில், மக்களுக்காகவே இந்த அரசு என்ற வகையில் செயல்பட்டு, இந்தியாவிலேயே எந்த மாநிலத்திலும் செயல்படுத்தப்படாத திட்டங்களை செயல்படுத்தி, பொற்கால ஆட்சி நடத்தி வருகிறார்” என்று கூறினார்.